ዘፍጥረት መእተዊ
መእተዊ
ኦሪት ዘፍጥረት ብዛዕባ ኣፈጣጥራ ዓለማትን ኣመፃፅኣ ደቂ ሰብን፥ ሰብ ብኸመይ ሓጢኣት ከም ዝጀመረን ሓጢኣት ዘስዓቦ ስቓይን፥ ከምኡውን እግዚኣብሄር ምስ ሰብ ዘለዎ ርክብን ይገልፅ።
ኦሪት ዘፍጥረት ኣብ ክልተ ዓበይቲ ኽፍልታት ይምደብ፦
1. ካብ ምዕራፍ 1 ክሳዕ 11፥ ብዛዕባ ኣፈጣጥራ ዓለምን፥ ብዛዕባ እቶም ቀዳሞት ደቂ ሰብን ይገልፅ። ኣብዝ ክፍሊ እዙይ ታሪኽ ኣዳምን ሄዋንን፥ ቃየልን ኣቤልን፥ ኖህን ማይ ጥፍኣትን፥ ህንፃ ባቢሎንን ንረክብ።
2. ካብ ምዕራፍ 12 ክሳዕ 50፥ ኣብ ዘሎ ኽፍሊ ድማ ታሪኽ እቶም ቀዳሞት ኣቦታት ህዝቢ እስራኤል ይርከብ። ካብዚኣቶም እቲ ቐዳማይ ኣብርሃም እዩ። ኣብርሃም ብእምነቱን ፍቓድ እግዚኣብሄር ብምፍፃሙን ዝተፈለጠ ነበረ። ኣስዒቡ ብዛዕባ ወዱ ይስሓቅን፥ ብዛዕባ ወዲ ወዱ ያእቆብን ብዛዕባ እቶም ዓሰርተ ኽልተ ደቂ ያእቆብን ይገልፅ። እዞም ዓሰርተ ኽልተ ደቂ ያእቆብ፥ ነቶም ዓሰርተ ኽልተ ነገድ እስራኤል ዝፈረዩ ኸም ዝኾኑ እቲ መፅሓፍ ይነግረና። ወዲ ያእቆብ ዮሴፍ ተሸይጡ ናብ ግብፂ ኸም ዝኸደን፥ ብድሕሪኡ ድማ ያእቆብ ምስ ስድራኡ ኸም ዝሰዓቦን ይገልፀልና።
እዝ መፅሓፍ እዙይ ብዛዕባ ደቂ ሰባት ዝገልፅ እኳ እንተ ኾነ፥ ልዕሊ ዅሉ ብዛዕባ እቲ እግዚኣብሄር ዝፈፀሞ ግብርታት እዩ ዝነግረና። እግዚኣብሄር ሰማያትን ምድርን ከም ዝፈጠረን፥ ንህዝቡ ኸዓ ዅልሻዕ ናብ ቅኑዕ መንገዲ ኸም ዝመልሶም ዝሃቦም ተስፋን ይገልፅ። ኣብዝ መፅሓፍ እዙይ፥ ብዝበለፀ ብዛዕባ እቲ ንዝበደሉ ዝፈርድን ዝቐፅዕን ንህዝቡ ዝመርሕን እግዚኣብሄር ነንብብ። እዝ ጥንታዊ መፅሓፍ እዙይ ብዛዕባ እምነት ሓደ ህዝብን፥ እዝ እምነት እዙይ ድማ ህያው ኮይኑ ምእንቲ ኽነብርን ተፅሓፈ።
ትሕዝቶ
1. ኣፈጣጥራ ዓለምን ደቂ ሰብን 1፡1-2፡25
2. መጀመርታ ሓጢኣትን ስቓይን 3፡1-24
3. ካብ ኣዳም ክሳዕ ኖህ 4፡1-5፡32
4. ኖህን ናይ ጥፍኣት ማይን 6፡1-10፡32
5. ህንፃ ባቢሎን 11፡1-9
6. ካብ ሴም ክሳዕ ኣብራም 11፡10-32
7. ኣብርሃም፥ ይስሓቅ፥ ያእቆብ 12፡1-35፡29
8. ደቂ ኤሳው 36፡1-43
9. ዮሴፍን ኣሕዋቱን 37፡1-45፡28
10. እስራኤላውያን ኣብ ግብፂ 46፡1-50፡26
