Mark 12
12
Yafukon te sene Iyesu me, te ken yirr rrlōne rrmelole.
1 # Asa 5:1-2 Te Iyesu te mang rrō horrutōn mwenan susuran nga bwe byane hae brris nyer, vanten ne wuhuran ne lingsenean nyer, te elta nyer. Te fe lon tabarryean mnii mōn ge, “Ran wobung hu yafu hu te rrwene ōrr lonōrr ne woye ge err rrō rrwene wekonkon an ne. San woye ge a, nge krreb. Te te lngi yeo goro, te te gli bulubul hu ge ne rrwene wekonkon an lon. Ngate, te nga kilkile byarr hu bya mre ge bya mre, te e ten teter goro an. Ngate yafu te lngi ōrr lonōrr bya lon veran vanten worhu ge he en rrō terfon, te en rrō homnen buverr en. Te en nga rrō sene wuōrr nan byane yafu ne ōrr lonōrr.
2 “Bone ge woye nan nyer te men, yafu ne ōrr lonōrr te hutamne mwenan vanten ne ōman hu byane ge nyer ge err rrō terfon ōrr lonōrr, he ne rrya mwenan wuōrr ne ōrr lonōrr.
3 “Te ge nyer ge err rrō terfon ōrr lonōrr, err halkete vanten ne ōman ge a, ete whe te err hutam mōle. Ngate err rrlōn nga sene sese te hu byanen.
4 “Te yafu ne ōrr lonōrr te hutamne mwenan vanten ne ōman hu mōn bya lonōrr. Ge nyer ge err rrō terfon ōrr lonōrr, ete whe bweten, te ete rrwene sese worhu mōn byanen. Te te rrwene ge lun te krir ge lun te krir.
5 “Ngate, yafu ne ōrr lonōrr, te hutamne mwenan vanten ne ōman hu mōn te a, te err toō kabnu. Ete rrwene te hel byanen vanten te e lol mwena yafu ne ōrr lonōrr ge a, te yi nga en ge nyer ge err vya teemō. Worhu ete whe nyer nga rryi le, a worhu err toō kakabnu nyer.
6 “Vanten ge te nga rru, he yafu ne ōrr lonōrr ne nga hutamne, te e mwenan bari terere ge lon te jejee sene. Ngate te hutamne mwenan terere mleng byanen vanten ge err rrō terfon ōrr lonōrr. Lon mwenan rrinrrinan te rrō rrme he, ‘Ni nam yekya ge efe tengne mweneng terere.’
7 “Te vanten ge err rrō terfon ōrr lonōrr, err rrō susur e nyer ge, ‘Terere mwenan yafu ne ōrr lonōrr sirr nge a. Ge he yafu ne ōrr lonōrr eb myarr, nge eb nga ktu meyen. Mi me, yi toō kabnu, te tan ge a eb nga e angken ge.’
8 “Ngate err halen terere mleng ge a, te err toō kabnu, te err koōne tablin bya tobi yeo.”
9Tebyan totoōtean ge le, Iyesu te whu nyer te fe, “Ha nge yafu ne ōrr lonōrr eb nga rrwene? Yafu ne ōrr lonōrr eba me te me toō kakabnu ge nyer ge em rrō teterfon ōrr lonōrr, te eba lngi ōrr lonōrr bya lon veran vanten rrute.
10 “Mwi yi be, mirr rrlō yekya rral hu lon Tuuankon rrō fe,
“ ‘Berr meleng ge vanten ne ōmne im an nyer, err fyaabōne ge telōn wu ne sese te hu,
te mwe nga me e berr meleng ge lon tobol e im.
Mwe yekya eb hal konone im te eb hu rrya myaōan ne im.
11 Berr meleng ge le, Yafukon nge te rrwene,
te bya wu ten tam lon metangken.’ “ Sam 118:22-23
12Ngate yafu lamlam ta Ju ge nyer a mōn ete rrwekya he en hale Iyesu bya lon im ne jenjenan, tebyan ge err yekya ge te rrō wliwli nyer tere totoōtean. Te nyer lur te rrō myorr ne vanten nyer tebyan ge vanten rrute ete rrmelole tolo Iyesu. Te rrwene ge err yel metene Iyesu.
Sene mwenam myuran byane Yafukon.
13Ngate err sene Farrasi worhu mōn krinen vanten worhu mwena King Herrot he en me whu Iyesu ne wuhuan worhu. Tebyan ge err rrō rrwekya ge he ne murr lon tolon nyer.
14Ngate nyer err me lhe nge, te err fe byanen ge, “Vanten ne Wuhuran, myam yekya ge neng ōm be vanten konon hu rru. Vanten te hu tōlō ngrengre eba rvi neng ge efō rrutōn mwenan rrinrrinan. Neng ōm rrō fe sese ge be fetinan, te ōm rrō whure rruan ge Yafukon ma rrmelole ho. Te gemya myam temelole mya yekya ge, bu ten ge ken ge Ju, yi rrō sene buverr ge be takis, byane Sisa ge be king ne ōrr Rrom, te be king ne vere rrute mōn, o tōlō knon bu rru? Emya gye, o emya rrlōne gye?”
15Te Iyesu te yekya ge ge nyer a err rrō seseviine nge nga. Ngate Iyesu te fe byane nyer ge, “Tebyan ha mim rrō rrwekya ge he ena murr? Mi ktu buverr mwena Sisa te hu me. Te ena lhe.”
16Ngate ete ktu buverr nan hu byanen, te te whu nyer ge, “Kilino si nge mu rru en? Te sa si nge mu rru ran?” Mōl mōn, nyer err fe, “Kilino Sisa nge le, te san mōn mu rru ran.”
17 Iyesu te fe byane nyer ge, “Sese ge be mwena Sisa, semōle byane Sisa. Te sese ge be mwena Yafukon, semōle byane Yafukon.” Te vanten ge nyer a err non metenen ha ge Iyesu te fe.
Fō nga totor mōl lon myarran, te fō nga rru krine Yafukon ngamto nga.
18 # Ōman 23:8 Ngate #12:18 Satusi ge em be wor vanten hu ne ōrr Isrrel ge mwenar rrinketean he vanten ge rrō myarr tōlō mimi eb nga totor mōl mōn.Satusi worhu err me lhe Iyesu. Satusi ge nyer a mwenar rrinketean he vanten ge rrō myarr tōlō mimi eb nga totor mōl mōn.
19Err fe rral e sesevii an mōl mōn byane Iyesu ge, “Vanten ne Wuhuran, Mosis te rrhu lon mwenangken Tuuankon ge,
“ ‘Bone ge vanten hu me myarr metenen mwenan tarirr,
te mwenarō terere mwe rranga,
taalan vanten ge me myarr a, eb nga yene silna ge a.
Rruan ge le rrō rrwene tebyan ge mwenarō terere eb nga ktu san vanten ge te myarr le.’ Titrronami 25:5
20“Te fō fe me ne gemya, batatōn te e liuru ho; tamō nan te yene vehen hu, te te myarr metenen, te mwenarō terere te rranga.
21“Ngate, tangatōn taalan tamō te yene silna ge a, te nge mōn te myarr metenen, te mwenarō terere te rranga. Taalan ge sul nan mōn, te rrwene rruan ge taalan tamō nyerō terō rrwene, te nge mōn te myarr metenen vehen ge a.
22“Rruan ge a te tongve batatōn ge err ve liuru ho a, nge bonga err yene vehen ge a, te err myarrmyarr bonga, te mwenar terere te rranga. Ngate vehen ge a te nga myarr, te e tene nyer.
23“Te fō fe me ne gemya: lon giri wobung, bone ge vanten nyer efe totor mōl lon myarran, vehen ge a, eb nga e ge mwena si, tebyan ge batatōn ge err ve liuru ho le, nge err yene vehen ge a rru.”
24Ngate Iyesu te fe byane nyer ge, “Mwenami rrinrrinan me byasel ho lon yekyaan ne totor mōl an metenen myarran. Mim yekya tebyan ha? Mim byasel tebyan mirr rrlō yekya tuuan ge mo ho lon Tuuankon, te mirr rrlō yekya helan mwena Yafukon.
25 “Bone ge ge nyer a efe totor mōl lon myarran, tōlō mimi efe nga ye mōn, rruan ne yean rrō nong. Nyer efe me yen abhyobhyorkon ne tōngtōng.
26 “Te lon totor mōl an metenen myarran, gimi emi rrinrrine tuuan mwena Mosis te saarōne liye kakae hu ge fyang te rrō frifri ran. Bone ge le Yafukon te fe byane Mosis ge,
“ ‘Ni nam be Yafukon mwena Abrraham,
te ni nam be Yafukon mwena Aesak,
te ni nam be Yafukon mwena Jekob.’ Yel Metenen 3:6
“Mwi yi be, mirr rrlō horrutōn tuuan ge le wobung te hu?
27 “Yafukon ge a be Yafukon mwenan vanten ge em myur ho, mwe yen Abrraham, Aesak, te Jekob. Tablisul nga te myarr ran tan ge fyan ge li, te musu myur nga ho krine Yafukon bwe. Yafukon tōlō e mwena vanten ge em myarr ho. Mwenami rrinrrinan me byasel bonga ho.”
Lom eb jejeene Yafukon lon hingim bonga.
28Te vanten hu ne wuhuran ne lingsenean te rrō rongtane ge Satusi worhu err rrō rrwekya ge he Iyesu ne murr lon tolon nyer. Te te rongtane ge Iyesu te rrō fe rral ge rrwu byane nyer rrutōn mwenar wuhuan. Ngate te me lhe Iyesu, te te whu ne wuhuan hu ge, “Lingsenean bonga mwena Yafukon, ge be nge mu wu ten mōn bwe mwe saavi lingsenean rrute?”
29Te Iyesu te fe byanen ge, “Lingsenean ge be tamō me fe,
“ ‘Buluim ne ōrr Isrrel, mi rongta sene!
Yafukon ge mu rru mre,
nge nga be mwenangken Yafukon,
te nge hobōn nga nge be Yafukon ge mu rru mre.
30 Te lomi eb jejeene Yafukon ge a ge be mwenami Yafukon
lon lolomi bonga,
te lon mwenami myuran bonga,
te lon mwenami rrinrrinan bonga,
te lon mwenami helan bonga.’ Titrronami 6:4-5
31 “Te lingsenean ge be e ru nan me fe,
“ ‘Lomi eb jejeene ge nyer ge em ho tiliuti gimi,
te emi rrwene e wu ten byane nyer
eb yen ge mim rrō rrwene mu wu ten me ne gimi hobōmi.’ Lefitikas 19:18
“Lingsenean te hu mōn, tōlō rru mre ran lingsenean ge nyerō a.”
32 # Tit 4:35 Ngate vanten ne wuhuran ne lingsenean te fe byanen ge, “Vanten ne Wuhuran, tolom nyer ma knon bonga. Sese ge ōm fe be fetinan ten. Yafukon ge mre nga, nge be Yafukon. Yafukon mōn mwe rranga rru.
33 # Hos 6:6 ”Te longken eb jejeene nge lon lolongken bonga, te lon mwenangken rrinrrinan bonga, te lon mwenangken helan bonga. Te longken eb jejeene ge nyer ge em ho tiliuti ken, yi rrwene e wu ten byane nyer, eb yen ge yim rrō rrwene mu wu ten me ne ken hobōngken. Bone ge yim rrō rrwene lingsenean ge nyerō le, ge le mwe saavi ge yim rrō rrya sesebno nyer, te yim rrō toō kakabnu nyer, te yim rrō fnefne byane Yafukon lon imkon ge rrlam Jerrusalem.”
34 # Luk 10:25-28 Iyesu te rongtakya ge tolon vanten ge a te knon. Ngate te fe byanen vanten ge a ge, “Ōrr rrlō rru hatin metenen limhian mwena Yafukon.” Ngate tebyan surmōlan ge rrwu mwena Iyesu le, telōn e ngrengre vanten te hu ne nga rrme rral e seseviian te hu ge he neng nga fe byanen.
Iyesu be Mesaya mwena King Tefit.
35Bone ge Iyesu te rrō whure vanten nyer lon hereere ne imkon ge rrlam Jerrusalem, nge te whu wuhuan hu byane nyer, te fe ge, “Tebyan ha nge vanten ne wuhuran ne lingsenean em rrō fe ge Mesaya be terere mleng mwena King Tefit? Sarōan ge a, tōlō e fetinan.
36 “Nin Myuran Kon te sene yekyaan ge a byane King Tefit. Te rrwene ge King Tefit te fe,
“ ‘Yafukon ge mre te fe byane mweneng Yafu ge,
“Ō tataa ran bamtō ne ni, te fō taa bwe.
Ena rrwene mwenam tōnyōn nyer efe ho fyan mwenam helan,
te efe me e mwenam vanten ne ōman nyer.” ‘ “ Sam 110:1
37Ngate Iyesu te surfyaara susuran ge a byane nyer, te fe, “Mi rongta sene, King Tefit nga nge te rrō je, ‘Mweneng Yafu.’ King Tefit mwe yekya ge Mesaya ge a, be mwenan Yafu. Ma rrwene ge Mesaya ge a, tōlō e terere mleng mwena King Tefit.” Vanten ge nyer a, ge err rrō rongne Iyesu, err ve lol ge err ve lol, te err rrō kwarr tebyan tolon nyer.
Fō sene sevyaran lon lolom byane Yafukon.
38Lon mwenan wuhuran ge te mnii mōn, Iyesu te rrō fe ge, “Emi rrmerrme vanten ne wuhuran ne lingsenean nyer. Nyer, em rrō rrinrrin lamlam ne nyer. Em rrō kokor ul brereō ge me fyaa bu ten en ōrr ge vanten be lol ho en, tebyan ge em rrō rrmelole ge vanten nyer efe rrō fe byane nyer ge, ‘Wei, yafu neng le!,’ lon rruan ne tengnean ge efe mnomno nyer.
39 “Te lon imkon kakae ne tamtamyaōan, em rrō rrmelole ge efe ktu atataa ge rrwu nga, te lon yenyenan lamlam nyer ema rrmelole ge efe ktu atataa mwenan yafu nyer nga.
40 “Te em rrō rrhare silna nyer lon rruan ge em rrō laahe hilngir nyer. Te em rrō rrwene tamtamyaōan brereō nyer tebyan ge vanten nyer efe tengne nyer. Te Yafukon mwe yekya mwenar rruan hakbe ge nyer a. Eb nga sene #12:40 Barryale be jenjenan hu ge eb tamtee ne vanten hu ge vanten hu rrō tamyaō ne vanten an. Te Yafukon nga hbōn mwe yekya eba rrwene. Ge he sōnhal o temyarr hu lon eb jeene eba rrwene tamyaōan ge le, he te e temelolean mwena Yafukon, ma kya eba rrwe. barryale ge eb tongve nyer. Barryale ge a eb hel ge eb hel, eb taavi barryale bonga.”
41Ngate Iyesu te taa rru lon yeo ge te hereere ne imkon ma Yafukon, en ōrr ge err rrō kokoō buverr bya lon siliye ne sevyaran. Nge te rrō lhe vanten nyer ge err rrō koōne buverr bya lon siliye ge a. Te vanten err ve lol ge mwenar buverr te lam ho, err me rrō koōne buverr ge rrlam bya lon siliye ne sevyaran ge a.
42Ngate Iyesu te lhe silna hu ge hilngin te rranga ho. Te te me koōne buverr wa te ru ge mwe yen 1 vatu nga rrō.
43Ngate Iyesu te je mwenan vanten nyer me ne nge. Te te fe byane nyer ge, “Mi lhe silna ge a. Nam rrō fe fetinan byane gimi. Sevyaran ge silna ge a mo koōne, mwe saavi sevyaran ge vanten ge nyer ge hilngir mwe lam ho, em koōne,
44 “tebyan ge vanten ge nyer a, em rrō koōne mwenar buverr ge be mwenar sevyaran ge mwe nga ho mwee nga. Te silna ge a, ge hilngin mwe rranga rru, nge mo koō bonga mwenan buverr ge he ne nga myur rru ran.”
Currently Selected:
Mark 12: mmg
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc. All rights reserved.