Génesis 2
2
1E Dupade chimate cuchade jnese nanique, jé iji gaté, jnumi ore. 2Uje e chise dirode uje e gare iji ti enga Dupade e cha pésu cuchade uje e chimate gu. Enga e cho dajñare. 3Enga Dupade doi enga cho darúja dire garijitia enga chojninga: "A dire puyai tu ua jne. Chamáñaje e yimate yipesudode cucha ponáyo gu enga yo yujñare iji dire garijitia udé." 4Purusarane udojo júdi tu cuchade iji taningapísi uje Dupade pésu cuchade iji gaté, jnumi ore jnese nanique.
Pangarádejnai Dupade pésu dajutícabia ome dapesudi jnani
5Uje Dupade quene pésu cuchade iji gaté, jnumi ore nanique enga cáma cucha pacatique cuse nanique iji jnumi udé. Que ugarataque sué iji jnumi nanique. Chamáñaje Dupade cáma chiroque guéode aja jnumi nanique gu. Enga cáma ayorérique dépoji rĩ ujetiga doi enga chutã́riji jnumi nanique. 6Íjnoque guei iji taningapísi mu mararata jnumi bisideque nanique enga cuchade quérã gu mararataringuei uté nanique iji erámi jnese. 7Jé u nanique uje Pangarádejnai Dupade chisa nanique dachabei enga chipocásu dachabei nanique enga pésu ayorei iji nanique. Enga pésu jnani ujunane nanique enga na dajñari aja ujunane ajei enga jé u uje ayoré ueca uté nanique iji taningapísi uje pésu nanique.
8Udojo quigade enga Pangarádejnai Dupade pésu dajutícabia ome dapesudi jnani. Enga pésu dajutícabia iji guedé garani dosadi, enga puniri tuté i tu Edén nanique. Enga jno dapesudi jnani údi aja dajutícabia nanique ujetiga cho daniri iji uté. 9Enga Dupade pésu dejnai enga poridie jiéjna iji enga ueradéjna adie iji uté nanique ujetiga jnani bajai tagu adie udire nanique. Iji guejnai tuté nanique enga chicha pore gáredie aja dejnai gatócoro. Enga pore uña ujetiga gosi tagu adie enga pucuecaringué eyúgojmai déji gosi. Jé basa ga uña déji to ujetiga gosi tagu enga chiraja cucha gajnaréngone, cucha arégode ore iji ñane.
10Enga tié tṍraji sibíjnai iji puniri Edén nanique enga chayója jutícabia nanique enga jutícabia ueradéjna jnumi tiji nanique uje yodi chayója. Enga tié tuaté chajuque re nanique enga jmainie gagájni nanique enga chicáji erámone nanique. 11Tiedie udire uña i tu Pisón nanique enga tié tuaté chajni, chajni nanique iji puniri uje i u Havíla. Enga jiépisi cucaranéringui iji puniri uté nanique uje cucaranenie udire ueradépisi enga nanganata enga i tu óro.
12Enga órodie udire uñáringui iji puniri uté jiépisi iji cucarané chojmara ajei gaté rĩ enga ueradépisi enga oredie jiépisi nanique. Enga cucaranéringui dépoji to rĩ enga utatapise uña enga i tu ónice, jé basa uña nanganatapise enga quĩrique gati enga i tu ópalo, enga jiépisi cucaranenie udire oredie nanique. 13Enga tiedie udire uñáraque i tu Gihón nanique enga tié tuaté jno nanique enga chipatigase re iji erámi nanique enga chajni, chajni nanique iji puniri uje i u Cus. 14Enga tiedie udire uñáraque dépoji nanique rĩ uje i tu Tígris. Enga tié tuaté jno enga chicáji puniri uje i u Asíria nanique enga déji guedé garani yui. Enga tiedie udire uña i tu Éufrates to nanique.
15Pangarádejnai Dupade que chicha jnani bajai taja dajutícabia bisideque nanique uje jutícabia uaté déji puniri Edén nanique. Mu pota jeta jnani bajai chajo jnumi tiji nanique enga chañuru guio. 16Enga Dupade catecã́ri jnani bajai enga chojninga:
"Yipota jetiga agu poridie adie iji yejnai tudé jnese. 17Mu gusu pore chojmara adie ujetiga ca agu jne. Chamáñaje uaté u gu ujetiga araja cucha gajnaréngone, cucha omone ore ome uaté jne."
Enga Dupade chojningápo rĩ:
"Jé ũrépise yu, jetiga agu ga a atoi jne."
18Udojo quigade enga Dupade chojninga:
"Gajnareque ujetiga yipesudi jnani gusúji erámi udé. Jecute a yipésu jõráraque jne ujetiga cháta cuchade aja."
19-20Enga jé u uje Dupade chipocásu jnumi enga pésu cuchiso ponáyone jnese, jé aja chugúpẽre ponáyone jnese to rĩ, enga jno udore údi aja dapesudi jnani bajac. Pota gu ujetiga ipesudi jnani bajaque pésu cuchade udore íode ome ore jnese nanique. Jecute jnani bajai pésu cuchiso parágode udojo íode to nanique, jé aja chugúperenie íode to nanique, jé aja cuchiso sijnángone íode to nanique rĩ. Enga jé jogate ore íode jé aja dirode udojo to. Uje chimate cuchade íode udore mu que chise dátajatóraque iji ore ujade. 21Jecute Pangarádejnai Dupade pésu jnani bajai uté nanique enga chisi ome móquedatéi ome nanique. Uje mopise jnani bajai enga Dupade chijnime orotabidi, mu pésapo aoi te rĩ iji dajnimi orotabite jogadi. 22Enga Pangarádejnai Dupade pésu chequé iji dajnimi uté orotabite nanique. Enga chiringare jnani uté nanique enga chisi ome derané chequé ome nanique. 23Enga jnani bajai niji enga chajire chequé enga chojninga:
"¡Chõ! Uaté, yocadode jé chopise ñane, ga jé cho yocajnoquéode to rĩ. Pijniminguíji yorotabidi gu. Jecute a yĩ́care chequé taja jne."
24Jecute ujetiga jnani pota chisa dacotéraque enga jé noñome daté, ore iji ta, enga gusu acotéraque ore ome ñane jeta ore nóna ñane jne enga ore cãra dajogadode ome ore dayode, ore datedie ore jne. E ore gajneque ñane ga cho jetiga chojmára óriji jnumi.
25Iji taningai nanique enga jnani bajai, chequé bajé choquíbio ore nanique, mu íjnoque pajegátigai iji ore nanique.
Đang chọn:
Génesis 2: Ayore
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2021 Ethnos360