MARIKUS 2

Yeesus à wɔɔzii kìsɛkɛ̀rɛ̀ a Kapɛrinawum

(Mt. 9:1-8; Lk. 5:17-26)

1Yɛ̀ɛ ɓɔɔ mɛru ɓɛ ghaghìghà, nni Yeesus à sugtìghà a Kapɛrinawum; yɛ̀ɛ ɓum ɓɛ wokà lɛ, à rì a mɛɛ, 2ɓɛ taŋzɛ̀ngà lɛɛ̀gwey lèg ànɛ lɛ, kìtuɓi ki ɓatìghà ɓi nsoò asuunaa; fɔɔnnɛ Yeesus à kpaakpààghà ɓɔ ɓìɓan ɓi Bɛ̀ll. 3Nni ɓum ɓɛniǹ ɓɛ tɛkày kìsɛkɛ̀rɛ̀ ɓi kon ɓɛ yuiy nyi rì kɔ. 4Wɔ̀lɛ ɓumɓɛ̀n ɓɛ ɓaghà ɓi lɛ, ɓɛ kɛǹ rì kìsɛkɛ̀rɛ̀ kiǹ lɛsaaɗ yɛ̀ɛ Yeesus lɛ gùl ì ghekà bee; nni ɓɛ pinìghà fìran ɓi jàŋ inɛ Yeesus à rɛrɛ̀lìghà, ɓɛ rɔŋzìì min ŋwaànɛ̀n fɔlɔɔ ɓi kon wiì. 5Yɛ̀ɛ Yeesus à ghɛngà rìgherɛ̀n ɗi ɓumɓɛ̀n ɓɛ ɓaghà rì ɗyɔ, nni à kpaaghà kìsɛkɛ̀rɛ̀ kiǹ lɛ: Man wɛm̀, ɓìɓe ɓyɔɔ ɓi ti ɓìcenɛn. 6Ɓɛ̀rèsàg-ɓìdɔ̀gsɛna ɓɛdɛŋ ɓɛ ɓɛ ɓaghà wɔɔ ɓɛ kɔ̀kɔriyɛn, ɓɛ kpaakpààghà ɓi mɛ̀rem maa lɛ: 7Lannɛ ŋwaànɛ a tòtog fɛlɛ? A feefengì Bɛ̀ll. Ghɛn adɛŋ yɛɛ ri lɛ à cenɛ̀n mum ɓìɓe, i ki yin lɛ Bɛ̀ll cɛ̀ncii! 8Yɛ̀ɛ Yeesus à ghàskà kì yiì kìɓan ki ɓɛ fefèkà, nni à tɔkà ɓɔ lɛ: Ɓisuucɛ nnɛ ɓì rì rì mɛ̀kuu mɛ mɛyitì mɛǹ ɓi nɗem? 9Kìɓan aɗi kɛɛ yeesɛɛ foo? Rìkpaa ɗi ǹkpaa kìsɛkɛ̀rɛ̀ lɛ ɓìɓe ɓyɔɔ ɓi ti ɓìcenɛn gìn, rìkpaa ɗi ǹkpaà kɔ lɛ, pɛ̀sɛn aɗyoo u teɗ kon wɔɔ̀ u kɛǹ? 10Nni ɓi ɗi lɛ, ɓi yi lɛ Man à mum à rì rì ìtèɗ wulɛ a cenɛ̀n mum ɓìɓe fɛ ɓi ziinɛ, 11Yeesus à kpaaghà kìsɛkɛ̀rɛ̀ kiǹ lɛ: Pɛ̀sɛn aɗyoo, u teɗ kon wɔɔ̀, u sug. 12Nni ŋwaànɛ̀n à ghàskà kì pɛ̀sɛɛ aɗyoo, à teɗ kon wiì à kpaŋ, ɓum ɓɛ̀cèm ɓɛ seesèè, kìɓan ki wey ɓɔ yɛ̀ɛ rìtɔŋ; ɓɛ keèkèmzì Bɛ̀ll di ɓɛɛ̀ kpaakpaa lɛ: Tì ka ghɛngà ɓi rikuu ɗi kiɓan yɛ̀ɛ ɗi.

Yeesus à reŋii Levi, à ki ɗi nɗaŋ ri ɓɛ̀kìì-kìɓe

(Mt. 9:9-13; Lk. 5:27-32)

13Yeesus à kɛ̀ɛ̀dìghà tì ɓi bèn ì rìɓày, ɓum ɓɛ̀cèm ɓɛ yuyùy nyi a nyoo, nyii ki rèresi ɓɔ ɓìɓan ɓi Bɛ̀ll. 14Yɛ̀ɛ Yeesus à ghaghàghìyà, nni à ghɛngà Levi man à Alfe, di à kɔ̀kɔrii jàŋ inɛ ɓɛ m̀peghì làmpoŋ̀, fɔɔnnɛ à kpaaghà nyi lɛ: Nɔ̀ɔ̀ti mɛ̀, Levi à pɛ̀sɛ̀n aɗyoo à nɔ̀ɔ̀tì nyi. 15Yɛ̀ɛ Yeesus à ɗiɗìghà ɓìɗilàg ɓi naa ì Levi, ɓɛ̀terì-làmpoŋ̀ lɛɛ̀gwey rì ɓɛ̀kìì-kìɓe ɓɛ yughà kì kɔ̀rii ɓi riɗi ɗi ɓyom ǹɗaŋ ri nyi rì ɓɛ̀yilàg ɓii, ɓisuulɛ ɓumɓɛ̀n ɓɛ nnɔ̀ɔ̀tàg nyi ɓìtuu ɓìtuu. 16Yɛ̀ɛ ɓɛ̀rèsàg-ɓìdɔ̀gsɛna ɓɛ ɓi nɗaŋ wu Ɓɛ̀fàrìzyɛŋ ɓɛ ghɛngà nyi di a ɗiɗi ǹɗaŋ ri ɓɛ̀terì-làmpoŋ̀, rì ɓɛ̀kìì-kìbe, nni ɓɛ tɔkà ɓɛ̀yilàg ɓii lɛ: Ɓisuucɛ nnɛ ǹɗèsàg wìn a ɗiɗi ǹɗaŋ ri ɓɛ̀terì-làmpoŋ̀, rì ɓɛ̀kìì-kìɓe? 17Yɛ̀ɛ Yeesus à wokà ǹtɔɔ̀tɔɔgh wiǹ, nni à kpaaghà ɓɔ lɛ: Ɓumɓɛ ɓɛ yin ɓiì roroɓi, ɓɛ ti ɓɛ kɛɛ ɓa ri zày ì dɔgtà, lɔŋ ɓɛ̀roroɓ ɓɛɛ ti ɓɛ ɓalàg rì zày ìnɛn. Mɛ̀ ǹ-yùghà ɓi ki reŋii ɓumɓɛ ɓɛ ri lɛsaaɗ, lɔŋ ɓɛ̀kìì-kìɓe ɓɛɛ̀ɓɛ ǹ-yùghà kì reŋii.

Kìɓan ki ricèlì ɗi ɓiɗilàg, ri rìɓùtɛ̀n ɗi ɓyom ɓi nyoo rì ɓi abɛ̀y

(Mt. 9:14-17; Lk. 5:33-39)

18Ɓɛ̀yilàg ɓɛ Zyaŋ rì ɓɛ ɓɛ̀fàrìzyɛŋ ɓɛ nti ɓɛ celàg ɓìɗilàg; nni ɓum ɓɛdɛŋ ɓɛ yughà ki tɔɔgh Yeesus lɛ: Ɓisuucɛ nnɛ ɓɛ̀yilàg ɓɛ Zyaŋ rì ɓɛ ɓɛ̀fàrìzyɛŋ ɓɛ ti ɓɛ celàg ɓìɗilàg ɓyaàmɛ̀n ɓidɛŋ, ɓɛnkɔɔ ɓɛ̀ kɛɛ̀ cèli! 19Nni Yeesus à ɓakà ɓɔ lɛ: Mɛ̀ghan mɛ ŋwaànɛ à wɔlɛɛ mɛ ri nya lɛ mɛ celì ɓìɗilàg di ǹwɔlì à kaka nɗaŋ ri ɓɔ! Cààmɛ̀n kìcèm ki ǹwɔlì à kaka nɗaŋ ri ɓɔ, ɓɛ yin lɛ ɓɛ celì ɓìɗilàg. 20Wɔ̀lɛ cààmɛ̀n ki lɛ ɓɛɛ pisi ǹwɔlì ɓi nyìinyìm wàà ki tiì, cààmɛ̀n kiǹ kɛɛ̀ki ɓɛ ri min ɓiì cèlii ɓiɗilàg. 21Ŋwaà yin lɛ à teɗ zyònà ì kìlàà ki nyɔn lɛ a raɗ ɗyas ɗi kitùg ki kilàà miì, ɓisuulɛ zyònà ì kìlàà ì nyɔn ì rì ɓìì tùnii kitùg ki kilàà, ɗyas ɗìn ɗi teghɛ̀n tì. 22Ɓaà ki foŋ ɓi mɛrɔ̀g mɛ nyɔn ɓi ɓìtùg ɓi ɓiren, ɓisuulɛ mɛ̀rɔ̀g mɛ ri ɓiì weeyii ɓiren, mɛ̀rɔ̀g rì ɓìren ɓi ɗyaŋ ɓìcèm. Wɔ̀lɛ ɓɛɛ̀ fogi mɛrɔ̀g mɛ nyɔn ɓi ɓìren ɓi nyɔ̀n.

Yeesus rì kìɓan ki Saɓàt

(Mt. 12:1-8; Lk. 6:1-5)

23Ŋwosi Saɓàt àdɛŋ, Yeesus à ghaghàghìyà ɓi dɛmi nyas. Yɛ̀ɛ ɓɛ ghaghàghìyà fɔlɔɔ, ɓɛ̀yilàg ɓii ɓɛ tumɛ̀n rìsòsòrì ɗi nyas. 24Nni Ɓɛ̀fàrìzyɛŋ ɓɛ tɔkà Yeesus lɛ: Ghɛna ɓɛ̀yilàg ɓɔɔ! Ɓisuucɛ nnɛ ɓɛɛ̀ kìki kiɓan ki ɓìdɔ̀gsɛna ɓis ɓi reègh lɛ mum kɛɛ̀ kì ŋwosi Saɓàt? 25Fɔɔnnɛ Yeesus à ɓakà ɓɔ lɛ: Ɓì ka ɓalà ɓi com ki Davit à kìghà, yɛ̀ɛ zày ì kɔ̀ngà lɛ rì nyi rì ɓum ɓii, nyi kɛ̀ɛ̀ com ki ɗiyɛn? 26Yɛ̀ɛ à ɗiŋìghà ɓi naà-Bɛ̀ll, ɓi cààmɛ̀n ki Aɓyatar à ɓaghà pìrɛɛtìrɛ̀ àgwey, à ɗi bìrɛs yi ɓum ɓɛ faghà ɓisuu Bɛ̀ll, à ki teɗ gàɓ, à fa ɓum ɓii, kɔm̀ lɛ ɓìdɔ̀gsɛna ɓyɛɛ kpaaghi lɛ lɔŋ ɓɛ̀pìrɛɛtìrɛ̀ cɛ̀ncaa ɓɛɛ ghɛɛ̀sɛɛ kì ɗiì bìrɛs yiǹ. 27Nni Yeesus à kpaaghà Ɓɛ̀fàrìzyɛŋ ɓɛǹ lɛ: Bɛ̀ll à rɛsìghà Saɓàt ɓi kìrɔɔ ki mum, wɔ̀lɛ à kìghà ɓi mum lɛ a ɓa ǹkpàn a gòn inɛ̀n. 28Fɔlɔɔ nnɛ Man à mum à làmii girig Saɓàt.

Đang chọn:

MARIKUS 2: BAFNT

Tô màu

Chia sẻ

Sao chép