LIKI 24
24
Yeesu hare wəra dədərgə adordə meŋa
(Mat. 28.1-9; Mar. 16.1-8)
1Bəbəəgaŋ dər Dəmasiŋa, kəram kooroŋ cəərə teɗker də son bə siisi pisi də agumgum duru bə minti yə a ɗəmpunuŋ. 2Bə minti yə ɗeŋ a tuukiŋ, yə fəlaŋ pərki bə ku teɗker wəra bə laktə-lakte agəjaŋa. 3Yə vaŋ giidə, yə fəlaŋ titi də Barkaŋ Yeesu ada ba. 4Yə lenteŋ wəra gud kel gə minti jəŋ, ɗe a goleŋa kaa vəɗaŋ diri gil-gil ɓasi də dəməəmə də welɗe pələk-pələka siri. 5Kəya yə cokoŋ ciiri adawra kas walka, kaa té ɓasiŋ wəətənəy minti: «Aŋ golde hulum bə dədərgəŋ adəwaldə kaa kə mee-meŋa səm mo? 6Wə paapa kəna ba, wə haraŋ ne wəra dədərgə. Aŋ ɗəkə kel gə minti wə a waatənaŋ dəŋ bə minti wə a kəm Galile daŋ 7minti: ‹Doŋ kir minti yə ayə *Kormə Hulúm la wəra kasi kaa kə bayməlaŋa, yə ɓəlu la wəra a kəbaŋ gə largaŋa daana wə harə la wəra dədərgə a hi bə soopeŋa.›»
8Kəya ciiri ɗəkəŋ kel gə minti Yeesu a wəətənəy diŋ. 9Bə minti yə haraŋ da minti gole teɗker, yə bəŋ a tope bəlam də kel teŋ wəra keɗe a *kaa gə guudu hor ciiri məna'iŋ, daana a kaayaŋ teŋ keɗe gəm. 10Kəram teŋ haa anə Mari də Magdalaŋ, də Jan daana Mari nər Zaki. Də kəram kaayaŋ gə minti yə a jəŋ də kumsiŋ, yə keɗe yə topoŋ bəlam də kel teŋ a *kaa kə vaa-veŋ. 11Səma kaa kə vaa-veŋ a ɗəkəŋ neeteŋ haa minti yə waate a té haa ku lente, yə doŋ kel neeteŋ ba. 12Də teŋ keɗe Piyer kooroŋ də tara cəərə teɗker, wə goɓoŋ bə gola giidə, wə asaŋ ladəraŋ máŋ laki təwa. Kəya wə haraŋ aker da, bə ŋələ-ŋili ba anə caw gud kel gə minti jəŋ.
A kəkəy bə Emayusiŋa
13Dər hi tó bə məna'iŋa, *kaa gə gud Yeesu ɓasi kooroŋ giidə wəlasi də minti yə manta Emayusiŋ. Wəlasi taŋ wəra sar Zeruzalema kas tooto ɗəwa. 14Yə bə keɗpe zugi cəərə kel gə minti a jəŋ keɗe. 15Anaaŋa, bə minti yə bə keɗpe lam daana bə ce awəyaŋ, Yeesu də kusru təpaŋ guudi bə ɗe diiri a kəkəya. 16Yə əsnu caw, səma karman həənəy kuy wəra bay əsu minti kəna mindi moŋ.
17Yeesu ləənəy kuy minti: «Aŋ ce awəy cəərə maa toŋa a kəkəya bədoona mo?» Kəya yə əsəŋ laki kas də laawe. 18Hulum məna guudi, səmu minti Kelewpasi, hərnu kel minti: «Gəɗaŋ Zeruzalema haa tam məna bay iski kel gə minti jəŋ akaceŋa kənaŋ mo?» 19Yeesu wəətənəy minti: «Kel maa jəŋ mo?» Yə hərnu kel minti: «Kel gə minti jəŋ sar Yeesu bə Nazaretiŋaŋ. Wə *hulum bə jogte ku mini kə Pepeŋ, wə də səɓaki a joŋreŋa daana a kel kə waateŋa tiinə Pepeŋa, tiinə kaŋa keɗe gəm. 20Kəkamna kə *kaa kə keere Pepeŋ də kaa kəmtəŋ náŋ əynu ku meŋa daana yə ɓəlnu wəra a kəbaŋ gə largaŋa. 21Ɗiki də are a bə malə-mele minti wə haa hulum bə minti a sə a ɓiti kaanə *Israyel wəraŋ. Anaaŋa hiti dayna soope bə minti kel teŋ jəŋ. 22Sərdə kəram naareŋ ŋələŋ are. Yə a kooroŋ siswiɗiŋ cəərə teɗker na, 23səma yə fəlaŋ titi du ada ba. Yə haraŋ da a tope bəlam də kel a are minti *kaa kə digi kə Pepeŋ vəɗaŋ dər té, yə waataŋ té minti wə dədərgə. 24Sərdə are kooroŋ cəərə teɗker, yə fəlaŋ kel teŋ damdi kəram a wəətənəy ana, səma tó ha'aŋ, yə əsnu də diri ba.»
25Kəya Yeesu wəətənəy minti: «Aŋ kaa gə minti cəərəŋ paapa! Aŋ də liŋ-liŋ bə de gud kel gə minti kaa kə jogte ku mini kə Pepeŋ a wəətənəy! 26Doŋ kir minti *Hulum bə minti Pepeŋ ŋəmnu lasə la bədoona, adoro wə kele yaŋ a məyan nuutuŋa.» 27Kəya wə topoŋ bəlam də kel gə minti a jəŋ gə jeerə-jeere cuuruŋ wəra keɗe, wə məlaŋ guudu də kefter kə *Moyisiŋ, də kefter kə kaa kə jogte ku mini kə Pep gə minti yə a jiiriniy wəraŋ keɗe.
28Bə minti yə tuukuŋ maŋ sar kuli bə minti yə ɗe adaŋ, Yeesu jəŋ damdi tó raawe ajewa ana. 29Kəya yə dignu, yə wəətunu minti: «Əsə la sar are kəna, gud bə minti cəwaŋ dəraŋ wəra, ko bə duugŋ wəra maŋ.» Kəya yə vaŋ aləwa, yə əsəŋ də kumsi.
30Bə minti wə əsəŋ bə hame diiriŋ, wə haŋ mappaŋ, wə jəŋ suuse a Pepeŋ cəərə, kəya wə ɗoklona dərə, wə əynəy di. 31Gud teŋa diri bəŋəŋ wəra, kəya yə əsnu wəra pəɗaki, səma wə lenteŋ wəra diri a ko toŋa ada cin faɗi. 32Kəya yə əsəŋ bə waate kumsi minti: «Bə minti wə bə waate kela a áŋ ha'aŋ daana bə ke gud jeereŋa wəra a áŋ a kəkəy daŋ, tarmə áŋ do'oŋ gal akera bə cəwa ana bə mo?»
33Kəya yə pətəŋ apəya cəlam faɗi, yə haraŋ Zeruzalem, yə ɗeŋ a fele kaa gə gud Yeesu hor ciiri məna'iŋ gə tapə-tepe ciiri də kaa kaayaŋ. 34Yə əsəŋ bə waate kaayaŋ ɓasi gə tulə-tuliŋa minti: «Barkaŋ haraŋ ne wəra dədərgə gəəzi, wə vəɗaŋ dər Simoŋ!» 35Kəya, kaa ɓasiŋ əsəŋ bə ke gud kel neete gə minti yə a wəətənəy a kəkəyaŋ, daana gə minti yə asaŋ Yeesu naanaanə mo a ko bə minti wə ɗokloŋ dər mappaŋ.
Yeesu veɗe kusru dər kaa gə guuduŋa
36Bə minti yə kəm bə waate kel teŋaŋ, Yeesu də kusru pəŋ duru aduubə di gil faɗi. Wə wəətənəy minti: «Kəkaɓiŋ jəə la dəərəŋ!» 37Kəya kusri humnuy tukuk-kuk, walka jiiniy ablaw. Yə a ɗəkəŋ neeteŋ haa minti té asaŋ tiirə karman. 38Səma Yeesu wəətənəy minti: «Ku tarməyaŋ jəmaŋ wəra səm mo? Aŋ də awəy ku tarməyaŋa bədoona səm mo? 39Aŋ golon kaasən la də kamparən. Haa kəna ten gəəzə-gəəzi! Aŋ laaman kusrən la, aŋ golə la, gud bə minti tiiruŋ paapa də kusuki daana kəskəŋ damdi aŋ asnan gilaŋ ana ba.» 40Kəya wə gəənəy diri cəərə tarwa də kəəsuŋa daana də kəmpuruŋa. 41Giidi jəŋ waale ablaw! Də teŋ keɗeŋ, yə ɗempa a de kel teŋ kəm bə pa. Gud bə minti kel teŋ ŋilniy, Yeesu ləənəy kuy minti: «Karman bə hame yaŋ kaasəŋa kəna mo?» 42Kəya yə əynu aska də hogə-hoge. 43Wə haana, wə hamna də diri.
44Kəya wə wəətənəy pa minti: «Kel gə minti wəra gə jeerə-jeereŋ cəərəna keɗe giidə kefter bə *ku gili kə *Moyisiŋaŋ, kə *kaa kə jogte ku mini kə Pepeŋaŋ, daana giidə Gudulaŋ, kir de kuy wəra keɗe. Haa kel gə minti ten a bə waataŋ dəŋa minti ten a jəŋ kəm səraŋa caw.» 45Kəya wə əynəy ase bə minti yə əskə gud jeere ke Pepeŋ la. 46Wə wəətənəy minti: «Kel teŋ damdi gə minti gə jeerə-jeereŋ ana: Kristuŋ kir lese daana kir hare wəra dədərgə adordə meŋa a hi bə soopeŋa. 47Yə mele guudi yaŋ bə waate kela Zeruzalema də səmu minti kaŋ kole kirki la a baymele neeteŋ daana yə falə vəəgi bə giiduŋ la guudu. Yə waate kel teŋ yaŋ wəra a kaŋ giidə seŋka daalaŋ-daalaŋa keɗe. 48Aŋ kəmnə də kəkəy də kel teŋ. 49Ten ge karman bə minti Barən a waataŋ minti tó ayaŋ dəŋ yaŋ da a nəənəŋ. Nəətiŋ, aŋ əsə la giidə vila hãã bə minti səɓaki də apəyaŋ bəə la kəm cəərəŋa.»
Yeesu koore apəya
50Kəya Yeesu kooroŋ warna diiri sar Betani na maŋ. A ko toŋa wə humuŋ kəəsu apəya, wə gəənəy pisiŋ ciiri. 51Bə minti wə bə gay pisiŋa ciiriŋ, Pepeŋ həənu warna apəy na. 52Neeteŋ, bə minti yə kəənu awalna kaŋ, yə haraŋ máŋ Zeruzalem də waale feh-fehi. 53Yə ɗeeteŋ saksaki giidə *Kuli kə Pepeŋa bə jəw suuse.
موجودہ انتخاب:
LIKI 24: KERNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Texte de la Bible: Kera © Alliance Biblique du Tchad, 2004.