Matthew 10
10
Jesus.angan Ngurp Nungantam Twelve Anangan Kuch Thanang Aak Nath-Nathan Iiy-Iiyayna
1Aꞌ nil Jesus.angana pam ngurp nungantam twelve anangan karpam yalmath thanang. Nilan thaw thant, “Ngay inan thawāng niiyant -- ngay maꞌkunch yumpāng niiyanga, aꞌ maꞌ-aathāng niiyang niiyaniya yipam oony way anangan pam wanchantaman kenthān thanang; aꞌ putha pam wancha weechan thanangan-a, niiyaniya miyalathān thanang.” 2Pam ngurp twelve nungantam ananganiya, nil apostles waaꞌ thanang nil ngulan kuchow thanang wik min nungantaman waaꞌ-waaꞌayn pam wanchantan. Pamiya namp inangan nilan miꞌ thanang: Simona (ngul-ngulana Jesus.angana namp thon ngul theeꞌ nungant, namp inan theeꞌanta, Peter); aꞌ putha kuunch nungantam Andrewa, putha pul kuuncham James-a, aꞌ Johna, nhengk nungantam, Zebedee alantamana; 3aꞌ putha Philip-a, aꞌ Bartholomew; putha Thomas, aꞌ putha Matthew, pam nilan wukalan yal-yalmath pam piꞌan alantana; aꞌ putha James-a, nhengk nungantam Alphaeus.antama, putha Thaddeusa; 4aꞌ putha Simona thanan waaꞌ-waaꞌin nunang Patriot, nil puth aak nungantamakana kaangk wun paththama, aꞌ putha Judas Iscariot. Nil pam ilangaman ngulaniya maꞌaman theeꞌow nunang Jesus.an pam soldiers al-alantan mulathayn nunangana.
5-6Aꞌ nil Jesus.an thaw thant pam ngurp nungantam twelve al-alantan, “Niiy paththam aakanakan iiyāna pam wanch Jews al-alantan aꞌ wik min God.antamana waaꞌ-waaꞌān thant. Niiyiya aak thanttam Jews yaꞌ al-alantamakan keꞌ iiyāna aꞌ putha aak Samaria.akana niiy keꞌ iiyān, yaꞌa. Niiy pam wanch Jews anman uwān thanang, puth thanan keꞌ minh sheep yimanangan yaarkamin nungantam piip God.antamana, thaaꞌ-weep-weepantan nungantam. 7Niiy iiyān thant paththama aꞌ wikan waaꞌān thant, aakana thinth ngul kan wamp-wampana nil piip God.angana pam wanch yota maꞌ nungantangan piꞌ-piꞌow thananga. 8Pam wanch way alpan anangana miyalathān thanang; aꞌ pam wanch mulamana, niiy ekathān thanang; puth pam wanch anangan wenchangaman mak thanangwey-a, niiyiya minam yumpān thananga, aꞌ putha oony way ngangkanganwey piꞌ-piꞌantan-a, niiy kenthān thanttamana. Nil puth piip God.angana ngangk minangam maꞌ-aath-aathan niiyang, yipam work piꞌanan iiy-iiyān nunganta, nil wukalakana keꞌam thawan niiyanta theeꞌān nungantan, yaꞌa. Niiyiy putha yimanaman pam wanch anangan maꞌ-aath-aathān thanang, wukalakan niiy keꞌ thawān thantana. 9Aꞌ niiyaniya wukal keꞌ kalān pocketangan, 10aꞌ niiy bag manyana keꞌ kalān may kalanakana. Aꞌ putha niiy keꞌ kalān shirt kuchamana, thonam anman ep-paththamweya. Aꞌ putha thaꞌ murrukana kucham anman thaꞌangaman ngoonchāna, anman thonakama, wiy thampana keꞌ kalān, yaꞌa, aꞌ putha yuk pil thookana thonam anman maꞌangan kalāna. Puth pam wanch anangan niiyan maꞌan-aathan thanang-a, an thaniya may thakan ngul aathayn niiyanga, niiyan puth work inan nungant iiy-iiyaniy piip God.antana.
11“In ngeeyiy a! Niiy aak townak kanan ngoonchān-a, niiy aak pal-puy thathāna nil weeꞌang nathwey ngangk minangam umang wakow niiyangana. Niiyana aak angman wunān aawuch nungantamanga, aawuch anpalman niiyaniy iiyāna aak thonakana. 12Niiy aawuch thon-thonangan wampān thant-a, niiy wik inangan thawān thanta, ‘Ngay kaangk God.ana min-minam paththam iiy-iiyow niiyant.’ 13Than pam wanch anangan aawuch angan wuntana nath ngangk minangaman iiyayn niiyantan-a, yaa, nil God.ana min iiyow thant keꞌ niiyaman thawan thant. Than keꞌwey ngangk minangaman iiyayn niiyantan-a, yaa, nil puth piip God.ana min keꞌ iiyiy thant, yaꞌa.
14“Niiy nathwey aak town thonak ngulan wampān-a, aꞌ than umang keꞌwey wakayn niiyangan-a, aꞌ putha than kaangk keꞌan wik ngeeyayn niiyangan-a, yaa, niiyaniya aak anana too wantāna, aꞌ thaꞌ wookana wunyathān thantana anpalana than kaangk keꞌan wik niiyantaman ngeeyayn. 15Puth in ngeeyāna: aak keenkanamana aak Sodom amanamana puth aak Gomorrah amanamana pam wanch anangana way-wayam paththam iiy-iiyin. Puth ngay inan kan-kanam waaꞌāng niiyant: ngul-ngulana, aak anan wampow nil God.angana umangam thanathow ngampang-a, nilan pam wanch aak Sodom aꞌ Gomorrah anpalmana wayanang waaꞌow thanang aꞌ aak wayak kuchow thanang, puth pam wanch anangaman than kaangk keꞌan niiyang-a, nilana waaꞌow thanang pam wanch anangan way-wayam paththama, aꞌ putha kuchow thanang aak wayakana.
Pam Wanch Way Al-Alangan Wayan Yump-Yumpayn Niiyantana
16“Thon in kan waaꞌāng niiyant: ngay inana kuchāng niiyang pam wanch way-wayam paththam al-alantan. Puth niiyaniya maal anman iiy-iiyān thanttangana, keꞌ minh sheep anman, kulliy yaꞌa; than pam wanch ananganiy-a, kulliy weenayn niiyant, keꞌ kuꞌ kulliy yimanangana. Niiyiya kuchek waap min-minam paththam iiy-iiyāna, aꞌ putha kulwey iiy-iiyān keꞌ minh panch kolat yimananganweya. 17Yaa, niiyaniya meeꞌ yanth-yanth iiyāna pam wanch way al-alantaman than puth ngul mamin niiyang, aꞌ courtak kaliythan niiyang, aꞌ puth piikiythan niiyang aak churches Jews.antamang angana. 18Niiy puth ngayangweya monkan-wak-wakaniy thanan puth nanpalan mamayn niiyang aꞌ umang thanathayn niiyang pam moom piꞌ-piꞌanam al-alantang. Niiyan paththama wik min God.antaman waaꞌān thant aꞌ putha pam wanch Jews yaꞌana al-alantan thamp waaꞌān thant. 19Than umangan thanathayn niiyang pam moom piꞌ-piꞌanam al-alantangan-a, niiyaniy kuchek keꞌ wayamāna, puth niiyana keꞌ ngaantam-ngeeyān niiyantakama, ‘Ngay wik ngeen thawāng e? ngay want-wanttaka wik min thawāng e?’ Yaꞌa, niiy keꞌ ngaantam-ngeeyān yimananganiya, nil piip God.angana ngul waaꞌow niiyant niiy wik ngeenan thawān thant. 20Niiy puth wik niiy-niiyaman keꞌ thawina kuchek waap niiyantam anpalan, yaꞌa; nil Ngeen-Wiy Min piip God.antam alangana ngul waaꞌow niiyant niiy wik want-wanttakan thawān thantana.
21“Aak an-aniyangan-a, pam wiy al-alangan-a, pam kuunch thanttam anangan maꞌam theeꞌayn thananga pam wiyangan mulathayn thanang; putha piipiy wiyanganiya maꞌam theeꞌayn puk thanttam anangan wiyangan mulathayn thanang; aꞌ puk nhengk wiy al-alangana kaath piip thanttam ngangk-wayangam kalayn thanang aꞌ maꞌam theeꞌayn thanang wiyangan yipam mulathayn thanang. 22Pam wanch yotangan ngangk-wayangam kal-kalayn niiyang, puth anpalan niiy ngayangan monkan-wak-wakaniya. Nil weeꞌanganweya keꞌ-ngoongkam anman monkanan-wak-wakow ngayanga, keꞌan eenchow-a, nilaniya ngangk aak umpuyam wunow piip God.antangan. 23Thanwey aak thonamang ngangk-wayangam kaliythan niiyangwey-a, nathwey yukang thak piikiythan niiyang-a, yaa, niiyana aak thonak erkam iiyāna ngula. Kan in ngeeyāna; niiyaniya wik min God.antamana pal-puy waaꞌ-waaꞌān aak town thon-thonangana aak Israel.angana. Work niiyantam keꞌan yippak minchow-a, ngay inman pam nil God.angan kaꞌathaman kuchany-a, ngay palam ngul wampānga.
24“Aꞌ ngay in thampan waaꞌāng niiyant: pam teacherana pam piꞌan iiy-iiyana; puth pam nungantam anangana nilan piꞌ-piꞌan maꞌ nungantangana, than pam piꞌan yaꞌa. An aak yimanangana, nil pam moomana pam piꞌan iiy-iiyan; pam workan iiy-iiyantan nungantan-a, an than pam piꞌan yaꞌa. 25Than pam wanchangan nath ngangk-wayangam kal-kaliythan nunang teacheranwey-a, aꞌ puth way yumpiythan nungant-a, an thanana pam wanch nungantam al-alantan thamp way yumpiythan. Than nathweya pam mooman ngangk-wayangam kal-kaliythan nunang-a, putha way yumpiythan nungant-a, thananiya pam workan iiy-iiyantan nungantana thanang thamp ngangk-wayangam kal-kaliythana putha way thamp yumpiythan thanta. Aakan yimanangan wunow niiyant pam wanch ngurp ngatharam il-ilantan way thamp yump-yumpayn niiyantweya. Than nath way inangan yumpayn niiyantan-a, yaa, an puth kanweya, niiyan ngangk wayaniya keꞌ iiyāna, niiywey ngangk thayanam anman iiy-iiyāna, an puth waya kaꞌathamana ngathar yumpin -- niiyantan-a, yimanangan yump-yumpayn. Pam wanch wiyanganiya Beelzebula waaꞌ-waaꞌantan ngayang, ngay keꞌ moom piꞌan oony way al-alantamana -- yaa, thananiya wik way-wayam paththam waaꞌ-waaꞌayn niiyanga akayn niiyang nenchayn niiyang thaka.
Niiy Pam Wanchantamana Keꞌ Winynyang Moꞌān Thanttamana, Piip God.antaman Ep Winynyang Paththam Moꞌān Nungantamana
26“Yaa, niiy puth keꞌ winynyang moꞌān pam wanch al-alantamana. Than pam wanchangan wik thaaꞌ-mupaman piꞌ-piꞌayn thanttakamanwey-a, ngul-ngulana, maꞌmangkamangan ngul thiichayn wik thanttamana. Than wik ngeenan yump-yumpayn thaaꞌ-mupaman-a, ngul-ngulaniya than maꞌmangkamangana ngul ngeeyayna wik ananganiya than keꞌ thenchwiythan, yaꞌa. Than wiyiya, ep wik min thaw-thawantan thaaꞌ-mupaman, ngul-ngulaniy-a, an than maꞌmangkamangana ngeeyayn ngula. 27Yaa, ngurp ngatharam-ang, ngay puth kanam wik waaꞌ-waaꞌang niiyant ngamp aak pok-pokkapangan iiy-iiyanampa, ngampaniy putha wik anangana maꞌ-mupam piꞌ-piꞌanamp ngamparakama, puth ngul-ngulaniya niiyana meeꞌ yotantang aak engkanang thaaꞌ-aath-aathān thanang, pam wanch anangan, wik min ngatharaman koochanathān thant. 28Niiy keꞌ winynyang moꞌāna pam wanch al-alantaman mulathayn niiyangana; than kemp thonakam mulathiythan, ngangk niiyantamana, an yaꞌa, keꞌ mulathiythan. Niiy nungantam piip God.antaman ep winynyang moꞌāna, nil aak wayakan nath kuchiy niiyang aak umpuyamana, kemp maꞌmangkamana putha ngangk niiyantam thampana theeꞌiy niiyang aak wayang angana thumang pench-penchinweya. 29Puth niiy kan wik inan ngeeyāna: niiy minh panch kucham sparrows nath piiyina wukal manyanga, keꞌ two centsang yimanangana. Nil puth piip God.angana maꞌangam piꞌ-piꞌan thanang minh panch many pattakam anangana. Nil minh panch many sparrowa thonamweya aakangan keekiya aꞌ mul ngulan wuniy aakang-a, an nil thathan piip God.angana, puth nilan kan aak miꞌant minh panch manyan uthamowana. 30Aꞌ putha nil niiyang thamp thathana, nil meeꞌmiya yangan ngeen-ngeenan piꞌ-piꞌaniy kuchek niiyantamangan. 31Yaa, niiyana keꞌ ngangk winynyangan moꞌān, nil God.an ngangk niiyantakam anmana, nil niiyantan ep-paththam kaangk wunan, puth minh panch yot al-alantan yaꞌa, chil-chil!”
32Aꞌ nil Jesus.an thaw ngul, “Ngay thon inan thawāng niiyant. Nil pamwey nath thawiy meeꞌ yotantangana, ‘Nil Jesus.an moom ngathara, ngay pam nungantam inan iiy-iiyanga.’ Aak anan wampow nil piip God.angana pam wanch umangan thanathow thanangan-a, ngayan puth thawāngant piip ngatharamant God in kenyan wunan, ‘Nil pam ilangan keꞌ-ngoongkam ngayangaman monkan-wak-wak, nil pam ngatharamweya.’ 33Puth nil pamwey thawiya meeꞌ yotantangan-a, ‘Nil Jesus.an moom ngatharam yaꞌa, ngayan puth keꞌam iiy-iiyang nungantangana’ -- yaa, aak anan wampow nil God.angan pam wanch umangan thanathow thanang-a, ngayan puth thawāng piip God.antan, ‘Nil ngayang keꞌam monkan-wak-wakanya, yaꞌa, nil pam ngatharam yaꞌa.’
Niiy Kaangk Wunān Paththam Ngatharana
34“Niiyan nath yimanang ngaantam-ngeeyaniy niiyantakam, keꞌ ngay aak iikanakan ukangana yipam niiy yotaman ngangk minangam iiy-iiyān niiyantakamana, kul keꞌanang wun-wunānweya, karpam anman ngaantam-ngeey-ngeeyān. Puth yaꞌa, an aak yimanangan keꞌ wunow niiyanta. Than pam wanchangan ngul thaampwayn thanttakam aꞌ thaaꞌ-thayanamayn ngatharam peeyanang. Than puungk wiyangana ngayang ngul monkan-wakayna, putha wiyangana, yaꞌa, than thaampayn ngayanga aꞌ kulak wenkayn thant pam wanch al-alantan than ngayangan monkan-wak-wakantan, wiyiya mulathayn thanang thaka. 35Aawuch thonamangan wuntan-a, an ngatharam peeyanang wakwiythana, pul nath maꞌ-piip-nhengkwey thaampwiypul pulantakaman ngatharam peeyananga, aꞌ maꞌ-kaath-puk nath thaampwiypul pulantakaman, nath maꞌ-piny-nhengk yimanangan thaampwiypul pulantakaman ngatharam peeyanang. 36Kampan thanttam al-alangan puy-puyam thaamp-thaampayn thanang ngangk-wayangaman kal-kalayn thanang pam wanch monkanan-wak-wakantan ngayangana.
37“Ngay thon inan waaꞌāng niiyant: nil weeꞌ-nathwey kaath piip nungantamak kaangk wunan paththamwey-a, aꞌ ngatharana chil-chilwey kaangk wunow-a, an puth nilana ngurp ngatharam keꞌ iiyow yaꞌa. Aꞌ nil weeꞌ-nathwey puk nungantamakan kaangk wunan paththamwey-a, aꞌ ngatharan chil-chilwey kaangk wunow-a, an nilana ngurp ngatharam keꞌ iiyow, yaꞌa. 38Nil weeꞌanganweya kaangk monkan-wak-wakow ngayangan-a, nilaniya keꞌ ngaantam-ngeeyow nungantakamana, yaꞌa, nil nungantakaman kon-ngathowana. Pam wanch al-alangan nath mulathayn nunanga, keꞌ ngayangan mulathayn, yuk wuuyanangan waanchayn ngayang. Nungkway than wiyangana nath mulathayn nunang-a, nilana ngayang anman monkan-wak-wakow. 39Nil weeꞌangwey wantow ngayangana pam wanch wiyangan keꞌ yipam mulathayn nunang-a, an nilaniya keꞌ wuniy aak ngatharamangan, yaꞌa, an aak wayang wunowa, puth nil weeꞌangwey anman ngangk-thayanangama monkan-wak-wakow ngayangan-a, nungkway pam wanch wiyangana thaaꞌ-thengkathiythan nunang-a, nath mulathiythan nunang-a, an nil ngangk aak umpuyam ngul wunow aak ngatharamanganweya.
40“Ngay wik inan thamp thawāng niiyant. Nil weeꞌ-nathweya ngangk minangam iiyow niiyant-a, an nil keꞌ ngathar yimanangan ngangk minangam iiy-iiyan, aꞌ putha nil weeꞌ-nathweya ngangk minangam iiyow ngathar-a, an nil keꞌ piip ngatharam God.antan ngangk minangam iiy-iiyan nungant thampa, nil puth piip ngatharamangana kuch ngayang aak iikanakan. 41Nil paman nathweya wampiy nil yipam wik min God.antaman waaꞌow. Than weeꞌ-weeꞌanangan ngangk minangam iiy-iiyayn nungantan-a, than puth kaangk wik min God.antaman ngeeyayn-a, nil piip God.angana thaaꞌ-kuumpow thanang pam wanch anangan aꞌ putha min iiy-iiyow thanta. Thon ina, than weeꞌ-weeꞌanangan nathweya pam min alantan ngangk minangaman iiy-iiyayn nungantan-a, nil puth pam mina, nil piip God.angana thaaꞌ-kuumpow thanang pam wanch anangan aꞌ nilana min iiy-iiyow thamp thantaniya. 42Ngay puth wik inana kan-kanam thawāng niiyant: pam ngurp ngatharam wiy anangana pam piꞌan yaꞌa, thanwey pam manyiya, kaangk-keꞌanang maꞌmangkiy yaꞌweya. Nil weeꞌang nathweya ngak thaaꞌ kucharan theeꞌiy thant-a, puth anpalan than ngayangan monkan-wak-wakantan-a, ngay thaaꞌ-kuumpāng nunang, putha minam piꞌ-piꞌāng nunang.”
Àwon tá yàn lọ́wọ́lọ́wọ́ báyìí:
Matthew 10: wimNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1984, Wycliffe Bible Translators, Inc. All rights reserved.