मत्ती 2
2
बुद्धिमान लोका रा ईहंणा
1जेबा राजा हेरोदेस यहूदिया प्रदेशा में राज करा थी तेबा यीशु रा जन्म तेऊ प्रदेशा रे बैतलहम शहरा में होऊ, तेता बाद पुर्बा दिशा का कई बुद्धिमान लोका यरूशलेमा में इच्छी करे पूछते लागे। 2यहूदी रअ राजा जासका जन्म होऊ साहा कई साहा? किबेकी हामें पुर्बा में तेऊरअ तारअ हेरू होर तेऊबै नमस्ते करदे आउदे साहा। 3यहूदियों रअ राजा रे जन्मा रे बारे में शूणी करे हेरोदेस राजा होर तेऊ संघे सारा यरूशलेम डरू। 4होर राजा लोका रै सभे प्रधान याजक होर यहूदी शास्त्री कठे करी करे त्याह का पुछु, मसीह कई पैदा लोडी होऊ? 5त्याहे तेऊबे बोलू, मसीहा रा जन्म एउ यहूदिया प्रदेशा रे बैतलहम शहरा में हुणा, किवेकी भविष्यद्वक्ता मीका यह लिखू दा आसा :
6हे यहूदिया प्रदेशा रे बैतलहम शहरा रे लोको,
तमें कासु भी रीति में यहूदा रे अधिकारी का सभी का होछअ नांई आंधअ;
किबेकी ताह में का एक मनश एहण जो राजा बडनअ,
तेऊ इस्राएल देशा मे रहणे आले मेरे लोका री अगुबाही करनी।
7तेबा हेरोदेसे बुद्धिमान लोका चुपचारे शादी करे त्याका पुछु कि तारअ ठीक कासु वक्ते हेरू, 8होर तेऊ यह बोली करे त्याह बैतलहमा बे भेजी, नाहाँ, तेऊ बालका रै बारे मे ठीक-ठीक पता करा, अगर सह भेटलअ तेबा महा बे समाचार दे कि हाऊं भी इछी करे तेऊबै नमस्ते करू।
9त्याह राजा री गला शुणी करे नाठे, होर जोह तारअ त्याहे पुर्बा में हेरू, सह त्याका जेह-जेह चलू; होर ज़खे बालक थी, तेसा ज़ाघा पैंदे पूजी करे तारअ तखे रुकू। 10तेऊ तारे हेरी करे त्याह बहू खुश होई। 11त्याह तेऊ घरे पूजी करे बालक तेऊरी आमा मरियमा संघे हेरू, होर ऊटे पडी करे बालका बे नमस्ते करू, आपणी-आपणी झोल़ी खोली करे तेऊबै सुना होर लोबान, होर गन्धरसा री भेंट चढ़ाई। 12तेबा सुपने में यह चेताबनी पाई करे कि राजा हेरोदेसा सेटा बे भी नांई नाहे, त्याह राजा बे बिना खोजे दूजी बाता में आपणे देशा बे नाठे।
मिस्र देशा बे नाहंणा
13बुद्धिमान लोका नाहंणे बाद परमेश्वरा रे एकी दूते सुपने में यूसुफा बे हेरी करे तेऊबे बोलू, उठ, तेऊ बालका होर तेऊरी आमा नी करे मिस्र देशा बे नाहाँ, होर जेबरे तणी हाऊं ताहब नांई बोले, तेबरे तणी तखी रह, किबेकी हेरोदेस एउ बालका लोढ़अ लागदअ साहा कि तेऊ मारी सके। 14यूसुफ उठू होर तेसी राची बालक होर तेउरी आमा नी करे मिस्र देशा बे नाठअ। 15त्याहे राजा हेरोदेसा री मऊती तणी मिस्रा में रही एतकी तणी कि सह बचन जोह परमेश्वरे भविष्यद्वक्ता होशे रै साबे बोलू, पूरा हो: मांई आपणें शोहरू मिस्र देशा का शादू।
16जेबा हेरोदेसे यह हेरू, जोह कि बुद्धिमाने लोके तेऊ संघे धोखा करू, तेबा तेऊ बहू रोष आउआ, होर लोका भेजी करे बुद्धिमाना रै ठीक-ठीक खोजी दे वक्ता रै साबे बैतलहम होर तेऊरे नेड़ तेड री ज़ाघा रे सभे शोहरू जोह दुई साला रे या त्याका होछे, मारी पाई। 17यह तेबा होऊ की पवित्र शाश्त्रा में जोह बचन भविष्यद्वक्ता यिर्मयाह रे साबे बोलू, सह पूरा होऊ:
18रामाहा नगर में बेटड़ी रा हाला शूणु एक दुख भरी आवाज शुणी,
लेरना होर बडा बिलाप;
राहेल आपणे शोहरू री तणी लेरदी लागी दी थी ,
होर शांत हूँणा नांई चांहदी थी, किबेकि एबा त्याह मुए।
मिस्र देशा का बापस ईहंणा
19यूसुफ, मरियम होर बालक यीशु एबरे तणी मिस्र देशा में थी, तेउकी हेरोदेसा रे मरने रै बाद, प्रभु रे दूत मिस्रा में सुपने में रिहाई करे बोलू, 20उठ, बालक होर तेऊरी आमा नी करे इस्राएला देशा बे नाह, राजा हरोदेस होर तेउरे लोका मरी मुके जो बालका रै प्राण लउणा चाह्न्दा थी। 21सह उठू होर बालक होर तेऊरी आमा संघे नी करे मिस्र छाडी करे इस्राएला रे देशा वे नाठअ। 22पर जेबा यूसुफे यह शूणू की अरखिलाउस आपणे बापू हेरोदेसा री ज़ाघा यहूदिया में राज करदअ लागअद, तखे नाहंणे बे डरू। तेहुकी सुपने में परमेश्वरा का सुपने में चेताबनी पाई करे गलीला प्रदेशा बे नाठअ, 23होर नासरता ना रै नगरा मे बसु, कि सह बचन पूरा हो, ज़ो भविष्यद्वक्ताए यीशु रे बारे में खोजू थी की सह नासरता नगरा कअ हुणअ।
Đang chọn:
मत्ती 2: ISJNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.