If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

यीशु फसह रै त्यौहार थऊँ छिया दिन पैहलै बैतनिय्याह ग्राँ मन्ज आ जैड़ी लाजर थू, जैसियो यीशुऐ मरुरै थऊँ जीयाऊ थू। तैड़ी तियैं यीशु तांयें धाम बणाई; अतै मार्था तसेरी सेवा लगुरी थी, अतै लाजर भी तियां सबी सोगी धाम खाणा बैहुरा थू। तैहणै मरियमें अध्धा सेर किमती इत्र लेई करी यीशु रै पैरा मन्ज ड़ोळी करी मळु अतै अपणै बाळा सितै पैर पुन्जै; अतै तैस इत्र री मुसकी सितै पुरा घर खुश्‍बुदार भूच्ची गो।
पर तसेरै चेलै मन्ज यहूदा इस्करियोती नां रा अक्क चेला जैडा तैसिओ पकडाणै बाळा थू, बलणा लगा, “ऐह इत्र ता त्राई सो दीनार मन्ज बेचीकरी गरीबा जो कजो ना दिता?” तिनी ऐह गल ठेरैतांये ना बली की गरीबा री चिन्‍द थी, पर ठेरैतांये की सो चोर थू, अतै तैस बलै अक्क थैली भुन्दी थी अतै तैत मन्ज जैडा कुछ भी पान्दै थियै सो कड़ी लैन्दा थू।
यीशुऐ बल्लू, “ऐसा जो रैहणा देय्आ। ऐसै जैड़ा ऐह करू हा ऐह मेरै दफनाणै रै दिना री तैयारी पैहलै थऊँ ही करी हा। क्ओकि गरीब ता तूसु सोगी सदा रैहन्दै हिन, पर मुँ तूसु सोगी सदा ना रैहणा।”

जैहणै यहूदी मणु री भीड़ जो पता लगू कि यीशु बैतनिय्याह ग्राँ मन्ज हा। ता सो ना सिर्फ यीशु री वजह थऊँ तैड़ी आये, पर लाजर जो भी हेरना आये, जैसियो तिनी मरूरै थऊँ जिआऊरा थू ता प्रधान याजकै लाजर जो भी मारनै री योजना बणाई। क्ओकि तसेरी वजह थऊँ मतै सारै यहूदी मणु चली गै अतै यीशु पुर विस्वास करू।


दूये दिन मतै मणुऐ जैड़ै तैस त्यौहारा मन्ज छुरै थियै ऐह हुणु कि यीशु यरूशलेम मन्ज ईणा लगुरा। ठेरैतांये तियैं खजूर री डाळी लेई अतै तैस सोगी मुळन तांयें चली पै, अतै चिल्लाणा लगै,
“जय जयकार!
धन्य इस्त्राएल रा राजा,
जैडा प्रभु रै नां थऊँ इन्दा हा।”
जैहणै यीशु जो गदहै रा अक्क बच्चा मूलु; ता सो तैस पुर बैही गो, अतै यरूशलेम शहरा जो आ। अतै जिंआ पवित्रग्रन्थ मन्ज लिखुरी हा,
“हे सिय्योन री बेटी,
मत डर;
हेर, तेरा राजा गदहै रै बच्चै पुर
चड़ी करी चली आ हा।”
यीशु रै चेलै पैहलै ऐह गल्ल ना समझै थियै, पर जैहणै यीशु रै चमत्कार हेरै ता तियां जो याद आई कि जैड़ी गल्ला तसेरै बारै मन्ज लिखुरी थी अतै मणुऐ भी तैस सोगी ईना ही वर्ताव करूरा।
ता तैहै मणु री भिड़ै तसेरी गवाही दिती, जैड़ै तैस टैमैं तैस सोगी थियै जैहणै तिनी लाजर जो क्रब थऊँ हैदी करी मरूरै थऊँ जीयाऊ थू। ठेरी वजह थऊँ ही मणु तैस सोगी मुळना चली आये थियै क्ओकि तियैं ऐह हुणु थू कि तिनी ऐह चमत्कार करू हा। ता फरीसी अप्पू मन्ज कणैणा लगै, “सोचा असु थऊँ कुछ ना भूच्छु करदा। हेरा संसारा रै मतै मणु ऐस पिचो भूणा लगुरै।”

जैड़ै मणु तैस त्यौहारा मन्ज भजन करना छूरै थियै तियां मन्ज कुछ यूनानी मणु भी थियै। तियैं गलील रै बैतसैदा रै रैहणै बाळै फिलिप्पुस बलै ईच्ची करी तैस सोगी बिनती करी, “श्रीमान, अहै यीशु सोगी मुलणा चाहन्दै हिन।” फिलिप्पुसे ईच्ची करी अन्द्रियास सोगी बल्लू, ता अन्द्रियास अतै फिलिप्पुसे गिच्ची करी यीशु सोगी बल्लू,।
ता यीशुऐ तियां सोगी बल्लू, “सो टैमं चली आ की मणु रै पुत्रा री जय जयकार भोआ। अऊँ तूसु सोगी सच बलदा कि जैहणै तक कणका रा दाणा जमीना मन्ज पैई करी मरी ना गान्दा, सो अकेला रैहन्दा हा, पर जैहणै मरी गान्दा, ता मता फल लैईन्दा हा। जैडा अपणै प्राणा जो बडा प्यारा जाणदा, सो तैस खोई दिणै; अतै जैडा ऐस संसारा मन्ज अपणै प्राणा जो प्यारा ना जाणदा, तैस अनन्त जिन्दगी तांयें तठेरी रक्षा करनी हा। अगर कोई मेरी सेवा करा, ता मेरै पिचो चला, अतै जैड़ी अऊँ हा, तैड़ी मेरा दास भी भूणा। अगर कोई मेरी सेवा करा, ता पितै तसेरा आदर करना।

“अबै मेरा मन बड़ा परेशान हा। ठेरैतांये अबै अऊँ कै बल्लू? ‘हे पिता, मिन्जो ऐस टैमां थऊँ बचा?’ क्ओकि अऊँ ऐस संसारा मन्ज दुख सैहणै तांयें ही छूरा। हे पिता, अपणै नां री महिमा जो प्रकट कर।” तैहणै अम्बरा थऊँ ऐह आकाशवाणी भूई, “मैंई अपणी महिमा जो प्रकट करूआ, अतै होर भी करनी हा।” ता जैड़ै खडुरै मणु हुणु करदै थियै ता तियैं बल्लू कि बदळ गरूजू हा। होर बलणा लगै, “कोई स्वर्गदूत ऐस सोगी कणैऊ हा।”
ता यीशुऐ बल्लू, “ऐह बोल मेरै फायदै तांयें ना पर तून्दै फायदै तांयें ही हा। अबै ऐस संसार रा न्याय भूणा, अतै शैतान जो कड्ड़ी दिणा जैडा ऐस संसारा रा हाक्म हा; अतै अगर अऊँ धरती थऊँ उच्चै पुर चढाया गाणा, ता सबी जो अप्पू बलै खिंजणा हा।” ऐह बली करी तिनी ऐह दस्सु कि तैस किन्‍नी मौती मरना हा।
ऐह हुणी करी मणुऐ बल्लू, “अहै पवित्रग्रन्था री गल्ला हुणुरी हिन कि मसीह सदा रैहणा हा, फिरी तू कजो बलदा हा कि मणु रै पुत्रा जो ऊचै पुर चढ़ाया गाणा जरूरी हा? ऐह मणु रा पुत्र कुण हा?”
यीशुऐ तियां सितै बल्लू, “ज्योती अबै थोड़ी देरा तक तूसु सोगी हा। जैहणा तिकर ज्योती तूसु सोगी हा तैहणा तक चली रेय्आ, ईयां ना भोआ कि नैहरा ईच्ची करी तुसिओ घेरी लेय्आ; जैडा नैहरै मन्ज चलदा सो ना जाणदा कि करा चलूरा। जैहणै तक ज्योती तूसु सोगी हा, ज्योती पुर विस्वास रखा ताकि तुहै ज्योती री औलाद बणन।”
ऐह गल्ला करीके यीशु चली गो अतै तियां थऊँ लूकी रैऊ।

यीशुऐ मणु सामणै ऐतनै चमत्कार करै, तांभी तियैं तैस पुर विस्वास ना करू; ऐह ठेरैतांये भूआ ताकि यशायाह भविष्‍यवक्ता रा बचन पुरा भोआ जैडा तिनी बलुरा थू
“हे प्रभु, इन्दै सुसमाचार पुर कुणी विस्वास करू हा?
अतै प्रभु रा जोर कुणी हेरू हा?”
ठेरी वजह थऊँ सो विस्वास ना करी सकै, क्ओकि यशायाह ऐह भी बलुरा हा
“तिनी तंयारी हाख्री अंधी,
अतै मन कठोर करी दितुरा हा;
करखी ऐसा ना भोआ कि सो हाख्री सितै हेरन,
अतै मना सितै समझन,
अतै फिरन, अतै अऊँ तियां जो चंगा करूं।”
यशायाह ऐह गल्ला ठेरैतांये बली कि तिनी तसेरी भविष्‍य मन्ज भूणैबाळी महिमा हेरी, अतै तसेरै बारै मन्ज गल्ला करी। तांभी हाकमा मन्ज भी मतै तैस पुर विस्वास करू, पर फरीसी री वजह थऊँ सामणै ना मन्दै थियै, क्ओकि सो सोचदै थियै कि ऐसा ना भोआ कि तियां जो यहूदी रै सभागार थऊँ कड्ड़ी दीन। क्ओकि मणु री तरफा थऊँ तारीफ तियां जो प्रमात्मैं री तारीफ थऊँ ज्यादा खरी लगदी थी।

यीशुऐ जोरा सितै बल्लू, “जैडा मिन्जो पुर विस्वास करदा, सो मिन्जो पुर ना मगर मेरै भैजणै बाळै पुर विस्वास करदा हा। अतै जैडा मिन्जो हेरदा, सो मेरै भैजणै बाळै जो हेरदा। अऊँ संसारा री ज्योती बणी करी छूरा, ताकि जैडा कोई मिन्जो पुर विस्वास करा सो नैहरै मन्ज ना रेय्आ।”
“अगर कोई मेरी गल्ला हुणी करी ना मना, ता अऊँ तैसिओ दोषी ना ठहरान्दा; क्ओकि अऊँ संसारा रै मणुओ दोषी ठहराणा ना छूरा, पर ईयां जो बचाणै तांयें छूरा हा। जैडा मिन्जो तूछ जाणदा अतै मेरी गल्ला ग्रहण ना करदा तैसिओ दोषी ठहराणै बाळा ता अक्क ही हा; मतलब जैडा बचन मैंई बल्लू हा, तैस ही न्याय रै दिना मन्ज तैसिओ दोषी ठहराणा। क्ओकि मैंई अपणी तरफा थऊँ गल्ला ना करी, पर पिता जिनी मिन्जो भैजुरा तिनी ही मिन्जो हूक्म दितुरा हा कि अऊँ कै बल्लू अतै कै कै कणैऊ? अतै अऊँ जाणदा कि तसेरा हूक्म मनणै थऊँ अनन्त जिन्दगी हा। ठेरैतांये अऊँ जैडा कुछ बलदा, सो जैडा पितै मिन्जो सोगी कणैऊ तियां ही बलदा हा।”

Nghe यूहन्‍ना 12