Yaya 1
1
Ala la kuma ma koe Adamadeŋɛ la
1Kuma le fɔlɔ fɔlɔ be,
a nun Ala be ɲɔgɔn na,
a mu Ala le la.
2Bɔɔla fɔlɔfɔlɛ, ale kuma nun Ala be ɲɔgɔn na.
3Koenu bɛ data ale kuma le sabu la.
Fenfen ma da a kɔma.
4Ale le be kise diila mɔgɛnu ma.
Wo kise le be maren mɔgɛnu ye kɛnɛ la.
5Kɛnɛ le be dibe lamalanna,
kɔnɔ dibe ma sɔn a la.
6Kaye do le tota ɲɔ, a tɔgɔ Yaya#1:6 Yaya malasuwɛlá le mu., Ala ka kiilaya don wolo bolo. 7Wo nata seede bɔɔ koe le la, a ni kɛnɛ la ko seedeɲɔgɔya bɔɔ mɔgɛnu ye, alako min mu kɛnɛ la, a bɛ ni laa a la, ale Yaya sabu la. 8Kɛnɛ ma ale la de, ale nata le a ni kɛnɛ la ko seede bɔɔ mɔgɛnu ye. 9Min mu kɛnɛ beeyareŋɛ yati la, wolo be naren dunuya, a ni kɛnɛ labɔɔ mɔgɛnu ye.
10Ala la kuma be nun dunuya,
dunuya data ale le sabu la,
kɔnɔ dunuya mɔgɛnu ma sɔn a la.
11Kuma nata dunuya,
kɔnɔ a yɛtɛ tɛn mɔgɛnu ma a la ko bita.
12Kɔnɔ min yo ka a la ko bita,
anu dɛnkɛnɛyata a tɔgɛ ma,
a ka sago dii wonu ma anu ni ma Ala la deŋɛnu la.
13Wonu la sɔtɛ bele fatanden base la, ka wo ma Adamadeŋɛ sagoe, ka wo ma musu nun kayiya, a be fatanden Ala le la.
14Ale kuma mata Adamadeŋɛ la,
a daakata mɔ tɛma.
A juse be faren kanunteya nun tɔɲa la.
A to mu Ala la den kayiren dɔndɛ le la,
a Baaba ka nɔɔra min dii a ma,
mɔ ka wo nɔɔra lasaga le.
15Yaya ka wolo seede bɔɔ, a ka a kulɛ mayɛlɛ koola, a ka a fɔ mɔgɛnu ye: «N be kɛ-lɛ la ko fɔla wo ye nun, n ko: min be nala nde tanbi kɔma wo sɔdula kolo nde ko, bayi a be nun yannun nde ni da.»
16Ale be faren min na,
mɔ bɛ bata wo do sɔtɔ,
a ɲan ka barikɛ do sa barikɛ do kunma.
17Iyon, Ala ka a la sariyanu don wo mɔ bolo Musa sabu la, a ka kanunteya nun tɔɲa tugun yita wo mɔ la Isa Ala la mɔgɔ masubɛreŋɛ sabu la.
18Han bi mɔgɔ yo ma Ala yen; a la den kayiren dɔndɛ, min be sigiren a Baaba kɛnna, anu tɛ di, wolo bata a la ko ɲatabɔ mɔ ye.
Yaya malasuwɛlá la seedeɲɔgɔya
19Lun do, Yahude kuntigenu ka sarika lakela donu kii anun Lewi bɔnsɛ kaye donu bɔɔla Darisalamu, anu ni Yaya maɲininka, ale mu min na. A ka seedeɲɔgɔya min bɔɔ wo tɔ, wolo mu kɛ la. 20A ma balan tɔɲa fɔla, a ka tɔɲa beeyareŋɛ le fɔ, a ko: «Ala la mɔgɔ masubɛreŋɛ ma nde la de!» 21Anu ka a maɲininka: «I ko wo tɔ kama? Annabi Eli le mu ile la ba?»
A ka anu jaabi: «Wo ma nde la de!»
Anu mɛn ko: «Nabiyonmɛ min bɛnta nala#1:21 Taureta Musa kitabu looluɲɔgɛ, sora 18 haaya 15 anun 18. , wolo mu ile la ba?»
A ka anu jaabi, a ko: «Ade!»
22Wo butɔ, anu ka a fɔ a ye: «Awa, ɲɔmɔ le yati mu ile la, alako mɔ ni jaabire lake mɔ kiilanu ma. I ni i yɛtɛ la ko fɔ mɔ ye.»
23Min be sɛbɛren annabi Esayi la kitabue tɔ, a ka anu jaabi wolo la, a ko:
«Belebele kulɛ be bɔɔla janfue tɔ, a fɔla,
wo kila latelen Marige ye!
# 1:23 Annabi Esayi, sora 40, haaya 3 fɛlɛ. Awa, wo kulɛ mu nde le la.»
24Wo ka a taran, Farisinu le be wo kiilanu kiiren. 25Wolo mu, anu ka a maɲininka, anu ko: «I be mɔgɛnu lasuwɛla je tɔ fenna, ka a taranta Ala la mɔgɔ masubɛreŋɛ ma ile la, ka wo ma annabi Eli, ka wo ma nabiyonmɛ min bɛnta nala?» 26Yaya ka anu jaabi, a ko: «Nde be mɔgɛnu lasuwɛla je le tɔ, kɔnɔ mɔgɔ do be sɔren wo mɔ tɛma, wole ma min na ko lɔn. 27Ale si naa na nde tanbi kɔma. A biliya ɲan bele nde bolo hali a la samata jule yati n ni a mafulen.» 28Wo koenu mata Betani saa tɔ le, Yurudɛn kɔɛɛ kɔkɔma, Yaya be mɔgɛnu lasuwɛla ka min na.
Ala la saaka kontoŋɛ
29Wo tabantaka, Yaya ka Isa yen nala a ma, a ka a fɔ mɔgɛnu ye: «Wo a fɛlɛ, Ala la saaka kontoŋɛ le ka! min be dunuya junube jiganna a ni taga a fɛ. 30N ka kɛ-lɛ la ko fɔ nun, n ko: Kaye do si naa na nde tanbi kɔma, a sɔdula kolo nde ko, bayi a be nun yannun nde ni da. 31Nde yɛtɛ ma a la ko lɔn nun, kɔnɔ n be naren de n ni mɔgɛnu lasuwɛ je tɔ, alako bani Isirayila kaanu tugun ni ale lɔn.» 32Yaya ka kɛ seedeɲɔgɔya bɔɔ, a ko: «N ka Ala Hakkili saniyandeŋɛ yen de jigila ɲɔ, bɔɔla saŋɛ tɔ a gabu kɛɲa ma, a sigita Isa ma. 33Nde yɛtɛ ma a la ko lɔn nun, kɔnɔ Ala min ka n sɔ mɔgɔ lasuwɛla je tɔ, wolo ka a fɔ n ɲɛ, aa n tini Hakkili saniyandeŋɛ yen jigila min ma, a sigita a ma, wolo be mɔgɛnu lasuwɛla Hakkili saniyandeŋɛ la. 34N bata a yen yati, n bata ma a seede la, ka a fɔla ale le mu Ala la den kayireŋɛ la.»
Isa la talibi fɔlɛnu
35Wo lun tabantaka, Yaya mɛn be sɔren ɲɔ, a nun mɔgɔ fila a la talibenu tɔ. 36A to ka Isa yen tanbila, a ka a fɔ: «Ala la saaka kontoŋɛ le ka!» 37Bɔɔla wo talibi fila ka Yaya la wo kuma mɔɛ, anu bɔɔta a kɔma, anu ka Isa jokki. 38Isa tugun ka a kɔma tafɛlɛ, a ka a yen anu be a jokkiren, a ka a fɔ anu ye: «Wo be fen ɲinila?» Anu ka a fɔ Isa ye: «Rabi, i be sabatiren mina?» Awa, Rabi be a fɔren de «Karamɔgɔ» anu la kuma tɔ. 39Isa ka a fɔ anu ye: «Wo mɔ ni ma, wo si ɲɔ yen kɔtɛ.» Wo ka a taran, salifana bata tanbi wo wagate. Awa, anu bɛ nun Isa tagata, anu ka a todula yen, anu tota a fɛ ɲɔ wo lun.
40Mɔgɔ dɔndɛ min ka Yaya la kuma mɔɛ anu fila tɛma, han anu ka Isa jokki, Simɔn Piyɛri kɔtɔ Andire le mu. 41A tagata a dɔgɛ yɛtɛ Simɔn yen betunna, a ka a fɔ a ye: «Mɔ bata Al-Masihu yen!» Wo be fɔren de anu la kuma tɔ: «Ala la mɔgɔ masubɛreŋɛ». 42A ka Simɔn nati Isa kɛnna. Isa ka a fɛlɛ, a ko: «I tɔgɔ Simɔn, Yaya do la deŋɛ. I si naa kele Sefasi.» Awa, wo be fɔren de «Kure».
43Wo tabantaka, Isa ka natá jigan a ni taga Galile duge tɔ. A ka mɔgɔ do taran ɲɔ min tɔgɔ Filipu. A ka a fɔ a ye: «Sɔ n kɔma.» 44Filipu go, Andire go, Piyɛri go, anu bɛ bata mu Betasayida saa le la. 45Filipu tagata mɔgɛ do taran min tɔgɔ Natanayeli, a ka a fɔ a ye: «Musa ka min na ko fɔ Taureta tɔ, a nun nabiyonmɛnu tugun ka min na ko fɔ, mɔ bata a yen: Isa Nasarɛti kaa le mu, Yusufu la deŋɛ.» 46Natanayeli ka a fɔ a ye: «Kɔnɔ hali fondo ɲinma si nɔ bɔɔla Nasarɛti saa tɔ ba?» Filipu ko a ma: «Mɔ ma tun, i ni a yen.» 47Isa to ka Natanayeli yen nala a ma, a ka a fɔ a ma: «Bani Isirayila deŋɛ yati le ka, kɔnɔ yo bele a la.» 48Natanayeli ka a maɲininka, a ko: «I ka n lɔn kama le?» Isa ka a jaabi, a ko: «Yannun Filipu ni i kele, bɔɔla i be sigiren toori lɔgɛ kɔtɔ tɛmuɛ min tɔ, n ka i yen nun bima.» 49Wo butɔ, Natanayeli ka a fɔ a ye, a ko: «Karamɔgɔ, ile mu Ala la den kayireŋɛ le la, i mu bani Isirayila mansa le la.» 50Isa ka a jaabi, a ko a ma: «N to bata a fɔ i ye, n ka i yen de toori lɔgɛ kɔtɔ, i bata laa n na. Kɔnɔ i si naa ko donu yen, minnu kolo kɛ ko.» 51A mɛn ka a fɔ a ye: «N ni tɔɲa beeyareŋɛ fɔ wo ye: wo si naa saŋɛ yen a be lakaren, Ala la malekanu be yɛlɛla ka jigi nde Adamadeŋɛ ma.»
Àwon tá yàn lọ́wọ́lọ́wọ́ báyìí:
Yaya 1: MOG
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀