Jon 2
2
Bidi me deli Kana bulude we sai
1Te Jisasgo Nataniel dali te po olama, si sogo biliama, sela sogo wabo side tama bidi me deligo Kana bulude we sai. Te Kana bulu te Galili tǫ pedai tomode elalubao. Tama Jisas aga ida te we sabo bede bidai. 2Augwaligo Jisas aga bidi dabe dali augwali i wai, Jisas aga bidi dali augwali aselama, te we sabo suagasomainogo, augwaligo te po wai. 3Tama te bomai ąį wain silai. Tama Jisas aga idago agabolo te po wai, “Augwaligo bomai ąį wain meni, te sia salio,” Jisas dali aga idago te po wai. 4Tama Jisasgo aga idabolo te po wai, “Ida, nago enabolo te po magi baso obawe? Eno we bidi augwali tau sabo sogo te pedalobeo,” Jisasgo aga ida dali te po wai. 5Jisas aga idago augwali te we sabo be page bidigo sę ebo bagebolo te po wai, “Jisasgo po me deli dage dali obaso da, teda dagego te po wali pao,” te po wai. 6Te moni masigi sene a naga olama, me badu nogo deli badu munalubo. Tama te tobage sene deli deli augwaligo ąį hauwa pągąwaibao. Godigo augwalibolo dage usu da omainogo, te Juda dabe augwaligo nai tuainogo eyu, hasia bolo augwa nogo ąį polo telawai. 7Tama Jisasgo te sę ebo bagebolo te po wai, “Wę sigibao, e moni masigi sene dabe pągą yao.” Tama augwaligo te masigi sene dabe mu pągąwai. 8Tama Jisasgo augwalibolo te po wai, “Te ąį me badu dwasianu genagide manama, tama sela pelama, te tubo nai tonalubo bidibolo magibao,” te po wai. Tama tilama, augwaligo te ąį sela pai.
9Te tubo nai tonalubo bidigo te ąį agai polo tula suai, megi tama te bomai ąį wain pedalali ąį agai polo tula suai. Tama agai konebeo, augwaligo menade sali. Tialima, te sę bidi augwaligo te ąį tuali augwaligo koneai. Tialima, te nai tonalubo bidigo te we sali bidi agai i wai. 10Tama asama, agai te bidibolo te po wali, “Tigidali bidigo da, augwaligo dwagi yai bomo ąį wain polo dobabo dao. Tama nosali, augwali bidi dabego te ąį hauwa tulama, tama augwaligo dobo ąǫ yali ąį te dobabo dao. Tiali goli, nago naga dwagi yai ąį wain naga dąų olaluama, tama megi tama nago sela asalio,” agai te po wai.
11Te bomai sę Jisasgo yali bomai sę hasia mu yai. Te Jisas agai te Galili tǫ pedai badu tomode, te dwasianu be nani nogi Kana, tede te sę yai. Tama Jisas aga bomo augwalibolo ola mawai, tama Jisas aga wali pabo bidi augwa Jisasba homu tigidali muai. 12Te sę silama, tama Jisas aga Kaperneam buluba pai. Aga ida me, aga ama dede me, aga wali pabo bidi dabe me, augwali hodobo pai, tama augwali te bulu Kaperneamde osogo bidigi pai, si sela sogo bidai.
Jisasgo te bidi dabe augwali Moni Lotu Be tempel tomode nai dabe dobu si ebadi sela sąwai
(Mat 21:12-13; Mak 11:15-17; Luk 19:45-46)
13Te Juda bage augwaligo bo disąwai bret tuabo side te pąde tama o, te si nogi Pasova dao. Tama Jisas aga te Jerusalem moni be naniba pai. 14Tama Jerusalem be nani tomoba sabolama, tama te Moni Lotu Be tempel tomode Jisas agai suali, augwali bidi dabe augwa kibu bulmakau me, kibu sipsip me, ba dabe, tama augwaligo te naide maket ebo sę eyu, te Moni Lotu Be tempel tomode yai, we bidi augwaligo te nai si dobu eyu abelama, Godibolo momainogo yai. Tama Jisasgo suali, ma gasa bulu masigi dobu si ebo bidi dabe da augwali ni nami pąde dulalubo suali. 15Tama Jisasgo te sę sulama, tama agai bono dabe selama, bį nigai. Bį nigilama, agai te kibu bulmakau dali kibu sipsip dali tigidali te tempel bede augwali bįgo elama, buluba gudulai. Tama Jisas agai te masigi dobu si ebo bidi dabego masigi dali ni nami dali gea palali. 16Tama agai ba dabe dobu si ebo bidi dabebolo te po wai, “Te nai sela pao,” wai. “Dagego eno ayago be te nai dobu ebo be tiwai egio,” Jisasgo augwali dali te po wai. 17Jisas aga wali pabo bidi dabe augwaligo po me Godigo po bukude wali po me ma koneai. Te bukude te po wai, “Eno homugo nago be tonalubo homu bomo ebo dao. Tama augwaligo enabolo dene mawaibao.”
18Te Juda dabe augwaligo te sulama, Jisas dali te po wai, “Mena bidigo nagebolo ‘Te nai sela sąyao,’ obaso, tama nago te nai dabe sela sąyaniwe? God agai nagebolo te po weyu da, teda nago naga moni bomai sę me deli yao. Tama dago nago te sę ebo sulama, Godigo nagebolo ‘Te sę yao’ wali dago koneaibao,” Juda dabe augwaligo Jisasbolo te po wai.
19Tama Jisasgo po wei ponoyu, te po wai, “Dagego e lotu be tempel hųgibaso, tama sela sogo eno polo te be ma sę yaibao,” Jisasgo te po te Juda dabe dali wai. 20Tama Juda bage augwaligo te po wai, “Te tempel Moni Lotu Be sę yani kibu be bidi sese si olama, tama a naga olama, me badu nogo deli badu kibu be te be sę yai dao,” te po wai. “Tama dago te be hųgilama, tama sela sogo nago te be polo me sę yaibawe? Woo, nage usu egobeo,” te po Jisas dali wai. 21Tialima, Jisasgo te tempel lotu be po wali aga tigide po wali, te Moni Lotu Bede meni. 22Tilama, tama nosali Godigo Jisas gų pagede ma hodolai, te sogo Jisas aga wali pabo bidi dabe augwaligo Jisasgo polobadu te wali po augwaligo ma koneai. Tama augwaligo Godigo bukude muani po dali, Jisasgo wali po dali, te po siba augwa homu muai.
Jisasgo tigidali bidi konea silai
23Te bidi Jisas bo disąwai nai bret tubo side, te Pasova side, aga Jerusalem bulude bidibadi, tama we bidi hauwa augwaligo agai bomo yai sę ebo suai. Tama sulama, tama augwaligo augwa homu tigidali Jisasba muai. Augwaligo te homu yai, aga te Godigo sa muyu, asaiba wali bidi dao. 24Tialima, Jisasgo te homu yai, augwaligo konesiąbo ąǫ, te homu yai. Tama tibaso, Jisas aga digi augwaligo nogoba mubeo. 25Magi basowe? Jisas aga digi te tigidali we bidigo homu mu konea silai. Gasa bidi mego agabolo te we bidigo homu me ola magobeo.
Okuqokiwe okwamanje:
Jon 2: mps
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2002, Wycliffe Bible Translators, Inc. All rights reserved.