Матай 15
15
Инсанды не зат арам этеди?
1Сонъ Ерусалимнен Исага парисейлер эм дин аьлимлери келдилер. 2Олар: «Сенинъ сокталарынъ бурынгылардынъ аьдетлерин неге бузадылар? Олар ас алдында колларын ювмайдылар», – дедилер.
3Иса оларга: «Аьдетинъиз уьшин сиз де Алладынъ парызын неге бузасыз? – деп яваплады. 4Алла: „Атанъ ман ананъды оьрметле“ эм „Атасы ман анасына яман соьйлеген оьлтирилмеге тийисли“ деп, буйырган. 5Сиз болсанъыз, эгер бирев ата-анасына: „Меннен алаякларынъыздынъ баьриси Аллага берилген“, – деп айтса, 6ол киси ата-анасына ярдамласпаска болаяк дейсиз. Соьйтип сиз Алладынъ соьзин аьдетинъиз бен куватсыз этесиз. 7Экиюзлилер! Ешая пайхамбар сизинъ акынъызда туьз соьзин айткан: 8„Бу халк Мени тиллерининъ ушы ман оьрметлейди, а олардынъ юреклери Меннен алыста. 9Олардынъ Мага табынувлары маьнесиз; окувлары – аьдем буйырыклары“».
10Иса, халкты оьз янына шакырып, булай айтты: «Тынъланъыз эм анъламага куьресинъиз. 11Аьдемди авызыннан кирген зат арам этпейди, а авызыннан шыккан зат арам этеди».
12Сонъ сокталары Исадан: «Сенинъ соьзлеринъ парисейлердинъ хаьтерлерин калдырганын билесинъме?» – деп сорадылар.
13Иса: «Меним Атам экпеген аьр оьсимлик тамыры ман сувырылаяк. 14Койынъыз оларды, олар сокырлардынъ сокыр етекшилери. Эгер сокыр сокырды етеклеп юрсе, олар экеви де шонъкырга туьсер», – деди.
15Петер десенъ Ога: «Сол таварыхты бизге анълатсанъ экен», – деп тиледи.
16Иса: «Сиз энди де бир зат та анъламадынъызба? 17Эслемединъизбе? Аьдемнинъ авызыннан кирген баьри зат, асказаныннан оьтип аякйолга атылады. 18Авыздан шыккан – юректен шыгады. Эне сол зат аьдемди арам этеди. 19Неге десе огырсыз ойлар, аьдем оьлтируьв, зиналык, каьхпелик, кырсызлык, ялган шаатлыклар, тил юргисткенлик юректен шыгадылар. 20Эне сол затлар инсанды арам этедилер, а кол ювмай ас ишуьв аьдемди арам этпейди», – деди.
Кенаншы хатыннынъ иманы
21Иса оннан шыгып Тир ман Сидон янларына кетти. 22Сол ерден бир кенаншы хатын шыгып Ога: «Даут Улы, Бийим, Мени языксын! Кызымды йин каты азаплайды», – деп кышкыра эди.
23Иса ога бир соьз де айтпады. Сонда сокталары Исадынъ касына келип: «Оны кув, артымыздан кышкырып келеди», – деп, тилеп басладылар.
24Иса хатынга: «Мен тек Исраилдинъ адаскан койларына йиберилгенмен», – деди.
25Хатын ювыклады да, Ога бас ийип: «Бийим! Болыс мага!» – деди.
26Ол явапка: «Оьтпекти балалардан алып, ийтлерге аткан ийги тувылды да», – деди.
27Хатын: «Аьше, Бийим, тек ийтлер де бийлерининъ сыпырасыннан туьскен оьтпек увакларын ашайдылар», – деп яваплады.
28Оннан сонъ Иса ога: «Эй хатын, сенинъ иманынъ куьшли ди. Сен тилегенше, сага болсын», – деди. Эм онынъ кызы сол саьатлей савартылды.
Иса доьрт мынъ аьдемди тойдырады
29Иса оннан шыгып, Галилея коьлине келди, тавга шыгып олтырды. 30Онда Онынъ касына коьп халк оьзлери мен аксакларды, сокырларды, сакатларды, сакавларды эм баскаларды алып келип, аягынынъ алдына салды. Ол баьрисин савартты. 31Сонда халк сакавлардынъ соьйлегенин, сакатлардынъ сав болганларын, аксаклардынъ юргенлерин, сокырлардынъ коьзлери ашылганын коьрип сейирсинди, Исраил Алласын данъклады.
32Иса сокталарын шакырып: «Халкка Меним яным авырыйды, неге десе Мени мен уьш куьн турып, оларда азык калмаган. Оларды уьйлерине аш йибермеге суьймеймен, олар йолда карувсызланарлар», – деди.
33Сокталары Ога: «Авлак ерде биз бу кадер халкты тойдырганша, оьтпек кайдан табаяк?» – дедилер.
34Иса: «Сизде неше оьтпек бар?» – деп сорады.
Сокталары: «Ети оьтпек эм бираз балык бар», – дедилер.
35Иса халкка ерге олтырмага буйырды. 36Сонъ Ол ети оьтпек пен балыкларды алды да, шуькир дувасын этип, сындырып, сокталарына узатты, сокталар да халкка уьлестирдилер. 37Баьриси де тойганынша ашадылар, калган кесеклерден де ети толы шетен йыйдылар. 38Ашаганлар, хатынлар ман балаларды санамай, доьрт мынъ аьдем бола эди. 39Сонъ халкты таркатканлай, Иса, кайыкка минип, Магдала ерлерине йол алды.
Àwon tá yàn lọ́wọ́lọ́wọ́ báyìí:
Матай 15: NOG
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Институт перевода Библии, Москва, 2011