MARIKUS 13

Yeesus à kalii ɓum lɛ naà-Bɛ̀ll inɛ a Yorisalɛm ì rì ɓiì wààrɛɛ

(Mt. 24:1-2; Lk. 21:5-6)

1Yɛ̀ɛ Yeesus à kpagày ɓi naà-Bɛ̀ll, nni kìbog ki ɓi ɓɛ̀yilàg ɓii kì kpaaghà nyi lɛ: Raɓì, ghɛna ɓyoo gɔ̀g ɓi, rì coo syeesyee à rìtoŋ! 2Yeesus à ɓàg nyi lɛ: Ù ghɛɛ coo kitoŋ ki ɓɛ togà kiǹ, nsoò gɔ̀g bog yàa rɔ̀ɓ ti ɓi ǹsasaghiyɛn ɓi ìmbog.

Mɛ̀tɔɓ mɛ mɛ ri ɓiì ghɛnɛɛ di rìlèg ɗi zi ɗi ti jàŋbog

(Mt. 24:3-14; Lk. 21:7-19)

3Yɛ̀ɛ Yeesus à kɔ̀rìghà ɓi dòn ì ɓɛ̀olivyee, à pɛ̀ɛ̀zì mis rì naà-Bɛ̀ll nni ɓɛ̀-Pyɛɛri rì Zyag rì Zyaŋ rì Andire ɓɛ tɔkà nyi a dwìɗ lɛ: 4Kali ɓìsi fin innɛ ki ri ɓiì kìlɛɛ, rì kìrèmzɛnà ki ki ri ɓiì rèsii lɛ rìsugtɛ̀n ɗi ɓiɓan ɓìcèm ɗi kpaŋi.

5Nni Yeesus à tumɛ̀ngà min ɓɔ rìkpaa lɛ: Ɓì konàg lɛ mum kɛ̀ɛ yègsi mini. 6Ɓisuulɛ ɓum lɛɛ̀gwey ɓɛ ɓiì yùu ri ɗii ɗyɛ̀m, rì ànɛn miì à kpaa lɛ mɛ̀ yɛɛ ri Kiris, ɓɛ ki rì ɓiì syòŋi ɓum lɛɛ̀gwey. 7I ɓì woogh ɗi ɓɛɛ kpaakpaa ɓiɓan ɓi mɛ̀y, rì gom yi mɛ̀y mɛ mɛɛ̀ ɗùuɗuùrɛ̀n, kɛ̀ ɓi risi, lɛ ɓìɓan ɓiǹ ɓìcèm ɓi ghɛɛ̀sɛɛ kì kìlɛɛ, kìɓan kifog àa rìlèg ɗi zi ɗyɛɛ ri ɓiì ɓaà lɔɔ. 8Ki ɓiì ɓaà lɛ, ɓumɓɛ ɓi tum a zi anɛ, ɓɛ ram wɛ̀y ri ɓɛ ɓi tum a zi ambog, ɓɛ ɓi kìlɔ̀ŋ ki ɓɛ ram wɛ̀y ri ɓɛ ɓi kìlɔ̀ŋ kimbog, fɔɔnnɛ zi i ɓiì kìi lɛ rì foo ì nyɛ̀ŋɗɛ̀n; rì foo ì nyɛ̀ŋɗɛ̀n, zày ì ki kìki jàŋ jàŋ. Ɓìɓan ɓiǹ ɓi ɓiì ɓaà rìtumɛ̀n ɗi mɛtɔɓ. 9Konaaghna rì mìniìɓɔmiɗ lɛ ɓum ɓɛ ri ɓiì kɛ̀ɛ ri mìni ɓi ɓìkpanà ɓi ɓɛyɔ̀m, ɓɛ ki ɓog mini kìtòn ɓi naa yi bɔ̀ŋzɛ̀n. Ɓì ɓiì rɛlii ɓɛyɔ̀m ɓi mis mɛ ɓɛ̀gɔmìnà rì ɓi mis mɛ mɛfòm, ɓisuu kiɓan kɛm̀ lɛ ɓi resi ɓɔ saaɗ ànɛ miì. 10Kìɓan ki asu ki ki ghɛɛ̀sɛɛ kì kìlɛɛ ki ri ɓiì ɓaà lɛ, Syeesyee à Ɓɔlɛ a ka kalɛn ɓi ɓɛ̀tum ɓɛ zi ɓɛ̀cèm. 11Nni yɛ̀ɛ ɓɛ ɓiì ɓangii mini, ɓɛ sɔmɛ̀n mìni rì ɓɛ̀làmì lɛ ɓɛɛ yɔm̀ mìni, mɛ̀rem min mɛ̀ kɛɛ̀ log ki cɛɛcɛɛ̀rɛ̀n ɓi mùm rì com ki ɓì ɓiì kpaà, kìɓan kifog, kpaana lɔŋ com ki ki ri mìni ɓiì ɓɔghìì ɓi ǹɗem ɓi cààmɛ̀n à ɓɛ̀yɔ̀m, lɛ àa mìniìɓɔmiɗ yɛɛ ri ɓiì tòòghrɛɛ, lɔŋ Kìtɛntɛ̀ɛ̀n ki Nghay kɛɛ ri ɓiì tòòghrɛɛ. 12Mum à ri tɔ̀kɛn geni lɛ a wey nyi, seŋi à tɔ̀kɛ̀n man wiì lɛ a wey, ɓɔn ɓɛ ram wɛ̀y ri ɓɛ̀yalì ɓaa, ɓɛ ki cuusi ɓɔ. 13Ɓum ɓɛ̀cèm ɓɛ ri mìni ɓiì ɓèèzɛɛ ɓisu wɛ̀m, kìɓan kifog ŋwaànɛ à ɓiì sììrɛɛ à kpaŋ a rìsugtɛ̀n nnyɛɛ ɓiì ghɛɛ cɛɓ. 14Yɛ̀ɛ ɓì ɓiì ghɛɛ̀ di ɓum ɓɛ ti ɓiì kìkii ɓìɓe ɓi ɓi ri koŋnyoo ɓi jàŋ inɛ ki ghɛɛ̀sɛɛ ɓi, ŋwaànɛ a ɓàɓay ɓiɓan ɓi Bɛ̀ll à ghɛ̀ɛ̀sɛɛ kì kɔ̀rii ɗyomzɛ̀n; nni ɓumɓɛ ɓɛ ɓiì ɓaà a Zyude, ɓɛ ghɛɛ̀sɛɛ kì ghɛŋii ɓi dòn aɗyòò. 15Ŋwaànɛ à ɓiì ɓaà ɓi mɛɛ aɗyoo, kɛɛ̀ sɛɛdii lɛ a teɗ com ɓi nàà. 16Fɔɔnnɛ ŋwaànɛ à ɓiì ɓaà ɓi dɛm, kɛ̀ɛ sugtii rì jɛ̀m lɛ a teɗ rìga. 17Nyìighnyìg rì ɓɛ̀yiɓ ɓɛ mèm, rì ɓɛ̀gɛɓyɛ̀y ɓɛ ɓi mɛ̀ru mɛ̀n. 18Ɓɔ̀ŋzaaghna Bɛ̀ll lɛ kìɓan kiǹ kɛ̀ kɛɛ̀ kìlɛn ɓi cààmɛ̀n à bùmà. 19Ɓisuulɛ mɛ̀ru mɛ̀n mɛ ɓiì ɓaà rì rìkuu ɗi ǹtɔɓ ɗi ɗi ka ghɛnɛ̀ngà ɓi, a tumɛ̀n yɛ̀ɛ Bɛ̀ll à kìghà lɛ rì ɗyoo rì zi, à kpaŋ ɓigomìnɛ; rìkuu ɗi ǹtɔɓ ɗìn ɗi ki ghɛnɛɛ gɛ tì ɓi ɓi ziinɛ. 20I Kan Bɛ̀ll kɛ̀ɛ ghaɓi mɛru mɛ̀n, di nsoò mum bog à yin lɛ à ghɛɓ; kìɓan kifog à ghaɓìghà mɔ ɓisuu ɓum ɓii ɓɛ à rɔ̀tɛ̀ngà. 21I ŋwaàdɛŋ à kpaa mìni lɛ, Kiris à rì fɛ nsoò lɛ fɛnii, kɛ̀ ɓi wog; 22ɓisuulɛ ɓɛ̀-kiris ɓɛ ɓɛpwàà, rì ɓɛ̀pwààpwaà ɓɛ ɓɛkpaŋzì-ɓìɓan ɓɛ ɓiì yùu, ɓɛ kikì lɛ rì dàm yi ɓiɓan rì ɓɛ̀koŋnyoo ɓɛ ɓiɓan ɓi lèg ànɛ lɛ, i kaa rì lɛ ki kilɛ̀n, ɓɛ ri lɛ ɓɛ syoŋ̀ nsoò ɓumɓɛ ɓɛ ri ɓɛ̀ɓɔ̀nɛn. 23Ǹloogh mìni kì wogsii ɓiɓan ɓìcèm, kɔ̀riina ɗyomzɛ̀n rì ɓìɓan ɓi ɓi ghɛɛ̀sɛɛ ɓìn kì ghɛnɛɛ.

Rìsugtìì ɗi Man à mum

(Mt. 24:29-35; Lk. 21:25-33)

24Ajɛ̀m ì ɓìɓeɓtàg ɓi mɛru ɓìn, kìsaa ki ŋwos ki ri kpìi gɛ ɓirìm, ŋwii kɛ̀ɛ lòmdi. 25Tyɔɛy tì kɔɔ̀kɔ̀sɛ̀n yì aɗyoo, di tyɛɛ̀ kpìkpì, mɛ̀tèɗ mɛ ɓi ɗyoo mɛ nyɛŋɗɛ̀n. 26Fɔɔnnɛ ɓum ɓɛ ghɛɛ gɛ ɗi Man à mum à rìì ɓi ɓìkwìɗ rì coo itèɗ, rì rìgwey. 27Fɔɔnnɛ à romi gɛ min ɓum ɓii ɓɛ titom ɓi ɓɛ̀tum ɓɛ zi ɓɛ̀cèm lɛ ɓɛɛ taŋzɛn ɓum ɓii ɓɛ ɓɛ ri ɓɛ̀ɓɔ̀nɛn ɓi zi bimiɗ. 28Terina kìfèèghrɛnà ɓi ǹɗyèm wu fìgyee. Cààmɛ̀n kìcèm ki ɓɛ ghɛɛ di myaɓ mɛɛ̀ wòowomzɛ̀n, tyɛn ti tɔtɔ̀ɓ, ɓɛ ti ɓɛ̀yilàg lɛ bwey yi yuù rì rìsɛn. 29Fɔlɔɔ nnɛ mìni girig, ɓì ghɛ̀ɛ̀sɛɛ kì yii lɛ Man à mum à ti jàŋbog ɗì rìyù di ɓì ghɛɛ ɓìɓan ɓiǹ ɓìcèm. 30Ǹkalii mìni ɓi saaɗ lɛ, bɔ̀ɓ i ɓum ìnɛ yàa lèg ɓi bimiɗ di ɓìɓan ɓi ɓìcèm ɓi ka kilɛn ɓi. 31Ɗyoo rì zi ɓi ri ɓiì lèegh, kìɓan kìfog ɓìɓan ɓyɛm̀ ɓyaa lèg ɓi.

Yeesus lɛ: Yɛ̀ɛ ɓì yii ɓi risugtìì ɗyɛm̀, kɔ̀riina cem

(Mt. 23:36-39)

32Ŋwaàdɛŋ à yii ɓi gòn nsoò cààmɛ̀n kiǹ; nsoò ɓum ɓɛ titom ɓɛ aɗyoo, nsoò Man à Bɛ̀ll, àdɛŋ ànɛ ɓi ɓɔ à yii ɓi gòn inɛ̀n, lɔŋ Tààta cɛ̀ncii yɛɛ yii. 33Konaghna, ɓì ki ɓa cem, lɛ ɓì yii ɓi fin innɛ cààmɛ̀n ki ɓiì kpaŋì. 34Kìɓan kiǹ ki ri ɓiì ɓaà lɔŋ yɛ̀ɛ ŋwaànɛ à kɛ̀ɛ rìkɛ̀ɛ̀, à càɗ mɛɛ mii, à reɓsàg ɓìɓan ɓii ri ɓɛ̀kìì-ɓìsay lɛ, rì ànɛn miì rì ìsu wii wu kisay, à ki siitag m̀ɓèŋì-ìsuunaa lɛ, a kɔri cem. 35Fɔɔnnɛ kɔ̀riina cem, lɛ ɓì yii ɓi fin innɛ ŋwaàmɛɛ a ɓiì kpaŋì. À rì lɛ à kpaŋ cɛŋkò, nsoò lɛ rì ǹɗem-irù, nsoò lɛ di ɓɛ̀lem ɓaa rɔ̀ŋ, nsoò lɛ sariwa; 36ɓì konàg lɛ, kɛ̀ɛ ɓa lɛ à kpaŋ lɛ vuàs, à tanɛ̀n mìni di ɓì rì ɓi fìlo. 37Kìɓan ki ǹkpaa mìni ki, ǹkpaa kɔ ɓisuu ɓum ɓɛ̀cèm: Kɔ̀riina cem.

Đang chọn:

MARIKUS 13: BAFNT

Tô màu

Chia sẻ

Sao chép