MATEO 18
18
¿Änääcö o’jodhe’cä nai?
1Yääje mma yaawä ñoowanoomadö cöneejoto Jesuuquidiito wwadäädä; cönä’döa’to chäwwä:
—¿Änääcö o’jodhe’cä nai Wanaadi sotoije yeichö?
2Yaawä Jesuuquidiito mude’cä’cä cöna’dejjai; dhantawäiñe cönnöi. 3Töwö cönä’döaacä yaawä:
—Chäänönge yääje wä’döa äwwäiñe, mude’cä’cä nönge ä’dö’da aweiya’comjäcä, Wanaadi acaajichaanaichomooje eijai’cha na. 4Yääje yeijäcä ñäädä määdhä mude’cä’cä nöngato, o’jodhe chö’tajä’jönö, ñäädä ñäädä täneejucaato Wanaadi sotoi antawäiñe. 5Ñäädä öwö jääcäinchädä määdhä mude’cä’cä nöngato aashicha tödöönei, öwö mmaja aashicha yöödöa dea.
Soto shaadijannä’cannamo
6“Ñäädä mude’cä’cä yeecanö’nei shaadijannä’canei täju ijöncäcä tö’wadö’tämje yei’jödö na, dama sö’jato ’cwaca emaadöje mma. 7Cone’da dämma na sadiijannä’catä weiñä; ataamejaichojöönö yää. Yaawääne’ jooje wentumje na’de ñäädä soto sadiijannä’canei’jödö.
8“Yääje yeijäcä adhaamädö nödöödö woije asaadijanga’jäcä, ä’judu wötäädö woije jeiñe mma, acä’cä, memaiye yaawä. Aashicha eijai ña ijaatoonomjödö mma adhaamädö caju ña äätädö, ijaatoonomjödö ä’judu jeiñe mma; cone’da eijai ña a’nädäncädä adhaamädö weichaame, a’nädäncädä ä’judu weichaame mmaja, wa’to töwäätunque’emjönö nwaca äwäätämaajodö. 9Adheenudu nene’madö woije asaadijanga’jäcä, u’cacä, memaiye yaawä. Aashicha eijai ña ijaatoonomjödö mma adheenudu caju ña äätädö; cone’da eijai ña ääjatoncädä adheenudu weichaame wa’to töwäätunque’emjönö nwaca äwäätämaajodö.
Oweeja sadiijangajä dö’seeno
10“Canno mudeeshi’chä mänquiiñeme’täi. Yääje wä’döa äwwäiñe, canno mudeeshi’chä edai’chännamo Jaaja caju ñano je’taca töweiye naato, ñanno amoode. 11Soto nnedö cöneejä yännanö’ajä ewaanaca.
12“ ¿Aaquene nichö’taanä äwwäiñe? Dhanwa ecöntomo ijaatoodea soto oweeja weiya’comjäcä, tooni shaadijanga’jäcä, ¿anuuji’cha ca eijai ñai yaawä? Ñanno ijimmä töwö ñämjai ña jöö de’wä, ñäädä shaadijangajä ujiiye töötädö wetä. 13Töwwä edanta’jäcä na’cwaincha yaawä ñäädä oweeja’cä jäcä, ñanno ijimmä shaadijamjöncomo’jödö jäcäiñe ta’cwaiñe töweichö e’jodhe’cä. 14Mädääje dea Oomotoncomo caju ñano tooni yännamjö’se’da na canno’cä.
Töweichacoono cone’nadiiyö encwanno’jodö
15“Äjääcä conemjönö tödööa’jäcä aweichacoono wwä, chäwwäädä adha’deucwä choone’nadiiyö jäcä, äjääcäjeeneiñe aweichawäiñe. Aashicha eta’jäcä chäwwä, ecoonecaajai maato yaawä dhacä. 16Dha’da ’quene adha’deddu eta’se’da yeiya’jäcä, aweichacoono anaadäcä’de, aacä jeiñe mma, awa’deuwödööcomo etannamooje. 17Ñanno a’deddu aneeta’da dea yeiya’jäcä mmaja, Wanaadi sotoi wwäiñe ecammatääcä’de yaawä. Ñanno a’deddu aneeta’da yeiya’jäcä mmaja, Wanaadi aneecanö’jönö nönge tödöötäcä’de yaawä, acu’shänä jödaatai i’jummanei nönge mmaja.
18“Chäänönge yääje wä’döa, tameedä edä nono de’wä ännöjoodöcoomojöönö töödööjo’da mmaja caju ña na’dede. Tameedä edä nono de’wä ännöjoodöcoomo mmaane caju ña mmaja nä’döja’dede.
19“Edääje mmaja wä’dö’se wa dea äwwäiñe, edä nono de’wä aacä änwanno awa’deuwa’comjäcä yää jäcä dea Wanaadi wwä awa’deuwödööcomo wetä, Jaaja caju ñano nu’a’de aneecato’jocoomo. 20Aacä mma öwö yeetö joi ye’jumma’como yeiya’comjäcä, aaduwaawä jeiñe, öwö wa’de chääjadäiñe; quee cönä’döaacä Jesuuquidiito tönoowanoomadö wwäiñe.
21Yääje mma yaawä Peedhodo cöneejä Jesuuquidiito wwadäädä; cönä’döaacä:
—Cajiichaana, jääcä conemjönö tödööa’jäcä anejja wwä, ¿ä’waasade encwanno’jojai wanä? ¿Aacä amoojatoode ’ja? quee cönä’döaacä Peedhodo Jesuuquidiito wwä.
22Jesuuquidiito cönä’döaacä yaawä:
—Aacä amoojatoode, quee cajai’cha wa. Edääje mmaane wecamma äwwä, tooni sotooto de’wä aacäichea sotoodeene.
Ñanno aaco’como ejeeque’nä’nnamo wei’jocoomo
23“Yääje yeijäcä Wanaadi cajiichaanaje yeichö na edä nono de’wono cajiichaana töweiye naichöje. Ñäädä cajiichaana tösootoi cöna’dejjaicho ñeejeque’näjöödöcoomo ejeemajoodö wetä chäwwäiñe. 24Töwö cönaajäntäi yaawä ecamma’jodööcomo. Yääje mma yaawä dhanwa cönnejooto ñäädä cajiichaana wwadäädä. Töwö ñeejeque’näjöödö cönä’jaacä amoojadä miide jödaata. 25Yaawä yää ejeemajai’cha yeijäcä chäädhajä cunu’jaacä anejja dhanwa wwä, jödaata ejeetöje, täjeeque’näjöödö ejeematoojoje; ijiiñamo, iiñacoomo jadä’jödöödä cunu’ja’to, tameedä inshomaadö mmaja. 26Yääje mma yaawä ñäädä ejeeque’nä’nei tä’mudhe cönä’döi tädhaajä je’taca; cönä’döaacä: “Äcuude, yoomo’cä’de cajiichaana. Wejeema’de mma’ne tameedäädä;” quee. 27Chäädhajä wentumje cöneeneaacä yaawä. Tameedä ñeejeque’näjöödö cönencwanno’joi. Cönenno’jai yaawä. 28Ñäädä cöntämä yaawä. Töötädaawä töweichacoono cöneejodöi, täjeeque’nä’nei. Ñäädä cöneejeque’nä’acä aacä’cä jödaata mma. Yääje mma yaawä töweichacoono cönaajäi ijöömödö jäcä; cönaawö’cacä: “Ejeemacä aneejeque’näjöödö;” quee töwä’döancädä chäwwä. 29Yaawä yeichacoono tä’mudhe cönä’döi ije’taca, cönä’döaacä: “Äcuude, yoomo’cä’de. Wejeema’de mma’ne tameedäädä;” quee. 30Yääje yä’dö’jödö weichaame ñäädä yoomocö’se’da cönä’jaacä. Jedeesoje mma cöneewaacai yaawä täjeeque’näjöödö ejeemadö wa’cä. 31Yää eneea’jäcä ijimmä wwä cone’da cönä’döjoicho. Cöntonto yaawä tädhaajotoncomo wwadäädä; tameedä cöneecammajäätöicho chäwwä. 32Yääje mma yaawä chäädhajä cöna’dejjai ñäädä täjeeque’nä’nei’jödö; cönä’döaacä: “Sootoi conemjönö amäädä. Öwö wencwanno’joi tameedä aneejeque’näjöödö, yääje äwä’dö’jödö wei’jäcä. 33Amäädä mmaja wentumje eneejai awei’jödö na dea ñäädä aweichacoono, wentumje maneeneannöje mmaja amäädä;” quee cönä’döaacä. 34Chäädhajä jooje cönäätömai yaawä chääjäcä. Cuntui yaawä jedeeso edhaajä wwä, tameedä täjeeque’näjöödö ejeemadö wa’cä chäwwä.
35“Mädääje mmaja Jaaja caju ñano ayöödöaato’de änwanno, ajimmotoncomo cone’nadiiyö anencwanno’jo’da aweiya’comjäcä; quee cönä’döaacä Jesuuquidiito tönoowanoomadö wwäiñe.
Àwon tá yàn lọ́wọ́lọ́wọ́ báyìí:
MATEO 18: MCH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2014 Reservados todos los derechos