LUKAS 24
24
Yesus nikiju hanyenti
(Mat. 28:1-10; Mrk. 16:1-8; Yoh. 20:1-10)
1Sop nya ittei mpam di ui-gwang kei di itin ei su biyuug sut ei hak mihyeti mem njap bigyoti ei njap di hyep di nok ide las gom. 2Yuug krau bingat lo, tig mma di jo ser jui nuhui son leu jui nuhui tu. 3Lene icoi ug ei hak mihyeti bingat lo, Tuhan Yesus ningut jo bi. 4Apino ingon kiowi niti bigya hak lo, pinai nya ibou can di ijuk sinsun di sieng-siau kei ittau kros bigya kui yok. 5Sop nya idigit tut nindig bibor bikuk yonti ug ei dihyeisi mpe dino pinai cin ihig ser yok “Nggon rino jinggok No di niyaijo ei nimai nya ikieti i? 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33 Ningat rin ei mpia dini bu bi. Noni kiju hanyen leu nimai eisi tu! Jiyok ngon kep mun di Noni pai bije tirigi ningat rin ei Galilea pima bi e? 7Noni pai bije nipou su ‘Suar tungwatu nya ikes Munggwom Tungwatu Nipmot ei yo di isibut nya indati leu api yoni mipek Noni ei biei salibti noro njap ningai bu ne Noni mikiju hanyen leu nimai eisi ri.’ ”
8Lene sop nya igyok ngon kep Yesus nipaisi dima. 9Tirigi ingkwei hanyen leu hak mihyeti lene ipui kep mun di bitimon yok hagom bak yo di igya kui Yesus ibou simnaibrimiggom kin nindigsi nya cem. 10Sop di ipui kep nipek kepti dima bak yo di ibit Yesus nya inyeng rino Maria Magdalena kin Yohana kin Maria di Yakobus nipmem kin sop nindigsi di ibit yok cem yahagom. 11Noro yo di igya kui Yesus ikan bigya sop nya ipai-pai wai he. Gima rino ingon bit ighyet bi. 12Noro Petrus kiju bidor ug ei hak mihyeti lene hun kep ndam jui nuhui bitou kep mun di joti nya lene ngat sre di inggai nimai ngut eisi he. Noni ngkwei hanyen ug ei ig pima lo, ningon kiowi tut mun di pek kep dima.
Yesus ndo Nonti ningat bak ibou can ei pui sinon ndam Emaus
(Mrk. 16:12-13)
13Njap dima cem yo di ibit Yesus ibou can imbut kak puig sinon ug ei minu mien Emaus di jo dideu Yerusalem ba, nitingti dem kilometer simnaibrimiggom. 14Imbut ug ei puig sinon lene isimbot kep biyam tut mun di cut igkep Yesus. 15Isimbot kep biyam bihig yam tut sri lene Yesus Nonti hatap yok bibit yok. 16Yoni ingat ningat noro ingat igbit niimaisi bi lewo mun nyeng hi bindei ba, ingat igbit Noni bi. 17Lene Noni hig ser yok “Jisimbot kep biyam tut mindei ei puig sinon dini i?”
Yo cin iba ingwak di mbriu biya igyati kin ingon di buhun. 18Lene gi hi di Kleopas hig ser Yesus “Nani ne no di ngkiai tindur ei minu ndig Yerusalem dini rin apino bitig dino akan tut mun di pek kep ei minu ndig dima mem njap ndini kwei bi e?”
19Yesus hig ser yok “Mindei rino pek kep i?”
Lene ibuhup “Mun di cut igkep Yesus di nok nabi leu minu ndig Nazaret. Nihyet kin niyai munti nya sindem bibor ei Allah kin tungwatu nya yahagom igyai him. 20Imam nindig nya kin nibou mben Yahudi nya ikes Yesus ei nibou Roma nindati lene noni jem nimai gau Yesus leu api pek Noni ei biei salibti! 21Noro nikan bigya Noni mikwek nye di mben Israel ba, niyati kwes hanyen! Lene gima he bi lewo mun dima cut igkep Noni acan ba, njap di ammani ne dem njap ningai su. 22Sop ibou poi di icoi bit nye ibindei biningon digit. Lewo yoni yuug ei hak mihyeti mem njap bigyoti, 23noro ingat Yesus ningut bi. Ingkwei hanyen bipai binye bipia ingat malaikati nya di ipai biyok bipia Yesus No niyaijo yo. 24Ibou poi di icoi bit nye yuug ei hak mihyeti leu api ingat hagom bit leu nok sop nya ipaisi noro ingat Yesus ningat bi.”
25Lene Yesus pai biyok “Jingon mbum yo! Jingon tindak cem lewo jingon jo kep mun di tibim ei nabi nya yuhui him bi! 26Suar jide Nibou Ndig di teu tungwatu nya biyai niyaijo nijep biyok yai ninghuisi wei nipou leu api ug krau Nide nikei-kau-keisi bi e?” 27Lene Noni pai mingat tut Allah Nihyet di pai sut Nonti hagom brei biyok bikinyon ei Musa de srat nya kin nabi nya ide srat nyati.
28Lo bi lene ikwei dideu minu mien di yo cin yuug eisi dima tu. Yesus bon Nonti nok no di mbut kikau, 29noro yo cin dima ibrim ingkek kep bipai biNoni “Ma akwei bong bit nye lewo mpia jinjui su ba, mmun tu.” Gima rino Noni bit yok ug ei ide ig. 30Tirigi Noni gwam kui meja biyem njita bit yok lene Noni krau roti bipai sigyo kep bak Allah biki kukiau tut yok. 31Leu api mun di bindei dino ingat igbit Noni bi pren kros leu lene ingat igbit Noni noro Noni pror kros leu yok bou igyai him. 32Yoni inga leu bipai biyam “Noni mbrap bit sa bindo igbit Allah Nihyet bisa ei puig sinon pima lene nihyet tot singonti bi e?”
33Ikiju haninyai bimbut mem jam dima bingkwei hanyen ug ei minu ndig Yerusalem. Leu api ittau kep ibou simnaibrimiggom tirigi induk yam bit nindigsi nya. 34Yo dima ipai bak yo cin “Yesus kiju hanyen leu nimai eisi bindo nonti bak Simon tu!”
35Lene yo cin ipui sut mun di pek kep mem yok kak puig sinon kin notou ingat igbit Yesus tirigi Noni ki roti tut yok cem.
Yesus ndo Nonti bak yo di ibit Noni
(Mat. 28:16-20; Mrk. 16:14-18; Yoh. 20:19-23; Kis. 1:6-8)
36Tirigi yo cin ipui kep biyok lene Yesus ttau kros hak biya ei ikieti bipai biyok “Ma jingon jo nyahan!”
37Yahagom inghuisi mpig sut ba, ittin tut nindig bibor lewo ikan bipia gima ne njungwes ri. 38Noro Yesus hig ser yok “Nggon rino jittin Da i? Nggon rino jingon kiowi tut Da i? 39Jingig jiyai kep dinda kin dimig leu api jikan tut bipia Dani ri. Ma jiprios dingkek dip leu api jo nibreisi mem je bipia gini ne dingat ri. Njungwes bon ninghui kin ninjum noyam kin dinghui kin dinjum di jingat bou jiyai him dini bi.”
40Tirigi Noni pai biyok nok lene bindo ninda kin nimig biyok. 41Noro gi mbun ingon jo kep Noni bi lewo ingon nggan-triot binggap leu sut Noni ser. Yesus hig ser yok “Jide njita niken hi no jo dini e?” 42Igyai wau nghui di ingei ei su biNoni. 43Noni krau wau dima biyem hagom bingwig bou igyai him.
44Yem njita tu lene Noni pai biyok “Mun po dipai bije nipou tirigi dingat rin bit je pima suar dem igbit. Gima ne mun di ipas ei Puig Yahudi nicukti nya kin nabi nya ide srat nyati kin srat Mazmurti tut Da hagom suar dem igbit.”
45Leu api Noni bindei ba, ingon dor niti leu api ikan igbit tut Allah ningon kanti di tug hon Nihyet. 46Lene Noni pai biyok “Suar Nibou Ndig di teu tungwatu nya biyai niyaijo nijep biyok yai ninghuisi wei leu api kiju hanyen leu nimai eisi ei njap gi niningai. 47Leu api suar tungwatu nya itri tut nittin ser sisar kin nikiek ndam Allahti kin nihyet tut nikos ser sisarti tug hon Nibou Ndig di teu tungwatu nya biyai niyaijo nijep biyok ninyeng bak tungwatu dihyeisi dini hagom lo, ikinyon eisi ei minu ndig Yerusalem bibie ug e. 48Jingat mun di pek kep dima yok hagom bou jiyai him tu. 49#Kis. 1:4 Ba, midipinak No di Dicig preu sut ei mem je tu ei je dip. Noro suar jigwam ei minu ndig dini bibou nisindemti di juk kwei leu Allah minggai je ug e.”
Yesus kui ug ei gwamti
(Mrk. 16:19-20; Kis. 1:9-11)
50Gima ngwig lene Yesus buwak yok bibie tut yok leu minu ndig ug ei minu mien Betania. Noni yai mun di kei bak yoni ei sirima. 51Tirigi Yesus yai mun di kei biyok leu lene Noni kes yok leu bikui ug ei gwamti. 52Yoni iba ibiau bicom mpia binggei sut Noni leu api iba ingon di llei bibor bingkwei hanyen ug ei minu ndig Yerusalem, 53binggei sut Allah ei Tuhan De Ig bikwop njap-njap.
Currently Selected:
LUKAS 24: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena