MATYOO 28

Rìghèmɓɛ̀n ɗi Yeesus

(Mk. 16:1-10; Lk. 24:1-12; Zŋ. 20:1-10)

1Ɓi jɛ̀m ì Saɓàt, ŋwosi sɔnɗi lɛ ɓuɓ, Marii Madelɛn rì Marii àmbog ɓɛ kɛngà kì ghɛɛ̀ zɔ̀ŋ. 2Nni ɓɛ sigmɛ̀ngà di zi i mɛ nyɛ̀ŋɗɛn ri ìtèɗ, lɛ ŋwaà-fìtom a Kan à sɛngày, à yù kì ɓiŋzii gɔ̀g, à kɔ̀rì miì aɗyòò. 3Ŋwaàfìtom àǹcèm à lònlòmgà lɔŋ yɛ̀ɛ ŋ̀wàaŋ̀wàɗ, kìlàà kii ki pupuɓ lɔŋ yɛ̀ɛ dɛ̀ɓ. 4Fɔɔnnɛ ɓɛ̀sujàà ɓɛ risìghà ɓɛ tumɛ̀n rìnììghnìŋdɛ̀n lɛ kpàg-kpàg-kpàg, ɓɛ rɔɓ lɔŋ yɛ̀ɛ ɓìloŋ. 5Wɔ̀lɛ ŋwaà-fìtom a tòòghrɛ̀ngà, à kpaa ɓɛ̀yiɓ ɓɛǹ lɛ: Kɛ̀ ɓi risi, lɛ mɛ̀ ǹ-yii lɛ ɓi kaakaa Yeesus ànɛ ɓɛ ǹkpani ɓì kɔrɔs. 6À yiìdi fɛ, àa ghèmɓɛɛ lɔŋ yɛ̀ɛ à kpaaghà, yùunay, ɓi ghɛǹ jàŋ inɛ àa nɗì ǹnɔ̀nɔŋiyɛn. 7Nni kɛ̀ɛna lɛ fyɛ̀ɗ, ɓi kpaà ɓɛ̀yilàg ɓii lɛ, àa ghèmɓɛɛ a ɓìloŋ, à loloogh rì mìni a Galile, wɔɔ nnɛ ɓì rì nyi ɓiì ghɛɛ̀; kìɓan kiǹ kɛɛ̀ki maà rì lɛ ǹkpaà mìni.

8Fɔɔnnɛ ɓɛ pɛsɛ̀ngà a zɔ̀ŋ lɛ fyɛ̀ɗ, mɛ̀rem mɛ̀ronɛn lɛ: rì ìris, rì coo kinyàà, ɓɛ kɛǹ kì kpaà ɓɛ̀yilàg ɓɔlɛ ànɛ̀n rì mɛ̀ree.

9Lɔŋ wɔɔ foo, nni Yeesus à ghàskà ki yùu ki tulɛɛ ri ɓɛ̀yiɓ ɓɛǹ, à kpaa ɓɔ lɛ: Ǹtògsii mìni! Fɔɔnnɛ ɓɛ tyoŋdɛ̀ngà nyi a nyoo, ɓɛ ɓaǹ nyi ɓi mɛ̀kòò, ɓɛ ɓɔgsì nyi. 10Yeesus à kpaa min ɓɔ lɛ: Kɛ̀ ɓi risi; kɛ̀ɛna kì kpaà ɓɛ̀geni ɓɛ̀m lɛ ɓɛɛ kɛǹ a Galile, wɔɔ nnɛ ɓɛ ri mɛ̀ ɓiì ghɛɛ̀.

11Yɛ̀ɛ ɓɛ̀yiɓ ɓɛǹ ɓɛ ɓaghà di ɓɛ kaka ɓi bee, nni ɓum ɓɛdɛŋ ɓɛ ɓɛ ɓaghà ɓi nɗaŋ wu ɓɛsujàà ɓɛ ɓɛ ɓeŋɓèŋgà zɔ̀ŋ, ɓɛ sugtìghày ɓi bàn, ɓɛ kpaa ɓɛ̀pìrɛɛtìrɛ̀ ɓɛgwey com kìcèm ki ki kilɛ̀ngà. 12Fɔɔnnɛ ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ ɓaghà lɛ, ɓɛ mɛ taŋzɛ̀n, ɓɛ tokì, nni ɓɛ faghà ɓɛ̀sujàà ɓɛǹ ɓyoo mɔ̀ɔ̀ni; 13ɓɛ kpaa ɓɔ lɛ: Ɓi ghɛ̀ɛ̀sɛɛ kì ghagsii ɓɔlɛ lɛ, ɓɛ̀yilàg ɓii ɓaa yùu kì fyaasii kiloŋ kii ri ìru, di ɓìsii ri ɓi fìlo. 14Nni i gɔmìnà à woogh kìɓan kiǹ, tì yii yɛ̀ɛ tì ri kpaa nyi ɓi ɗi lɛ kɛ̀ ɓi ɓa ri kìɓan. 15Fɔɔnnɛ ɓɛ̀sujàà ɓɛ tekà mɔ̀ɔ̀ni, ɓɛ ki lɔŋ yɛ̀ɛ ɓɛ reɓkàkà ɓɔ lɛ ɓɛɛ ki; fɔlɔɔ nnɛ ɓɔlɛ ànɛ̀n à sààghà ɓi nyìinyìm à Ɓɛ̀yudɛ̀n à kpaŋ gɛɛ̀nɛ.

16Nni ɓɛ̀yilàg ɓɛ kintɛ̀ɗ rì bog ɓɛ kɛngà a Galile ɓi dòn ìnɛ Yeesus à reɓkà ɓɔ lɛ ɓɛɛ kɛǹ wɔɔ. 17Yɛ̀ɛ ɓɛ ghɛngà nyi, ɓɛ ɓɔgsì nyi, kìɓan kifog, ɓɛ̀ro ɓɛdɛŋ ɓɛ ɓaghà rì nyoey ɓi nɗem. 18Fɔɔnnɛ Yeesus à tyòŋdɛ̀ngày, à kpaa ɓɔ lɛ: Ɓaa fa mɛ ìtèɗ wucèm lɛ rì ɓi ɗyoo ɓiɗùm, rì ɓi ziinɛ. 19Kɛ̀ɛna! ɓi ki lɛ ɓumɓɛ ɓi ɓìlɔ̀ŋ ɓìcèm ɓɛɛ ɓa ɓɛ̀yilàg ɓɛm, ɓì ɓàɓtì ɓɔ ɓi ɗii ɗi Seŋi, rì Man, rì Kìtɛntɛ̀ɛ̀n ki Nghay; 20ɓì rèsàg ɓɔ rìɓèŋ ɗi ɓiɓan ɓìcèm ɓi nsiŋdɛ̀ngà mìni; ɓì ki yi lɛ, ǹɗì ɓiì ɓaà nɗaŋ ri mìni ɓɛ̀ŋwos ɓɛ̀cèm à kpaŋ ɓi rìlèg ɗi zi.

Đang chọn:

MATYOO 28: BAFNT

Tô màu

Chia sẻ

Sao chép