San Mateo 4
4
Ñayóꞌo káꞌa̱n xa̱ꞌa̱ ta̱Jesús ki̱vi̱ ñaníma̱ ndiva̱ꞌa káꞌno xi̱to ndoso ña ra
(Mr. 1:12-13; Lc. 4:1-13)
1Ta saá Níma̱ Ndios ni̱ka̱ꞌa̱n ña xíꞌin ta̱Jesús ko̱ꞌo̱n ra yuku̱ yi̱chí, chi ñaníma̱ ndiva̱ꞌa káꞌno koto ndoso ña ra, chi kóni ña sandáꞌví ña ra.
2Ta nda̱ loꞌo o̱n vása ní‑xixi ta̱Jesús, chi ni̱xi̱yo soꞌon ra o̱vi̱ si̱ko̱ ndiví xíꞌin o̱vi̱ si̱ko̱ ñoó, ta saá xíꞌi̱ ní ra so̱ko. 3Ta ki̱xaa̱ ñandiva̱ꞌa káꞌno no̱o̱ ta̱Jesús ña koto ndoso ña ra, ta ni̱ka̱ꞌa̱n ña xíꞌin ra to̱ꞌon yóꞌo, káchí ña saá:
―Tá ndixa Sa̱ꞌya Ndios kúu ún, ta va̱ꞌa kaꞌnda chiño ún no̱o̱ yu̱u̱ ña ndóo yóꞌo ná nduu ña si̱ta̱ va̱ꞌa ―káchí ña xíꞌin ra.
4Ta nda̱kuii̱n ta̱Jesús, káchí ra saá xíꞌin ñaníma̱ ndiva̱ꞌa:
―To̱ꞌon Ndios káchí ña saá: “O̱n si̱ví nina ña xíxi ni̱vi kúu ña xíni̱ ñóꞌó ña kutaku̱ na. Ta xíni̱ ñóꞌó kandixa va̱ꞌa na to̱ꞌon Ndios, ta saá kutaku̱ na”, káchí to̱ꞌon Ndios ―káchí ta̱Jesús xíꞌin ñaníma̱ ndiva̱ꞌa.
5Ta saá ñaníma̱ ndiva̱ꞌa káꞌno ni̱ka̱ꞌa̱n ña xíꞌin ta̱Jesús ko̱ꞌo̱n ra xíꞌin ña, ta ni̱xaa̱ na yíta na si̱ni̱ torre veꞌe ño̱ꞌo káꞌno ñoo Jerusalén, 6ta ni̱ka̱ꞌa̱n ña xíꞌin ra, káchí ña saá:
―Tá ndixa Sa̱ꞌya Ndios kúu ún, ta sakana xíꞌin mi̱i ún nda̱ ni̱no̱, chi saá káchí to̱ꞌon Ndios:
Ndios tiꞌví ra ángel ña chindeé na yóꞌó, ta kundaa va̱ꞌa na yóꞌó.
Ta naángel natiin na yóꞌó kanóo ún no̱o̱ ndaꞌa̱ na,
ko̱to̱ nakava ún no̱o̱ yu̱u̱, ta takuéꞌe̱ ún,
káchí to̱ꞌon Ndios ―saá káchí ñandiva̱ꞌa xíꞌin ta̱Jesús.
7Ta nda̱kuii̱n ta̱Jesús:
―Saá tuku káchí to̱ꞌon Ndios: “O̱n váꞌa koto ndoso yó Ndios” ―káchí ta̱Jesús xíꞌin ñaníma̱ ndiva̱ꞌa.
8Ta sondi̱ꞌi ñandiva̱ꞌa káꞌno ni̱ka̱ꞌa̱n tuku ña xíꞌin ta̱Jesús ko̱ꞌo̱n ra xíꞌin ña, ta saá nda̱a na ñii yuku̱ síkón ní, ta ñandiva̱ꞌa sa̱náꞌa ña ra ndiꞌi ñoo ña yóo ñoyívi yóꞌo xíꞌin ndiꞌi ñakuíká ñoyívi. 9Ta saá ni̱ka̱ꞌa̱n ñandiva̱ꞌa xíꞌin ra, káchí ña:
―Tá kuxítí ún no̱o̱ i̱ ta kasa to̱ꞌó ún yi̱ꞌi̱, ta saá taxi i̱ nda̱yí ndaꞌa̱ ún kuu ún ta̱káꞌno no̱o̱ ndiꞌi ñoyívi yóꞌo xíꞌin ndiꞌi ñakuíká kómí ña ―káchí ñandiva̱ꞌa xíꞌin ra.
10Ta nda̱kuii̱n ta̱Jesús, ni̱ka̱ꞌa̱n ra xíꞌin ña:
―¡Kutaꞌa ún no̱o̱ i̱, yóꞌó, ñaníma̱ ndiva̱ꞌa káꞌno Satanás!, chi káchí to̱ꞌon Ndios saá: “Ndasaá kuiti Ndios kasa to̱ꞌó yó, ta kasa ndivi yó xíꞌin ra, ta o̱n kasa to̱ꞌó yó, ni o̱n kasa ndivi yó xíꞌin inka̱ na”, káchí to̱ꞌon Ndios ―saá ni̱ka̱ꞌa̱n ta̱Jesús xíꞌin ñaníma̱ ndiva̱ꞌa.
11Ta saá ñandiva̱ꞌa sa̱ndakoo ña ra, ta ke̱e ña kua̱ꞌa̱n ña, ta saá ki̱xaa̱ naángel chindeé na ta̱Jesús, ta̱xi na ndiꞌi ña xíni̱ ñóꞌó no̱o̱ ra.
Ñayóꞌo káꞌa̱n xa̱ꞌa̱ ta̱Jesús ña ki̱xáꞌá ra kísa ndivi ra chiño Ndios
(Mr. 1:14-15; Lc. 4:14-15)
12Ki̱vi̱ xi̱ni̱ so̱ꞌo ta̱Jesús xa̱ꞌa̱ ña chi̱kaa̱ na ta̱Juan ini veꞌe ka̱a, ta ndi̱kó ta̱Jesús kua̱noꞌo̱ ra estado Galilea. 13Ta ni̱xaa̱ ra ñoo Nazaret, ta ke̱e tuku ra kua̱ꞌa̱n ra koo ra ñoo Capernaum, ña nákaa̱ yatin yuꞌu̱ mi̱ni, no̱o̱ yóo yatin ñoo no̱o̱ ndóo sa̱ꞌya ñani síkuá ta̱Zabulón xíꞌin inka̱ ta̱Neftalí. 14Ta saá ku̱ndivi ña ni̱ka̱ꞌa̱n ta̱profeta Isaías kui̱ya̱ xi̱na̱ꞌá, ta ka̱chí ra saá:
15Ñoo no̱o̱ ndóo sa̱ꞌya ñani síkuá ta̱Zabulón xíꞌin inka̱ ta̱Neftalí,
nákaa̱ ña yatin yuꞌu̱ mi̱ni, inka̱ yuꞌu̱ yu̱ta Jordán.
Ta estado Galilea, ta kán ndóo sava ni̱vi na o̱n vása kúu najudío, ni o̱n vása ndíko̱n na yichi̱ najudío.
16Nda̱tán ndóo na naa ní ini, án na naa ní no̱o̱, saá ndóo na, chi o̱n vása táku̱ na no̱o̱ Ndios.
Ta ñii ki̱vi̱ koni na ñii ñoꞌo̱ káꞌno yéꞌe, ña yeꞌe ña no̱o̱ na ta̱nda̱ níma̱ na, chi Ndios taxi ra ña kunda̱a̱ ini na ñava̱ꞌa ña ná kundiko̱n na yichi̱ ra, ta o̱n ndiꞌi xa̱ꞌa̱ na no̱o̱ ra,
káchí to̱ꞌon Ndios ña ni̱taa ta̱Isaías xi̱na̱ꞌá.
17Ta saá ki̱xáꞌá ta̱Jesús káꞌa̱n ndoso ra to̱ꞌon Ndios xíꞌin ni̱vi, káchí ra saá:
―Ta vitin o̱n vása keꞌé ka̱ ndó ña o̱n váꞌa, ta nandikó ini ndó, chi xa yóo yatin ní yichi̱ ña xáꞌnda chiño Ndios kutaku̱ yó ―káchí ta̱Jesús.
Ñayóꞌo káꞌa̱n xa̱ꞌa̱ ta̱Jesús ki̱vi̱ ka̱na ra ko̱mi̱ ta̱a na táva tia̱ká, ña kundiko̱n na sa̱ta̱ ra
(Mr. 1:16-20; Lc. 5:1-11)
18Tá kua̱ꞌa̱n ta̱Jesús yuꞌu̱ mi̱ni Galilea, ta xi̱ni ra o̱vi̱ ta̱a, ñii ra na̱ní Simón ta inka̱ ki̱vi̱ ra kúu Pedro, ta inka̱ ta̱a na̱ní ra Andrés, ñani ta̱Simón yóꞌo kúu ra. Ta o̱vi̱ ta̱a yóꞌo sákana na ñono̱ ini takuií, chi na táva tia̱ká kúu na. 19Ta ni̱ka̱ꞌa̱n ta̱Jesús xíꞌin na:
―Naꞌa ndó kundiko̱n ndó yi̱ꞌi̱, ta sanáꞌa i̱ ndóꞌó ndasaá nakaya ndó ni̱vi kundiko̱n na yichi̱ Ndios ―káchí ta̱Jesús xíꞌin na.
20Ta xa̱ndi̱ko̱n sa̱ndakoo nata̱a yóꞌo ñono̱ na, ta xi̱kundiko̱n na kua̱ꞌa̱n na sa̱ta̱ ta̱Jesús.
21Ta ta̱Jesús kua̱ꞌa̱n ka̱ ra, ta xi̱ni ra inka̱ o̱vi̱ ta̱a, ta̱Jacobo xíꞌin ñani ra ta̱Juan, sa̱ꞌya ta̱Zebedeo. Ndóo na ini tón barco xíꞌin yivá na, sándaꞌa na ñono̱ na. Ta ta̱Jesús ni̱ka̱ꞌa̱n ra xíꞌin na:
―Naꞌa ndó kundiko̱n ndó yi̱ꞌi̱.
22Ta xa̱ndi̱ko̱n sa̱ndakoo nata̱a yóꞌo tón barco na, ta sa̱ndakoo na yivá na, ta xi̱kundiko̱n na kua̱ꞌa̱n na sa̱ta̱ ta̱Jesús.
Ñayóꞌo káꞌa̱n xa̱ꞌa̱ ta̱Jesús ki̱vi̱ sa̱náꞌa ra kua̱ꞌa̱ ní ni̱vi
(Lc. 6:17-19)
23Ta saá xíka ta̱Jesús kua̱ꞌa̱n ra ndiꞌi saá ñoo ndáꞌvi ndaa estado Galilea, ta sánáꞌa ra ni̱vi veꞌe ño̱ꞌo sinagoga, ta káꞌa̱n ndoso ra to̱ꞌon ñava̱ꞌa xa̱ꞌa̱ yichi̱ ña xáꞌnda chiño Ndios, ta saá sándaꞌa ra ni̱vi na ndeé ndóꞌo ndiꞌi saá no̱o̱ kue̱ꞌe̱. 24Ta ki̱xáꞌá ni̱xi̱ta̱ níꞌnó to̱ꞌon xa̱ꞌa̱ ta̱Jesús ndiꞌi saá ñoo Siria, ta ni̱vi kua̱ꞌa̱n na xíꞌin na ndeé ndóꞌo ta ni̱xaa̱ na no̱o̱ yóo ra estado Galilea. Ta na ndeé ndóꞌo yóꞌo, sava na kómí níma̱ ndiva̱ꞌa, sava na xíꞌi̱ yi̱ꞌí, sava na o̱n ki̱ví kaka, ta ta̱Jesús sa̱ndaꞌa ra ndiꞌi nayóꞌo. 25Kua̱ꞌa̱ ní ni̱vi na ke̱e estado Galilea, na ke̱e ñii xiiña no̱o̱ na̱ní Decápolis, na ke̱e ñoo Jerusalén, xíꞌin inka̱ kua̱ꞌa̱ ñoo ña ndáꞌvi ndaa estado Judea, ta na ke̱e inka̱ táꞌví yuꞌu̱ yu̱ta Jordán, na̱kutáꞌan na ta kua̱ꞌa̱n na sa̱ta̱ ta̱Jesús.
Okuqokiwe okwamanje:
San Mateo 4: mim
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019, Wycliffe Bible Translators, Inc. All rights reserved.