مزگینیا مەتتای 10
10
هەر دوازدە هنارتی
(مەرقۆس 3:13-19؛ لوقا 6:12-16)
1پاشی گازی كرە هەر دوازدە شاگردێن خۆ و دەستهەلات ل سەر گیانێن پیس دایێ، داكو وان دەربئێخن و خەلكی ژ هەر لاوازی و نەخۆشیەكێ ساخ بكەن. 2ئەڤەنە ناڤێن هەر دوازدە هنارتیان: ل پێشیێ شەمعون ئەوێ دگۆتنێ پەترۆس و ئەندراوسێ برایێ وی، یەعقوبێ كوڕێ زەبەدی و یوحەننایێ برایێ وی، 3فیلیپۆس و بەرتولماوس، توماس و مەتتایێ باجگر، یەعقوبێ كوڕێ حەلفی و تەداوس، 4شەمعونێ وەڵاتپەروەر#10:4 شەمعونێ وەڵاتپەروەر: ل فەرهەنگۆكێ بنێڕە. و یەهودایێ ئەسخەریوتی ئەوێ بێبەختی ل عیسای كری.
عیسا شیرەتان ل هنارتیان دكەت و دهنێریت
(مەرقۆس 6:7-13؛ لوقا 9:1-6)
5عیسای ئەڤ دوازدە هنارتن و شیرەتكرن و گۆتێ: «د رێكا مللەتێن دی را نەچن و نەچنە د باژێڕێن سامەریان ڤە، 6لێ هەڕنە پەزێن بەرزە بووی ژ مالا ئیسرائیل. 7دەمێ هوین دچن، مزگینیێ بگەهینن و بێژن: پاشایەتیا ئەسمانان یا نێزیك بووی. 8نەخۆشان ساخ كەن، مریان راكەن، گوڕیان پاقژ كەن و ئەجنەیان دەربئێخن. هەوە بێ بەرامبەر وەرگرت، بێ بەرامبەر بدەن. 9د كەمەرێن خۆ دا زێڕی و زیڤی و سفری هەلنەگرن، 10نە چانتكی بۆ رێكێ، نە دوو كراسان، نە پێلاڤەكێ و نە ژی دارەكی، چنكو پالە هەژی خوارنا خۆیە. 11هەر گوند و باژێڕەكێ هوین چوونێ، لێ بگەڕیێن كا كی ل وێرێ یێ هەژییە ل نك وی بمینن، هەتا هوین ژ وێرێ دچن. 12دەمێ هوین دچنە مالەكێ سڵاڤ كەنێ#10:12 پەیڤا عیبرانی ‹شالۆم› رامانا وێ ئاشتیە، كو ب كوردی ل شوینا وێ پەیڤا سڵاڤ دهێتە بكارئینان. سڵاڤ كەنێ ئانكو ئاشتیێ بۆ بخوازن. 13و ئەگەر ئەو مال یا هەژی بیت، بلا ئاشتیا هەوە ل سەر بیت و ئەگەر نە یا هەژی بیت بلا ئاشتی بۆ هەوە بزڤڕیت. 14ئەگەر كەسەكی ل مالەكێ یان باژێڕەكی هوین قەبیل نەكرن و گوهێ خۆ نەدا ئاخفتنا هەوە، دەمێ ژ وێرێ دەردكەڤن، تۆزێ ژ پێیێن خۆ داقوتن. 15راستیە دبێژمە هەوە: دێ رەوشا وەڵاتێ سەدۆم و عەمۆرایێ#10:15 سەدۆم و عەمۆرا: ل فەرهەنگۆكێ بنێڕە. ل رۆژا دادكرنێ ژ یا وی باژێڕی باشتر بیت.
16گوهداریێ بكەن، ئەز هەوە وەكو میهان بۆ ناڤ گورگان دهنێرم، ئەڤجا وەكو ماران د هشیار بن و وەكو كووتران د بێگونە‍‌ھ بن. 17لێ ژ مرۆڤان هشیار بن: چنكو ئەو دێ هەوە رادەستی دادگەهان كەن و دێ د كنیشتەیێن خۆ دا هەوە دەنە بەر قامچیان 18و ژ بەر من دێ هەوە بەنە بەرامبەری حوكمداران و پاشایان، دا هوین ل بەرامبەری وان و مللەتێن نەجوهی شاهدەییێ بدەن. 19لێ دەمێ هەوە رادەست دكەن، خەمێ نەخۆن كا دێ چەوا ئاخڤن یان دێ چ بێژن، ل وی دەمی دێ بۆ هەوە هێتە دان كا دێ چ بێژن. 20چنكو نە هوینن ئەوێ دئاخڤیت، لێ گیانێ بابێ هەوە یێ د ناڤ هەوە دا دئاخڤیت. 21برا دێ برای رادەستی مرنێ كەت و باب دێ زاڕۆكی رادەست كەت، زاڕۆك دێ بەرامبەر دایك و بابێن خۆ رابن و دەنە كوشتن 22و دێ ژ بەر ناڤێ من كەربێن هەمیان ژ هەوە ڤەبن. لێ یێ تا دویماهیێ خۆ راگریت، ئەو دێ قورتال بیت. 23ئەگەر هوین ل باژێڕەكی تەنگاڤ كرن، بڕەڤنە باژێڕەكێ دی. راستیە دبێژمە هەوە: هوین ناگەهن ل هەمی باژێڕێن ئیسرائیل بگەڕن، هەتا كوڕێ مرۆڤ نەهێت.
24شاگرد د سەر مامۆستایێ خۆ را نینە و بەنی ژی د سەر خودانێ خۆ را نینە. 25بەسی شاگردیە وەكو مامۆستایێ خۆ لێ بهێت و بەنی ژی وەكو خودانێ خۆ لێ بهێت. ئەگەر خودانێ مالێ ب بەعلزەبولی#10:25 بەعلزەبول: ناڤێ سەرۆكێ ئەجنەیانە، ئانكو ئبلیسی. ل فەرهەنگۆكێ بنێڕە. هاتبیتە ناڤكرن، پا دێ خەلكێ مالا وی یێ چەوا بیت؟
26ئەڤجا ژ وان نەترسن. چ نخافتی نینن ئاشكرا نەبن و چ ڤەشارتی نینن نەهێنە زانین. 27ئەوا ئەز ل تاریاتیێ دبێژمە هەوە، هوین ل رۆناهیێ بێژن و ئەوا هوین ب پستەپستێ دبهیسن، ل سەر بانان گازی بكەن. 28ژ وان نەترسن یێن لەشی دكوژن. ئەو نەشێن گیانی بكوژن. لێ ژ وی بترسن یێ دشێت گیان و لەشی پێكڤە د دۆزەخێ دا ژ ناڤ ببەت. 29ما نە دوو چویچك ب فلسەكی دهێنە فرۆتن؟ ل گەل هندێ ئێك ژ وان بێی بابێ هەوە ناكەڤیتە ئەردی. 30هندی هوینن، خۆ مویێن سەرێ هەوە ژی د هژمارتینە. 31ئەڤجا نەترسن، هوین ژ گەلەك چویچكان ب بهاترن.
32هەر كەسێ ل بەرامبەری مرۆڤان دانپێدانێ ب من بكەت، ئەز ژی دێ ل بەرامبەری بابێ خۆ یێ ل ئەسمانان دانپێدانێ ب وی كەم، 33و هەر كەسێ ل بەرامبەری مرۆڤان من ماندەل#10:33 ماندەل: ئینكار بكەت، ئەز ژی دێ ل بەرامبەری بابێ خۆ یێ ل ئەسمانان وی ماندەل كەم.
عیسا و جیهان
(لوقا 12:51-53؛ 14:26-27)
34هزر نەكەن ئەز یێ هاتیم دا ئاشتیێ بینمە سەر رویێ ئەردی. ئەز نەهاتیمە ئاشتیێ بینم، لێ شیری بینم. 35ئەز یێ هاتیم مرۆڤی بكەمە دژی بابێ وی و كچێ دژی دایكا وێ و بویكێ دژی خەسیا وێ 36و ئها هۆسا دوژمنێن مرۆڤی دێ بنە خەلكێ مالا وی#10:36 میخا 7:6. 37هەر كەسێ باب یان دایكا خۆ پتر ژ من بڤێت، ئەو نە هەژی منە و هەر كەسێ كوڕێ خۆ یان كچا خۆ پتر ژ من بڤێت، دیسان ئەو نە هەژی منە. 38هەر كەسێ خاچا خۆ هەلنەگریت و ب دویڤ من نەكەڤیت، ئەو نە هەژی منە. 39هەر كەسێ ژیانا خۆ بپارێزیت، دێ وێ ژ دەست دەت و هەر كەسێ ژیانا خۆ ژ پێخەمەتی من ژ دەست بدەت، دێ وێ پارێزیت.
40ئەوێ هەوە قەبیل بكەت، ئەز قەبیل كرم و یێ من قەبیل بكەت، ئەوی ئەو قەبیل كر یێ ئەز هنارتیم. 41هەر كەسێ پێغەمبەرەكی قەبیل بكەت ژ بەر كو پێغەمبەرە، دێ خەلاتێ پێغەمبەرەكی وەرگریت و هەر كەسێ راستدارەكی قەبیل بكەت ژ بەر كو یێ راست و دروستە، دێ خەلاتێ راستدارەكی وەرگریت. 42هەر كەسێ خۆ پەرداغەكا ئاڤا تەزی ژی بدەتە ئێكی ژ ڤان كەسێن بچویك ژ بەر كو شاگردێ منە، ئەز ب راستی دبێژمە هەوە، خەلاتێ وی چ جاران بەرزە نابیت.»
Àwon tá yàn lọ́wọ́lọ́wọ́ báyìí:
مزگینیا مەتتای 10: BHD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
All rights reserved.