Jɛ́nɛ́sì 13
13
Éébànà kè Ɖáà mú-ge-ge
1Ti ɓɛ́ Éébànà kè ɔ gmààɔ̀ kè Ɖáà kè waà kɔ̃̀ɔ̀-ɖɛ̀ séín ɓěɔ̀ sɔ̀ ma Íjè-ɓòɖòɔ̀ kɔ̃ɛɛ, wa mu ma ɖé Nɛ́gà-ɓòɖòɔ̀ kɔ̃. 2Ɓó tia ɓaɖaa, púɛɛ, Éébànà ɖǎ ma bã mìɔ ɖé nyúà-ɖɛ̀ kè séɓàɖà kè góò ɓáún-ɓáún mú. 3Ké ti ɓɛ́ ɔ sɔ̀ ɖé Nɛ́gà-ɓòɖòɔ̀ kɔ̃ɛɛ, ɔ mu ma tee, ké ɔ nyini ma ɖé Bɛ́fèò-hwɔ̀ɖɔ̀ɔ̀ mú. Ké ɔ zi, ké ɔ mu ma ɖé pá kɔ̃̀ mú ɓɛ́ ɔ nyànàìn ma kà ɔ jàɖàìn-gbò ɓěɔ̀ dyi kĩ́ín ɓó Bɛ́fèò-hwɔ̀ɖɔ̀ɔ̀ kè Éà-hwɔ̀ɖɔ̀ɔ̀ pṹa kɛ. 4Ɔ mɔ̀ dɛ̀ ɓɛ́ ɔ po ma kà sáa-kɔ̃-zàìn-gbààɔ̀ kĩ́ín nyɛ. Ké ɓóɛ̀ ɔ ɓièìn ma Bounɓoɔ̀ ɖe.
5Ɓó tia ɓaɖaa, púɛɛ, Ɖáà ɓɛ́ ɔ kè Éébànà naìn ma kà múɛɛ mɔ̀ùn ɓéɖé ma nyɔǔn-dyù ɓáún-ɓáún kè ɓáɖáá kè wiɖi kè ɓìɖǐ ɓáún-ɓáún ɖekè. 6Kɛɛ ɓóɖóɔ̀ dɛ̀ wa cĩ́ ma kà kɛɛ se ma pá ɓéɖé ɓɛ́ wa sɔ̃́ɔ̀ ké ma dà dyúáɖò cĩ́, sepóɛɖé waà kɔ̃̀ɔ̀-ɖɛ̀ ɓěɔ̀ ɓúá ma kpéín mìɔ. Ɔ jèɛɛ, wa se ma dà dyúáɖò cĩ́ɛ ɓɛ́ìn. 7Púɛɛ, zà-ɖɛín kpá ma ɓó Éébànà nììn nyúà-ɖɛ̀-dyí-gmɔ̀-nyɔ̀ ɓěɔ̀ kè Ɖáà nììn nyúà-ɖɛ̀-dyí-gmɔ̀-nyɔ̀ ɓěɔ̀ pṹa. Ɓó tia ɓaɖaa, Kénà-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ nì ma ɖé ɓóɖóɔ̀ mú cĩ́ɛń ɖekè.
8Hwɛ̀ ké Éébànà cɛ̃ɛ ma Ɖáà gbo, ké ɔ ɖá, “Ní ɓaà m̀ ní, zà-ɖɛín ɖò mɛ ɓɔ́ ɓó ḿ kè mɔ̀ pṹa nìɛ̀, ɔ kè ɓó níǐn nyúà-ɖɛ̀-dyí-gmɔ̀-nyɔ̀ ɓěɔ̀ kè nììn ɓěɔ̀ pṹa, sepóɛɖé à mɔ̀ wóɖó-wóɖó. 9Má, ɓóɖó gànáɔ̀ kɛà kɛ̀e? Ní ɓaà m̀ ní, à mɛ ge mú. Ɔ jǔ ké mɔ̀ùn dyi kunuaún kpáìn ní, mɔ́ún mu ɖiaún kpáìn. Mɔɔ ké mɔ̀ùn dyi ɖiaún kpáìn ní, mɔ́ún mu kunuaún kpáìn.”
10Hwɛ̀ ké Ɖáà gmɔìn ma dyi, ké ɔ dyé ma Jɔ́nì Bɔɔ-kpà hwɔà ɖé Zóà-hwɔ̀ɖɔ̀ɔ̀ gbo dyíɛ kà ɓɛ́ ɔ ɓéɖé ma ní ɓáún-ɓáún wɛ̃. Ɔ nì ma kà Bounɓoɔ̀ ɓáá-ɖɛ̀-gbǎɔ̀ kè Íjè-ɓòɖòɔ̀ nì ma kà kɛ. Kǎà ɓóɖóɔ̀ nì ma kĩ́ín ti ɓɛ́ Bounɓoɔ̀ séè ma kà Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ mú gbɔɔ̀ keɛ. 11Ké Ɖáà gã ma Jɔ́nì Bɔɔ-kpà gànáɔ̀. Ké wa sɔ̃́ɔ̀ ge ma mú. Ké ɔ mùìn ma ɖé Jɔ́nì Bɔɔ-kpà hwɔà ɖé dyóɖó-xwáɖáún-wóɖóìn-naínɔ̀ dyíɛɛ kɔ̃. 12Ké Éébànà cĩ́ ma ɖé Kénà-ɓòɖòɔ̀ kɔ̃, kɛɛ Ɖáà cĩ́ ma ɖé Jɔ́nì Bɔɔ-kpàɔ̀ kɔ̃, dɛ̀ ɓɛ́ ɓóɖóɔ̀ hwɔɖɔ ɓěɔ̀ nì ma kɛ. Ké ɔ nyànàìn ma ɔ jàɖàìn-gbò ɓěɔ̀ ɖé Sáɖɔ̀ùn-hwɔ̀ɖɔ̀ɔ̀ wáún dyi. 13Ɓó tia ɓaɖaa, Sáɖɔ̀ùn-nyɔ̀ ɓěɔ̀ nyu ma Bounɓoɔ̀ nàmàǔn ɓáún-ɓáún bũ̌, ké wa nyìnììn ma hwòɖǒ kɔ̃in mìɔ cá.
Éébànà jàɖàìn ɖé Hɛ́bɔ̀nɔ̀-hwɔ̀ɖɔ̀ɔ̀ mú
14Ti ɓɛ́ Éébànà kè Ɖáà ɖǎ ma mú geɛɛ, Bounɓoɔ̀ cɛ̃ɛ ma Éébànà gbo, ké ɔ ɖá, “Ɓó kàǔn wɛ̃ɛ, ɖú nì dyéɖéɔ̀ dyií, ɓɛ́ m̀ ké ɓóɖó m̀ nìà ɓó kɔ̃ɛɛ wáká séín kɔ̃ dyi gmɔìn, 15sepóɛɖé ḿ nì m̀ kè nì xwíníín-dyù ɓě ɓóɖó séín ɓɛ́ m̀ dyéà kɛɛ nyíɛń, ɓɛ́ ɔ ké sè-ná-sèɛ̀ ɖɛ jǔ ɓó ɓě bìì. 16Ní mu nì xwíníín-dyù ɓěɔ̀ nyuùn ɓɛ́ wa ké jĩ̀ kà púu-púu nìà ɓóɖó-kpàɔ̀ kɔ̃ɛɛ jĩ̀à kɛ. Nìí, ɔ jǔ ké nyɔ ɖò dyi púu-púu nìà ɓóɖó-kpàɔ̀ kɔ̃ɛɛ zɛɖɛɛ ɓɛ́ìn ní, nìí, wa mu nì xwíníín-dyù ɓěɔ̀ zɛɖɛɛ ɓɛ́ìn ɖekè. 17Sɔ̀ dyí, ɓɛ́ m̀ ké ɓóɖó gànáɔ̀ kɔ̃ dyi té, ɓɛ́ m̀ ké kà ɔ nyu ɓɛ́ɛ kɛɛ dyé, sepóɛɖé ḿ nìɛ̀ m̀ nyíɛń.” 18Hwɛ̀ ké Éébànà ɖú ma ɔ jàɖàìn-gbò ɓěɔ̀ dyí, ké ɔ mu ma ɖé Hɛ́bɔ̀nɔ̀-hwɔ̀ɖɔ̀ɔ̀ wĩín. Ké ɔ cĩ́ ma dɛ̀ ɓɛ́ Máwèɖè ɓɛ́ ɔ mɔ̀ ma Ámɔ̀-nyɔ̀ ɖò kɛɛ cu vɛ̀nɛ̀ ɓěɔ̀ nì ma kà kɛ. Ké ɔ po ma ɖé sáa-kɔ̃-zàìn-gbàà ɖò ɓó Bounɓoɔ̀ bìì.
Đang chọn:
Jɛ́nɛ́sì 13: ƁB02
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bassa Bible © Bible Society Liberia, 2002.