MATYOO 26

Ɓɛ tɔkɛɛ Yeesus

(Mk. 14:1-2; Lk. 22:1-2; Zŋ. 11:45-53)

1Yɛ̀ɛ Yeesus à lègsìghà ɓìtòkì ɓiǹ ɓìcèm, nni à kpaaghà ɓɛ̀yilàg ɓii lɛ:

2Ɓì yii lɛ, Paskà à rɔ̀ɓi mɛ̀ru mɛɓɛɛ̀, ɓɛ ɓiì ki kàɓi Man à mum lɛ ɓɛɛ kpan nyi ɓi kɔrɔs aɗyòò.

3Nni ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ kilɔ̀ŋ ɓɛ taŋzɛ̀ngà ɓi ǹlɛmɓog wu ǹlàmì-ɓɛ̀pìrɛɛtìrɛ̀ ànɛ lɛ Kayif, 4ɓɛ teɗ ǹɗɛli lɛ ɓɛɛ ɓaǹ Yeesus ɓi ghèy, ɓɛɛ wey. 5Wɔ̀lɛ ɓɛ kakàlìghà lɛ: Kìɓan kiǹ kɛ̀ kɛɛ̀ kìlɛn ɓi nyìinyìm à tìcàɓ, di ɓum ɓɛ kilɔ̀ŋ ɓɛ ri ɓiì woògh bim ɓɛ ki kìyoòyòò.

Giɓ àdɛŋ à sùùrii Yeesus tìrààre ɓi ǹto a Bɛtanii

(Mk. 14:3-9; Zŋ. 12:1-8)

6Yɛ̀ɛ Yeesus à ɓaghà a Bɛtanii ɓi naa ì Simɔn ànɛ a ɓaghà kukwiy, 7giɓ adɛŋ à yùghà nyi a nyoo, rì ɓeŋ ànɛ a ɓaghà ǹsoɓɛn ɗi gɔ̀g ì ŋwèrim-ŋwèrim, ɓeŋ ànɛn a ɓaghà ǹɗònɛn ri ɓìsyeesyee ɓi tirààre ɓi ɓi ɓaghà ɓì kɛŋɛn; giɓ anɛ̀n à sùùrì Yeesus tìrààre tìn ɓi ǹto di a kaka à ɗiɗì. 8Yɛ̀ɛ ɓɛ̀yilàg ɓɛ ghɛngà kìɓan kiǹ, ki ɓeɓ ɓɔ, ɓɛ kpaa lɛ: Ki ghɛɓsii cɛ lɛ ɓɛɛ yoòyògsì ɓyom fɛlɛ? 9Ɓaa rì lɛ ɓɛ kaɓ tìrààre tìn dune ǹkɛŋɛn lɛɛ̀gwey, ɓɛ fa mɔ̀ɔ̀ni mɛ miì rì ɓɛ̀soghàsogha. 10Yɛ̀ɛ Yeesus à wokà fɔlɔɔ, nni à kpaaghà ɓɔ lɛ: Ɓi yeeyeèsì giɓ anɛ lɛ la? À kìi syeesyee à kìɓan ɓisu wɛ̀m 11lɛ ɓì rì rì ɓɛ̀soghàsogha ɓyààmɛ̀n ɓìcèm, kìɓan kifog mɛ̀ màa ɓa ɓi ri mìni cààmɛ̀n kìcèm. 12Yɛ̀ɛ àa sùùrii mɛ̀ tìrààre tìn ɓi nyoo, àa pegsɛɛ rìɓòm ɗi ɓɛ ri mɛ̀ ɓiì ɓòmi. 13Ǹkalii mìni ɓi saaɗ lɛ, jàŋ bimiɗ ìnɛ Syeesyee à Ɓɔlɛ ànɛ à kaakàlɛɛ gɛ ɓi ziinɛ ǹcèm, ɓɛ kpaakpaa gɛ kìɓan ki giɓ anɛ à kìi ki, ɓɛ yiìyìtàg nyi miì.

Zyudas à ɗiŋii dàŋ rì ɓɛ̀pìrɛɛtìrɛ̀ ɓɛgwey lɛ ɓɛɛ ɓaǹ Yeesus

(Mk. 14:10-11; Lk. 22:3-6)

14Fɔɔnnɛ Zyudas Iskariyot, kìbog ki ɓi ɓɛ̀yilàg ɓɛ Yeesus ǹtɛ̀ɗ rì ɓɛɓɛɛ̀, à kɛ̀ngà a ɓɛ̀pìrɛɛtìrɛ̀ ɓɛgwey 15à tɔg ɓɔ lɛ: Cɛ kɛɛ̀ki ɓì rì mɛ̀ ɓiì faà di ǹfaa mìni nyi? Nni ɓɛ̀roɓɛ̀n ɓɛ peeghà nyi mɔ̀ɔ̀ni tìraŋ̀ rìtin ɗì ǹtɛ̀ɗ. 16À tumɛ̀n ɓi cààmɛ̀n kiǹ, Zyudas à kaakààghà syeesyee à cààmɛ̀n ànɛ a fa ɓɔ Yeesus.

Yeesus a ɗii Paskà nɗaŋ ri ɓɛ̀yilàg ɓii

(Mk. 14:12-21; Lk. 22:7-14, 21-23; Zŋ. 13:21-30)

17Ŋwos a ǹtonto ànɛ ɓi mɛ̀ru mɛ ɓɛ nkìlaagh bìrɛs kɛ̀ɛ̀ nwìɗ miì, ɓɛ̀yilàg ɓɛ Yeesus ɓɛ yughà nyi kì tɔɔ̀gh lɛ: Fe nnɛ u kɔ̀nkɔn lɛ ti kɛǹ wɔ̀ kì pègsɛɛ ɓiɗilàg ɓi Paskà? 18Yeesus à ɓàg ɓɔ lɛ: Kɛ̀ɛna ɓi bàn yɛ̀ɛ tɛɛnɛ, ɓi kpaa nyi lɛ, ǹɗèsàg a kalag lɛ: Cààmɛ̀n kii ki ti jàŋbog, nni a lɔ̀ŋkɔɔ nnɛ nyii ɓiì ɗiì Paskà rì ɓɛ̀yilàg ɓii. 19Ɓɛ̀yilàg ɓɛ ki lɔŋ yɛ̀ɛ Yeesus à kpaaghà ɓɔ, ɓɛ ki pègsɛn ɓiɗilàg ɓi Paskà.

20Yɛ̀ɛ cɛŋkò ki kpagà, Yeesus à kɔ̀rì ɓi ɓìɗilàg rì ɓɛ̀yilàg ɓii ǹtɛ̀ɗ rì ɓɛɓɛɛ̀. 21Nni yɛ̀ɛ ɓɛ ɗiɗìghà ɓyom, nni Yeesus à kpaaghà lɛ: Ǹkalii mìni ɓi saaɗ lɛ, kìbog ki ɓi mìni ki ri mɛ̀ ɓiì kàɓi. 22Fɔɔnnɛ ɓɛ̀yilàg ɓɛ ɓɛ samgàkà lɛɛ̀gwey, mum ǹcèm à tɔg nyi lɛ: Kan, mɛ̀ nya gìn? 23Yeesus à ɓàg ɓɔ lɛ: Ŋwaànɛ tyàa pùùsɛɛ càg ɓɛɛ̀ nyi taasà bog yɛɛ ri mɛ̀ ɓiì kàɓi. 24Man à mum à ɓiì wiì lɔŋ yɛ̀ɛ ɓɛ kangà lɛ à ghɛ̀ɛ̀sɛɛ kìwiì, kìɓan kifog nyìighnyìg rì ŋwaànɛ à rì nyi ɓiì kàɓi! Ki ɓaghà kìrɔɔ ɓisuu ŋwaànɛ̀n lɛ kɛ̀ɛ yalɛn. 25Nni Zyudas ànɛ à ɓaghà ɓi kìtɔ̀kɔ̀ kiǹ, à tekà jɛ̀ɛ̀, à kpaa lɛ: Raɓì, mɛ̀ nya gìn? Yeesus à ɓàg nyi lɛ: Wàa kpaà.

Yeesus à faa ɓɛ̀yilàg ɓii ɓiɗilàg ɓi Bɛ̀ll

(Mk. 14:22-26; Lk. 22:15-20; 1 Kɔr. 11:23-25)

26Nni yɛ̀ɛ ɓɛ ɗiɗìghà, fɔɔnnɛ Yeesus à tekà bìrɛs, à fa Bɛ̀ll ɓìtògsɛ̀n, à ɓɛg min yɔ̀, à fa ɓɛ̀yilàg ɓii, à kpaa ɓɔ lɛ: Terina, ɓi ɗi, nyoo yɛ̀m yɛ̀ɛ lɛ. 27Nni à teetìghà ɓeŋ, à mɛ̀rɔ̀g à fa Bɛ̀ll ɓìtògsɛ̀n, à ceesi nyi rì ɓɛ̀yilàg ɓii, à kpaa ɓɔ lɛ: Nɔɔna ɓɛ̀sɛ̀ɛ̀ ɓɛ̀cèm 28ɓisuulɛ bwaɓ yɛm̀ yɛɛ ri, bwaɓ yi ɓi rìràrɛ̀n ɗi rì Bɛ̀ll, yi yi ri ɓiì kpaŋì ɓisuu ɓum lɛɛ̀gwey, ɓisuu ricenɛ̀n ɗi ɓiɓe. 29Nni mɛ̀ ǹkpaa mìni lɛ, à tumɛ̀n gɛɛ̀nɛ, màa nɔti ɓi mɛrɔ̀g mɛ viìnyɛ̀, à kpaŋ ŋwos anɛ tì nɔtii gɛ nyɔɔnyɔn à rìnɔ lɛ rì mɛ̀ rì mìni ɓi kìlɔ̀ŋ ki Seŋi wɛ̀m.

30Ɓɛ ɓaghà lɛ ɓɛ mɛ ghàɓ tyem ti ɓɛsam̀ fɔɔnnɛ ɓɛ ɓɔkà min ɓi dòn ì ɓɛ̀òlìvyee.

31Nni Yeesus à kpaaghà ɓɛ̀yilàg lɛ: Ɓi-ru wu gɛɛ̀nɛ, ǹɗì ɓiì ɓaà fìɓàg ɓisu win ɓɛsɛ̀ɛ̀ ɓɛ̀cèm, lɛ ki ri kì kànɛn lɛ: Ǹɗì ɓiì wolì m̀ɓèŋì-jɔ̀ɔ̀, jɔ̀ɔ̀ yii yicèm yi saàtɛ̀n. 32Kìɓan kifog, ajɛ̀m ì rìghèmɓɛ̀n ɗyɛm̀ ǹɗì ɓiì loògh kì kɛ̀ɛ ri mìni a Galile. 33Nni Pyɛɛri à tekà jɛ̀ɛ̀, à kpaa nyi lɛ: Ǹsoò wàa rì fìɓàg ɓisuu ɓisi ɓɛsɛ̀ɛ̀ ɓɛ̀cèm, wàa ɓa ɓi fiɓàg ɓisu wɛ̀m. 34Yeesus à kpaa nyi lɛ: Ǹkalii wɔ̀ ɓi saaɗ lɛ, ɓi-ru wɔm̀ wu, ù rì mɛ̀ ɓiì roòzɛɛ gɛ̀n yiraa, di ǹlem à zag a ka rɔŋ ɓi. 35Pyɛɛri à pɛ̀ɛ̀zì nyi lɛ: Ǹsòò ki kpaŋi lɛ ǹwu ɓɛɛ wɔ̀ ǹɗaŋ, màa roòzɛn ɓi wɔ. Ɓɛ̀yilàg ɓɛmbog ɓɛ̀sɛ̀ɛ̀ ɓɛ̀cèm ɓɛ kpaaghà girig fɔlɔɔ.

Yeesus à ɓɔ̀ŋzaagh Bɛ̀ll a Gɛsemane

(Mk. 14:32-42; Lk. 22:39-46)

36Fɔɔnnɛ Yeesus à kɛ̀ngà rì ɓɛ̀yilàg ɓii ɓi jàŋ ɗii lɛ Gɛsemane, à kpaa ɓɔ lɛ: Kɔ̀riina fɛ, mɛ̀ ǹka kɛ̀ɛ kìɓɔ̀ŋzaagh fɛnii. 37Nni à tekà lɛ rì Pyɛɛri, rì kìɓɛ̀ɛ̀ ki ɓɔn ɓɛ Zeɓede, à tumɛ̀n rìwog ɗi ǹɗemi-kɛŋɛn, ɗì ìris. 38Fɔɔnnɛ à kpaaghà min ɓɔ lɛ: Ǹɗì rì ǹɗemi-kɛŋɛn wu wu ri lɛ wu wey mɛ̀, nni rɔ̀ɓina fɛ, ɓi kɔri cem nɗaŋ, ri mɛ̀. 39Nni à kɛ̀ɛ̀dìghà asu lɛsàg, à kpì ɓi zi guɓùg, à ɓɔ̀ŋzì lɛ: Tààta wɛ̀m i bee yàa rì lɛ ì ɓa, lɛ ɓeŋ ànɛ a raɓsɛn mɛ̀, nsoò fɔlɔɔ, kɔ̀ɔ kì rikɔ̀n ɗyɛm̀, lɔŋ rìkɔ̀n ɗyɔɔ ɗyɛɛ̀ɗi kìya. 40Nni à sugtighày a ɓɛ̀yilàg, à tanɛ̀n di ɓaa cuu tilò, fɔɔnnɛ à tɔkà Pyɛɛri lɛ: Ɓi yin yɛɛ lɔɔ lɛ ɓì cenɛ̀n lɛ ɓi kɔri cem ɗi mɛ̀ bimiɗ à hawò? 41Kɔ̀riina cem, ɓì ki ɓɔ̀ɔɓɔ̀ŋzì lɛ, kɛ̀ ɓi tanɛn ri mɛ̀fèèghrɛn; lɛ ǹghay wu mum wu ri rì ìtèɗ, kìɓan kifog, nyoo ì mɛ̀mùù ì rì kɛ̀ɛ̀ ìtèɗ. 42Ɓi gɛ̀n i kìɓɛ̀ɛ̀, à ràɓsɛ̀ngà tì ɓɛ̀yilàg, à ɓɔ̀ŋzàg lɛ: Tààta wɛ̀m, i ki ri lɔŋ lɛ ɓeŋ ànɛ àa pɛ̀sɛn ɓi di nnɔɔ ɓi nyi, rìkɔ̀n ɗyɔɔ ɗyɛɛ kilɛn. 43Yɛ̀ɛ à sugtìghày a ɓɛ̀yilàg à tanɛ̀n tì ɓɔ ɓi fìlo, lɛ fìlo fì ɓaghà ɓɔ ɓi mis. 44Nni à cààtìghà ɓɔ, à ràɓsɛ̀n tì, à ɓɔ̀ŋzì Bɛ̀ll ɓi gɛ̀n i kìraa, à ɓììtì lɔŋ ɓiɓan ɓi à lokà kì kpaa. 45Fɔɔnnɛ à sugtìghày a ɓɛ̀yilàg, à kpaa ɓɔ lɛ: Mìnii ri lɔŋ ɓi fìlo, ɓì fɔɔ̀fɔ̀ɔ̀sɛ̀n? Cààmɛ̀n ki lɛ, ɓɛɛ fa Man à mum rì ɓɛ̀kìì-kìɓe kɛɛ kpaŋi lɛ. 46Pɛ̀sɛɛna aɗyoo ti kɛǹ, lɛ ŋwaànɛ a kàkaɓ mɛ à tiì.

Ɓɛ ɓani Yeesus

(Mk. 14:43-50; Lk. 22:47-53; Zŋ. 18:3-12)

47Yeesus à kaka à kpaakpàà fɔlɔɔ, nni Zyudas ànɛ à ɓaghà kìbog ki ɓi ɓɛ̀yilàg ɓii ǹtɛ̀ɗ rì ɓɛɓɛɛ̀, à ghàskà kì kpaŋì. A ɓaghày rì coo kituu ki ɓum ki ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ romgày; ɓumɓɛ̀n ɓɛ yughày lɛ rì gàfàg, rì ɓìgeŋ. 48Ŋwaànɛ à kàɓkà nyi à faghà ɓɔ kìrèmzɛnà à kpaa ɓɔ lɛ: Ŋwaànɛ ɓì ɓiì ghɛɛ̀ di ǹlɔ̀ri, ɓì yi lɛ nnyɛɛ ri, ɓì ɓan. 49Fɔɔnnɛ Zyudas à ghàskà kì tyòŋdɛɛ Yeesus a nyoo, à kpaa nyi lɛ: Raɓì, ǹtògsii wɔ̀, à ki lɔ̀ɗ nyi. 50Yeesus à ɓàg nyi lɛ: Reŋkàŋ wɛ̀m! Kìya com ki wàa yùu kì kìi. Ɓumɓɛ̀n ɓɛ yuiy min, ɓɛ sɛn ɓi Yeesus, ɓɛ ɓan. 51Kìbog ki ɓi ɓumɓɛ ɓɛ ɓaghà rì Yeesus, ki nimɓɛ̀ngà, ki sɔŋìì gàfàg ɓi ɗyaŋ, ki kpɛɛ̀ ǹkìì-kìsay a ǹlàmì-ɓɛ̀pìrɛɛtìrɛ̀ àgwey, ìreè wu lɛy. 52Nni Yeesus à kpaaghà nyi lɛ: Pɛ̀ɛ̀zi gàfàg yɔ̀ɔ̀ ɓi ɗyaŋ, lɛ ɓum ɓɛ̀cèm ɓɛ ɓɛ teri gàfàg, ɓɛ ɓiì wiì lɛ gàfàg. 53Ù yii ɓi lɛ, ǹɗì lɛ, i ǹtɔɔgh Tààta wɛ̀m lɛ, a ghɛɓsi mɛ̀, à rì lɛ à rom yì mɛ̀ ɓum ɓɛ titom ɓigomìnɛ ɓìtuu lɛ ɓìtuu. 54Lannɛ rìkalì ɗi kaàtà à Bɛ̀ll ɗi ri min ɓiì ronì? Lɛ kaàtà à Bɛ̀ll a kalag lɛ, ki ghɛɛ̀sɛɛ kì kìlɛɛ fɔɔlɔɔ. 55Ɓi cààmɛ̀n kiǹ innɛ Yeesus à kpaaghà rì kìtuu ki ɓum kìn lɛ: Ɓì ghɛɛ mɛ̀ lɛ ǹɗì zyaàzyaa, nni ɓì yùu yì lɛ rì gàfàg rì ɓìgeŋ lɛ ɓi ɓaǹ mɛ̀? Kɔm̀ lɛ, mɛ̀ɛ ǹɗi ɓi naà-Bɛ̀ll ɓɛ̀ŋwos ɓɛ̀cèm ǹɗèèrèsàg ɓum, kɛ̀ ɓi ki ɓaǹ mɛ. 56Wɔ̀lɛ ɓìɓan ɓiǹ ɓìcèm ɓi kilɛ̀ngà fɔlɔɔ lɛ di ɓìɓan ɓi ɓɛ̀kpaŋzì-ɓìɓan ɓɛ kangà ɓyɛɛ roǹ.

Fɔɔnnɛ ɓɛ̀yilàg ɓɛ rinìghà nyi ɓɛ̀sɛ̀ɛ̀ ɓɛ̀cèm, ɓɛ ghɛŋɗàg.

Ɓɛ kɛɛ rì Yeesus a sànèdìrɛŋ

(Mk. 14:53-65; Lk. 22:54-55, 63-71; Zŋ. 18:12-14, 19-24)

57Ɓumɓɛ ɓɛ ɓangà Yeesus ɓɛ kɛngà rì nyi yɛ̀ɛ ǹlàmì-ɓɛ̀pìrɛɛtìrɛ̀ àgwey ànɛ lɛ Kayif; wɔɔ nnɛ ɓɛ̀sɛ̀ɛ̀mɛn rì ɓɛ̀rèsàg-ɓìdɔ̀gsɛna ɓɛ taŋzɛ̀ngà. 58Pyɛɛri à nɔɔnɔ̀ɔ̀tìghà nyi fìràɓ fìràɓ, à kpaŋ ɓi ǹlɛmɓog wu ǹlàmì-ɓɛ̀pìrɛɛtìrɛ̀ àgwey, à ɗiŋì à kɔ̀rì ɓi nyìinyìm à ɓɛ̀sujàà lɛ, à ghɛn yɛ̀ɛ ki ri ɓiì Syɔnì. 59Ɓɛ̀pìrɛɛtìrɛ̀ ɓɛgwey, rì ɓum ɓɛ̀cèm ɓɛ ɓi sànèdìrɛŋ, ɓɛ kaakààghà kìɓan ki ɓɛpwàà ki ɓɛɛ tiri Yeesus ɓi ɗi lɛ ɓɛɛ wey nyi. 60Kìɓan kifog, ɓɛ ghɛngà ɓi kiɓan ki ɓɛ ɓaghà lɛ ɓɛ kpaa, nsoò yɛ̀ɛ ɓum lɛɛ̀gwey ɓɛ rɛlìghà lɛ ɓɛɛ feg kìpwaà Yeesus ɓìɓan ɓi nyòò, kɛ̀ɛ̀ bee; fɔɔnnɛ ɓum ɓɛdɛŋ ɓɛ siitɛ̀ngày kì yùu ɓɛsɛ̀ɛ̀ ɓɛɓɛɛ̀, ɓɛ kpaa lɛ: 61Ŋwaànɛ̀n àa ǹkpaa lɛ: Ǹɗì lɛ ǹwàà naà-Bɛ̀ll, ǹki pɛ̀ɛ̀zi yɔ̀ ki toŋì ɓi mɛ̀ru mɛraa. 62Nni ǹlàmì-ɓɛ̀pìrɛɛtìrɛ̀ àgwey a pɛ̀sɛǹgà aɗyòò à tɔg Yeesus lɛ: Kìɓan ki ɓumɓɛ ɓɛ kpaa ki ɓɛ raɗ rì wɔ̀ yòg, ù yin ɗi com ki ɓàghɛn ɓɔ? 63Wɔ̀lɛ Yeesus à maamààghà lɔŋ. Nni ǹlàmì-ɓɛ̀pìrɛɛtìrɛ̀ àgwey à tɔgtìghà nyi lɛ: Ɓi ɗii ɗi Bɛ̀ll ànɛ à rì cencem ǹtɔɔgh lɛ ù kali ɓìsi ù ki kànɛn bɛ̀ɗ ǹkòo wɔ̀ yɛɛ ri Kiris Man à Bɛ̀ll 64Yeesus à ɓàg nyi lɛ: Wàa kpaà. Nni ǹki kpaatii mìni lɛ, à tumɛ̀n ɓigomìnɛ, ɓì ri ghɛn Man à mum di à kɔ̀kɔrii ɓi weèlem à Bɛ̀ll à ìtèɗ wucèm, ɓì ki ghɛɛ̀di nyi di a yùyuiy aɗyoo ɓi ɓìkwìɗ. 65Fɔɔnnɛ ǹlàmì-ɓɛ̀pìrɛɛtìrɛ̀ àgwey à wokà bim, à ghàskì ɓìlàà ɓi à ɓaghà rì ɓyɔ ɓi nyoo, à ki kpaa lɛ: Ɓì woogh ɓi yɛ̀ɛ à fengii Bɛ̀ll, tì yin lɛ tì kaatì ɓɛ̀wusìnɛ̀ɗ ɓɛdɛŋ, lɛ mìniìɓɔmiɗ ɓì woogh tìfena ti à fengii Bɛ̀ll, nni ɓì kpaa la? 66Ɓum ɓɛmbog ɓɛ ɓaàg lɛ: À ghɛ̀ɛ̀sɛɛ lɛ ɓɛɛ wey. 67Fɔɔnnɛ ɓɛ tuughàkà Yeesus tìtyɛɛ̀ ɓisu, ɓɛ ki rogi nyi ɓìkam; ɓɛro ɓɛmbog ɓɛ ɓoɓog nyi mɛ̀ɓɛn di ɓɛɛ kpaakpaa lɛ: 68Mèsii, rèmi ŋwaànɛ à ɓoogh wɔ̀, u kali ɓìsi.

Pyɛɛri à roòzɛɛ Yeesus

(Mk. 14:66-72; Lk. 22:56-62; Zŋ. 18:15-18, 25-27)

69Wɔ̀lɛ Pyɛɛri à kɔ̀kɔ̀rìghà ɓi ǹlɛm̀ɓog fɔɔnnɛ giɓ adɛŋ ànɛ à ɓaghà ǹkìì-kìsay à yughày nyi à nyoo, a kpaa lɛ: Wɔ̀ɔ ǹɗì gìrìg ɓi ǹɗaŋ wu Yeesus ànɛ a Galile. 70Kìɓan kìfog Pyɛɛri à roòzɛ̀ngà kìɓan kiǹ ɓi mis mɛ ɓum ɓɛ̀cèm, à kpaa lɛ: Ǹ-yii ɓi com ki u kɔ̀nkɔn kiǹ lɛ u kpaà. 71Yɛ̀ɛ à kɛ̀nkɛni a rìɗigì ɗi gari, giɓ adɛŋ à ghɛn nyi, à kpaa ɓumɓɛ ɓɛ ɓaghà wɔɔ lɛ: ŋwaànɛ àa ǹɗì ǹɗaŋ ri Yeesus ànɛ a Naazarɛt. 72Nni Pyɛɛri à roòzɛ̀ngà tì nyi, à kànɛ̀n bɛ̀ɗ, à kpaa lɛ: Ǹ-yii ɓi ŋwaànɛ̀n. 73Yɛ̀ɛ maa cààmɛ̀n à ghaghìghà, nni ɓumɓɛ ɓɛ ɓaghà wɔɔ ɓɛ tyoŋdɛ̀ngày ɓɛ kpaa Pyɛɛri lɛ: Ki ri lɔŋ saaɗ lɛ, ù rì kìbog ki ɓi ɓumɓɛ̀n, ɓisuulɛ, rìtòtòg ɗyɔɔ ɗi resii fɔlɔɔ. 74Fɔɔnnɛ Pyɛɛri à tumɛ̀ngà rìkààkànàg ɗi bɛ̀ɗ, di a kpaakpaa lɛ, i m̀pwàa, Bɛ̀ll à cɛ̀m mɛ̀; ǹ-yii ɓi ŋwaànɛ̀n. Ǹlem à zag a ghaàgh kì rɔŋì ɓi cààmɛ̀n kɔm̀ kiǹ. 75Nni Pyɛɛri à yìtìghà min yɛ̀ɛ Yeesus à kpaaghà nyi lɛ, ù rì mɛ̀ ɓiì roòzɛɛ gɛ̀n yiraa, di ǹlem à zag à ka rɔŋ ɓi; fɔɔnnɛ à kpagà gari à rèn à sìgtàg.

Đang chọn:

MATYOO 26: BAFNT

Tô màu

Chia sẻ

Sao chép

Bạn muốn lưu những tô màu trên tất cả các thiết bị của mình? Đăng ký hoặc đăng nhập

Bafia Nouveau Testament © Bible Society of Cameroon, 2019.

Tìm hiểu thêm về Bafia Nouveau Testament