Noo Mian 6
6
CAB. VI.
1Cur‐jee twoai nagh der shiu da ny Boughtyn, kiongoyrt rish deney, er coontey dy ve er ny akin lioroo: er nonney cha vow shiu leagh veih’n Ayr eu t’ayns niau.
2Shen-y-fa tra t’ow coyrt da ny Boughtyn, ny lig da cayrn ve’r ny heidey royd, lurg aght ny crauee‐foalsey, ayns ny kialteenyn, as ayns ny straadjyn, er coontey moylley gheddyn veih deney. Dy firrinagh ta mee gra riu, ta nyn Leagh oc.
3Agh tra t’ow uss cur da ny Boughtyn, ny lig da fys y ve ec dty laue chiare, cre ta dty laue yesh dy yannoo.
4Dy vod dty yeirk ve’r ny choyrt gy follit, as nee dty Ayr ta fakin ny ta jeant gy follit, dty leagh y chur dhyt gy foslit.
5¶ As tra vees oo goall padjer, cha bee oo myr ny crauee‐foalsey: son shynney lieusyn shassoo seose ayns ny kialteenyn, as ayns corneilyn ny straadjyn dy ghoall padjer, er chee dy ve’r ny akin liorish deney. Dy firrinagh ta mee gra riu, dy vel ad er gheddyn nyn leagh.
6Agh gow uss, tra vees oo goall padjer, stiagh ayns dty hiamyr, as erreish dhyt dty ghorrys y yeih, guee gys dty Ayr gy follit, as nee dty Ayr, ta fakin ny ta jeant gy follit, leagh y chur dhyt gy foslit.
7Ny yei tra vees shiu guee, ny gow-jee rouyr taggloo erriu, goll rish ny angreesteenyn: son tar adsyn goall ayns laue, dy vow ad nyn aghinyn, liorish nyn ymmodee goan fardalagh.
8Ny eiyr‐jee shiuish er‐y‐fa shen er yn aght ocsyn: son ta fys ec nyn Ayr cre ta ymmyrtsagh diu, roish my jean shiu aghin huggey.
9Er yn aght shoh er‐y‐fa shen gow‐jee padjer: Ayr ainyn t’ayns niau, Casherick dy row dt’ennym.
10Dy jig dty reeriaght. Dt’aigney dy row jeant er y talloo, myr te ayns niau.
11Cur dooin nyn arran jiu as gagh laa.
12As leih dooin nyn loghtyn, myr ta shin leih dauesyn ta janoo loghtyn nyn oi shin.
13As ny leeid shin ayns miolagh, agh livrey shin veih olk: son she liats y reeriaght, as y phooar, as y ghloyr, son dy bragh. Amen.
14Son my leihys shiuish da deney nyn loghtyn, leihee nyn Ayr flaunyssagh myrgeddyn diuish.
15Agh mannagh leih shiu da deney nyn voiljyn, cha jean yn Ayr eu nyn voiljyn y leih diuish.
16¶ As tra vees shiu trostey, ny bee-jee jeaghyn trimshagh, myr ny crauee-foalsey, son tar adsyn sollagh nyn eddinyn er chee deney dy chur tastey da’n trostey oc. Dy firrinagh ta mee gra riu, dy vel nyn leagh oc.
17Agh jean uss, tra vees oo trostey, dty chione y ooillagh as dt’eddin y oonlagh:
18Er coontey nagh nee deney ver tastey da’n trostey ayd, agh dty Ayr ta toiggal folliaghtyn, as nee dty Ayr ta fakin ny ta [jeant] gy follit, leagh y chur dhyt gy foslit.
19¶ Ny stoyr‐jee seose berchys, er nyn son eu hene, er y talloo, raad ta’n lhemeen as y mergey cur mow, as raad ta maarlee brishey stiagh as geid.
20Agh stoyr‐jee [seose] er nyn son hene, berchys ayns niau; raad nagh vel y lhemeen ny’n mergey cur mow, as raad nagh vel maarlee brishey stiagh as geid.
21Son raad vees nyn stoyr, ayns shen myrgeddyn vees y cree eu.
22Yn tooil ta cur soilshey da’n chorp; shen‐y‐fa my ta’n tooil fegooish foill, bee soilshey ec ooilley dty chorp.
23Agh my ta foill ayns dty hooil, bee dty slane chorp ayns dorraghys. My she dorraghys eisht yn soilshey ta aynyd, nagh moar y dorraghys eh!
24¶ Cha vod dooinney erbee daa vainshter y hirveish: son edyr ver e dwoai da’n derrey yeh as graih da’n jeh elley, ny bee e jeidjagh da’n derrey yeh as soiee e beg jeh’n jeh elley. Cha vod shiu Jee as Mammon y hirveish.
25Er‐yn‐oyr shoh ta mee gra riu, ny bee‐jee imneagh son nyn mea, cre nee shiu y ee, ny cre nee shiu y iv; ny foast son nyn girp, cre ver shiu y miu: Nagh vel y vea ny smoo dy ve soit jeh ny beaghey, as y corp ny coamrey?
26Cur‐jee tastey da Eeanlee’n aer: son cha vel ad cuirr ny buin, ny chymsagh stiagh ayns soaltyn; foast ta nyn Ayr flaunyssagh dyn meaghey ad. Nagh vel shiuish foddey share ny adsyn?
27Quoi eavish, liorish ve imneagh, oddys yn chraue‐roih y chur gys yn aase echey?
28As cre’n fa ta shiu imneagh son coamraghyn? Gow‐jee eu hene kys ta lilleeyn y vagher gaase; cha vel ad laboragh ny sneeu.
29As foast ta mee gra riu, nagh row Solomon hene, ayns ooilley e ghloyr, er ny choamrey myr annane jeu shoh.
30My ta Jee, er‐y‐fa shen, myr shoh coamrey’n faar ta jiu ’sy vagher as mairagh caeu’t stiagh ayns yn oghe, nagh jean e foddey smoo er nyn son eavish, O gheney faase‐chredjuagh?
31Ny bee‐jee er-y-fa shen imneagh, gra, Cre nee mad y ee? ny cre nee mad y iv? ny cre yiow mad, dy chur y mooin?
32(Son ooilley ny reddyn shoh, ta ny Angreesteenyn imneagh er nyn son) agh ec yn Ayr flaunyssagh eavish ta fys dy vel feme eu er dy chooilley nee jeu shoh.
33Agh shir‐jee hoshiaght reeriaght Yee as e chairys, as bee shiu jeant magh lesh ooilley ny reddyn shoh.
34Ny bee‐jee er‐y‐fa shen ayns imnea erbee son y laa mairagh, son tra hig y laa mairagh, hig e chiarrail marish: ta e heaghyn hene dy liooar er son y tra t’ayn.
Okuqokiwe okwamanje:
Noo Mian 6: NMian
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
historic text maintained in digital form by the British and Foreign Bible Society (Sheshaght y Vible)