قصص من كتاب التكوين 1
1
خَلِق السماوات والأرض
1بالبداية خلق الله سبحانُه وتعالى السماوات والأرض، 2وكانت الأرض خربة بلا شكل وكلّا فوضى، والدنيا ظلام والميّ مغطّي وجّ الأرض كلها، ونَفَحات من روح الله كانت تحلّ عوجّ الميّ. 3وبكلمة من الله سبحانه أمر النور وقال: "كُنّ" فكان نور. 4ورضي الله عن هيدا النور، وفَصَل بينُه وبين الظلام. 5وسمّى النور نهار والظلام ليل. وبهبوط الليل وطْلوع النهار خَتَم سبحانُه اليوم الأوّل من الخلِق.
6-8بتاني يوم وزّع الله الميّ بأماكِنها المناسبة فوق وتحت وسمّى الشي بيناتُن الجوّ. وهيك ختم اليوم التاني.
9باليوم التالت أمر سبحانُه الميّ إنّه تتجمّع بمحل لتظهر اليابسة. 10وسمّى اليابسة أرض وسمّى الميّ بحر. ورضي الله عن الأرض والبحر. 11-12وبكلمة منُّه تعالى خلق بالأرض كلّ أنواع النباتات وشجر الفاكهة بهيدي الدنيا، والنبات يلّي بيحمل كلّ البذر عأنواعُه، وكلّ الشجر كمان يلّي فيها بذر من نوعها حتى تتكاثر. ورضي الله عن هالطبيعة. 13وهيك ختم سبحانُه اليوم التالت.
14-19وباليوم الرابع، وبكلمة من الله، ظهرت بالفضا أضواء عشان تضوّي الأرض وتميّز بين الأعياد والإيّام والسنين وضَبِطْ الليل والنهار. وهيدا كلُّه صار بأمر من الله تعالى. سخّر الكواكب، منها الشمس حتى تُضْبط النهار والقمر تَيُضْبَط الليل وسخّر النجوم، ورضي سبحانُه عن كلّ هالأمور وهيك انتهى اليوم الرابع.
20-21وباليوم الخامس خلق الله بكلمة منُّه السّمك وكلّ أنواع الحيوانات يلّي بتعيش بالميّ، من أصغر شي فيها لأكبر شي، وملِّت كلّ البحار والمحيطات. وخلق الله الطيور عأنواعا حتى تملّي السما، ورضي الله عن كلّ هالمخلوقات كمان. 22وباركها وأمرا سبحانُه إنّه تتكاثر. السمك يملّي كل البحار والطيور تْمَلّي كلّ الجو. 23وهيك انتهى اليوم الخامس.
24وباليوم السادس خلق الله بكلمة منُّه كلّ أنواع الحيوانات البريّة من بهايم وحيوانات مفترسة وزواحف وحشرات.
25وكلُّه تمّ بأمر من الله سبحانُه. ورضي تعالى عن كلّ هالمخلوقات.
26-28وآخر شي خلق الله الإنسان وقال: "لِنخلُق الإنسان تيكون ظِلّنا عالأرض، ذَكَر وأُنثى منِخلقُه" فأعْطى سبحانُه سُلطة للإنسان عالسمك والطيور وكلّ الحيوانات! نعم، خلّاه مسؤول عن الأرض وعن كلّ شي فيا. وهيك صار الإنسان خليفة الله سبحانُه عالأرض. وبارك تعالى الإنسان وأمَرُه أنّه يتكاتَر ويملّي الدنيا. وخبّر الله الإنسان إنّه سخَّرُه عكل المخلوقات من سمك، وطيور وكلّ الحيوانات وكلّ شي عوجّ الأرض. 29وقال تعالى: "وهبتَك كلّ النباتات يلّي بتحمُل بذر عوجّ الأرض، وكلّ شجر الفاكهة، منشان تاكُل منها. 30ووهبِت العشب والنباتات الخضرة لكلّ المخلوقات الحيّة بما فيهن الحيوانات والطيور". 31وبالنهاية رضي سبحانُه عن كلّ شي خلقُه من إنسان وحيوان ونبات، لأنّه كلّ شي كان بأحسن تقويم. وهيك ختم سبحانُه اليوم السادس.
© 2021 Sabeel Media