<div class="version vid1125 iso6393cwe" data-vid="1125" data-iso6393="cwe">
 <div class="book bkGEN">
 <div class="chapter ch9" data-usfm="GEN.9">
 <div class="label">9</div><div class="s">Mulungu kokwika lagano na Nuhu</div><div class="p"> 1Mulungu kamtemela mate Nuhu na wanage na kawalongela, &#8220;Yelekeni na mongezeke na muimemeze isi yose. 2Wanyama wose muna iisi na ndege woguluka na wang'onyo wotambala na somba wose muna ibahali wezawadumbani. Wawo wose mwizawatawala. 3Chila chinhu chili na ugima na chitambala molondeka kuchija. Fana vinimwing'hileni mibiki isuka, sambi nomwing'hani chila chinhu. 4Mbali sekemuje nyama ili na damu, kwaviya ugima wake waumo muna idamu. 5One munhu yoyose hebu mnyama yahamkomani, nizamtagusa. Na one munhu yahamkoma miyage, kezatagusigwa.</div><div class="q"> 6&#8220;Munhu yoyose yondayamkome miyage,</div><div class="q">iviya nayo kezakomigwa na munhu,</div><div class="q">Mana munhu kalumbigwa yalingile fana Mulungu mwenyewo.</div><div class="m"> 7Yelekeni na kwenela isi yose.&#8221;</div><div class="p"> 8Maabaho Mulungu kamulongela Nuhu na wanage, 9&#8220;Lelo nokwika lagano jangu na mweye na welesi wenu, 10na vilumbe vili na ugima vose vili na weye, ndege na wanyama wofugigwa na chila mnyama wa kumbago yoyalawile muna isafina hamwe na weye. 11Nodikanhamiza lagano jangu na mweye, vilumbe vose vili na ugima havizanangigwa na gombo, hebu gombo hadizalawilila kaidi kuinanga isi.&#8221; 12Mulungu kalonga, &#8220;Chino niicho chilaguso cha lagano dinikwika hagati ya niye na mweye na chila chilumbe chili na ugima chikala hamwe na mweye kwa welesi wose mbaka welesi ukwiza, 13nokwika pinde da Mulungu kuna yamawingu. Chizakuwa chilaguso cha lagano jangu na isi yose. 14Chila nahayatanda mawingu muna uulanga na pinde da Mulungu dizalawilila muna yamawingu, 15Nizadikumbuka lagano jangu na mweye na vilumbe vose vili na ugima. Mazi hayezagaluka kaidi kuwa gombo kuvinanga vilumbe vose vili na ugima. 16Baho pinde da Mulungu vondadiwoneke kuna yamawingu, nizadiwona na kudikumbuka lagano jangu na vilumbe vili na ugima mwiisi.&#8221; 17Mulungu kamulongela Nuhu, &#8220;Chino ni chilaguso cha lagano donitendile na vilumbe vose vili na ugima muna iisi.&#8221;</div><div class="s">Nuhu na Wanage</div><div class="p"> 18Wanage Nuhu wowalawile muna isafina wakala Shemu na Hamu na Yafesi. Hamu kakala niiyo tata wa Kanani. 19Kufosela wanhu wawo watatu wa Nuhu, wanhu wenela muiisi yose.</div><div class="p"> 20Nuhu kakala wa mwanduso kuhanda mgunda wa mizabibu. 21Kang'wa divai na kakoligwa, maabaho kagona ukulunge muna dihema jake. 22Hamu tata wa Kanani kauwona ukengele wa tati yake, kalawa kunze na kuwalongela ndugu zake waidi. 23Maabaho Shemu na Yafesi wasola walo na waigeleka mmayega yawo na wahita chisengelenyuma na kuugubika ukengele wa tati yawo. Walola mumgwazo na hawauwonile bule ukengele wa tati yawo. 24Nuhu upele viukunguzuke kavimanya viyatendiligwe na mwanage imdodo, 25kalonga,</div><div class="q">&#8220;Nayaduwiligwe Kanani.</div><div class="q">Kezakuwa mtumwa kwa ndugu zake.&#8221;</div><div class="q"> 26Iviya kalonga, &#8220;Yatunhizigwe Mndewa Mulungu, Mulungu wa Shemu.</div><div class="q">Kanani yawe mtumwa wa Shemu.</div><div class="q"> 27Mulungu yamwing'he wana wengi Yafesi,</div><div class="q">yakale hamwe na Shemu</div><div class="q">na Kanani yawe mtumwa wake.&#8221;</div><div class="p"> 28Vidimalile gombo, Nuhu kakala miyaka magana matatu na malongo matano 29Nuhu kadanganika na miyaka magana kenda na malongo matano.</div>
 </div>
 </div>
</div>

Mulungu kamtemela mate Nuhu na wanage na kawalongela, “Yelekeni na mongezeke na muimemeze isi yose. Wanyama wose muna iisi na ndege woguluka na wang'onyo wotambala na somba wose muna ibahali wezawadumbani. Wawo wose mwizawatawala. Chila chinhu chili na ugima na chitambala molondeka kuchija. Fana vinimwing'hileni mibiki isuka, sambi nomwing'hani chila chinhu. Mbali sekemuje nyama ili na damu, kwaviya ugima wake waumo muna idamu. One munhu yoyose hebu mnyama yahamkomani, nizamtagusa. Na one munhu yahamkoma miyage, kezatagusigwa.
“Munhu yoyose yondayamkome miyage,
iviya nayo kezakomigwa na munhu,
Mana munhu kalumbigwa yalingile fana Mulungu mwenyewo.
Yelekeni na kwenela isi yose.”
Maabaho Mulungu kamulongela Nuhu na wanage, “Lelo nokwika lagano jangu na mweye na welesi wenu, na vilumbe vili na ugima vose vili na weye, ndege na wanyama wofugigwa na chila mnyama wa kumbago yoyalawile muna isafina hamwe na weye. Nodikanhamiza lagano jangu na mweye, vilumbe vose vili na ugima havizanangigwa na gombo, hebu gombo hadizalawilila kaidi kuinanga isi.” Mulungu kalonga, “Chino niicho chilaguso cha lagano dinikwika hagati ya niye na mweye na chila chilumbe chili na ugima chikala hamwe na mweye kwa welesi wose mbaka welesi ukwiza, nokwika pinde da Mulungu kuna yamawingu. Chizakuwa chilaguso cha lagano jangu na isi yose. Chila nahayatanda mawingu muna uulanga na pinde da Mulungu dizalawilila muna yamawingu, Nizadikumbuka lagano jangu na mweye na vilumbe vose vili na ugima. Mazi hayezagaluka kaidi kuwa gombo kuvinanga vilumbe vose vili na ugima. Baho pinde da Mulungu vondadiwoneke kuna yamawingu, nizadiwona na kudikumbuka lagano jangu na vilumbe vili na ugima mwiisi.” Mulungu kamulongela Nuhu, “Chino ni chilaguso cha lagano donitendile na vilumbe vose vili na ugima muna iisi.”

Wanage Nuhu wowalawile muna isafina wakala Shemu na Hamu na Yafesi. Hamu kakala niiyo tata wa Kanani. Kufosela wanhu wawo watatu wa Nuhu, wanhu wenela muiisi yose.
Nuhu kakala wa mwanduso kuhanda mgunda wa mizabibu. Kang'wa divai na kakoligwa, maabaho kagona ukulunge muna dihema jake. Hamu tata wa Kanani kauwona ukengele wa tati yake, kalawa kunze na kuwalongela ndugu zake waidi. Maabaho Shemu na Yafesi wasola walo na waigeleka mmayega yawo na wahita chisengelenyuma na kuugubika ukengele wa tati yawo. Walola mumgwazo na hawauwonile bule ukengele wa tati yawo. Nuhu upele viukunguzuke kavimanya viyatendiligwe na mwanage imdodo, kalonga,
“Nayaduwiligwe Kanani.
Kezakuwa mtumwa kwa ndugu zake.”
Iviya kalonga, “Yatunhizigwe Mndewa Mulungu, Mulungu wa Shemu.
Kanani yawe mtumwa wa Shemu.
Mulungu yamwing'he wana wengi Yafesi,
yakale hamwe na Shemu
na Kanani yawe mtumwa wake.”
Vidimalile gombo, Nuhu kakala miyaka magana matatu na malongo matano Nuhu kadanganika na miyaka magana kenda na malongo matano.

Nghe Mwanduso 9