Duk ADIBII ETI-ETUK ADINYAAGHA DUK NWUU
ADIBII ETI-ETUK ADINYAAGHA DUK NWUU
Andiwad N̄wad: Anwe se akewad eti-etuk adinyaagha anịm ikinoo anyịn̄ esiu. Akpesọg adee, adiwaag mme abughu-isiu adaidagha mbun Abasi emaewuu etoo ke Duk akede andiwad. Adiwaag mme andikpiab Baibru mfịn̄ n̄ko eyịmme etoo ke andiwad akede Duk
Duk akede n̄kukre awad n̄wad Ufaa Ediomi me akedidee Yuu. Anyii akede akpiab iboog mfia-anwe, ndiin ama anakka anyi ukpiab me usem Grịk mme eduk une n̄kpo emmo. Anyii akede nsan̄ Abọsul Bọọd, ndiin asan̄a mme anyii me usọg isan̄ utum Abasi esiu (Utum mme Abọsul 16:10-17, Utum mme Abọsul 20:5—21:17).
Akimi ide Duk akewad eti-etuk adinyaagha anịm me Rum me ufọd inii AD 60 mme AD 80.
NTAAG ME DUK AKEWAD ETI-ETUK ADINYAAGHA ANỊM
Duk akewad eti-etuk adinyaagha esiu ano anwe me akekreke Tiofilọs. Anwe anịm akimi ide akede awuo-isiu adaidagha Rum. Duk akeyịm Tiofilọs adiọn̄n̄ọ mbọg aban̄a Yisọs inwan̄-inwan̄. Anyii n̄ko akeyịm mme anwe me afịd itighe, n̄kọrọ mme anwe mee ekedidee Yuu, yaag ediọn̄n̄ọ akpanikuo mbọg me aban̄ake anwe se Yisọs Krais akedee. Anyii akeyịm emmo ediọn̄n̄ọ se Yisọs akenan̄n̄a ano akpiab n̄ko. Anyii n̄ko akeyịm emmo ediọn̄n̄ọ nte Yisọs akedi adifaag afịd anwe me enịm anyii me akpanikuo.
SE DUK AKEWAD ABAN̄A
Me eti-etuk adinyaagha anịm, Duk aketan̄ se Yisọs aketan̄ ano ane adiwam mme anwe ediọn̄n̄ọ nan̄a Abasi akefaag emmo isịkke me idiogn̄kpo. Duk akewad aban̄a unwe Yisọs, tọn̄n̄ọ me inii mbemisiu anyii amana tutuk asịm inii se anyii atịmme anyọn̄ Efịn. Anyii ama anakka atan̄ aban̄a emana Yọọn aduogmmọn̄ mme Yisọs. Mme etuk anịm awuu ato ke Yisọs akede Andifaag me Abasi akewuọn̄ọke adino edii.
Duk n̄ko amaawad aban̄a Yisọs nte Ayiu Anwe. Anyii ama atan̄ aban̄a nte Yisọs ake anwamma mbun udun̄ọ mme ubuene me nan̄a anyii akeyịmmeke mme anwe me mbun ufịn ekesịnne. Anyii amaakoog udun̄ọ mme anwe, afeen mme idiogn̄kpo emmo, ndiin adogho emmo aban̄a ukrag Abasi.
Adiwaag me eti-etuk adinyaagha anịm aban̄a utum Yisọs mme ukpiab n̄kpo esiu me Kadidi. Duk n̄ko amaawad aban̄a se Yisọs akene ano atan̄ me inii anyii ake asan̄a atuk Kadidi aka Yerusedem. Yisọs adogho mme mbed esiu atoo ke ana nte imo ibuoghọ ufeen ino ikpa adinyaagha mme anwe nsịkke me mme idiogn̄kpo emmo. Ndiin Abasi aya ane anyii ased me mkpa. Yisọs n̄ko amaadogho emmo atoo, Usọg inii ama abughu, imo iya ised me mkpa, imo iya itịmme idii idisiag ukrag imo.
Duk amaawad aban̄a se aketịppe me inii Yisọs akesịm Yerusedem. Nte Yisọs aketan̄n̄a, kian̄ me atuk mbed esiu ama atab anyii ano mkpa. Mme akuk Yuu me mme adaidagha emaedogho etoo ke anyii aduk adikpa, ndiin emmo ebii anyii esoog mme ukrag Rum, ndiin ewu anyii. Me ane usiu ite me Yisọs amaake akpa. Abasi ane anyii ased me mkpa. Yisọs amaawuo awud idii ano adiwaag anwe, ndiin awuud emmo atoo ke imo imiiduk unwe. Ndiin Abasi abii anyii adọg me Efịn.
Adibii se asịne me esịd nwuud
Adibii nwud 1:1-4
Emana mme uyen Yọọn Aduogmmọn̄ mme ame Yisọs 1:5—2:52
Utum ukwuọrọ ikuo Yọọn Aduogmmọn̄ 3:1-20
Uduogmmọn̄ mme idimi Yisọs 3:21—4:13
Anwa-anwa ukwuọrọ ikuo me Kadidi 4:14—9:50
Atuk tọn̄ọ me Kadidi aka Yeruselem 9:51—19:27
Akpatre udua me Yeruselem mme mkpre Yeruselem 19:28—23:56
Adised me mkpa, ubii idii nwuu, adidọg Abọn̄ Yisọs 24:1-53
Etebi (Esit Eket) Bible by Beyond Translation is licensed under Creative Commons Attribution-ShareAlike 4.0 License.