PUDUT 3
3
Lemulun Mebpeh Bang Sala'
1 Idi menipeh ineh meluun ileh ratnan amung-amung pung luk pangeh inau' Tuhan Allah luun tana'. Idi kebalaneh nan decur ineh, “Matuké Allah nepebala, kudeng ini, ‘Aleg medueh kuman bua' amung-amung lawa luk bang kabun ini'?”
2Idi kebala decur nan menipeh ineh, “Miak kai kuman amung-amung bua' luk bang kabun ini. 3Iamo' ratnan sebuleng lawa kayuh luk luun uned kabun ineh Tuhan nemebpeng nekai na kuman idi na ngakem bua'neh, pad kai na maté.”
4Idi kebala menipeh nan decur ineh, “Bala ineh na matu. Kali' rungen medueh na maté. 5Iamo' Tuhan Allah nepebala kudeng ineh, ngaceku Ieh kali' kareb medueh kuman ineh, mateh medueh mukab, idi medueh mangun mepad kudeng Allah pad kali' luk do' idi luk dat.”
6Idi decur ineh nenier lawa ineh do' siren matehneh, idi bua'neh pana' do' én sirenneh. Idi ieh nengerawé ineh mangun ku luk do' kuanneh lek, pad ieh mileh. Idi ieh nengalap bua' ineh, idi nekuman ineh. Idi ieh nenguit kuan awanneh, idi awanneh pana' nekuman teh. 7Idi petacu mateh didueh mukab idi didueh nekali' didueh lubpa. Idi didueh nerut don gita' mangun ku abpar didueh.
8Idi didueh neninger gara Tuhan Allah nalan bang kabun kareb malem, idi deléi dengan decur ineh pana' nesigapung nan apet kabun ineh. 9Idi Tuhan Allah nenawar deléi ineh, kebalaNeh, “Iapehké iko?”
10Idi kebala deléi ineh, “Ui neninger garaMu bang kabun, idi ui matot, ngaceku ui lubpa, ineh punneh ui sigapung.”
11Idi Allah nepebala, “Idéké nemaré kali namu ratnan iko lubpa? Pangehké iko nekuman bua' luk bibpengKu na miak kenen?”
12Idi kebala deléi ineh, “Decur luk pangeh biréMu negku ineh, ieh luk nemaré bua' ineh kinanku.”
13 Idi kebala Tuhan Allah nan decur ineh, “Anunké luk pangeh inau'mu ineh?”
Idi kebala decur ineh, “Menipeh nenaluk negku idi ui nekuman ineh.”
Allah Maré Ukum
14Idi kebala Tuhan Allah nan menipeh ineh, “Ngaceku iko pangeh nenganau' luk kudeng ineh, iko sebuleng ngalap kediman. Idi dengan batekmu iko miak suloi, idi iko miak kuman abuh tana' seruked ulunmu. 15 Idi Ui nganau' aceh bunu' arangmu dengan decur ineh, idi arang inulmu dengan inulneh. Idi Ieh miak ngeradu' uluhmu, idi iko miak nicuk tumidNeh.”
16Idi kebala Tuhan nan decur ineh, “Ui miak ngula' derehmu kareb iko mali', idi dengan derehmu iko miak nenganak, idi teh iko geregan ku awanmu, idi ieh pana' pa luunmu.”
17 Idi kebala Allah nan deléi ineh, “Ngaceku iko pangeh neninger bala awanmu, idi nekuman bua' ineh luk pangeh bibpengKu na miak kenen, idi tana' ini uen ngediman ngaceku iko. Idi dengan medereh iko nakap akan rat bang tana' ini seruked ulunmu. 18Idi tana' ineh miak ngulun tabpa' idi uduh luk baken kuanmu. Idi irin-irin luk bang pulung mangun ku akanmu. 19Idi dengan panamu iko ngakem, idi teh iko miak ngalap akan, pad macing iko lemubed amé' ku tana' teh, ngaceku ratnan abuh tana' iko ilap, idi iko lemubed mangun ku abuh teh.”
20Idi Adam neneten awanneh ineh Hawa, ngaceku ieh luk tinan amung-amung lemulun. 21Idi Tuhan Allah nenganau' kuan Adam idi awanneh ayung ratnan kubil pung, idi Ieh nengayung nedidueh.
Adam Idi Hawa Tila' Rat Bang Kabun
22 Idi kebala Tuhan Allah, “Nekini lemulun ini pangeh mangun mepad kudeng Tau, ngaceku ieh kali' do' idi dat. Idi na miak kuman bua' ratnan lawa kayuh ulun ineh idi na ieh mulun ruked-ruked.” 23Idi Tuhan Allah nengecuk neneh remuat rat bang Kabun Eden, pelé ieh luk pinudut ratnan tana miak ngasa' tana' teh. 24Idi Ieh nenganau' tuda'-tuda' melaikat karub pa busat aco Kabun Eden ineh. Idi Ieh nenganau' sebuleng pelapet luk mebudung idi luk mediper, luk ku matar dalan amé' lawa kayuh ulun ineh.
BALA LUK DO' Lun Bawang Bible © The Bible Society of Malaysia 1982, Second Edition 1998.