Maafiù 13
13
Ke kàɓànè wo nyuùŋ tòmò ɓùɔ
(Mài 4.1-9; Luù 8.4-8)
1Ke ɗɔ̀ɔ̀ guùŋ yii wo Jisɛ̀ naŋ fòlò ko saaìŋ, yèè wò naŋ kɔ̀ wɔŋ juwoɔ̀ kɔɔ, wo jɛi wèè wo kaà anyùùŋ nyaŋ. 2E faaàŋ nauŋ wa gbònò e kɔɔ lɛ̀ naŋ wa gàŋ, sɔɔ̀ wò naŋ wa sɛ̀ɛ̀ wɔŋ gɔɔ̀ sùà wo jɛi. Wɔŋ gɔɔ̀ jaa wa e wùìyèɛ diɛŋ yèè e faaàŋ sia e tiwi feìŋ nɛ e wùìyèɛ kɔɔ. 3Wò naŋ wa kàà anyùùŋ nyaŋ maŋ keì zimgbe maŋ kàɓanè sùà.
Wò naŋ nyiŋ woò wààŋ, “Wo felaa bà naŋ wa kɔ̀ ko ɓùuŋ noo ko vààì manɛ̀ŋ koei. 4Nààŋ wò yaà wa vàài sùà manɛ̀ŋ koei màŋ, maŋ bà naŋ sɔ̀ɔ̀ ke dòmaàŋ diɛŋ, yèè aŋ wòì nyaŋ naŋ hnè àŋ naŋ miŋ mìè. 5Maŋ bà miŋ naŋ sɔ̀ɔ̀ e dìì le dùò diɛŋ, ko yèi e gùòɛ gò wa gàŋ lɛ. Manɛ̀ŋ koei màŋ naŋ wa zùmò wùìya, esaɓù kɛ̀ e gùòɛ gò wa jìwà nɛ̀ŋ. 6Kɛɛ nààŋ e gɔɛɛ̀ naŋ fòlò, è naŋ sùɔ̀ŋ manɛ̀ŋ wuiye bɔwɔ màŋ. E kìlà nààŋ e gùlò lɛ kòò è kɔ̀ wa kòɓɛ̀ dii, manɛ̀ŋ wuiye màŋ naŋ haaìŋ maŋ wòà. 7Manɛ̀ŋ koei màŋ bà naŋ sɔ̀ɔ̀ maŋ dɛ̀ɛ̀ maŋ dɛiŋ sùà, miiŋ yaà maŋ dɛɛ màŋ naŋ wùìyè koɓɛ̀ guùŋ, yèè maŋ dɛɛ màŋ naŋ dèkè dèkè manɛ̀ŋ wuiye màŋ. 8Kɛɛ manɛ̀ŋ koei màŋ bà miŋ naŋ sɔ̀ɔ̀ e diì sìàŋ diɛŋ, maŋ wùìyà, maŋ dɛɛdɛ̀ɛ̀, yèè màŋ naŋ kòmò. Maŋ bà miŋ naŋ kòmò e komàŋ hɔ̀nɔ̀ɔ̀ guùŋ, maŋ bà miŋ naŋ kòmò e komàŋ kpɛ̀ùŋ jɛ̀wɛ̀ zììyà, yèè maŋ bà miŋ nàŋ kòmò e komàŋ kpɛ̀ùŋ taai.”
9Wo Jisɛ̀ naŋ kpɛ̀ɛ̀yɛ̀ gbòa yèè wò naŋ woò wààŋ, “Weètii, jàaìŋ maŋ nùŋ dìì tɛ̀ɛ̀ sèè nìŋ kɛɛnɛ̀ŋ maŋ nùŋ!”
Esàɓù maŋ kàɓanè maŋ
(Mài 4.10-12; Luù 8.9, 10)
10Anyùùŋ màŋjɛ̀wɛ̀ Jisɛ̀ nyaŋ naŋ hnè ko nɛ̀ɛ̀uŋ niìŋ yèè àŋ nauŋ dawè nyààŋ, “Wèè kiìŋ mùŋ gbuuyà maŋ kàɓanè sùà sèè mùŋ nɔ̀ŋ gbùùyè koɓɛ̀ anyùùŋ nyaŋ?”
11Wo Jisɛ̀ naŋ nyiŋ woò wààŋ, “Wèè yɛ̀iŋ, wo Dayà wòiŋ nyɛ̀nɛ̀ŋ nàŋ nyìmàŋ ke gbùnù e Kànà àìjɛnɛ̀ɛŋ, kɛɛ e fè wèè nyiŋ. 12Wo nyùnɔ̀ɔŋ gbiŋ kuwa e nɛ̀ŋ bà wɔ, wo Dayà douŋ ɓɛìŋ nàŋ tooyè, wèè kɛ̀ wo kɛɛnɛ̀ŋ niŋ zimgbe e nìàŋ e yèɛ wò kuwa lɛ̀. Kɛɛ wo nyùnɔ̀ɔŋ kuwà è nɛ̀ŋ bà gbiŋ wɔ̀, e tòloòɛ pɛɛ wò kuwa lɛ̀, wò douŋ niŋ nàŋ gè sìwè. 13Esaɓùɛ mìŋ gbuuyà nyiìŋ maŋ kàɓanè sùà lɛ nàŋ yaà kɛ̀, aŋ pɛɛ yɛmɛ yɛ̀mɛ̀, aŋ fè niŋ yɛmɛ̀, aŋ pɛɛ jàà maŋ nùŋ dìì wèè aŋ kòmàŋ maŋ kàìŋ, aŋ naàŋ niŋ kòmò ɔ̀ɔ̀ aŋ niŋ nyìmàŋ. 14Kpeiŋ e yèɛ wo Dayà naŋ wa woò lɛ naŋ hɛɛnɛ̀ŋ, nààŋ wò naŋ wa gbùùyè wo wɛ̀ijìɔ Àzaayà sùà wààŋ,
‘Anyùùŋ nyɛɛ̀ŋ do naŋ jàà maŋ nùŋ dìì wèè aŋ kòmàŋ maŋ kàìŋ, e jiikɛ̀ɛ fè nyiŋ dè.
Aŋ pɛɛ yɛmɛ yɛ̀mɛ̀, aŋ fè niŋ yɛmɛ̀.
15Yèè wò naŋ nyɛ̀nɛ̀ŋ maŋ jii nyiŋ màŋ maŋ nɔ̀ŋ gbɔ̀mgbɔɔ,
àŋ naŋ yìlè maŋ nuùŋ nyiŋ màŋ kpaŋ
yèè àŋ naŋ ɓùwò maŋ fɛɛ̀ nyiŋ màŋ.
Sèè è go yɛi weè nɔ̀ŋ, maŋ fɛɛ̀ nyiŋ màŋ he weè nàŋ yɛ̀mɛ̀ dìì,
maŋ nuùŋ nyiŋ màŋ he weè nàŋ kòmò maŋ kàìŋ,
e jiikɛ̀ɛ he nyiŋ nàŋ dè,
e kìlà àŋ he weè nàŋ kìlè ko nɛ̀ɛ̀ŋ miìŋ,
yèè mìŋ he nyiŋ nàŋ joeyè.’
16“Kɛɛ sèè è nɔ̀ŋ wèè nyɛ̀iŋ, wo Dayà wòiŋ kpuumàŋ, esaɓù kɛ̀ maŋ fɛɛ̀iŋ màŋ yɛmɛ̀ dìì e kìlà maŋ nuùiŋ màŋ komo maŋ kàìŋ. 17Tɔ̀ miŋ woòiŋ e tɔɔɓaaà kɛ̀, aŋ wɛ̀ijì yèè anyùùŋ tɔ̀ɔ̀nyaàŋ zimgbe yaà wa nyìnìè wànàŋ wèè aŋ yɛ̀mɛ̀ e nɛ̀ɛŋ nìŋ yɛmɛ̀ lɛ, kɛɛ aŋ gò niŋ wa yɛmɛ̀, e kìlà aŋ kòmàŋ e yèɛ nìŋ komo lɛ̀, kɛɛ aŋ gò niŋ wa kòmàŋ.
Wo Jisɛ̀ gɔ̀ì ke kàɓànè wo nyuùŋ tòmò ɓùɔ sùà
(Mài 4.13-20; Luù 8.11-15)
18“Jàaiŋ naàŋ maŋ nùŋ dìì niŋ kòmàŋ e fàsàì ke kàɓànè wo nyuùŋ tòmò ɓùɔ. 19Anyuùŋ kpùuŋ nyàŋ yè nyaŋ komo ke mìè gbìàŋ e Kànà Dayàa, kɛɛ aŋ fè nyiŋ nyìmàŋ yɛ, àŋ yaà mààŋ manɛ̀ŋ koei màŋ naŋ sɔ̀ɔ̀ ke dòmaàŋ diɛŋ màŋ. Àŋ komo nɔŋ ke mìè Dayàa fa, wo Nyuùŋ kɛ̀ɛ̀nɛ̀ŋ ke Kpèè Naanààaŋ hnàŋ wò gè ke mìè bi maŋ jii nyiŋ màŋ sùà. 20Aŋ bà nyiŋ yaà mààŋ manɛ̀ŋ koei màŋ naŋ sɔ̀ɔ̀ le dùò lɛ sùà maŋ, àŋ komo ke mìè Dayàa aŋ nyiŋ jàà kùàŋ dìì e zɔlɔ̀ sùà. 21Kɛɛ ke fè nyiŋ gè lè gùlò màŋ jiio sùà tɛ̀ɛ̀, kè nɔ̀ŋ nyìŋ nɔŋ maŋ jii wèè e teenga kpuu. Kpeiŋ sèè e keì nyìnga hnàŋ nɔŋ ɔ̀ɔ̀ sèè àŋ kɔ̀à e mɔ̀ɔ̀nɛ̀ŋ ke sàwà dìì esàɓù ke mìè Dayàa, àŋ nyiŋ gè kùàŋ dìì àŋ kɛ̀ɛ̀ maŋjɛ̀wɛ fiò. 22Aŋ bà nyiŋ zà yaà mààŋ manɛ̀ŋ koei màŋ naŋ sɔ̀ɔ̀ maŋ dɛiŋ màŋ sùà lɛ, nyɛɛ̀ŋ nàŋ yaà aŋ yè nyaŋ àŋ komo ke mìè Dayàa. Kɛɛ maŋ haamiŋ màŋ wɔŋ nyiiŋ gèe wɛɛ̀ŋ sùà, yaà manɛ̀ŋ maŋ zuwà nyùùŋ e nyaàiŋ dè e kèì maŋ bàne màŋ, e kpùlìà e wànàŋ manɛ̀ŋ gɛ̀wɛɛ̀ maŋ gbiŋ nɔ̀ŋ maŋ jii nyiŋ màŋ diɛŋ, mɛɛ̀ŋ nàŋ deka dèkà ke mìè Dayàa ke fè kà màŋ jii nyiŋ màŋ sùà, kpeiŋ aŋ fè kà feìŋ è kèè Dayàa sùà nàaŋ ɔ̀ɔ̀ julɔfɔ. 23Kɛɛ aŋ bà nyiŋ yaà mààŋ manɛ̀ŋ koei màŋ naŋ sɔ̀ɔ̀ e diì sìàaŋ diɛŋ lɛ̀, àŋ komo ke mìè Dayàa, aŋ nyiŋ jàà kùàŋ dìì, aŋ nyiŋ haawè. Aŋ bà nyiŋ komo e komàŋ hɔ̀nɔ̀ɔ̀ guùŋ, aŋ bà nyiŋ komo e komàŋ kpɛ̀ùŋ jɛ̀wɛ̀ zììyà, yèè aŋ bà nyiŋ komo e komàŋ kpɛ̀ùŋ taai.”
Ke kàɓànè maŋ dɛɛ màŋ
24Wo Jisɛ̀ naŋ wòò ke kàɓanè joo bà. Wò naŋ woò wààŋ, “E Kànà àìjɛnɛ̀ɛŋ è yaà mààŋ e yèɛ naŋ wa kaaìŋ e teengaà wo nyuùŋ tòmò ɓùɔ naŋ wa kɔ̀ yèè wò naŋ vààì manɛ̀ŋ koei siaŋ ko ɓùuŋ noo. 25Wɔŋ dùùm guùŋ, e teengaà anyùùŋ nyaŋ gbiŋ yaà wa maŋ jàwè lɛ, wo joouŋ naŋ hnè yèè wò naŋ vààì maŋ dɛɛ naanààŋ kòmàŋ e kpàli lɛ̀ e fèemàŋ ko ɓùi yèè wò naŋ kɔ̀. 26Nààŋ e kpàli lɛ̀ naŋ wùìyè yèè è naŋ tɔ̀ɔ̀tù fuùŋ mùnlòmunlo, aŋ ɓɔ̀ìjɔ̀à tòmò wo kɛ̀ɛ̀nɛ̀ŋ ɓùɔ naŋ yɛ̀mɛ̀ maŋ dɛɛ wuiye naanààŋ maŋ naŋ wùìyè. 27Yèè aŋ ɓɔ̀ìjɔ̀à wo kɛ̀ɛ̀nɛ̀ŋ ɓùɔ naŋ hnè ko nɛ̀ɛ̀uŋ niìŋ yèè àŋ nauŋ woò nyààŋ, ‘Dàa, mùŋ naŋ dai vààì manɛ̀ŋ koei siaŋ ko ɓù moo. Kɛɛ kòò maŋ dɛɛ wuiye naanààŋ maŋ naŋ yèwè màŋ yaà ko ɓùi?’ 28Wo kɛ̀ɛ̀nɛ̀ŋ ɓùɔ naŋ nyiŋ fasàì wààŋ, ‘Wo jooim naŋ tɛɛ̀ nyɛ̀nɛ̀ŋ.’ Yèè aŋ ɓɔìjɔ̀à tòmo nyàŋ nauŋ dawè nyààŋ, ‘Mùŋ manaŋ wèè eiŋ noo ka eiŋ fìà maŋ dɛɛ wuiye màŋ?’ 29Yèè wo kɛ̀ɛ̀nɛ̀ŋ ɓùɔ naŋ woò wààŋ, ‘Kpele, sèè nìŋ fie maŋ dɛɛ wuiye naanààŋ maŋ, nìŋ do nàŋ fìè e kpàli wuiyeɛ̀ bà tiiŋ pɛɛ. 30Tɔ̀ maŋ dɛɛ wuiye màŋ nɔ̀o e jeèsùà e tèèngà e kpàliɛ̀ hɛ̀ɛ e haì. Kpeiŋ mìŋ do nàŋ wòò anyuùŋ tòmoim nyàŋ wèè aŋ fìà maŋ dɛɛ wuiye naanààŋ maŋ miiŋ jiɛ̀, aŋ miŋ dèkà maŋ bilà yèè aŋ miŋ sùàŋ. Kpeiŋ kɛ̀ àŋ hɛ̀ɛ̀ e kpàli lɛ̀ àŋ niŋ gbìàŋ ko kɛiŋ miìŋ.’ ”
Ke kàɓànè kaaŋ komaàŋ
(Mài 4.30-32; Luù 13.18, 19)
31Wo Jisɛ̀ naŋ nyiŋ ɓɛìŋ wòò ke kàɓanè joo. Wò naŋ woò wààŋ, “E ɗewe lɛɛ̀ e Kànà àìjɛnɛ̀ɛŋ è yaà. È yaà mààŋ sèè wo nyuùŋ tòmò ɓùɔ wo ɓèmè ke kaaŋ komaŋ wo nyiŋ nyùàŋ ko ɓùuŋ noo. 32Kiiŋ nàŋ yaà ke kuù kòmàŋ jɔa tòloòɛ maŋ kuù kòmàŋ maŋ gbiŋ sùà. Kɛɛ sèè kè dɛɛ̀, kè nɔ̀ŋ gbee manɛ̀ŋ wuiye gbànaŋ màŋ gbiŋ sùà ko kpòkpòi. Kè gè maŋ kpee gbeegbèè e kìlà aŋ wòì nyaŋ ko fùùiŋ hnàŋ aŋ nyɛ̀lɛ̀ maŋ jie nyiŋ màŋ maŋ kpee nyiŋ màŋ sùà.”
Ke kàɓànè e sòi sìà gbɔ̀uɛ̀
(Luù 13.20, 21)
33Wo Jisɛ̀ naŋ nyiŋ ɓɛìŋ wòò ke kàɓanè joo. Wò naŋ woò wààŋ, “E Kànà àìjɛnɛ̀ɛŋ è yaà mààŋ e yèɛ kaaìŋ sèè wo jɔùŋ wo ɓèmè e sòi bàànè gbɔ̀u jɔa wo niŋ kàànè kàànè maŋ fìlàwà pòùm gbèègbèè taai. Kpeiŋ ko diemeì kɛ̀ e gbɔ̀uɛ̀ gbiŋ è jòwà.”
Maŋ kàɓanè maŋ wo Jisɛ̀ naŋ toomò maŋ
(Mài 4.33, 34)
34Wo Jisɛ̀ naŋ wa wòò maŋ keì mɛɛ̀ŋ gbiŋ koɓɛ̀ anyùùŋ nyaŋ maŋ kàɓanè sùà. Yèè ngèè wo gò nyiŋ wa wòò è keì gbiŋ janyai sɔɔ̀ nɔŋ maŋ kàɓanè sùà. 35Wo Jisɛ̀ naŋ wa tɛɛ̀ nyɛ̀nɛ̀ŋ wèè e nyɛ̀nɛ̀ŋ e yèɛ wo Dayà naŋ wa woò lɛ e hɛɛnɛ̀ŋ, màànààŋ nɔŋ wo wɛ̀ijìɔ naŋ wa woò lɛ wààŋ,
“Mìŋ do nàŋ gbòò ko nɛ̀ɛ̀ŋ nyiŋ niìŋ maŋ kàɓanè sùà.
Mìŋ do nyiŋ nàŋ kpìnìè maŋ kèì ko nyɛɛnɛŋ e yìwìà e teengaà e ɗuunyaàŋ naŋ wa nɔ̀ŋ bàne niŋ nɛ̀.”
Wo Jisɛ̀ gɔ̀ì ke kàɓànè maŋ dɛɛ màŋ sùà
36Nààŋ wo Jisɛ̀ naŋ wa jòò e faaàŋ yèè wò naŋ jɔ̀ ko saaìŋ, anyùùŋ màŋjɛ̀wɛ̀uŋ nyàŋ naŋ hnè ko nɛ̀ɛ̀uŋ niìŋ yèè àŋ nauŋ woò nyààŋ, “Wòò wi e fàsàì ke kàɓànè maŋ dɛɛ wuiye naanààŋ maŋ ko kpàli ɓuì.”
37Wo Jisɛ̀ naŋ nyiŋ fasàì wààŋ, “Wo nyùnɔ̀ɔŋ naŋ vààì e kuù kòmàŋ sìàaŋ wɔ̀ nàŋ yaà miàim wo Jɔ̀àfèlàà Nyuùŋ Kpùnɔɔ̀ŋ. 38Wɔŋ ɓùɔ naŋ yaà e ɗuunyaàŋ. Ke kuù kòmàŋ sìàaŋ nàŋ yaà anyùùŋ nyaŋ kanaŋ e Kànà àìjɛnɛ̀ɛŋ nyàŋ. Maŋ dɛɛ wuiye naanààŋ maŋ nàŋ yaà anyùùŋ nyaŋ kanaŋ wo nyuùŋ kɛ̀ɛ̀nɛ̀ŋ ke kpèè naanààaŋ. 39Wo jooɔ̀ naŋ vààì maŋ dɛɛ komaŋ naanààŋ maŋ wɔ̀ nàŋ yaà wo Sɛ̀tanàaŋ. E kpàli hɛ̀ɛ̀ɛ nàŋ yaà ko dìà e ɗuunyaàŋ, e kìlà anyuùŋ hɛ̀ɛ̀ kpàli nyàŋ nàŋ yaà aŋ màikà nyaŋ. 40Màànààŋ nɔŋ maŋ dɛɛ wuiye naanààŋ maŋ nɔ̀ŋ gbònògbono miŋ aŋ miŋ sùàŋ lɛ, yɛi nɔŋ e kèì guùŋ bi do wa nàwèè nàŋ kaaìŋ ko dìà e ɗuunyaàŋ. 41Miàim wo Jɔ̀àfèlàà Nyuùŋ Kpùnɔɔ̀ŋ do wa nàwèè nàŋ tùɔ̀ŋ aŋ màikàim nyàŋ wèè aŋ gbònògbònò anyùùŋ nyaŋ kinɛiŋ naŋ nyɛ̀nɛ̀ŋ esaɓù anyùùŋ naŋ nyɛ̀nɛ̀ŋ e kèì jùumù yèè anyuùŋ gbànaŋ nyàŋ gbiŋ naŋ nyɛ̀nɛ̀ŋ maŋ kpèè naanààŋ nyaŋ aŋ nyiŋ gè e Kana mɛ̀ sùà. 42Àŋ do nyiŋ nàŋ gbìɛ̀ŋ ko sààŋ hmɔɔ̀ŋ kùwa gbeeì, ko yèi àŋ do nàŋ gòlò e kìlà aŋ gbìlà le sìaŋ nyiŋ nɛ̀. 43Kpeiŋ kɛ̀ anyùùŋ tɔ̀ɔ̀nyaàŋ nyaŋ do nàŋ mɛ̀ɛ̀ŋ mààŋ e gɔɛɛ̀ e Kànà Dèda nyiŋ nɔɔ̀ŋ sùà. Weètii, jàaìŋ maŋ nùŋ dìì tɛ̀ɛ̀ sèè nìŋ kɛɛnɛ̀ŋ maŋ nùŋ!”
Ke kàɓànè e sùlòɛ ko nyɛɛnɛŋ
44Wo Jisɛ̀ naŋ ɓɛìŋ woò wààŋ, “E Kànà àìjɛnɛ̀ɛŋ è yaà mààŋ, wo felaa bà naŋ mɛ̀ɛ̀ŋ e sùlò è yaà ko nyɛɛnɛŋ ko ɓù bà. Wò tomo ɓɛìŋ e dììɛ wo niŋ nyɛɛnɛ̀ŋ. Yèè e zɔlɔ̀ douŋ nàŋ nɔ̀ŋ, kɛ̀ wò ka wò mààŋ manɛ̀ŋ maŋ gbiŋ wò kuwa màŋ, kpeiŋ kɛ̀ wò kɛ̀ɛ̀ maŋjɛ̀wɛ̀ wò dènàŋ wɔŋ ɓùɔ ko yèi wò naŋ mɛ̀ɛ̀ŋ e sùlòɛ lɛ̀.
Ke kàɓànè ke dàamàaŋ
45“Yèè ɓɛìŋ, e Kànà àìjɛnɛ̀ɛŋ è yaà mààŋ, wo felaa bà yaà kààmè ke daamàŋ sìàŋ, 46yèè sèè wò kɔ̀à wò mɛɛ̀ŋ ke yèɛ kuwa ɓaà lɛ, wò kɔ̀à wò mààŋ manɛ̀ŋ maŋ gbiŋ wò kuwa màŋ wèè wo dènàŋ ke daamàŋ yii.
Ke kàɓànè wɔŋ kpeeɔ̀
47“E Kànà àìjɛnɛ̀ɛŋ è yaà mààŋ, anyuùŋ sùnga bà aŋ yè nyaŋ naŋ gbìɛ̀ŋ wɔŋ kpee nyiŋ nɔɔ̀ŋ wɔŋ juwoɔ̀ sùà yèè àŋ naŋ kùwò aŋ kɛì ziì zimgbe. 48Sèè wɔŋ kpeeɔ̀ wɔ̀ŋ dià aŋ kɛ̀ì, àŋ gɔ̀ɛ̀ɛ̀ wuùŋ ko tiwi aŋ jɛi wèè aŋ nyàngè aŋ kɛ̀ì nyaŋ. Àŋ gbiɛŋ aŋ kɛnɛ nyàŋ ko pòum, kɛ̀ àŋ gò aŋ naanààŋ nyaŋ. 49Yɛi nɔŋ e kèì guùŋ bi do wa nàwèè nàŋ kaaìŋ ko dìà e ɗuunyaàŋ. Aŋ màikà nyaŋ do wa nàwèè nàŋ kɔ̀ aŋ gbònògbònò anyùùŋ maŋ kpèè naanààŋ nyaŋ aŋ nyiŋ gè anyùùŋ tɔ̀ɔ̀nyaàŋ nyaŋ e tɛɛ. 50Kpeiŋ àŋ do nàŋ gbìɛ̀ŋ anyùùŋ maŋ kpèè naanààŋ nyaŋ ko sààŋ hmɔɔ̀ŋ kùwa gbeeì, ko yèi àŋ do nàŋ gòlò e kìlà aŋ gbìlà le sìaŋ.”
Wo Jisɛ̀ naŋ wòò e kèè e kàa gɔu yèè e kàa jɛi
51Wo Jisɛ̀ naŋ dàwè anyùùŋ màŋjɛ̀wɛ̀uŋ nyàŋ wààŋ, “Nàŋ nyìmàŋ maŋ keì mɛɛ̀ŋ gbiŋ?”
Yèè àŋ naŋ fasàì nyààŋ, “Hɛ̀ɛɛ̀ŋ, èiŋ miŋ nyìmàŋ.”
52Kpeiŋ wo Jisɛ̀ naŋ nyiŋ woò wààŋ, “Tɛɛ̀ naŋ tɔɔ̀ kɛ̀, wo kààmɔ̀ɔ̀ŋ maŋ Sàwà Dayàa bà gbiŋ wo yèɔ kile wo nɔ̀ŋ wo nyùùŋ màŋjɛ̀wɛ̀im wɔ̀ e Kànà àìjɛnɛ̀ɛŋ sùà wò yaà mààŋ wo kɛ̀ɛ̀nɛ̀ŋ ko gboo wo yèɔ fulià manɛ̀ŋ jɛi yèè manɛ̀ŋ gɔu e yìwìà ko saaŋ bàànè manɛ̀ŋ hàauŋ niìŋ.”
Àŋ naŋ gììyè wo Jisɛ̀ maŋhɛɛ ko Naazɔ̀ɛ̀
(Mài 6.1-6; Luù 4.16-30)
53Nààŋ wo Jisɛ̀ naŋ wa kpɛ̀ɛ̀yɛ̀ maŋ kàɓanè mɛɛ̀ŋ wòo, wò naŋ yèwè koɓɛ̀ wii 54yèè wò naŋ kɔ̀ ko jawa kùmiauŋ noo, kpeiŋ wò naŋ tɔ̀ɔ̀tù anyùùŋ nyaŋ kàa ke sààŋ zòòlò aŋ Juùù nyaŋ dìì. È naŋ wa fòònò anyùùŋ nyaŋ nauŋ wa kumiè nyaŋ. Kɛɛ anyùùŋ nyaŋ bà nyiŋ naŋ wa dawè nyààŋ, “Kòò wò naŋ gè e jiikɛ̀ɛ lɛɛ̀ gbiŋ, yèè e gààaŋ wèè wo nyɛ̀nɛ̀ŋ maŋ kèè mèè mɛɛ̀ŋ? 55Wuŋ nàŋ fè wò jɔ̀àfèlàà kapinàa? Wo Mèèle nààŋ fè wò yèyeuŋ nɔɔ̀ŋ, yèè aŋ wùìyauŋ nyàŋ nààŋ fè wò Jìiiŋ, wò Jòòsɛ, wò Saimɔ̀ŋ yèè wò Juɗà? 56Kià nààŋ aŋ jaauŋ nyàŋ fè joo? Dièsɔa wò nyɛnɛŋ maŋ kèè mèè mɛɛ̀ŋ gbiŋ?” 57Wèè esàɓù lɛɛ̀ aŋ gòuŋ wa jàà kùàŋ diì.
Kɛɛ wo Jisɛ̀ naŋ nyiŋ woò wààŋ, “Anyùùŋ àŋ kiɛ̀ŋ wo wɛ̀ijì e ɓɛ̀ɛ̀jàa koɓɛ̀ gbiŋ, kɛɛ anyùùŋ nyaŋ ko jawa kùmiauŋ noo yaà anyùùŋ nyaŋ ke kpòò wuŋ biɛ̀ sùà fòuŋ kìɛ̀ŋ ɓɛ̀ɛ̀jàa.” 58Esàɓù e hààwe gò kɛɛnɛ̀ŋ nyiŋ nɛ̀, wo Jisɛ̀ gò wa kuii nyɛ̀nɛ̀ŋ màŋ kèè mèè zimgbe.
Àwon tá yàn lọ́wọ́lọ́wọ́ báyìí:
Maafiù 13: WFESD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Gola New Testament Translation and Literacy Project © Bible Society in Liberia, 2019.