ማቲወስት ወንጌል 3
3
ፈወነ 3
ጣምቀተ ይዃንስት ስቭክትድ
(ማር. 1፡1-8፤ ሉቃ. 3፡1-18፤ ይዃ. 1፡19-28)
1-2ኣይንት ወራቲዝ ጣምቀተ ይዃንስ፦ «ምጝግስተሰማያት ኣልትርኵችነ ንስኻ ጥውጥን» የው ሲቭካ ይዅዳቱ በራኸይዝ ፃቭ ተሩ።#ማቲ. 4፡17፤ ማር. 1፡15። 3ነቭይ ይሳያስ፦
« ‹ኣደረት ጒደነድ ኣስልጥን!
ጥርግየድየንትም ጭቅ ሽጥን!›
ያ በራኸይስ ቓፀው እጅርዙ ድመ»
የው ዊግተውድ ጝማጥን የጝ። #እሳ. 40፡3።
4ይዃንስት ኣልቨድ ግምለዙ ፅቭቀዝ ተሲተው ዊኑ፤ ጝይዊልም ኣኽር ከምራ ዊኑ፤ ጝዅረድም ኣብጠዝመ በራኸዙ ሳረዝ ዊኑ።#2ነገ. 1፡8፤ ዘካ. 13፡4፤ ዘሊ. 11፡22። 5ኣይንድ ኽዝቭ እየሩሳልየምስ፣ ድፍን ይዅዳ ኻግሪስ፣ ዮርዳኖስት ጅልወይል ፅበው ኻግሪስቅ ይዃንስ ትጐ ገይሽታ ዊኑ። 6ጝኽጥያትድም ነዚታ ዮርዳኖስ ዊርቨይል ይዃንስት ናኒዝ ጣምቅሻ ዊኑ።
7ይዃንስም ንቕፀቍ ፈርሳንዝመ ሰዱቃንዝ ጣምቅሽጥጘ ጝጐ ተርጛንድ ቓላንድ፦ «እፈ ሲቭረዝ ቝር ክታትርነ! ተረው ቍጠይስ ኣምልጥትርነ ማጥን ክታት ኣው ማኽሩ?#ማቲ. 12፡34፤ 23፡33። 8ነስየ ንስኻ ጥውርነጘ ቓሊሰው ሰቭ ሰራጭጥን። 9ክታእዘኒዝ፦ ‹ይን ኣቭርኻምት ቝር የጝ› የነውዝ ኣምልጥንቅ ይርን ኻስቭትርነ፤ እደረ እንዛይ ቕርጚስ ኣቭርኻምስ ዅል ጒሰነው ቸለኵ የኵን። 10እንወ ዘፋኒዝ ስሪል ባፅ ኣስልሽኩ፤ ነስየ ቀሰው ፍረ ፍርዛው ዘፍድቅ ቀቭሽት ልየዝ ቃጥልሽጡ።#ይዃ. 8፡33። 11ያንስ ንስኻዝ ኣቓንስ ማጥን ክታት ኣቝዝ ጣምቀኵን፤ ይግረይል ተረውድ ግን ይጊስ ዲቈኵ፤ ያንም ጝፃብጣንድ እኳ ፃቅጨ ጥውጨቅም፤ ጘጝም ክታት መንፈስ ቅዱስዝመ ልየዝ ጣምቅጡ። 12ጝመሽንድየንት ጝናኒዝ ፃይኩ፤ ጝዋርነድየንትም ቐናዝ ዊር ሽጡ፤ ዚርወድየንት ጝቅፋነይል ድውጡ፤ ገለቨድየንት ግን ስታው ልየዝ ቃጥልጡ።»
እየሱስ ይዃንስት ናኒዝ ጣምቅሸጘ
(ማር. 1፡9-11፤ ሉቃ. 3፡21-22)
13ኣይንድ እየሱስ ይዃንስት ናኒዝ ጣምቅሽጠ ገሊለስ ዮርዳኖስ ትጐ ተሩ። 14ይዃንስ ግን፦ «እንስ ኣቓውም! ያን ክናኒዝ ጣምቅጨ ጥውሻመ ክት ይጐ ተትራ?» የው ኪልክልጠ ኪርሙ። 15እየሱስም፦ «በጭ ግድ እጅረር፤ ፅድቅድቅ እነሽን ፋፅምነ ጥውሸኵ» ዩ። ይዃንስም ቲስመም እየሱስት ጣምቁ። 16እየሱስም ጣምቅሽ ኣቚስ ፈጘ በውዝ ሲመይ ቢቱ፤ እደረት መንፈስድም እርግቨት ተክ ጊም እየሱስትል ጐያንድ ቓሉ። 17ኣይንድም፦ «እንወ! ያን ጝቍዝ ዲስ የው ይቀነው ይዅርድ ጘጝ የጝ» የው ድመ ሲመይስ ተሩ።#ዘፍ. 22፡2፤ መዝ. 2፡7፤ እሳ. 42፡1፤ ማቲ. 12፡18፤ 17፡5፤ ማር. 1፡11፤ ሉቃ. 9፡35።
Đang chọn:
ማቲወስት ወንጌል 3: ኽምጣኣኪ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập