A Luk koe‑noogo 22
22
Kãsem-dãmbã baooda weer n na kʋ a Zeezi
(Mat 26.1-5, Mark 14.2, Zã 11.45-53)
1 #
Yik 12.1-27
Bur sẽn ka rã-bɩll tigri, b sẽn boond tɩ Pakã#22.1 Wakat-kãnga, Zʋɩf-rãmbã ka tog n dɩ rɩɩb sẽn ning rã-bɩll ye. da kolgame. 2Maan-kʋʋdbã kãsem-dãmba ne tõog karen-saam-dãmbã dag n baooda b sẽn na n maan to-to n kʋ a Zeezi. Bala, b rag n zoeta nebã. 3La a Sʋtãan kẽe a Zʋdaase, b sẽn boond tɩ Iskaryo, sẽn dag n yaa neb piig la a yiibã ned a yembrã.
4La a Zʋdaas kẽngame n tɩ yẽs ne maan-kʋʋdbã kãsem-dãmbã la ne wẽnd-doog gũudbã kãsem-dãmbã, n bao a sẽn na n tũ sor ning n yõk a Zeezi n kõ-ba. 5Bãmb sũyã yɩɩ noogo, tɩ b sar tɩ bãmb na n kõo a Zʋdaas ligdi. 6La yẽnda sakame, n sɩng n baood weer ning yẽnda sẽn na n yõk a Zeezi n kõ-ba, tɩ kʋʋngã ka bãng ye.
A Zeezi dɩta Pakã tigr ne b karen-biisã
(Mat 26.17-29, Mark 14.12-25, Zã 13.21-30)
7Bur sẽn ka rã-bɩllã raare, daar ning b sẽn da tog n kʋ Pakã pe-bilã taame. 8La a Zeezi tʋma a Pɩyɛɛr ne a Zã n yeel-b yaa: Kẽng-y n tɩ segl-y Zʋɩf-rãmbã Pakã rɩɩb tõnd yĩng tɩ d rɩ-a. 9Bãmb soka a Zeezi tɩ yɛɛnẽ la bãmb dat tɩ b tɩ segl Pakã. 10A Zeezi leok-b lame yaa: Ade, yãmb sã n kẽ tẽngã pʋgẽ, yãmb na n sega rao sẽn tʋk koom ne yʋʋre. Tũ-y-yã-a n kẽ yir ning a sẽn na n kẽ wã. 11Yeel-y yirã soab yaa: «Karen-saamb sokdame tɩ roog ning bãmb sẽn na n dɩ Pakã tigr ne b karen-biisã bee yɛ?» 12La yẽnda na n wilga yãmb do-pʋg sẽn yaa yalenga, n be roog zugu, tɩ teedã fãa be be, yaa be la y na n segl Pakã. 13Bãmb kẽngame, n tɩ mik tɩ bũmba fãa yaa wa a Zeezi sẽn dag n yeel bãmbã, la b segla Pakã.
14Wakat sẽn ta, a Zeezi zĩnda ne tẽn-tʋmdbã n na n dɩ. 15A Zeezi yeel-b lame yaa: Mam tʋlga ne m sũur fãa n dɩ Pak‑kãngã ne yãmba, sẽn deng m namsgã. 16Bala, mam yeta yãmb tɩ mam kõn leb n dɩ-a yɛsa, hal t'a pids Wẽnnaam soolem pʋgẽ. 17A Zeezi rɩka bõn-yũudlã n ning bark n yeele: Deeg-y bõn-yũudl-kãngã n pʋɩ ne taaba. 18Bala, mam yeta yãmb tɩ sẽn sɩng ne moasã, mam kõn leb n yũ reezẽ tɩɩs koom yɛsa, hal tɩ Wẽnnaam soolmã wa. 19Dẽ poore, a Zeezi rɩka bur n ning bark n yaool n kao-a n kõ karen-biisã n yeele: Ad‑a yaa mam yĩnga, b sẽn kõ yãmb yĩnga. [Bɩ y maand bõn-kãngã n tẽegd mam yelle. 20#Zer 31.31-34Woto me, bãmb sẽn dɩ n sɛ, a Zeezi rɩka bõn-yũudlã n kõ-b n yeele: Bõn-yũudl‑kãngã yaa kãab‑paalgã sẽn maan ne mam zɩɩmã sẽn daag yãmb yĩngã.]
21 #
Yɩɩn 41.10
Baoosgo, ade, ned ning sẽn zãmbd-a maamã naaga maam ka n dɩtẽ. 22Ninsaal Bi-riblã na n kii wa Wẽnnaam sẽn yãk yam to-to wã. La ned ning sẽn na n zãmb-a bãmbã na n paama toogo. 23La karen-biisã sɩngame n sokd taab n dat n bãng ned ning sẽn be‑a bãmb sʋkã n na n maan yel-kãngã.
Ãnda la kãseng n yɩɩda?
24 #
Mat 18.1, Mark 9.34, Luk 9.46 Karen-biisã wẽe nokoeemd ne taab wʋsg n dat n bãng ned ning b sẽn tog n ges wa kãsem bãmb sʋkã. 25A Zeezi yeel-b lame: Soolem dĩm-dãmbã soo nebã ne pãnga, la sẽn tar-b noor ne nebã kɩtdame tɩ b boond bãmb tɩ tʋʋm‑neer maandba. 26#Mat 23.11, Mark 9.35#Mat 20.25-27, Mark 10.42-44La a ka a woto ne yãmb ye. Sẽn yaa-a kãseng n yɩɩd yãmb sʋka, bɩ a yɩ wa yao-zʋʋga, tɩ ned ning sẽn yaa-a taoor soab yɩ wa tʋmtʋmda. 27#Zã 13.12-15Bala, ned ning sẽn zĩ n dɩtẽ wã la kãseng n yɩɩd bɩ, bɩ yaa ned ning sẽn kɩt-a rɩɩbã? La baoosgo, mam bee yãmb sʋk wa rɩ-kɩta. 28Yãmba, yãmb yaa neb sẽn kell n modg n pa ne maam m makrã pʋgẽ. 29Yaa rẽnd n kɩt tɩ mam kõt yãmb soolmã, wa m ba sẽn kõ-a maamã, 30#Mat 19.28tɩ yãmb tõe n zĩnd ne maam m soolmã pʋgẽ n dɩ la y yũ, la y zaoond gɛy zut n kao Israyɛll buud piig la a yiibã bʋʋdo.
A Zeezi pĩnd n togsa a Pɩyɛɛr kɩɩsgo
(Mat 26.31-35, Mark 14.27-31, Zã 13.36-38)
31Zu-soabã yeelame yaa: Sɩmo! Sɩmo a Sʋtãan kosame n na n yelg yãmb wa b sẽn yelgd koodo. 32La mam pʋʋsa fo yĩnga, tɩ f tẽebã ra wa paoog ye. La fo sã n lebg n wa mam nengẽ, bɩ f paas f ba-biisã raoodo. 33A Pɩyɛɛr yeelame yaa: Zu-soaba, mam seglame n sɛ tɩ kẽ bi-bees roog ne yãmba, wall tɩ ki ne yãmba. 34La a Zeezi yeel-a lame yaa: Pɩyɛɛre, mam yeta foom tɩ rũndã, no-raoog kõn kelem tɩ fo ka kɩɩs noor a tãab tɩ f ka mi maam ye.
Potmaane, korgo, la sʋʋga
35 #
Mat 10.9,10, Mark 6.8,9, Luk 9.3, 10.4 A Zeezi leb n yeela b karen-biisã yaa: Mam sẽn tʋm yãmb tɩ y ka zɩ ligdi wall korgo, wall neooda wã, bũmb paooga yãmba? B leokame tɩ baa fɩ. 36La a Zeezi yeel-b lame: Moasã, ka leb n yaa a woto ye. Bɩ ned ning sẽn tar ligd korg rɩk-a, tɩ ned ning me sẽn tar korg rɩke. La ned ning sẽn ka tar zabr sʋʋga, bɩ a koos a fuug n da a yembre. 37#Eza 53.12Bala, mam yeta yãmb tɩ bũmb ning b sẽn gʋls n yeel tɩ «b naaga bãmb ne tʋʋm-wẽns maandbã» tog n pidsa mam zugu. La bũmb ning sẽn gʋls n gomd mam yellã kolga pidsgu. 38Karen-biisã yeela a Zeezi tɩ ad zabr sʋʋs a yiibu. La a Zeezi yeel-b lame tɩ rẽ sekame.
A Zeezi pʋʋsa oliiv tɩɩs tãngã zugu
(Mat 26.36-46, Mark 14.32-42)
39A Zeezi yiime n kẽng oliiv tɩɩs tãngẽ wã, wa bãmb sẽn minim n maandẽ wã. La karen-biisã tũu bãmba. 40Bãmb sẽn ta zĩ-kãngã, a Zeezi yeela b karen-biisã tɩ b pʋʋs n da wa n lʋɩ makr pʋgẽ ye. 41La bãmb zãag n basa karen-biisã, sẽn zems kugr lobgre, n tɩ yĩgimd n pʋʋs 42n yeel yaa: M ba, yãmb sã n data, bɩ y zãag bõn-yũudl‑kãngã ne maam. Baoosgo, bɩ y ra maan mam sẽn datã ye, maan-y y raabo. 43Dẽ, malɛɛk yii arzãn n puk a meng ne bãmb n paas bãmb pãnga. 44La Sũ-sãoon-kãseng yõka a Zeezi, la bãmb pʋʋsa ne pãng n yɩɩd pĩnda, la b tʋʋlgã lebga wa zɩ-pɛla, n lasd tẽnga. 45Bãmb basa b pʋʋsgã n yik n wa b karen-biisã nengẽ n mik tɩ b gõeeme, sũ-sãangã yĩnga. 46La a Zeezi yeel-b lame yaa: Bõe yĩng tɩ yãmb gõe? Yik-y n pʋʋs-y n da wa n lʋɩ makr pʋgẽ ye.
B yõka a Zeezi
(Mat 26.47-56, Mark 14.43-50, Zã 18.2-11)
47Bãmb sẽn dag n nan ket n gomda, ad neb kʋʋng sẽn be taabẽ! La ned ning b sẽn boond t'a Zʋdaase, n yaa karen-biis piig la yiibã ned a yembrã dag n lʋɩɩ bãmb taoore. Yẽnda kolga a Zeezi n mok-ba. 48A Zeezi yeela yẽnda yaa: «Zʋdaase, yaa ne mokr la fo na n yõk Ninsaal Bi-riblã n kõ la?»
49Neb nins sẽn dag n be ne a Zeezi wã yãnda bũmb ning sẽn na n maanã, la b soka a Zeezi yaa: Zu-soaba, d kɛ-b ne sʋʋse? 50Karen-biisã ned a yembr kɛɛ maan-kʋʋdbã kãsem tʋmtʋmd n fiuug a dɩtg tʋbre. 51La a Zeezi gomame n yeel yaa: Bas-y-yã a woto. La a Zeezi tika raoã tʋbr n maag-a. 52Dẽ poore, a Zeezi yeela maan-kʋʋdbã kãsem-dãmbã, ne wẽnd-doog gũudbã nanambsã la kãsem-dãmbã sẽn dag n na n yõk bãmbã yaa: Yãmb waa mam nengẽ ne sʋʋse la ne rasab wa m yaa fãada. 53#Luk 19.47, 21.37Mam dag n bee wẽnd doogẽ wã daar fãa ne yãmba, la y ka yõkd maam ye. La wakat-kãngã yaa yãmb rẽnda, la likã pãng wakate.
A Pɩyɛɛr kɩɩsame t'a ka mi a Zeezi ye
(Mat 26.57-58, Mark 14.53-54, Zã 18.12-18)
54B yõka a Zeezi n tall-b n kẽng maan-kʋʋdbã kãsem yiri. A Pɩyɛɛr dag n pʋgda yɩɩg-yɩɩga. 55Nebã yõgna bugum zaka sʋka, n zĩndi. La a Pɩyɛɛr zĩnda ne bãmba. 56Tʋmtʋmd-poak a yembr sẽn yã a Pɩyɛɛr t'a zĩ bugmã vẽenemẽ, a ges-a-la kuii n yeele: Rao-kãngã me rag n bee ne a Zeezi. 57La a Pɩyɛɛr kɩɩsame n yeele: Paga, mam ka mi a Zeezi ye. 58Sẽn yɩ bilfu, ned a to yãnda a Pɩyɛɛr n yeele: Fo me yaa bãmb ned a yembre. La a Pɩyɛɛr yeela raoã yaa: Mam ka bãmb ned ye. 59Sẽn zems lɛɛr a yembr rẽ zugẽ, ned a to leb n yeelame: Hakɩɩka! Rao-kãngã rag n bee ne bãmba. Bala, yẽnda yaa Galɩle neda. 60A Pɩyɛɛr leokame: Hey! Mam ka mi bũmb ning fo sẽn gomd a yellã ye. Wakat-kãng bala, yẽnda sẽn ket n gomda, no-raoog kelmame. 61Zu-soabã wẽnemdame n ges a Pɩyɛɛre. La a Pɩyɛɛr tẽega gomd ning bãmb sẽn dag n yeel yẽnda wã: Sẽn deng no-raoog sẽn na n kelem rũndã, fo na n kɩɩsa naoor a tãab tɩ f ka mi maam ye. 62A Pɩyɛɛr yii yɩng n yãb ne sũ-sãang wʋsgo.
A Zeezi yaalgo, la b pãbre
(Mat 26.67-68, Mark 14.65)
63Raop nins sẽn da gũud a Zeezi wã yaala bãmba, n pãb-ba. 64Bãmb da loeta a Zeezi nengã ne peend n yet-b yaa: «Bãng-bãnge, ãnd n wẽ yãmbã?» 65La bãmb tʋʋ a Zeezi ne tʋy a taab wʋsgo.
A Zeezi bee kaoreng yɛl bʋ-bʋʋdbã taoore
(Mat 26.59-66, Mark 14.55-64, Zã 18.19-24)
66La beoogã sẽn vẽege, tẽngã nin-kẽembã sull ne maan-kʋʋdbã kãsem-dãmb la tõog karen-saam-dãmbã tigma taab n kɩt tɩ b tall a Zeezi n wa bãmb kaoreng yɛl bʋ-bʋʋdbã taoore. 67B yeela a Zeezi yaa: Yãmb sã n yaa Kirisã, bɩ y yeel tõndo. A Zeezi leok-b lame n yeele: Mam sã n yeel yãmba, y kõn tẽ maam ye. 68La m sã n sok yãmb bũmbu, y kõn leok-m ye. 69Sẽn sɩng moasã, Ninsaal Bi-riblã na n zĩnda pãng soab a Wẽnnaam rɩtgo. 70Bãmb fãa sokame: Rẽnd yãmb yaa Wẽnnaam biig wɛ? La a Zeezi leok-b lame: Yaa wa yãmb sẽn yeelã: «Mam yaa woto.» 71Dẽ, bãmb yeelame: Yaa bõe kaset la tõnd leb n baoodẽ? Tõnd mens wʋma bãmb noor goamã.
Moore Bible © Bible Society of Burkina Faso, 2014.