1Mos. 1
1
Panandaat manua samba polak samba sibabara ka bagania
1Kapanandatnia, Taikamanua masigalai manua samba polak, 2polak tapei aibailiu tubunia samba berisara sibabara kabagania, gepgep masilakkup koat samba Ketsat Taikamanua mumanyang ka uddut oinan.
3 #
2Kor. 4:6
Kuanangan Taikamanua, “Kau ibara pato.” Iageti mapatonangan leu et. 4Taikamanua masiitso pato nenda maeru, lepa pasaraakenangan pato nenda ka gepgep. 5Samba oniakenangan pato nenda “Ta'go” samba gepgep nenda “Soibo.” Bara kasoibokat samba bara simansep. Nene te gogoi siboiki. 6#2Ptr. 3:5 Lepa panibonangan Taikamanua, “Kau ibara lakkup katalagat oinan sibailiu pasongan oinan ka oinan.” 7Iageti baraakenangan Taikamanua lakkup samba ipasaraake oinan ka tei lakkup nenda ka oinan sikukuddu ka uddutnia. Puailinangan kele nenda. 8Oniakenangan lakkup polak nenda, “Manua” pasat soibo samba bailiu simansep. Nene te' gogoi sikarua.
9Lepa kuanangan Taikamanua, “Kau le iparuru oinan sikuddu ka tei manua ka sara kudduat, bailiu matoilanangan polak.” Iageti bara kele nenda. 10Taikamanua masioniake simagarak nenda, “Polak”, samba parurukat oinan nenda ioniake “Koat”. Maangka le bagat Taikamanua masiitco nenda.
11Panibonangan minca Taikamanua, “Kau le ibelaake polak senengamata siureman, iate siureman sibara luiku, samba siureman sibaraake bua.” Iageti bara kele nenda. 12Kise te ibelaake polak senengamata siureman. Taikamanua maangka bagania masiitso kele nenda. 13Kapplu sisoibo bailiu simansep. Nene te gogoi sikatelu.
14Lepa geti kuanangan Taikamanua, “Kau ibara simatoro ka manua masitoroiji polak bule ipasaraake sinago ka soibo. Eddangannia simatoro nenda ibailiu patuaggaiat tetere, gogoi samba rura, 15samba sibailiu simatoro ka manua nenda masitoroiji polak.” Iageti bara kele nenda. 16Kise te aigalai Taikamanua karua toro sabeu, iate sulu masitoroi ta'go samba laggo masitoroi gepgep; samba Igalai leu et panyanyat. 17Taikamanua masigalakngake sipasitoroi nenda ka manua bule itoroiji polak, 18bule itoroiji ta'go samba soibo, samba masipasaraake ta'go ka gepgep. Samba maangka bagat Taikamanua masiitco nenda. 19Pasat sinoibo, bara simansep. Iate gogoi si kaepat.
20Lepa geti kuanangan Taikamanua, “Kau le kabagat oinan senengamata sipungongoingoi samba pauma' uma' simigi sitububurut katei manua.” 21Lepa baraakenangan Taikamanua iba sabeu ka koat samba senengamata sipungongoingoi ka oinan samba senengamata uma. Samba maangka bagat Taikamanua masiitco nenda. 22Taikamanua masisukatnake sangamberinia nenda pasamba masikau parenta katubut sipungongoingoi kabagat oinan bule ramakakra samba masisunnake koat, samba katubut pauma-uma bule ituppai iginia. 23Pasat soibo, bara simansep. Nene te gogoi si kalima.
24Lepa kuanangan Taikamanua, “Kau le ibaraake polak senengamata leitit polak, simaom samba simalia, sabeu samba sigoiso.” Iageti bara ibara nenda. 25Kise te aigalai sangamberinia nene Taikamanau samba maangka le bagania masiitco sangamberinia nenda.
26Lepa kuanangan, “Kineiget tabaraake sirimanua simakere kele tubutta. Bule sia masipaneinei geti sangamberi iba, uma samba sangamberi leiti bagei, simaom samba simalia.” 27#1Mos. 5:1-2; Mat. 19:4; Mrk. 10:6; 1Kor. 11:7 Kise te aibaraake Taikamanua sirimanua samba bailiuakenangan sia kele tubuNia. Galainangan sia, simanteu samba sinanalep. 28Lepa geti sukatnakenangan sia pasamba tiboiet, “Kau ibara punuteteumui simigi, bule rakudduji samba raikepmake sangaliot polak. Kukau le ekeu masipasikeli paiba-iba, uma sangamberi leiti simalia.
29Komennu Kuake le katubum senengamata siureman sibara luiku samba buat mone. 30Tapoi katubut sangamberi uma samba leiti simalia, Kukau le parou samba siureman sibara buluk sibailiu komennia.” Iageti bara kele nenda. 31Itconangan sangamberi sigalaiNia nenda Taikamanua, samba bulat maangka bagaNia. Pasat soibo, bara simansep. Nenda te' gogoi sikaenem.
@LAI 2015