Matay 10
10
papulu' zi zazuwa na sito
(Maruko 3.13-19; Luka 6.12-16)
1i Yēsu puwazuk kanantu temakesi na papulu' zi zazuwa pukasa, veray kanazu za kezang venawi kana palrar zi paka'inava kana marekamelrimelri na kuwalengan. 2i makalusu maw tu ngadan na papulu' zi zazuwa na sito: na pukaisa maw i Simon (pu'avalray kani Pētēro), ulra ziya i waditaw i Antēlē, na alrak ni Zēbēdē i Yakob, waditaw ni Yakob i Yohanē. 3i Filip, Batolomay, Tomas, na kisasata i Matay, alrak ni Alefē i Yakob, Tatay, 4na 'uringetr na sevang i Simon, ulra ziya izu na meniwan kani Yēsu i Iskaliotē na trau i Yoda.
tu rilreng na papulu' zi zazuwa na sito
(Maruko 6.7-13; Luka 9.1-6)
5i Yēsu pakarun kanini na papulu' zi zazuwa na trau mupatraran, patalru kanazu: <<iauwa kanantu pinidare'an na sizumayan, zi iuwasavak kanantu kazekalran na Samaliya na trau. 6i inmu uwa kana i Iseraēl na trau na zemelengan na siri i kazu. 7na niredekan na kinazuwan mu vavati: <ula'esi lra na kanatal i itras!> 8paka'inava kana kuwaaleng i inmu, parevaaw kana minatray na trau, kemirungetr kana malripay na trau, venawi kana palrar. puwavutay mu kiveray, zi kuwaazu puwavut veray. 9kana pupaisuwan i aurung za kim, ging, tangpiya; 10nu mupatraran mu i aurung za lravatr zi za zuwaya za pakesavak, zi i aurung za kuse zi za surekuzan. 'alrana kiyakarun na trau nu kiveray za inuvalesan mu penauwa za pauwayan.
11<<nu mukuwa mu kana saya na kazekalran zi za zekalr mu, kiyanguwayan ziya kiyumalr za ulra i eman na muwai kiyatrevung kanmu, zi kikazu kanantu ruma', palru za muveruk mu i kazu kana kinazuwan. 12nu musavak mu kana saya na ruma' mu, rengay za: <kiyalriman ping-an i inmu.> 13na trau kanini na ruma' nu semangal kiyatrevung kanmu mu, na muramawan kanazu nanmu kiniyanun na ping-an mu raredek kanini na ruma'. nazu nu 'azi semangal kiyatrevung kanmu mu, elaku pareveliyas nanmu i'aperez. 14izu na 'azi uvalringay kanmu, na 'azi muwai kinger kananmu ngay na ruma' zi na kazekalran, muwadaya mu i kazu, tapetapu na trevulr i dapalr. 15penatezelra ku marengay kanmu, kazu kana kasayvangan na wari, i Sotoma zi Gomora tu kinisavungan paraatra'alr ziyan kanizu na kinazuwan nay!>>
nu kaidaidan na pakakuwatreng
(Maruko 13.9-13; Luka 21.12-17)
16<<taranapaw! pakarun ku kanmu pupatraran, penauwa kamawan kana siri pinusavak kana suwasuwan i alalas. kamawana mu kana unan 'elrepat, kamawan kana tutur apelr zi mukinger. 17taranapaw, ulra a trau 'a'evang kanmu, murung kanmu mukuwa i hoing, kazu kanantu waazukan ruma' melrepit kanmu. 18muramawan kananku nirekudayan, uri urungaw mu mukuwa kana demadikes zi na yawan i ngawayan kikiyumalr, wasay za fukuing kanazu zi kana sizumayan na trau. 19nu kikiyumalr mu mu, amanan mavangavang mianger rarengay za eman zi za kemuda temuvang; nu azu mu, na Viruwa i itras tu i panadamaw mu zanmu ngangay. 20'alrana nanmu nirengayan, amelri ninmu ngay, a mawna Lu'em nanmu Temama i itras na pakalrang kanmu zi marengay.
21<<na wadiyan naniwan kana wadiyan, piyanatray kanazu; na temama kuwaazu temara kanantu lralrak; na lralrak kima'etrev kana ma'izangan, pawnung papinatray kanazu. 22muramawan kananku nirekudayan, kaawiles kanmu mapapiya; mawmu izu na semaseker palru puludus na trau mu 'azika'azi muvaaw. 23nazu kazu kanini na kazekalran pakakuwatreng kanmu, pusar uwa kana zuma na kazekalran i inmu. marengaya ku kanmu, 'azi mu ziyan piya makawang kana kazekalran i Iseraēl mu, Alrak na trau uri raredek lra.
24<<na temakesi 'azi itraitras kana sinsi, na kuli 'azi itraitras kana tawki. 25mawna kemani, tu inuelepan na temakesi maresan kana sinsi, tu inuelepan na kuli maresan kana tawki, zi pakumawa lra. tu ma'izang i ruma' nu maw yawan na palrar i Bēlēzēbu kinuwa mu, na zuma na trau i savak kamelriya lra 'azi kisiri za marama'izang ziyamaw?>>
i eman na kakaudan
(Luka 12.2-7)
26<<semeneng, amanan makaud za trau, na muvulri ziya na lremak mu uwapana kikalrazam, na mulrasez na lremak mu kuwaazu kina'u. 27ku trinakatrakaw marengay kanmu, kazuwa mu nu 'uninan marengay pupana; nanmu inulrek kiningeran na ngay, kuwazuyu marengay pakalrazam kana ruma' i sa'usa'uv. 28izu na mawmau maruwa pinatray kana zazek, mawmu 'azi maruwa pinatray kana tinavawan mu, ikakaud; na kakaudan mu mawna Viruwa i itras, mawmau i intaw na maruwa putani pusavak i zikok kana zazek zi na tinavawan za trau. 29kemazu na saya tangpiya karuwa tremima' za zuwaya terin, mawmu nanmu Temama i itras nu 'azi muwai mu, arusay za 'azi watani i dare' a sasaysaya. 30mawlra i inmu, arusay nanmu 'arevu mu piya lra miip. 31semeneng, ikakaud, marapazangal mu lra kana sazu na terin.>>
pakanumaw kani Kiristo
(Luka 12.8-9)
32<<izu na pakanumaw kaninku i ngawayan kana trau mu, kazu ku i ngawayan kani Amalri i itras mu pakanumaw ku kantaw; 33izu na 'azi pakanumaw kaninku i ngawayan kana trau mu, kemazu 'azi ku pakanumaw kantaw i ngawayan kani Amalri i itras.>>
amelri pareka'inavanava, maw a tazaw
(Luka 12.51-53; Luka 14.26-27)
34<<zuwa ku i kani punapunan murunga za pareka'inavanava ikakuwa mianger; 'azi ku murung za pareka'inavanava, maw ku murung za tazaw. 35zuwa ku pakemazu kana alrak na ma'inayan semuveli kani temamataw, na alrak na vavayan semuveli kani tainataw, na musavak na vavayan semuveli kani tainataw tu inusavakan. 36tu 'alra na trau mu maw nantu niruma'enan.
37<<izu na sahar kanantu ma'izangan semalaw kanantu ikasahar kaninku mu, 'azi kirepa'uwa kurelrang kaninku; izu na sahar kanantu lralrak semalaw kanantu ikasahar kaninku mu, 'azi kirepa'uwa kurelrang kaninku; 38izu na 'azi muwai penazek kanantu ziyuzika kurelrang kaninku kemakawang mu, kemazu 'azi kirepa'uwa kurelrang kaninku. 39izu na maranger venaaw kanantu uwavaawan mu, muveliyas uwalremes za uwavaawan; izu na muramawan kaninku zi malremes za uwavaawan mu, muveliyas aelak za uwavaawan.>>
venavati kana pakasahar
(Maruko 9.41)
40<<i eman na temara kanmu mu mawna temara kaninku; na temara kaninku mu mawna temara kanizu na pazuwa kaninku izu na sasa. 41muramawan kani i eman za maw a pakarunan na Viruwa i itras zi temara kantaw mu, 'azika'azi kisepad kana pakarunan kanantu kiniveray na pakasahar; muramawan kani i eman za maw a patezelr na trau zi temara kantaw mu, kuwaazu 'azika'azi kisepad kanantu pakasahar na patezelr na trau. 42kanmuwa patezelray marengay, nu i eman lra, arusay nu melak za satakilran kana lritek na zanum pa'aw kana maramakitekiteng za sasa kana temakesi mu, 'alranu izu na makitekiteng na trau mu maw ninku temakesi, 'azika'azi kiveray za pakasahar.>>
© The Bible Society in Taiwan, 2023