Luka 22
22
Nimadrekadrekasane ku papacai ki Yesu
(Matai 26.1-5; Maruku 14.1-2; Yuhani 11.45-53)
1Salri padalrunga si daruru kudra ki tatulrisisisiane ki Tamwalrane ku sapawsemakane ka lrisi (Takilragavane ka lrisi). 2Kudra marudrange ki barakalai si tarabulrubulru ki Sisiu ngwalai sa mukuludru ki mapapangale, la kidremedreme ku akibubuliane papacai ki Yesu.
Palraingi ku Yuda kilangai ki Yesu
(Matai 26.14-16; Maruku 14.10-11)
3Kikwini kwidra, ku Satange mwadringi ki kidremedreme ki swa Isekaliwte ka Yuda. (Kai Yuda ikai ki ta 12 ka lasitu ki Yesu ka tangea.)
4Kai Yuda matwase kidrekase ki marudrange ki barakalai si mabelenge ki tarakadrekadrenge ki daane ki Twaumase, ku lrika apangimiane malra ki Yesu si baai liniane. 5Kwini lalasu la kiraragai, si palraingi ku wabaai ku paisu iniane. 6Ku Yuda la palraingi, si pathagili silapenga ku apikaiyane, kudra lu kai thingathingale ku mapapangale ku alrane ki Yesu si baai kikwini ki lalasu.
Padulru ku kwaubu ki Takilragavane ka lrisi
(Matai 26.17-25; Maruku 14.12-21; Yuhani 13.21-30)
7Ikai kwini ki tatulrisisisiane ki Tamwalrane ku sapawsemakane ka lrisi, si darurunga ku taculuculwane ku lrulai ka kiu ki Takilragavane ka lrisi ka vai. 8Ku Yesu siakawlu pakatwase ki Pitiru si Yuhani, la cunu liniane iya kai, “Kunumi lu pasikaiya mitane padulru ku kwaubu ki Takilragavane ka lrisi.”
9La kivaga kwini lamalala, “Ani ikai inu amiasu naiane padulru?”
10Ku Yesu la iya kai, “Lu mucekela, lri kipadradresenge numi ku tangea ka umawmase, ku wailuku ku yadilrungane ku acilai, kunumi la tupapalra iniane, mwa kudra ki tawdaananeini kudra daane. 11Si kivaga kudra ki tawki ki daane iya kai, ‘Ku Sinsi kiavaga, yakai inu kudra taikaiyane ku ataelreaneli ki lasituli kane ku kwaubu ki Takilragavane ka lrisi?’ 12Kwini lasu lri ililuku numiane mwa ki nikai ki daane padrele ku pinadulrwanenga ku taluvaale kudra ki swaadrau ka taikaikaiyane; lai lri ikai numi kwini padulru.”
13Kwini lalasu la katwasenga, ku kipadradresenge lini mararaamau ku taiyane ki Yesu, kwini lalasu la padulru ku kwaubu ki Takilragavane ka lrisi.
Kwaubu ki Tamatama
(Matai 26.26-30; Maruku 14.22-26; 1 Kurintu 11.23-25)
14La darurunga ki satukwauawbu, ku Yesu la nene; ku lasitu la mwa kilringulu iniane. 15Ku Yesu la iya kai liniane, “Siadramadraamaku ku apaswalane kai ki akipakwalrianeli ku ataelreaneli numiane kane kai kwaubu ki Takilragavane ka lrisi. 16Nau pelaela numiane, lu kai ikai ki kuni ki Twaumase si ikai ku patengatengane ku pacugane kikai kwaubu, kainaku lri kanenga inane tupela.”
17Ku Yesu la malra kudra kupu, si kiaseasene ki Twaumase, iya kai, “Kunumi malra kikai yakupwane, si mavalavala ungulu. 18Nau pelaela numiane, twalai kaikameane pakeela lubibilrili, lu kai keela kudra kuni ki Twaumase, lutuumane kainaku lri ungulunga kikai budu ka bava.”
19Ala malra kudra pange, si kiaseasene ki Twaumase, la apapithipithingi, si apavalavala baai liniane, la iya kai, “Kikai kinawmasaneli, ka pasiakai numiane cilri. Kunumi piapianga kai si ngulringalringau nakwane.” 20Sa maka kanenga, la pangialrau malra kudra kupu si iya kai, “Kikai kupu yai bavane ka sakiketeketane ki Twaumase, ka niarakaiyane ku tapasikaiyaneli numiane tueraerai ka erai si paacegecege.#22.20 Yakai ku lasidrumane ka hungu ku kai wapacase kikai mwasaka 19 “pasiakai numiane ... si ngulringalringau nakwane”, kikai vaga si mwasaka 20 ka vaga.
21“Kunumi drela, kwini lri kilangai nakwane ka umawmase yakai kai taelre nakwane ki cukui! 22Ku Lalake ki Umawmase unu lri singikai ku takelretane ki Twaumase si tarumara ku apacadhane, ai kwidra kialangai iniane ku umawmase yakai ku amatikurwane!”
23Kwini lalasu la makivagavaga, “Kudra lri pia kikai aneane?”
Ku lasitu makaririvu lukaaneane ku sanianiangenga
24Kwi lasitu yakai ku tamakaririvwane lini, ikai liniane lukaaneane ku sanianiangenga. 25Ku Yesu la iya kai liniane, “Kai latalialalai kai kawmasane yakai ku puku lini kadrenge ki laumawmase, si ku magagemegeme niyane la kimusakene kipasudalepe ka amani ku tarapalribulu; 26ai kai numi ka ngimiyaiya kikai. Ikai numiane kudra sanianiangenga naingibalre ngimia kamani ki lavavalake; kudra tamatama ka taramasasangililuku, lri ngimia ki sasiakawlu. 27Madradrau kwini wanene si kanekane ungungulu, madradrau kwini kiasikawkawlu iniane? Itara ka madraadrau kwini wanene. Ai, kunaku lu ikaiyaku numiane yai amaniaku kudra tarakisikawkawlu marasikaikai ki umawmase.
28“Ikai ki takipakwalrialianeli, kunumi tataelreane numi nakwane. 29Kikai lri malraku kudra patarumara ki Ama nakwane kudra puku ki talialalai si baai numiane. 30Kunumi lri ikai numi ki kunili si kibalrubalrulu nakwane kanekane ungungulu, si lai nene numi ikai ki taetalane si saibange ki swa Iseraylri kudra ki tai 12 ka zuku.”
Pakanaswala pelaela ku kaika athingalane ki Pitiru iniane
(Matai 26.31-35; Maruku 14.27-31; Yuhani 13.36-38)
31Ku Yesu la iyana kai, “Simune, Simune! Ku Satange kiapalrainginga ku akelane kituthiathingale numiane, lri pavalri numiane mia ki tarakawaungu lu pavalri ki mugi. 32Ai pasiakainga naku muswane kitutubi, ku kaika asakacilrianesu kwi salrwanesu. Lu ngibangulungasu papia nakwane, lri kamanisu ku tarapasapukupukwane ki laretesanesu.”
33Ku Pitiru la iya kai, “Tamatama, palraingaku tupapalra muswane kiemenge, taelre pacai!”
34Ku Yesu la iya kai, “Pitiru, nau pelaela muswane: Kaikameane lu kaina kuka, lri kingitulrulusu kainaku wathingale iya nakwane.”
Tapaiswane, kadrai, lrabu
35Ku Yesu la iyana kai liniane, “Ku paswalala sa sikawlaku numiane pakatwase, amiaku kai numiane madha ililuku ku tapaiswane, madha ililuku ku kadrai, ku kece, kunumi la ikaiyana ku kawrame numi?”
Kwini lalasu la tubalre, “Kadrwa.”
36Ku Yesu la iya kai, “Ai kikai ku yakai ku tapaiswane si kadrai yai, iluka; ku kadrwa ku lrabu, kilangadha ku laimai numi si langai nguvaeva. 37Nau pelaela numiane, ku taiyane ki Sisiu, ‘Kwini lasu kiapakililuku ikai ki pasalrivane’, kwini vaga lri tara ngimiya ikai ki kinawmasaneli. Ku patengatengane, kudra nipacasane pangukai nakwane patuelre yai ngiamiamianga kikai.”
38Ku lasitu la iya kai, “Tamatama, drele, kawvai drusa kai lrabu.”
Ku Yesu la iya kai, “Makakelrete!”
Ku Yesu yakai Ulrive lregelrege inulri
(Matai 25.36-46; Maruku 14.32-42)
39Ku Yesu samwa latadre ki cekele, paiya ku tapiapianeini papia Ulrive lregelrege; ku lasitu la tupalra iniane. 40Sakelanga kwini, ku Yesu la iya kai liniane, “Kunumi inulrinulria, amani lu kilrilrigili numi.”
41Ala katwase kidaili ku Yesu liniane, lri ikai ku lu dukulrane ku lrenege ku adailane, la pidruru ikai kwini inulri, 42si iya kai, “Ama, alaiyasi palraingisu, kikai mapalili ka kupu alra mwalra! Ai, madha singikaikai ki kidremedremeli, pangimia kamani ki takidremedremanesu.” [ 43Yakai ku tangea ku sasiakawlu belenge ku twalai subelebelenge papia iniane adrelane, padrima iniane ku puku. 44Ikai kudra ki takiangeangane turamuru, kai Yesu arwa ka parawramuru inulri, kudra igipini mia ki erai adidi mucakena.#22.44 Yakai ku lasidrumane ka hungu ku kai wapacase kikai mwasaka 43-44 ka vaga.]
45Samaka inulri, la ngidrakale ku Yesu, si siwlri mwa kwidra ki lasituini, la drele liniane ngwalai ku sakwalrialri ki kidremedreme lini la kasipelrenge ereke. 46Ku Yesu la iya kai liniane, “Kunumi anu sakaereke? Ngidrakala, la inulria, amani lu ulrabuku numi ki salrilrigilane.”
Ku Yesu kiapwalra
(Matai 26.47-56; Maruku 14.43-50; Yuhani 18.3-11)
47Ku Yesu sa kawrivariivana, yakai kudra sakaturedele ku wakela. Ikai kwini ki ta 12 ka situ kudra tangea ka sia Yuda amani ku waililuku liniane, la arwacucubungu si lri uma ki Yesu.
48Ku Yesu la iya kai iniane, “Yuda, ara umasu si kilangai ki Lalake ki Umawmase?”
49Kwini taelre ki Yesu kwini lasitu sa drele kai tangimiamiane, la iya kai, “Tamatama, lri dulru nai ara lrabu vathale?” 50Ikai liniane ku tangea la musudru ku lrabu si pwa vathale papia kwini ki sasiakawlu ki abebeelengenga ki barakalai, si lradipi pavanale ki calringaini.
51Ku Yesu la iya kai, “Madha pwalrimanga!” La seege ku Yesu ku alrimaini si ecenge kwini ki calringa, si pawdringai iniane.
52Lakamani, ku Yesu kawriva kwini ki wakela ruthuku iniane kwini ki marudrange ki labarakalai, si mabelenge ki tarakadrekadrenge ki daane ki Twaumase, si laciwru iya kai, “Kikai iluku numi kai lrabu si angatu kainganai pwalra nakwane, wamalra numi nakwane tusadre? 53Lukakaiya taelreaku numiane ikai ki daane ki Twaumase, la kai numi pwalrimalrima; ai kikainga tangilralrailraingane numi, magagemegemenga kai dradrimitane.”
Ku Pitiru kai wathingale ki Yesu
(Matai 26.57-58, 69-75; Maruku 14.53-54, 66-72; Yuhani 18.12-18, 25-27)
54Kikai kwidra, kwini lalasu la pwalra ruthuku ki Yesu, si iluku pwa ki daane ki abebeelengenga ki barakalai; ku Pitiru la sadaili kabibibilrili. 55Kwini lalasu la twapwapui ikai kalatadrane, si ngithalringulu ki apwi nene, ku Pitiru maiyalri ikai kiibu liniane. 56La ikai ku tangea ku ababai ka tuvange la drele ki Pitiru sa nene idididiu, la lengethe drele iniane, si iya kai, “Kikai umawmase kai, papapalra kavai ki lasu!”.
57Ku Pitiru la kithungu si iya kai, “Kusu ka ababai, kainaku wathingale iniane!”
58La kai tarathainu, la ikaainga ku umawmase ku kiararaakete iniane, si iya kai, “Kusu maiyalrisu ka papapalra liniane!”
Kai Pitiru la iya kai, “Kusu yai, kainaku kaamani!”
59Sa ngilribatenga lri ikai kau ngwavaeva ki tuki, la ikai ku tangea ku malritheethe iya kai, “Kai pasamali, kikai umawmase kai, papapalra kavai ki lasu, asi lwiyane kai lasu maiyalri ka swa Galrilri ka umawmase!”
60Ai ku Pitiru amia kai, “Kusu ka amiamia kwini, kainaku wathingale lukamanemane kai kawrivarivasu!”
La kaina tulrepenge ku vagaini, ala kuka. 61Ku Tamatama la ngibangulu, si dreele ki Pitiru; kai Pitiru la ngulringau ku taiyane ki Tamatama iniane ku vaga iya kai, “Kaikameane lu kaiyana kuka, lri kingitulrulusu ngikawlrawlravane nakwane.” 62Ku Pitiru la katwase mulatadre, la kai beserenga si tubi tungawngau.
Ku Yesu kiasivavangane kitusinalreme
(Matai 26.67-68; Maruku 14.65)
63Kudra wakadrekadrenge ki Yesu ku laumawmase la tumeameamelrace iniane, si lrumai iniane. 64Kwini lalasu la tamenge ki macaini, si kivaga iniane, “Ala pelaelaa, laka aneane kai walrumai muswane?” 65Kwini lalasu la iyana ku makaalra ku satusinalrelremeane iniane ka vaga.
Yakai ki takaigigiane kisaibange
(Matai 26.59-66; Maruku 14.55-64; Yuhani 18.19-24)
66Sakaliarenga, ku laciwru ki swa Yuda, si lamarudrange ki barakalai, si latarabulrubulru ki Sisiu yaelrelrenga makanaelre, si malra iluku ki Yesu mwa ki takaigigiane lini. 67Kwini lalasu la kivaga iniane, “Ala pelaela naiane, amanisu kwidra Kirisitu?”
La tubalre ku Yesu, “Adravane pelaelaku numiane, kunumi kainu lri kipawtenga; 68alaiyasi kivagaku numiane ku manemane, lri mialri numi kai maka tubalre. 69Ai twalainga kaikameane, kai Lalake ki Umawmase lri takaenenenga ikai vanale ki sapupukuanenga ka Twaumase.”
70Kwini lalasu la makitu iya kai, “Lu mia kikai, amanisu kwidra Lalake ki Twaumase?”
Ku Yesu la tubalre, “Amani numi ka amani iya nakwane!”
71Lakamani ku iya kai kwini ki lalasu, “Kaita mwarikainga ku manemane ku wasiwmi! Kialalrangata makanaelre ku tapuvaganeini kawriva!”
Currently Selected:
Luka 22: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017