Mateyo 3
3
Ubusimikilo bwakwa Yohani Kabatisya
(Mako 1.1-8; Luka 3.1-18; Yohani 1.19-28)
1Muli silya nsiku Yohani Kabatisya aisile alesimikila mukiswebebe kyamu Yudeya. 2Alandile ukuti, “Lapileni, pantu Ubufumu bwa mumulu nabupalama!” 3Yohani emuntu Ezaya aalelandapo ukuti,
“Isiwi lyaulebilikisya mukiswebebe lileti,
‘Pekanyeni insila ya Mfumu
olololeni umwakupita!’ ”
4Insalu syakwa Yohani syapangilwe namasako yangamali, mumusana alekakamo umusipi wampapa kabili makanta nobuki efyakulya alelya. 5Abantu baisile kuli ena ukufuma ku Yerusalemu, ku fitungu fyonse ifyamu Yudeya naku kyalo kyapalamina no mulonga wa Yodani. 6Baleyebelela imembu syabo kabili alebabatisya mumulonga wa Yodani.
7Lintu Yohani amwene Abafalise naba Saduki abengi baleisa mukubatisiwa abebele ukuti, “Mwensoka mwe! Ninani amyebele ati kuti mwafyuka ukukandwa kuntu Lesa ali nokutuma? 8Kiteni ifintu ifilelangisya ukuti mwalifuma kumembu syenu. 9Kabili mwilatontonkanya ati, kuti mwafyuka ukukandwa mukulanda ati Abulahamu kikikolwe kyenu. Ndemyeba nati Lesa muli aya mabwe kuti afumyamo abaana bakwa Abulahamu! 10Isembe naliyipekanya ukuputula ifimuti kumisila, fyonse ifimuti ifisitwala fisabo ifisuma kufitema nokufiposa mumulilo. 11Namibatisya namensi mukulanga ukuti namulapila imembu syenu, lelo uwamaka ukunkila alinokwisa kabili nebo nsilingile nokupiita indyato syakwe. Akamibatisya na Mupasi Wamusilo elo nomulilo. 12Ali nolupe lwakwelelako muminwe yakwe. Akafumya imisungu pamusolo. Akatutila Iŋano mubutala bwakwe. Imisungu akoca mumulilo ushishima.”
Ukubatisiwa kwakwa Yesu
(Mako 1.9-11; Luka 3.21,22)
13Yesu afumine ku Galili nokuya kumulonga wa Yodani mukubatisiwa kuli Yohani. 14Lelo Yohani alyesesye ukuti amukanye. Amwebele ukuti, “Niwebo ulingile ukumbatisya, nomba nikinsi waisila kuli nebo?”
15Lelo Yesu ayaswike ukuti, “Leka kibe ififine pali nomba. Pantu muli iyi nsila ninsi twafikilisya ubulungami bonse.” Elo Yohani asumina.
16Lintu Yesu abatisiwe, kilyafye afuma pamensi umulu waliswike, kabili amwene Umupasi wakwa Lesa uletentemuka nge nkunda waikala napali ena. 17Nesiwi lyafumine mumulu ukuti, “Uyu mwana wandi untu natemwa kabili muli ena emombekelwa.”
