Yuhani 7
7
Yesu si labetakaneini ka sawvalai
1Sangilribatenga, ku Yesu wadadavace salraelre talikai Galrilri, kai mwabangalre italikai Yuda masasawlri, asi lwiyane ku lamabelenge ki swa Yuda pasana papacapacai iniane. 2Lri padalrunga si kainganai kudra Talakangane ka lrisi ki swa Yuda, 3Lakamani ku lasawvalai ku betakane ki Yesu amia kai iniane, “Lu katwasa kai, la mwa ka Yuda, lani drele kai situsu ku tapianesu ku awngane. 4Kai umawmase nau kimathingathingale lu iya, kai takadradridridrimitane lu twatumane. Kudra wadulrusu pia kilakikai matiasamali, pia paathingalane ikai cucubungu ki yakawmasane!” (5Ku tangimiamiane kudra labetakaneini mialri kaiyana ka masalru iniane.)
6Ku Yesu la iya kai liniane, “Kaiyana wakela ku vaili; ai kunumi tatumane lu iya numi maduai. 7Kai kawmasane kai lri kalisi numiane, ai maliisi nakwane, asi lwiyane kainaku watelrai putaluvaivai ku tangilisianane ki kakwakudhane lini. 8Lu katwasa ngikakamani tulrisisi, kainaku lri katwase kikai#7.8 “kainaku lri katwase kikai” yakai ku sidrumane ka hungu ku amia kai “kainaku lri mwa”., asi lwiyane kaiyana wakela ku vaili.” 9Sa maka iyanga liniane kikai, ku Yesu la asurwana ikai Galrilri.
Ku Yesu twalrisisi ki Talakangane ka lrisi
10Sa katwasenga ku betakane ki Yesu, ku Yesu la mialri udradha kipaelre tulrisisi. Kai pathingale sa katwase, kiabubuli katwase. 11Ki tatulrisisisiane, ku lamabelenge ki swa Yuda la mwa kidruanga silape ki Yesu, tathingale iya ku taikaiyaneini.
12Ikai ki laumawmase la mapelaelaela pangukai iniane, yakai ku amia kai, “Kai lasu mathariri ka umawmase”; yakai ku amia kai, “Ini, kai lasu pwatatata ki laumawmase.” 13Ai ku laumawmase mwakuludru putaluvaivai mapelaela pangukai iniane, asi lwiyane kwi lalasu makiwcu ki lamabelenge ki swa Yuda.
14Kwi tatulrisisisiane sa apararamawnga ku tangilribatane, ku Yesu wamwa ki daane ki Twaumase si bulru ki umawmase. 15Ku lamabelenge ki swa Yuda la kasamali turamuru, si iya kai, “Kikai umawmase kai, kadrwa ku tupapalraini ku sinsi si kibulru, ani dulru ikai kai lrigilaneini turamuru?”
16La iya kai ku Yesu, “Kai bulrubulruli, kaika nakwane, twalai kwidra ki amani ka siakawlu nakwane. 17Ku tangea ka umawmase lwiyasi lri kalrithethe pangimia ku kidremedreme ki Twaumase, lri thingale kai bulrubulruli luka takidremedremane ki Twaumase, luka ngiasasingikaiyaku kawriva. 18Kudra ngiasasingikai kawriva, kiadremedremedreme ku lriguini; ai kwidra kiasilasilape ku lrigu ki amani ku siakawlu iniane, ala amani ku patengane ka kadrwa ku draedrangelrane. 19Ku Musi kaika wabaai numiane ku hulrice? Ai kadrwa ku paluludu numiane ku natangeanga. Anu kirimu kisanu papacapacai nakwane?”
20Ku laumawmase la tubalre, “Kiaikaisu ki aidridringane, aneane ku kiasanu papacapacai muswane?”
21La tubalre ku Yesu, “Lu ikaiyaku ki Taisadrasadrane ka vai, pia ku maadrau ka awngane, matiasamali amia numi makanaelre. 22Ai ku Musi kigelregelra tulrisi amia numiane pelaelaela (ku patengatengane ku kiagelregelre ka lrisi kaika twalai ki Musi, twalai ki cucungulane numi pathagili), la ikai numi ki Taisadrasadrane ka vai gelregelre tulrisi ki daini. 23Alaiyasi kigelregelre tulrisi ikai ki Taisadrasadrane ka vai ku umawmase, ku tangadrane ka pasiakai ki hulrice ki Musi, lu mia kwini, lu ikaiyaku ki Taisadrasadrane ka vai pawdringai ki umawmase, anu kirimu kaelaela nakwane? 24Madha singikai ku tadrelane ngubebelenge ki umawmase si mathariri malisi iya, sitangadrana si lekete ki madringelrese ala mathariri malisi iya pacengeecenge.”
Amaniaini kai lasu ku Kirisitu?
25Yakai kudra la swa Yerusalrime ku amia kai, “Kikai umawmase kai, kaika amani kwidra apapacadhane ki lamabelengeta? 26Drela, ka lasu mwataluvaivai si kawrivariva, laka kadrwa ku wabaebalre iniane! Kwini lalasu laka tengatengane ka wathingale iniane ala ka Kirisitu? 27Ai lu utaluvaivainga kai Kirisitu, kadrwa ku wathingale ka twalai inu kainganai kai lasu, ai ku tatwaladhane kai ki lasu wathingaleta turamuru.”
28Sakamani kudra, ku Yesu yakai ki daane ki Twaumase bulrubulru ki umawmase, la akwadrau iya kai, “Tengatengane numi ka wathingale nakwane, ka twalainwaku kainganai? Kai kelali, kainaku ka ngiasasingikai. Kudra amani ka siakawlu nakwane patengatengane. Kai numi wathingale iniane, 29ai wathingalaku iniane; asi lwiyane twaladhaku iniane kainganai, ka amani ku siakawlu nakwane.”
30Kwini lalasu la kisanu pwalra iniane, ai kadrwa ku umawmase ku pwalrima, asi lwiyane kaiyana wadaruru ku vaini. 31Ikai kwini ki laumawmase mialri takaalra ku masalru iniane; kwini lalasu amia kai, “Lu kainganai ku Kirisitu si pia ku pinangu Twaumasane ka puku lrika makakalra kai ki lasu?”
Ku tarakadrekadrenge pwalra ki Yesu
32Ku swa Palrisai kialalra sa makawrivarivariva pangukai ki Yesu, kai lalasu si marudrange ki barakalai la sikawlu ki tarakadrekadrenge katwase pwalra ki Yesu. 33Ku Yesu la iya kai, “Yakaiyana kai zikange, kai aikaiyaneli taelre numiane, ala lri katwasaku siwlri mwa kudra ki taikaiyane kudra ki siakawlu nakwane. 34Lri silape numi nakwane, ai kai numi lri maka kidringai; asi lwiyane kudra lrika amwaneli, kai numi lri maka mwa.”
35Kwini lamabelenge ki swa Yuda la makivagavaga, “Kai lasu pasana mwamwa inu, ku lri kaika amaka kidringadhaneta? Bekace katwase mwa cekele Gurike ki la swa Yuda, si bulru ki swa Gurike? 36Kudra iyaini kai, ‘Lri silape numi nakwane, ai kai numi lri maka kidringai’ si ‘Kudra amwaneli, lri kai numi dulru mwa’, manemane ku pacugane kwi taiyane kwini?”
Panianianiake ku acilai ka vaalru
37Sakabibiilrilinga ka vai ku tatulrisisisiane laka matipeaperawnga, ku Yesu acegecege, si akwadrau pelaela iya kai, “Lu kakadhame ku umawmase, bwala mwaili kai ungulu. 38Amia kikai kai Sisiu, ‘Kudra masalru nakwane ku umawmase yakai ku vaalru ka panianianiake ka acilai, lri twalai ki kidremedremeini berai mwalwaludru#7.37-38 “Lu kakadhame ku umawmase ... berai mwalwaludru” ku wahunyake madu iya kai “Ku umawmase lu kakadhame, wakela madu mwa nakwane, ku umawmase lu kasalru nakwane, wakela madu ungulu. Amia kai ku Sisiu, ‘Ku waberaberai panianiake ka acilai ka drakerale, lri twalai ki kidremedremeini ngiberai mwaludru’ ”..’ ” 39Ku taiyane kikai ki Yesu papia kwidra ki masalru iniane ku umawmase kudra lrika atarumarane ku Siri. Sakamani kwidra ku Siri kaiyana mwalebe, asi lwiyane ku Yesu kaiyana wamalra ku lrigu.
Ku laumawmase ngwalai ki Yesu karivu
40Ikai kwini ki laumawmase takaalra ku kialalra kikai vaga, si iya kai, “Kikai umawmase tengane ka amani kwidra yuginsia!”
41La ikai kwidra amia kai, “Kai lasu Kirisitu.”
La ikai ku drumane ku amia kai, “Ku Kirisitu ala kirimu twalai ka Galrilri! 42Asi lwiyane kai Sisiu wapacase, ku Kirisitu yai mwabaibalrithi ki Davidi, lri kitulalake ikai cekele ki Davidi kavai Bithelrihime.” 43Ku laumawmase la ngwalai iniane si karivu. 44Yakai ku la kiasanu pwalra iniane, ai kadrwa ku umawmase ku pwalrima.
Ku lamabelenge ki swa Yuda kai masalru ki Yesu
45Ku latarakadrekadrenge matwase kikawriva ki marudrange ki barakalai si swa Palrisai; kwini lalasu la kivaga ki tarakadrekadrenge, “Anu kai iluku ki Yesu kela kai?”
46Kwini tarakadrekadrenge la tubalre, “Kadrwana ku umawmase ku miyaiya iniane lu kawriva!”
47Kai swa Palrisai la iya kai, “Mialri numi ka kiatupupuici? 48Kai lamabelengeta si swa Palrisai yakai ku masalru iniane? 49Kilakikai kai pwalringalringau ku hulrice ki Musi ka takukulrungu ka laumawmase yai, lri kipusu!”
50Ikai liniane yakai ku Nikudimu; kai lasu nawamwanga kikawriva ki Yesu. La pakipapawlringau liniane, 51“Ku hulriceta palraingi lu kaidu kilalrana ku tangipapelaelaneini lu kaidu dreleana ku tangimiamiane si tupasalrivane ki umawmase?”
52Kwini lalasu la iya kai, “Mialrisu ka swa Galrilri? Lu drela ki Sisiu, la thingale kadrwana ku twalai Galrilri ku yuginsia#7.52 “la thingale kadrwana ku twalai Galrilri ku yuginsia” yakai ku sidrumane ka hungu ku amia kai “kwini yuginsia lutuumane kai lrika twalai Galrilri”..”
Currently Selected:
Yuhani 7: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017