Mataio 4
4
Tiapolo na Iesu ekalatovoato
Mareko 1:12-13; Luka 4:1-13
1Voia mulinai Veaga Palaguna na Iesu tanoleanai evaiagoato, Tiapolo na pene kalatovoa ulanana. 2Toma e pogi gagala vativati (40) aorai ati eganiganito, evokato; gaurai ia evito-rakavaato. 3Ne Vekalatovo Talimana Tiapolo ia genai evogomaito, evaikilaato, netiwato, “Pene goi Palagu Natuna genai, evatu ono vaikilara, pia gauganigani.” 4A Iesu na evega-geleato, netiwato, “Veaga Pukana aonai evetaina ekilana, ‘Taunilimalima ati gauganigani namo pia maguli. Na Palagu gena kila egapi-ragerana e ekwalanarana talimana maguli pene vaia.’”
5Tiapolo na Ierusalema, siti maveaganai, evaiagoato, Rupu Veaga kukuna pogepogenai evega-rugakauato. 6Maevaikilaato, “Pene goi Palagu Natuna, neanana ono puri-rigo, kwalana Veaga Pukana aonai evetaina ekilana,
‘Palagu na gena aneru pene vega-nagira,
pia gopemu, pia gapi-itimu,
irauna gagemu vatu ai oputu-kauana.’”
7Iesu na maevega-geleato, netiwato, “Veaga Pukana aonai maki ekilana, ‘Velekou goi gemu Palagu ragai pono kalatovoa.’”
8Eia mulinai Tiapolo na Iesu evairageato golo kamuna e mogana ta kukunai, tanopara basileiara maparara maralema ralemara e matiavura maki evega-gitaato, 9netiwato, “Pene au wailaku ai pono tiu-tali e au pono aliruputali-veniku genai egaura maparara au na pana venimu.” 10Na Iesu na evaikilaato, netiwato, “Satani, au gekuna ono laka-paka. Kwalana Veaga Pukana aonai ekilana, ‘Velekou goi gemu Palagu pono aliruputali-venia, iamo geregana vetugunagina pono kalaa.’”
11Ne Tiapolo na eraokwaniato. Aneru reketa Iesu genai geagoto, genakagatuato.
Iesu gena inagulu etinaato Galileiai
Mareko 1:14-15; Luka 4:14-15
12Iesu ekamonagito, Ioane gevega-tipuraato, gaurana Galileia tanonai maewaikuleto. 13Na Nasareta vanugana maeraokwaniato, ati etaluto, eagoto, Kaperanaumai evetaluto. Kaperanauma Genesareta kovuna lagana vanugana ta, Sebulona e Naptali tanora aorai. 14Voanana Isaia, peroveta talimana, gena kila etaunataunato, netiwato,
15“Sebulona e Naptali tanorai gotaluna talimami o,
Galileia kovuna pipinai e Ioridana waina vokavanai,
ati Iuda talimami, Palagu ati ripami talimami,
gemi Galileia voa, iokamonagia.
16Mukunai getaluwai talimara
emaeka kamuna warau gegitaana.
E voo raira mukuna kaikolo tanonai getaluwai talimara
atarai maeka warau pema matagai.”
17Volaganinai vou Iesu matotauna valina evopatagi-matagaiato, netiwato, “Gemi rakava aora na iovetugamagiwai, e iolaka-waikule Palagu genai, kwalana Kupa Basileia pekwara, (Palagu gena vegitatago tiavuna evega-rugaana ea).”
Iesu na talima vativati (4) ekearato, ia mulinai pia laka
Mareko 1:16-20; Luka 5:1-11
18Iesu Galileia kovuna kone taitarina na elakato, eagowai aonai, tau walakako ruala, Simona, arana ta Petero, matarina Anduru goti egitarato, geria leke kovu ai gepiarawai, kwalana ira taura ruala vetavu talimara. 19Ne Iesu na evaikilarato, netiwato, “Muliku ai iomai-laka, pe au na gomi taunilimalima vetavura pana vega-ripami.” 20Ne veganamo geria leke geraokwanirato, Iesu mulinai gelakakauto.
21Voanana gelakato, geagowai aonai, Iesu na tau walakako ruala maegitarato, Teimiti Tepetaio matarina Ioane goti; geria gati ai tamara Tepetaio ria geria leke veralera geaumerawai. Iesu na ekearato, 22veganamo geria gati e tamara geraokwanirato, Iesu mulinai gelakakauto.
Iesu evevega-ripato e viti talimara evega-namarato
Luka 6:17-19
23Iesu Galileia tanona maparanai elakavo-lakavowai, Iuda talimara geria rupu aorai evevega-ripawai, e Palagu gena Basileia, (gena vegitatago tiavuna evega-rugaana), valina namana evopatagiawai. E taunilimalima geria viti e viti irauirau maparara evega-namarato. 24Ia valina gepiaato, Siria tanona maparana eraka-lovaato, ne taunilimalima na geria viti talimara maparara ia genai geago-agirato: Viti irauirau, palagu rakavara na geporogirato talimara, uve na evagiana vitina, taunipara gepilupiluna, e tauniparara kavatara gekwaregato talimara, Iesu na maparara evega-namarato. 25Taunilimalima gutuma gutuma ia mulinai gelakato, Galileia na, Vanuga Gagalana (10) na, Ierusalema na, Iudea na, e Ioridana waina vokavana na maki ia gekwaruato.
Поточний вибір:
Mataio 4: khz
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2004, Wycliffe Bible Translators, Inc. All rights reserved.