Mateu 3
3
Chumairo ra Johani Mubhapatisi
(Marku 1:1-8; Ruka 3:1-18; Johani 1:19-28)
1Ngaao mazuva wakaviya Johani Mubhapatisi echichumaira mu bani mwo Judhiya, 2echiti: Tenderukanyi imwimwi; ngokuti Umambo hwo mu gore huri phedo. 3#Vonayi kuna: Isa. 40:3. Ngokuti uwo ndiye waakavereketa ndiye Isaya muprofeti, echiti: Izwi rounodanijira mu bani, nasiriranyi njira ya Mambo, rungamisanyi makwanja ake. 4Uwu Johani wayiva no nguvo yo mamviri wo kamera, no njobo muchiunu chake; no kuha kwake kwayiva ndongwe no uchi hwo mushango. 5Kwakaviya kwaari vo Jerusarema, no vese vo Judhiya, no vo ndharaunda yese yo Jordhani, 6navo vakabhapatiswa ndiye mu murambo wo Jordhani vechipupura zvishaishi zvavo. 7Asi echivona vazhinji vo vafarisi, no vasadhusi, vechiviya kwoobhapatiswa, wakati kwavari: “Imwimwi mibarihwana wo mavhumbi, ndiyani wakamuzivisa kuti mutize ushungu hunoviya?” 8Ndizvo pangijiranyi michero inovonisa kutenderuka. 9Musarangarija mwechiti mukati mwenyu, tina Abrahama baba wedu; ngokuti ndinoti kwomuri, kuti Mwari uno simba ngaaya mapuwe kumusira vana kuna Abrahama. 10Nazvinopano bheura radihwa pa miji jo miti, ndizvo muti wese usikabereki michero yakanaka unotemehwa pasi, ukandihwe mu muriro. 11Inini ngozvirokwazvo ndinomubhapatisa ngo kumwa kuti mutenderuke, asi uwo unoviya sure kwangu uno simba kupinda inini, anditosisiri no kutwara magwada ake; uwu ndiye unozomubhapatisa ngo Mweya Wakachena no muriro. 12Uwo mbhade yake iri mu nyara yake, naye unozonasa kupshayira chimbuwa chake, no kuunganija koroni yake mu nyumbu, asi unozopisa makoto ngo muriro usikajimi.
Kubhapatiswa kwa Jesu
(Marku 1:9-11; Ruka 3:21-22)
13Naapo Jesu wakaviya Jordhani echibva Garire, kuna Johani, kwoobhapatiswa ndiye. 14Asi Johani wakada kumurambira, echiti: “Inini ndinosisira kuti ndibhapatiswe ndiwe, newe woviya kwendiri here?” 15Asi Jesu wakapingura, akati kwaari: “Wechitenda zvino; ngokuti ngokudaro kunodikana kuti tizarise kururama kwese.” Naapo wakamutendera. 16Naapo Jesu abhapatiswa, paripo wakabuda mu kumwa, ngokudaro gore rakabewuka, naye wakavona Mweya wa Mwari wechibzuka wakadari ngo njiva yechiviya panyezuru pake. 17#Vonayi kuna: Ndu. 2:7; Isa. 42:1; Ruk. 9:35.Vonayi, izwi rechibva mu gore, rakati: “Uwu ndiye Mwana wangu unodikana, wo ndinonasa kudakara ndiye.”
Novo Testamento Cindau © Bible Society of Mozambique, 2023.