മത്തായി 3
3
തണ്ണിക്ക് മുളുഗ്‌സ്‌റ ഓഗന്നാന്‌ദ് ണായ
1അയ്യി ഗള്യേലി തണ്ണിക്ക് മുളുഗ്‌സ്‌റ ഓഗന്നാ് എഗുദ ണാഡില്യ ബെ്ട്ടെകാഡ്‌ക്കെ ബന്ത്: 2<<സാമി ആള്‌റാദ്#3:2 സാമി ആള്‌റാദ് മത്തായി എ്ള്‌ദിന ണല്ല സേദിലി സാമി ആള്‌റാദ് എങ്കാദ്‌ണ മേലോഗ ആള്‌റാദ് എന്ത്‌ത്തെ എ്ള്‌ദിര്‌ക്കാദ്. മത്തായി ഇച്ചെ എ്ള്‌ദിനാദ് എന്ത്‌ക്കെന്റ എഗുദാര് സാമിന മദ്‌സ്യ ബേ്ണ്ടി സാമി എന്ത് സൊല്ലമാട്ടാര്. അദ്‌ദ് കണാക്ക് മേലോഗ എന്ത്‌ത്തെ സൊല്ലുറാദ്. ണിമ്മ്‌ദ് കാല്‌ക്കെ ബന്ത് എജ്ജിര്‌ക്ക്‌ദ്. അദ്‌ണാലെ പാവ സെയ്‌രാദ്‌ണ തള്ള്യെക്കി സാമി സാരി തിലിമ്പിരി>> എന്ത് ബെല്ല്യാദ്‌ക്ക് ആലാത്ത് ആലാത്ത് സൊന്നാ്.
3<<ബെ്ട്ടെകാഡിലിര്‌ന്ത് ഒരുത്താ് ഇച്ചെ ഒളേത്ത് സൊല്ലുറാ്:
<ആണ്ടവാന്‌ക്ക് ബയ്യി ഒരിക്കിരി,
അയാള്‌ക്ക് ബേ്ണ്ടി ബയ്യിന ണേരെ ആക്കിരി> >>#എസയ്യാ് 40:3
എന്ത് എസയ്യാ് സാമിദാസ് സൊന്നാദ് ഇയാള്‌ണാത്തെ.
4ഓഗന്നാ് ഒട്ടഗ തുപ്പുഡിലി ഉണ്ടാക്കിന ഉഡുപ്പുമ് ഇ്ഡ്‌പ്പ്‌ക്ക് ഒരു തോല്‌കച്ചെനാമ് കെ്ട്ടിര്‌ന്താ്. അയാള്‌ദ് തീനി എങ്കാദ് തേന്‌മ് മുട്ടിരിമ് ആയിര്‌ന്ത്‌ദ്. 5അയ്യി ഗള്യേലി എര്‌സലേമ്‌ക്കാറാര്‌മ്, എഗുദ ണാഡ്‌ക്കാറാര് പക്കാനാമ്, ഓറ്‌ദ്ദാ് ബാനിക്ക് അയ്യേ്ട്ടിമ് ഇയ്യേ്ട്ടിമ് ഇര്‌ക്ക മുച്ചുഡ ണാഡില്യ ആള്‌ഗാമ് അവാന്‌ദ് പട്ട്‌ക്കെ ബന്ത് എജ്ജിനാര്. 6ബന്ത ആള്‌ഗ പക്കന തമ്മ് പാവഗണ തുറാന്ത് സൊന്നാര്. അക്കുളെ ഓഗന്നാ് അവാര്‌ണ ഓറ്‌ദ്ദാ് ബാനിക്കെ മുളുഗിസിനാ്.
7പരിസലാദിലിര്‌ന്ത്‌മ് സദൂക്യലാദിലിര്‌ന്ത്‌മ് എത്തിന്യൊ ആള്‌ഗ തന്ന് പട്ട്‌ക്ക് തണ്ണിക്കെ മുളുഗ്യ ബരാദ്‌ണ കണ്ട് ഓഗന്നാ് അവാര്‌ക്കെ ഇച്ചെ സൊന്നാ്: <<പാമ്പ്‌ണ പാസെ ണഞ്ചിര്‌ക്കവാരെ, ണിമാക്ക് സാമി തര ദണ്ടണേലിര്‌ന്ത് തപ്പിസി കഡാക്ക്യ ആര് ബുദ്ദി സൊല്ലി തന്താദ്? 8ണിമ്മ പാവ സെയ്‌രാദ്‌ണ തള്ള്യെക്കിനേര് എന്ത് സൊല്ലുറദാനാക്കി അദ്‌ക്ക് തഗ്‌ന്ത കാര്യ സെയ്‌ദ് കാട്ടുഡൊ. 9<അവുറഗാമ്‌ത്തെ എമ്മ് പാട്ടാ്> എന്ത് ണിമ്മ ണിമ്മ് മനേസ്സ്‌ക്കുള്ളുക്ക് സൊല്ലി തപ്പിസി കഡാക്ക്യ മുഡ്യു എന്ത് ണിമ്മ ണെനേക്കാദി. എന്ത്‌ക്കെന്റ ഈ കല്ല്‌ഗളിലിര്‌ന്ത് അവുറഗാമ്‌ക്ക് മക്കണ ഉണ്ടാക്കി കൊഡുക്ക്യ സാമിക്ക് മുഡ്യു എന്ത് ണാന് ണിമാക്കെ സൊല്ലുറെ. 10ഇപ്പ് താനെ മരാണ ബെ്ട്ട്യ ബേ്ണ്ടി മ്‌ണ്ടേക്കെ കോഡാലി ബെത്ത് മുഡിന്ത്‌ദ്. മോസ കായി കായിക്ക മരഗണെല്ല ബെ്ട്ടി തീക്കിക്കി സുട്ടെക്കുവാ്.
11ണിമ്മ പാവ സെയ്‌രാദ്‌ണ തള്ള്യെക്കി സാമി സാരി തിലിമ്പിനേര് എന്ത് കാട്ട്യ ബേ്ണ്ടി ണാന് ണിമാണ തണ്ണിക്കെ മുളുഗ്‌സ്‌റെ. ആന എനാണ ബ്‌ഡ അദിഗാരുള്ളവാ് എന്ന് പിന്ന്‌ക്ക് ബരുവാ്. അയാള് ഇക്കിര്‌ക്ക സെര്‌പ്പ്‌ണ ഗൂഡി എ്ഡ്‌ക്ക്യ എനാക്ക് തഗ്‌ദില്ലെ. അയാള് ണിമാണ സാമിണിഗാലിലിമ് തീലിമ് മുളുഗ്‌സ്‌വാ്. 12അന്ന കളാത്തില്യ അന്നണ തൂറ്റി പാളെന ബേ്റേമ് മണിന ബേ്റേമ് ആക്ക്‌റ ബീസ്‌ഗൂഡു അയാള്‌ദ് കയ്യിലിര്‌ക്ക്‌ദ്. അയാള് അന്നണ ബല്ലാക്കട്ടി ബെക്കുവാ്, പാളെന കെ്ഡാത്ത തീക്കിക്കി സുട്ടെക്കാമ് സെയ്‌വാ്.>>
ഏസുണ തണ്ണിക്കെ മുളുഗ്‌സ്‌റാ്
13അക്കുളെ ഓഗന്നാ് കയ്യാലെ തണ്ണിക്കെ മുളുഗ്യ ബേ്ണ്ടി ഗെലീലെ ണാഡിലിര്‌ന്ത് ഓറ്‌ദ്ദാ് ബാനിക്കെ ഏസു ബന്താ്. 14ആന ഓഗന്നാ്: <<ണീത്തെ എനാണ മുളുഗ്‌സ്‌റ കണാക്ക്. അച്ചെ ഇര്‌ക്കാട്ടി ണീ എന്ന് പട്ട്‌ക്ക് മുളുഗ്യ ബരേഗ?>> എന്ത് സൊല്ലി ഏസുണ തഡ്‌ത്താ്.
15ആന ഏസു അയാള്‌ക്കെ: <<ഇപ്പ് ഇച്ചെത്തെ സെയ്‌ഡൊ. ണമ്മ സെയ്‌ഡൊ എന്ത് സാമി ആസെപഡ്‌റാദൊട്ടുക്ക് ണഡാക്ക്യ ബേ്ണ്ടി ഇച്ചെ സെയ്‌രാദ്‌ത്തെ ണല്ലാദ്>> എന്ത് സൊന്നാ്. അക്കുളെ ഓഗന്നാ് ഏസു സൊന്ന പാസെ സെയ്‌ദാ്.
16ഏസു തണ്ണിക്കെ മുളുഗി എ്ന്താദ്‌മ് ഏ്ട്ടിക്കെ ഏ്റിനാ്. അക്കുളെ ബാന് തുറാന്ത് സാമിണിഗാല് സോറെ പക്കിന പാസെ ഇ്റാങ്കി ബന്ത് തനാക്കെ ഏ്റ്‌റാദ്‌ണ അയാള് കണ്ടാ്. 17<<ഇവാ്ത്തെ എന്ന് മഗാ്, ഇവാന ണാന് സീവാ് ബ്‌ഡ്‌റെ. ഇവാനാലെ എന്ന് മനേസ്സ് തെ്ളിന്ത്‌ദ്>> എന്ത് മേലോഗാത്തിലിര്‌ന്ത് ഒരു ജദ്ദാമ് കേ്ട്ട്‌ദ്.
New Life Literature