Genesis 14 的熱門經文

分享

Ma' wokthurrana Garraywu Godkunydja, liŋgu ŋayipi nhunanydja guŋga'yurruna, bala nhe djuḻkmaraŋalana nhuŋuway miriŋunha walalanha nhanukala yana ganydjarryu.” Bitjarrayina ŋayi Milkitjitik waŋananydja Yipuramgala. Bala yana ŋayi Yipuramdhu guḻk-guḻkthurrunana ŋunhiyi girri' malanha märrma' rululili ŋurruklili gurrunhara marrtjina, ŋunhiyi girri' bukmak yana ŋunhi ŋayi roŋiyinmaraŋala liliyi ŋurikala miriŋuwala. Yo, gurru'-gurrunharanydja ŋayi marrtjina märrma'-rululili ŋurruklili, ga waŋganydja ŋayi wekaŋala ŋurikinayi yolŋuwu Milkitjitikkuna. Bala yana Yipuramdja marrtjinana-wala.

ga ŋunhala gandarrŋuranydja wäŋaŋura yolŋu waŋgany yäku Milkitjitik gumurr-wunana nhanŋu Yipuramgu, yurru ŋayi ŋunhiyinydja yolŋu giŋ ŋurukuy wäŋawuy Djalambuy, ga bitjandhiyi ŋayi ŋunhiyi ḏarramu ḏalkarra'mirri Godkalaŋuwu. Yo, gäŋalanydja lili ŋayi Milkitjitikthu ŋayaŋay' ga borum weyika', bala wekaŋalana nhanŋu Yipuramgu. Bala ŋayi dhäruknha wekaŋala bukukurru-waŋanana Yipuramgu, Godkala yäkuyu ḻakaraŋala bitjarra, “Godthu nhuna yurru gämanydja marrtji ḻatju'kumana, ŋuriŋiyi liŋgu Godthu ŋunhi ŋayi djäma ŋunha djiwarr' ga dhuwala munatha'.

Ga ŋayi Yipuramdja waŋana yaka'yurruna, yana ŋayi rarr'yurrunana ŋunhiyi girri' malanha balayi roŋiyinmaraŋala giŋgu ŋurikiyi Djudumbuyŋuwu; ŋayi waŋana yaka'yurrunana bitjarrana, “Bukmak dhuwala girriny'tja warrpam' nhuŋuway, yaka ŋarra yurru dhuḏi'yunmarama ga ŋayathama yukurra ŋula nhämuny waŋgany. Dhuwalanydja nhuŋuwaynha yana, Märr nhenydja yurru yakaŋga waŋiya biyaka, ‘Ŋarra dhuwala ŋanya Yipuramnha ḻukunydjakuŋala.’ Yakana ŋarra yurru ŋayathama yukurra ŋula nhä ŋarrakuway ŋarra. Ma' märraŋana dhuwala girriny'tja malanha ga marrtjiyana-wala.” Bitjarrana ŋayi Yipuramdhu waŋananydja.