MATEO 9
9
Secumjato adonca’jödö
1Yääje mma yaawä Jesuuquidiito cönä’täi cudiiyada aca. Chu’jä mänsemjona cöne’dätäi yaawä; töjaatacäi cönä’döi. 2Yaawä secumjato cönnejooto chäwwadäädä, ä’wato jo. Chäwwäiñe täcamjödö eneea’jäcä Jesuuquidiito cönä’döaacä cädäijato wwä:
—Cone’da’da eichä, dhanwa. Ocoone’nadiiyö täncwanno’jo na; quee cönä’döaacä.
3Yää eta’jäcä anejjacoomo judhío owaanomannamo cöntö’tajä’a’to: “Määdhä cone’da Wanaadi jäcä na’deuwa mädääje töwa’deuwödö que;” quee cöntö’tajä’a’to. 4Jesuuquidiito dhowaanäcä cönä’jaacä yääje chö’tajäätödööcomo. Töwö cönä’döaacä:
—¿Ane’que’nei cone’da ätö’tajä’ato dea? 5¿Äshono ätääcammacoije’cä nai: “Ocoone’nadiiyö täncwanno’jo na;” quee’ja? ¿Edääjeene’: “Aanöncä, oojoimacä;” queene’ ? 6Edä wödööa odhoowanääcäiñe yeichö wetä Soto nnedö soto cone’nadiiyö encwanno’jojai yeichö edä nono de’wä; quee cönä’döaacä Jesuuquidiito.
Yaawä töwö cönä’döaacä secumjato wwä:
—Aanöncä; adhe’wötö adääcä; ämmai chaca äjääne; quee cönä’döaacä.
7Yaawä ñäädä dhanwa cönammöi; tömmai chaca cöntämä. 8Yää eneea’jäcä soto cönääcatoncaicho. Aashicha cöna’deuwa’to yaawä Wanaadi jäcä, yää nöngato adoncatoojo utu’jödö weijäcä soto wwä.
Mateo a’dejja’jödö
9Yääje mma yaawä Jesuuquidiito cöntämä yäätonno. Dhanwa cöneejodöi yaawä, Mateo täätö. Shuucu ñäädä cönä’jaacä acu’shänä jödaatai i’jummannamo weicho’como taca. Jesuuquidiito cönä’döaacä chäwwä:
—Ma’che jaadä.
Mateo cönammöi yaawä, chääjadä töötädööje mma.
10Yaawä Jesuuquidiito maa taca cönääwashinchaacä tönoowanoomadö jadäiñe. Jooje acu’shänä jödaatai i’jummannamo mmaja cönoomomöicho dea yaawä, jooje conemjönö dönnamo mmaja. Cönääwashincha’to yaawä Jesuuquidiito jadä, ñoowanoomadö jadäiñe mmaja. 11Yää eneea’jäcä jaadiseeo wwäiñe tönwanno cönä’döa’to Jesuuquidiito nowaanomaadö wwäiñe:
—¿Ane’que’nei mmaja odhoowanoomaneichomo nääwashinchannea acu’shänä jödaatai i’jummannamo jadäiñe mmädä, conemjönö dönnamo jadäiñe mmaja? quee cönä’döa’to.
12Yääje yä’dödööcomo eta’jäcä töwwä Jesuuquidiito cönä’döaacä chäwwäiñe,
—Cädäijemjönö täjiichö’tänei ämjumma’da töweiye nai; cädäijato mmaane tumjumma. 13Edä Wanaadi a’deddu imennaajä chö’tamme’täcä: “Wentumje äneetä weiñä tujunne na öwwä, saaquidiijiisiyo tödöödö tujunne’da mma;” quee naadö. Chäänönga’como a’dejja’da we’ne, conemjöncomoone, tötö’tajäätödööcomo sha’duminchaiyeto; quee cönä’döaacä Jesuuquidiito.
Wäänemaanä jäcä Jesuuquidiito ecamma’jo’jödö
14Yääje mma yaawä Juan nowaanomaadö cöneejoto Jesuuquidiito döiña; cönä’döa’to:
—¿Aaquene töwäänema ñaa weneene, jaadiseeo mmaja töwäänema weneeneto dea; amäädä onoowanoomadö mmaane äänema’da?
15Jesuuquidiito cönä’döaacä chäwwäiñe:
—¿Aaquene mmaja jötaanä enennamo aamodööto deeade’ töjöötaamö töjaadäiñe yeichaame? Aneedawä anooto na’de choojonnoiñe töjöötaamö wataadojootojo; yaawä näänemaato’de.
16“Töwoomö jenaado’jä ana’tä’da weiña nai eduuwaato sedei’jödö que. Eduuwaato que a’ta’jäcä eduuwaato töwaacö’ca yaawä jenaado’jä shiichajoodöje. Töwaataucwa’cä jeene yaawä yeeshiicha’jödö. 17Eduuwaato chääjedöödö eccudu döaajä anacca’da weiñä nai chääwötö jenaado’jä iji’jä döaajä aca. Mädääje tödööa’jäcä iji’jä neshiicha yaawä; chääjedöödö eccudu töweemacuudä yaawä, iji’jä mmaja. Eduuwaato iji’jä acaane chääjedöödö eccudu eduuwaato döaajä shoomadö. Mädääje a’nädä emaacudä’da eijai ña, chääjedöödö eccudu, iji’jä mmaja; quee cönä’döaacä Jesuuquidiito.
Jaido nnedö adonca’jödö, wodi wwä Jesuuquidiito womö ajoojo’jödö mmaja
18Yääje chäwwäiñe Jesuuquidiito wa’deuwödaawä judhío täneejucaato cöneejä yöiña. Tä’mudhe cönä’döi ije’taca; cönä’döaacä:
—Önnedö näämai eduuwa. Yääje yeichaame ma’che jaadä, adhaamädö mödöiye ye’wä, aadoncaiye.
19Jesuuquidiito cönammöi yaawä; cöntämä chääjadä; ñoowanoomadö mmaja cöntonto dea. 20Yaawä wodi cädäijato cöneejä Jesuuquidiito ncadheedä. Töwö chäädäichö cönä’jaacä munu’je, amoojadooto de’wä aacä wedu chäädäicha’jödö. Töwö Jesuuquidiito womö a’sadö cönaajojoi. 21Edääje cöntö’tajä’acä ñäädä wodi: “Yoomö ajoojodö que mma ja’ aadoncajai wanä;” quee cöntö’tajä’acä. 22Yaawä Jesuuquidiito cönä’jedennacai. Wodi cöneedantäi yaawä; cönä’döaacä chäwwä:
—Cone’da’da eichä, wodi. Äwwä ecamjödö weijäcä maadoncai; quee.
Yaawä dea mma ñäädä wodi cönaadoncai.
23Yääje mma yaawä ñäädä täneejucaato mmai chaca Jesuuquidiito wä’döa’jäcä töwö cöneedantoicho ñanno ewaacadaawä jiichu etönnamo we’a’como, soto wewoodoichadööcomo mmaja. 24Töwö cönä’döaacä chäwwäiñe:
—Adheeja’catääcä; ääma’da na mä’dä wodi’chä. Iiñöcöödö mma mädä; quee cönä’döaacä.
Tonno’e mma ñanno soto cönennojöicho yaawä. 25Yaawä ñanno soto weja’ca’comjäcä äqueejö döiña Jesuuquidiito cönoomomöi. Dhamäädö jäcä cönaajäi. Ñäädä ajei’choto’jaato cönammöi yaawä. 26Yääje Jesuuquidiito nödö’jödö cöneecatai yaawä tameedä yää jata weichö wa’cä.
Aacä tänuuquemjöncomo wäänu’to’jocoomo
27Yäätonno Jesuuquidiito wöta’jäcä aacä tänuuquemjöncomo cönta’to inchäcä. Töcä’de cöna’deuwa’to; cönä’döa’to:
—Wentumje ñaa eneecä, amäädä Dawí weichö; quee cönä’döa’to.
28Ä’saca Jesuuquidiito womonga’jäcä ñanno tänuuquemjöncomo cöneejoto chäwwadäädä. Jesuuquidiito cönä’döaacä yaawä chäwwäiñe:
—¿Mecaanö’ato ca mädä tödööjai weichö?
Tönwanno cönä’döa’to:
—Ee, ñaa necaanö’a; quee.
29Yääje mma yaawä Jesuuquidiito cönaajojoi chäänuduucomo.
—Äjääcäiñe nä’dö’ñojo mecaanö’atoodö nönge dea; quee cönä’döaacä.
30Tönwanno töneene cönä’döicho yaawä. Yaawä Jesuuquidiito cönwätuujaicho jooje; cönä’döaacä:
—Anejjacoomo wwäiñe maneecammajä’täi’che; quee cönä’döaacä.
31Yääje yeichaame yäätonno tööta’comjäcä tönwanno cöneecammajäätöicho tameedä yeichö wa’cä.
Ta’deudemjönö a’deudeme’jo’jödö
32Tänuuquemjöncomo’jödö wöta’comjäcä anejja daja cönnejooto dea Jesuuquidiito wwadäädä, odo’sha ana’deudeme’jojöönö ’jano daja. 33Odo’sha ija’canö’ja’jäcä Jesuuquidiito wwä, ñäädä ta’deudemjönö cöna’deutai yaawä. Soto cönääcatoncaicho yaawä; cönä’döa’to:
—Mädä nöngato aneene’da töweiye caato Iisadaaede ña; quee cönä’döa’to.
34Jaadiseeo mmaane cönä’döa’to:
—Määdhä dhanwa odo’shancomo tömja’canö’jo weneene odo’sha edhaajotoncomo jäduudu que mmädä; quee cönä’döa’to Jesuuquidiito jäcä.
Soto wentumje ene’jödö Jesuuquidiito wwä
35Yääje mma yaawä Jesuuquidiito cönäämannä’acä tameedä jata weichö wa’cä, judhío we’jummato’como waadäi soto owaanomancädäiñe. Wanaadi töcaajichaanaije tödöödö jäcä töneecammajä’e cönä’jaacä. Tameedä cädäi toneejichö’tä cönä’ja’dea. 36Jesuuquidiito ñanno soto wentumje cöneene’ma’to, töwaatansu’dä yeijäcäiñe, jäduuje’da yeijäcäiñe mmaja, oweeja tädhaajäquemjöncomo eijai ñaatoodöje. 37Yääje mma yaawä töwö cönä’döaacä tönoowanoomadö wwäiñe:
—Tadaawaaju jooje naadö’je, töweetadaawa’cajaamo mmaane wanna’da naato. 38Yääje yeijäcä adha’deutäcä tadaawaaju Edhaajä wwä, töwö tötaadawaajui dödö jäcä soto anaanontäiyeto; quee cönä’döaacä Jesuuquidiito.
Àwon tá yàn lọ́wọ́lọ́wọ́ báyìí:
MATEO 9: MCH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2014 Reservados todos los derechos