Athpariya 2023 WBT (NT) Non-Dramatized

Athpariya 2023 WBT (NT) Dramatized

“खानिङा बिस्‍वास नानेनुम् नुङ् डोक् आङा नागा ख्‍वाप्‍पा रिङ् खानि लोनानिगा॥ हिट्‌नागाँ खानि याहुदिचिगा छुम्‍मापाङ्‌लाम्‍मा माहोट्‌टिटि॥ छेम्‍बा डोक्, नाड्‌डेना बेला चा टायुगेट्, खानि कासेट्‌चिङा ‘माङ्‌हाङ्‌ङाना सेवा चोगुएट्‌टुम्‍मा’ नुङ् उमिट्‌युक्॥ हिट्‌नागाँ नाड्‌डेगा टोॽवाचि ओचोगुटु, पोङ्‌भोने हिट्‌नागाँ माङ्‌हाङ् पाबा मिसेन् उनिसुन्‍गेट्‌टुन्‍ना, हिट्‌नुङ् आङा चा मिसेन् उनिनिङ्‌गेट्‌निङ्॥ टरो नागा रिङ् खानि लोनेनाने, जब हिट्‌ना बेला टायुक्, टब खानि पाक् लोनानिगा डागा हिट्‌नागा रिङ् खानिङा आमिट्‌टुम्‍टुम्॥ पाइले डोक् आङा खानि नागा रिङ् लोनेट्‌निन्‍गा, पोङ्‌भोने आङा खानिलोक् वासेट्‌टाङ्‌ना॥

“हाट्‌ले आङा कापाङ्‌बा आङाना पाबाङि खाट्‌नागेट्‌नाँ॥ टरो ‘खान् खोनि आखाट्‌युगेट्‌ना?’ नुङ् खानि साङा चा आङा आसिलाप्‌टिन्‍नागा॥ पोङ्‌भोने आङा खानि नागा रिङ् ख्‍वाप्‍पा लोनानिनाँ खानि निङ्‌ग्‍वा याङ्‌छामाङि ठाइसे॥ टरो आङा खानि छेम्‍बाना रिङ् लोनाँनि, आङा नाहिलाम्‍मा खाप्‍मा डोक् खानिलोङ्‌सा ओचेट्‌नुना लियुक्, पोङ्‌भोने आङा खाट्‌नेट्‌निङ् भोने, घुवार काफाबा खानिङि उङ्‌निना॥ टरो आङा खाडाङे भोने उन् खानिङि आङा पाङ्‌सुङ्‌टुङ्॥ हिट्‌नुङ् उन् उङ्‌युङ् उन्‍ङा नाराङिगा याप्‌मिचिगा पाप, माङ्‌हाङ्‌ङाना धारमिक्‍ता बारेङि हिट्‌नुङ् टायुगेट्‌ना माङ्‌हाङ्‌ङाना न्‍याएङाना बारेङि हिट्‌नागा निमेट्‌टुचिचि॥ हिट्‌नुङ् आङा बिस्‍वास मिचोक्‍माम्‍बाक् पाप ए नुङ् निमेट्‌टुचिचि॥ हिट्‌नुङ् धारमिक्‍ता बारेङि हिट्‌नागा निमेट्‌टुचिचि, पोङ्‌भोने आङा माङ्‌हाङ् पाबाङि खाट्‌नाँ, हिट्‌नुङ् खानिङा आङा फेरि याङ्आनिसिन्‍नागा॥ हिट्‌नुङ् उन्‍ङा माङ्‌हाङ्‌ङाना न्‍याए बारेङि चा निमेट्‌टुचिचि, पोङ्‌भोने नाराङिना सासान् काचोक्‍बा पाइले डोक् माङ्‌हाङ्‌ङा न्‍याए चोक्‍मा हिडुएसुए॥
“आङा खानि लोमाना रिङ्उम् आझै जोम् युङ्‌ग्‍वा, टरो हाट्‌ले खानिङा ना नुङ्‌ना याप्‍मा बुजा चोक्‍मा आहिनिम्‍ना॥ हिट्‌नुङ् छेम्‍बाना हाङ्‌सा उङ्‌युङ् उन्‍ङा डोक् खानिलोङ्‌सा छेम्‍बाना लाम्‍बोलेङ् एडोक् लाम्‌टिमा आगुवाइ माचोगिटि॥ उन्‍ङा आप्‍पे उरिङ् माट्‌टुन्‍ना, उन्‍ङा जे खेम्‍सुटु, हिट्‌ना डोक् खानि मालोडिटि, हिट्‌नुङ् उन्‍ङा हान्‍डेङ् लिना रिङ् बारेङि चा खानि मालोडिटि॥ उन्‍ङा आङाना माहिमा चोगुटु, पोङ्‌भोने पाक् आङाना, हिट्‌ना आङालाम्‍मा खाट्‌टुङ् खानि मालोडिटि॥ आप्‍पालोक् लिसागा ख्‍वाप्‍पा थोक्‌चि आङागा॥ नाड्‌डेउङ् ‘पाक् आङागा हिट्‌नागा आङालाम्‍मा खाट्‌टुङ् हाङ्‌साङा खानि मालोडिटि’ नुङ् आङा लोनानिगा ए॥

“होप्‍मोलाम्‍मा खानिङा आङा फेरि याङ्आनिसिन्‍नागा, हिट्‌नुङ् छोप्‍मोङ्‌लाम्‍मा खानिङा आङा फेरि याङ्आनिसिटिङा॥” आम्‍टेप्‍मा ओचेलाचि उन्‌चि उन्‌चि नाड्‌डे उपिगे, “उन्‍ङा आनि ना पाक् आलोडाना, ‘होप्‍मोलाम्‍मा खानिङा आङा याङ्आनिसिन्‍नागा, हिट्‌नुङ् छोप्‍मोङ्‌लाम्‍मा खानिङा आङा याङ्आनिसिटिङा,’ हिट्‌नुङ् नाड्‌डे चा पिक्‍ना, ‘पोङ्‌भोने आङा पाबाङि खाट्‌नागेट्‌नाँ’?” हिट्‌नागा उपिगे, “उन्‍ङा ‘होप्‍मो बेला’ नुङ् पाक् माप्‍मा कोलुना? उन्‍ङा पाक् माट्‌टुएटुना आनि पाक्‍चा बुजा चोक्‌निम्‍ना॥”
हिट्‌नागाँ ना रिङ्‌ङाना बारेङि सिलाप्‍मा ओकोन्‌येट् नुङ् येसुङा ठाहा टोगुङ् हिट्‌नागा लोडुचे, “‘छोप्‍मोलाम्‍मा खानिङा आङा याङ्आनिसिन्‍नागा, हिट्‌नुङ् छोप्‍मोलाम्‍मा खानिङा आङा याङ्आनिसिटिङा’ ना रिङ्‌ङाना उटुप् पाइना नुङ् पोङ् खानि खानि रिङ्‌पान् आचोगेट्‌टिगि? छेम्‍बा आङा खानि लोनाँनि, खानि आहाबिटि हिट्‌नुङ् सानिङ्‌ग्‍वा आलोसिटि, टरो नाराङिगा याप्‌मिचिम्‍बाक् हारका उलियुक्॥ खानि याङ्आछाडिटि, टरो खानि याङ्‌छामाम्‍बाक् हारकाङि नोक्‌युक्॥ ओओ पोङ्‌मा बेला उमाङा टुक्‍लोक् छाडाङ्‌मा बेथा आङ्‌डुटु, पोङ्‌भोने उन्‍ङाना ओओ पोङ्‌मा बेला लियुक्॥ टरो उन्‍ङा ओओ पोङ्‌माहिडुङ् उन्‍ङा हिट्‌ना छाडाङ्‌मा बेथा मुन्‍डुडिसुटु, पोङ्‌भोने नाराङि ठिबाङ् ओओ पोङ्‌से नुङ् उन्‍ङाना ओचाप् टायुक्॥ नाड्‌डेडोक् ना बेला खानि याङ्आछाडिइसिए, टरो आङा फेरि खानि टुब्‌सिङा टाङा, हिट्‌नुङ् खानि निङ्‌ग्‍वा हारका लियुक्॥ हिट्‌नुङ् साङा चा खानिना हारका नाप्‍मा उहिडुन्‍ना॥ हिट्‌ना बेला खानिङा आङा पाक्‍चा आसिलाप्‌टिन्‍नागा॥ छेम्‍बा आङा खानि लोनाँनि, आङाना पाबालोक् खानिङा आनिङ्‌ङि जे आनाक्‍टुम् चा उन्‍ङा खानि मापिडिटि॥ ना बेला सोम्‍मा खानिङा आनिङ्‌ङि पाक्‍चा आनाक्‌टिन्‍गेट्‌टिन्‍गा॥ नाक्‍टानि, हिट्‌नुङ् खानिङा आटोगुम्‍टुम्, हिट्‌नुङ् खानि आड्‌डिक् हारका आलिसिटि॥

“आङा लोनानिगा नागा रिङ् बुजा डोक् चोक्‍मा हिनिम्‍ना रिङ्‌ङि लोनाइनाने॥ टरो बेला लियुङ् आङा खानिलोक् फेरि बुजा डोक् चोक्‍मा हिनिम्‍ना रिङ्‌ङि माखाक्, टरो पाबाङाना बारेङि खानि पारचिन्‍दा लोनाँनि॥ हिट्‌ना बेला खानि आप्‍पेङा आनिङ्‌ङि उन् आनाक्‍टुम्‍टुम्, हिट्‌नुङ् आङा खानि लोङ्‌सा पाबालोक् नाक्‍माबिमा कोन्‌निना॥ पाबा आप्‍पेङा खानि माया माचोगिटि, पोङ्‌भोने खानिङा आङा माया याङ्आचोगिएसिङे हिट्‌नुङ् आङा माङ्‌हाङ्‌लाम्‍मा टायाङ्‌ना नुङ् बिस्‍वास आचोगिएसिङे॥ आङा पाबालाम्‍मा नाराङि टायाङ्‌ना, हिट्‌नुङ् फेरि आङा नारा नाडुङुङ् पाबा सोरि खाट्‌नागेट्‌नाँ॥”
हिट्‌नुङ् ओचेलाचिङा ओलोडुए, “ना बेला गो खान्‍ङा आन्‍याँ बुजा डोक् चोक्‍मा हिनिम्‍ना रिङ्‌ङि माखाक्, टरो पारचिन्‍दा याप्‌मि आलोडे॥ हाट्‌ले आन्‍याँ बुजा चोगुम्‍मे, खान्‍ङा ख्‍वाप्‍पा रिङ् आनिसुगा, हिट्‌नुङ् खान् साङा चा सिलाप्‍मा कोन्‌निना॥ हिड्‌डेउङ् खान् माङ्‌हाङ्‌लाम्‍मा आउङ्‌साना नुङ् आन्‍याँ बिस्‍वास चोगुम्‍टुम्‍मा॥”
येसुङा हिट्‌नागा लोडुचे, “पाक् हाट्‌ले खानिङा आङा बिस्‍वास आचोगिटिङागि? टरो खेम्‍सानुम्, बेला टायुगेट्, छेम्‍बा टामाहिडे, हिट्‌ना बेला खानि ख्‍वाप्‍पा छेल्‍लेबेल्‍ले आलिसिटि॥ खानि आ-आप्‍पे पाङ्‌ङि आखाडिटि हिट्‌नुङ् आङा आएकेले याङ्आनाडिटिङा॥ टरोचा आङा आएकेले लिनिङ्‌ना, पोङ्‌भोने आङालोक् आङाना पाबा वाहेट्॥
“खानि आङि युङानिउङ् हाङ्‌हाङ् टोगानुम् नुङ् डोक् आङा खानिलोङ्‌सा नागा रिङ् लोनानिगा ए॥ नाराङि खानि याङ्आछाडिटि, टरो लुक्‍माभुङ् ठेलोक् चोगानुम्, पोङ्‌भोने आङा नारा मेप्‍मा हिडुएसुङे॥”

聆聽 युहान्‍ना 16