Athpariya 2023 WBT (NT) Non-Dramatized

Athpariya 2023 WBT (NT) Dramatized

ठिक् खेप् जोम् तिरो काफोक्‍बाचि हिट्‌नुङ् आरु पापि याप्‌मिचि येसुङाना रिङ् खेम्‌सिङा ओटाए॥ टरो फारिसि याप्‌मिचि हिट्‌नुङ् धारमाबिधि काहिसिक्‍बाचिङा गुनुङ् गुनुङ् चोक्‍सा उपिगे, “ना याप्‌मि पापिचिलोक् साङ्‌गाट् चोक्‍ना हिट्‌नुङ् एकेउ युङ्‌युङ् चोगा॥”
टब येसुङा हिट्‌नागा ठिक् मुन्‍डुम् लोडुचे, खानि माड्‌डे ठिबाङ् याप्‌मिलोक् साए गोटा ठुँबाचिङि ठिक् मासुए भोने, हिट्‌नाँ उनान्‍साए गोटा ठुँबाचि जाङ्‌गालाङि डोक् पोक्‍टुचिउङ् हिट्‌ना मासाना ठुँबा टुबुन्‍लोक् सोम्‍मा कोलुन्‌याक्‍टुन्‍नै टे? हिट्‌नुङ् हिट्‌ना मासाना ठुँबा टुबुङ् ओफाक्‍टाङ्‌ङि खुयुङ् ओचाप् टासा ओपाङ्‌ङि नोक्‌यु आप्‌युक्॥ हिट्‌नाँ ओसाइबाचि हिट्‌नुङ् ओटाक्‍लुङ्‌चि छेम्‍डुचिउङ् नाड्‌डे लोडुचिचि, “लौ हाट्‌ले आङालोक् खुसि लिसानि, पोङ्‌भोने आङा मासुङ्‌ना ठुँबा हाट्‌ले टुबेसुङे॥” आङा खानि लोनाँनि, नाड्‌डे पारिक् डोक् माङ्‌हाङ्‌ङि काएल्-काबु लिमा कोन्‌निना उनान्‍साए धारमोति याप्‌मिचि नुङ्‌ना माङ्‌हाङ्‌ङि काएल्-काबु लिना ठिबाङ् पापि याप्‌मि लोङ्‌सा टोनालोग्‌ङि ठेना आनान्‍दा लियुक्॥

येसुङा हिट्‌नागा आरको मुन्‍डुम् लोडुचे, “ठिबाङ् मेन्‍झेमालोक् ठिमेक् रुपाक् राङ् काप्‍टुएसुना॥ हिट्‌ना मेन्‍झेमाङा ठिक् रुपाक् राङ् मासुए भोने, कुपि हाट्‌टुङ् हिट्‌ना राङ् टुबुन्‍लोक् सोम्‍मा पाङ्‌ङि टाम्‍फेक्‍सा कोलुन्‍नै टे? हिट्‌नुङ् हिट्‌नाङा टुबुए भोने, ओसाइबाचि हिट्‌नुङ् ओटाक्‍लुङ्‌चि छेम्‍डुचिउङ् नाड्‌डे लोडुचिचि, ‘लु हाट्‌ले आनि आनान्‍दा चोग्‌याक्, पोङ्‌भोने आङा मासुङ्‌ना ठिक् राङ् टुबुएसुङे॥’ आङा खानि लोनाँनि, हिट्‌डेडोक् पापलाम्‍मा काएल्-काबु लिना ठिबाङ् पापि याप्‌मि लोङ्‌सा चा माङ्‌हाङ् रिङ् काउग्‍बाचिगा उन्‌चि चाप् टायुक्॥”

येसुङा फेरि आरको मुन्‍डुम् लोडुचे, “ठिबाङ् याप्‌मिङाना इप्‍पाङ् येम्‌बिछा उइछाचि डाचिगा॥ हिट्‌नुङ् ठिक् लेम्‍बा योङ्‌बिछा उइछाङा उप्‍पा लोडुए, ‘आप्‍पा, खान्‍ङाना माक्‍फेन्‍सुबेन् हान्‍डुङ् आभागा याङ्‌पिडा॥’ हिट्‌नुङ् हिट्‌ना याप्‌मिङा उमाक्‍फेन्‍सुबेन् इप्‍पाङ् डोक् हान्‍डुबिडुचे॥
“इम्‍टेप्‍मा लेम्‍बा ओएङ्‌स्‍वालेङ् योङ्‌बिछा उइछाङा टोगुना ओभागा सोब्‍बे खाट्‌टुङ् लाप्‍माङ् देसङि खाडे॥ हिट्‌नुङ् हिट्‌ना उमाक्‍फेन्‍सुबेन् खेरोक् डोक् मोज्‍मोज्‍जा चोक्‍सा चोङ्‌ठुङुङ् लाट्‌टुए॥ हिट्‌नुङ् उन्‍ङा खाट्‌टुना ख्‍वाप्‍पा उमाक्‍फेन्‍सुबेन् खारचा चोगुङ् लाट्‌टुना बेला डोक् हिट्‌ना देसङि ठेना आनिकाल ठाए, हिट्‌नुङ् उन्‍ङा पाक्‍चा चामा-ठुङ्‌मा टोगुव्‍ट्‌टुन्॥ हिड्‌डेउङ् हिट्‌ना देसङिना ठिबाङ् याप्‌मिङि टोॽवा नाक्‌सिङा खाडे हिट्‌नुङ् हिट्‌ना याप्‌मिङा उन् फाक्‌चि फाआरा पिमाना टोॽवा पिडुए॥ हिट्‌ना साङा चा चामा-ठुङ्‌मा उपिडुवाट्‌टुन् नुङ् फाआरा डोक् चोङ् ओफोक् इप्‍माजामा कोलुए॥
“हिट्‌ना बेला गोलो ओठोना टाए हिट्‌नुङ् नाड्‌डे मिट्‌टे, ‘आप्‍पा पाङ्‌ङिम्‍टे ओचाकारचि उन्‌चि फोक् उलिलोक् ओचोउङ् उठुङुङ् ओमोन्‍डुगा, आङाम्‍बाक् नाहि साॽवामाङा सियाङ्‌लाबाङे॥ हाट्‌ले आङा आप्‍पा पाङ्‌ङि नोक्‍ङा खाट्‌ना हिट्‌नुङ् लोडुङ्‌टुङ्, “आप्‍पा, आङा टोनालोग्‌ङिना माङ्‌हाङ् हिट्‌नुङ् कानिङ्‌ग्‍वा टानिना पाप चोगुएसुङे॥ हाट्‌ले आङा काइछा नुङ् चा लोमा याङ्‌खान्‌निना॥ आङा काचाकारचि गाड्‌डे डोक् ठिबाङ् चाकार याङ्‌चोगाउङ् कापाङ्‌ङि याङ्‌युङ्‌सा॥”’ हिट्‌नुङ्‌ना हिट्‌ना योङ्‌बिछा कोबाउङ् उप्‍पा पाङ्‌ङि नोक्‍टा खाडे॥ हिट्‌ना आबागेट्‌टाना बेला पाङ्‌लाम् लाप्‍माङ्‌लाम्‍मा उप्‍पाङा हिट्‌ना टायागेट्‌टाना निसुए, हिट्‌नुङ् उलुक्‍मा टुक्‍टुए हिट्‌नुङ् उप्‍पा पिन्‍सा खाडाउङ् उमुक्‍ङा हिट्‌ना हुप्‍टुङ् चुप्‍पा चोगुए॥
“हिट्‌नुङ् योङ्‌बिछा उइछाङा लोडुए, ‘आप्‍पा, टोनालोग्‌ङिना माङ्‌हाङ् हिट्‌नुङ् खान्‍ङाना निङ्‌ग्‍वा टानिना आङा पाप चोगुएसुङे॥ हाट्‌ले आङा काइच्‍छा नुङ् लोमा चा याङ्‌खान्‌निना॥’ टरो उप्‍पाङा ओचाकारचि लोडुचे, ‘एला खाडानिउङ् सोब्‍बे नुङ्‌ना ओफाङ् लोट्‌निङ् आप्‍टानुम् ना आइछा मेट्‌टानुम् हिट्‌नुङ् उमुक्‌ङि आङ्‌गुठि हिट्‌नुङ् ओलाङ्‌ङि लाङ्‌सुप् मेट्‌टानुम्, हिट्‌नुङ् गोठाङि ओम्‍बालाक् घुकुलुक्‍ना ठिक् जिवाट् आप्‍टानुमुङ् सेडानुम् हिट्‌नुङ् भातेर चोगुमुङ् चाम् हिट्‌नुङ् मोज्‍मोज्‍जा चोगि॥ पोङ्‌भोने ना आइछा सियेसाना, टरो फेरि उहिङ्‌ग्‍वाट् लिसाइसे॥ ना मासेसाना, टरो टुबाइसे॥’ हिट्‌नुङ् हिट्‌नागा आनान्‍दा चोक्‍मा ठालाँ ओचोगुए॥
“हिट्‌नुङ् हिट्‌ना बेला टुम्‍सामिङ् उइछा बेङ्‌सिङि टोॽवा चोगेट्‌टाना॥ हिट्‌ना टाए हिट्‌नुङ् ओपाङ् सोरि होन्‍डाटायानाँ ओपाङ्‌ङि बाजागाजा मुक्‍टाना हिट्‌नुङ् ओलाॽवासागा खेम्‍सुए॥ हिट्‌नाँ ठिबाङ् चाकार छेम्‍डुङ्, ‘नाहि पाक् लिएट्‌ना?’ पिक्‍सा सिलाप्‍टुए॥ हिट्‌नुङ् हिट्‌ना चाकारङा लोडुए, ‘कान्‍झा माहामा ओचेट्‌नुलोक् पाङ्‌ङि नोक्‍टा टाइसे, हिड्‌डेउङ् काप्‍पाङा ओम्‍बालाक् भुकुलुक्‍ना जिवाट् सेप्‍मा याप्‌मिमेट्‌टाउङ् भातेर चोगुएसुम्‍मे॥’ टरो हिट्‌ना टुम्‍सामिङाना आड्‌डिक् ओरेक् काडाउङ् पाङ् भिट्‌रा लिग्‍मा डोक् टेन्‍नेट्‌नि॥ हिट्‌नुङ् उप्‍पा भारा होन्‍डाउङ् ‘बाबु, पाङ् भिट्‌रा खाच्‌चि’ पिक्‍सा लेगालाप्‍टुए॥
“टरो हिट्‌नाँ उप्‍पा लोडुए, ‘आप्‍पा नाहि खेम्‍सु, नाट्‌टेप्‍मा बारखा टेप्‍मा काचाकारचि गाड्‌डे डोक् कासेवा चोगुङे, खान्‍ङा आलोडाङ्‌ना रिङ्‌चि पाक्‍चा मिपिक्‍ङे चोगुङे, हिट्‌डेउङ्‌चा आसाइबाचिलोक् मोज्‍जा चोक्‍मालोङ्‌सा ठिक् मेरबाचिलेट् नाथुचा आङा आपिनेट्‌निङ्॥ टरो ना काइच्‍छाङा वालाफेडुमा मेन्‍झेमाचिलोक् लाहाबा लिसाउङ् सोब्‍बे माक्‍फेन्‍सुबेन् लाट्‌टुए॥ हिट्‌नुङ् ना टायानाम्‍बाक् ओम्‍डाइसाना घुकुलुक्‍ना जिवाट् आसेडुङ् भातेर आचोगुए माहि टे॥’
“हिट्‌नुङ् उप्‍पाङा लोडुए, ‘आइछा खान्उम्‍टे लेन्‍सेन् आङालोक् डोक् आवाहेट्, आङालोक् युङ्‌ग्‍वागा ख्‍वाप्‍पा माक्‍फेन्‍सुबेन् खान्‍ङागा डोक्॥ टरो आनि खुसि हिट्‌नुङ् आनान्‍दा चोक्‍मा डोक् कोन्‌युक्, पोङ्‌भोने ना कान्‍झा सियाइसाना, फेरि हिङैसे॥ ना मासेसाना हिट्‌नुङ् टुबाइसे॥’”

聆聽 लुका 15