यूहन्ना 14
14
येशूका उनी सीसिपामिमकु न बन्साम्डिम
1“इनीमा न-गोडा मेभ्रसिक्पा मेदु़म्नी। माम्चु़नीडा थो़रलु़नी, मा गोडला वो थो़र बेनी। 2आमा पापकु नेमडा बाखोप हापा बु। मेमका मेबाट्पा माला इनीमा लागि, बाखोप झो़म्सिबेड्डा लक्तोङा बेउ र्वाक्साका हाम गानीनुङ र्वाङुवा? 3गो लङुमा इनीमा लागि बाखोप झो़म्सिबेट्जो़लुमा योङु। मेम्मा गानीलाई लनिनी, मा गो बान्ते बुङु मेसिन्डा गानी वो दु़म्नी। 4गो बान्ते लक्तोङा लेट्पु मेसिन्डा लक्पा लाम्दी गानी छेनी।”
पापकाडा लक्पा लाम्दी येशू
5थोमाका गुमीलाई र्वाक्ता, “ङाचो़, गानी बान्ते लनिमिम मेराम गुकु मेचकु, मा हेसाका लाम्दी छेकुमिम?”
6येशूका र्वाम्डी, “लाम्दी, आच्छाङा नुङ त्वारो़म गोङा सो़। गोडाम वाङमिम सु़लामका वो पापकाडा रोमु मेचाम्मी। 7गानी गोलाई आच्छाङा छेङिनिवाम माला आमा पापलाई वो छेनिवा। आथाडा आनो गानी गुमीलाई छेनी, गानी गुमीलाई ल्वान्निम बु।”
8फिलिपका र्वाक्ता, “ङाचो़, गुकुलाई पाप रेम्बेट्किनी। मेकोति माला नु़।”
9येशूका र्वाम्डी, “फिलिप, आकोम थारीसम्म गानीनुङ बाङ्डो मा वो गाना गोलाई मेछेङिमिम? उहेमका गोलाई ल्वाङ्डिम बु, मेरामका पापलाई ल्वास्तु़म बु। हेसाका गाना ‘गुकुलाई पाप रेम्बेट्किनी’ र्वामु चाम्ना?
10“गो पापगोडा बुङु मा पाप आमागोडा बुमी र्वाक्पा हाम गाना थो़र मेलु़ना? गो गानीलाई र्वाङुमिम ल्वा आमा त्वाकु नका र्वाङुमिम मेएँ, आमागोडा बाट्पा पापका र्वाबेन्ङिमिम, मा गुमीका उनी खारी बेत्तोङा लेन्मी। 11गो पापगोडा बुङु, मा पाप आमागोडा बुमी र्वाक्पा थो़र बेनी। मेएँ माला वो गो खारी बेउतोम गानी ल्वान्निमका थो़र बेनी।
12“आच्छाङा गो गानीलाई र्वाङु, उहेमका गोडला थो़र बु़, मेरामका गो बेउतोम होप्माम खारी बु़। मेम्मा मेरामडाम वो डोक्पु खारी बु़, हेङालोने गो पापकाडा लक्तोङा बेउ। 13गानी आमा नङडा हाम बिनी मेराम गो रेथिक्पु, मेम्साका पापकु यु़म गो झ्वाबेट्पु। 14गानी आमा नङडा हाम-हुम बिन्नी माला गो मेराम रेथिक्पु।
येशूका माम्चु़नी-पेल थु़रु र्वाम्डिम
15“गानी गोलाई रिखाम बोङिनी माला गो र्वाङुमिम थो़नी। 16मेम्मा गो पापनुङ र्वाङुमा गानीलाई इनीमा लागि कोङ जेप्साक्पा थु़र्मी। मेम्मा गुमी गानीनुङ हेल्लो लोवो दु़म्मी। 17माम्चु़नीकु दुथाम सो़पा पेल गुमी सो़। उनीमा ल्वाडा सु़म्दिसेरडाम मु़चु़मिम बुमु मेचाम्मी, हेङालोने मेर्मिमका गुमीलाई मेल्वामी, मा मेछेमी वो। लावो गानी गुमीलाई छेनी, हेङालोने गुमी गानीगोडा दु़म्मी, मा गानीनुङ दु़म्मी।
18“गो गानीलाई रेचो़कुपा होङ्ङा मेपार्जो़ल्निनी। गो इनीमाडा योङु। 19घरिकोङडाम्मा सु़म्दिसेरडाम मु़चु़मिमका गोलाई मेल्वाङिमी, लावो गानी ने गोलाई ल्वाङिनी। गो नु़ङुमिमका गानी वो नु़नी। 20मेनेम गो आमा पापगोडा बुङु, मा गानी आमाडा बुनी, मा गो गानीगोडा बुङु र्वाक्पा थेसिथेनी। 21उहेमनुङ गो जेङ्डोम ल्वा बु, मा मेराम होम्साका बु़, मेरामका गोलाई रिखाम बोङी। गोलाई रिखाम बेपा मु़चु़लाई आमा पापका रिखाम बोमी। मेम्मा गो वो गुलाई रिखाम बेउ, मा उमाडा गो रेम्बेङ्सिङु।”
22यहूदाका (यहूदा इस्करियोत ने मेएँ, मेरामङा नङ बाट्पा कोङमी सीसिपा) र्वाक्ता, “ङाचो़, हेङा गानी इनी त्वापलाई आकीमाडा रेम्बोनी, मा सु़म्दिसेरडाम मु़चु़मिमकाडा ने रेममेबोनिमिम?”
23येशूका मेरामलाई सिख्लोम्डिमा र्वाम्डी, “उहेमका गोलाई रिखाम बोङि, मेरामका आमा सीसि थो़सु़। आमा पापका मेरामलाई रिखाम बोमी, मा आमा पाप नुङ गुचुकु मेरामकाडा रोचुकुमा मेरामकाडा बुचुकु। 24गोलाई रिखाम मेबेपाका आमा सीसि मेथो़सु़। गानी थो़निमिम ओर्मिम सिजेम आमा मेएँ, मेर्मिम ने गोलाई थु़र्पा पापकाम सो़।
25“गो गानीनुङ बाङ्डोलोङा ओर्मिम ल्वा सो़उतोम बु। 26लावो जेप्साक्पाका खोत्ले सीनी, मा गो र्वाङ्डोम खोत्ले मिम्बेनिमी। जेप्साक्पा ओराम ने माम्चु़नी-पेल सो़, उहेमलाई पापका आमा नङडा थु़र्मी। 27न-भ्रसी गो गानीनुङ पार्जो़लु, मा आमा न-भ्रसी गो गानीलाई ग्वानिनी। गानी ओराम सु़म्दिसेरका ग्वाक्पा होप्माम न-भ्रसी गो मेग्वानिनी। इनी न-गो मेभ्रसिक्पा मेदु़म्नी, मा मेङिनी।
28“गो लङुमा इनीमाडा ख्लोङ्सिङुमा रोङु र्वाङ्डोम ने गानी थो़न्नी। गानी गोलाई रिखाम बेङिनिवाम माला गो पापकाडा लङुमिमडा गानी गेर्सिट्निवा, हेङालोने पाप गोडाम घ्ल्वापा बुमी। 29ओर्मिम खोत्ले ल्वा दु़म्मु ङादोङा गो गानीलाई र्वाङडोम बु, मा ओराम ल्वा दु़म्मु खाप्डु़लो गानी थो़र बोनी। 30गानीनुङ जेमु थारी हापा गोनुङ मिबु, हेङालोने ओराम सु़म्दिसेरडाम साखामचो़ रोक्तोङा लेडु़। मेरामका गोलाई हाम वो बोमु ने मेचाम्ङी। 31लावो पापलाई गो रिखाम बेउ, मा पापका हाम बेबेन्ङिमी मेरामङा गो बेउ र्वाक्पा सु़म्दिसेरडाम मु़चु़मिमका चमिनु़। दो, ओलामका लक्सी।”
Okuqokiwe okwamanje:
यूहन्ना 14: THUL
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.
यूहन्ना 14
14
येशूका उनी सीसिपामिमकु न बन्साम्डिम
1“इनीमा न-गोडा मेभ्रसिक्पा मेदु़म्नी। माम्चु़नीडा थो़रलु़नी, मा गोडला वो थो़र बेनी। 2आमा पापकु नेमडा बाखोप हापा बु। मेमका मेबाट्पा माला इनीमा लागि, बाखोप झो़म्सिबेड्डा लक्तोङा बेउ र्वाक्साका हाम गानीनुङ र्वाङुवा? 3गो लङुमा इनीमा लागि बाखोप झो़म्सिबेट्जो़लुमा योङु। मेम्मा गानीलाई लनिनी, मा गो बान्ते बुङु मेसिन्डा गानी वो दु़म्नी। 4गो बान्ते लक्तोङा लेट्पु मेसिन्डा लक्पा लाम्दी गानी छेनी।”
पापकाडा लक्पा लाम्दी येशू
5थोमाका गुमीलाई र्वाक्ता, “ङाचो़, गानी बान्ते लनिमिम मेराम गुकु मेचकु, मा हेसाका लाम्दी छेकुमिम?”
6येशूका र्वाम्डी, “लाम्दी, आच्छाङा नुङ त्वारो़म गोङा सो़। गोडाम वाङमिम सु़लामका वो पापकाडा रोमु मेचाम्मी। 7गानी गोलाई आच्छाङा छेङिनिवाम माला आमा पापलाई वो छेनिवा। आथाडा आनो गानी गुमीलाई छेनी, गानी गुमीलाई ल्वान्निम बु।”
8फिलिपका र्वाक्ता, “ङाचो़, गुकुलाई पाप रेम्बेट्किनी। मेकोति माला नु़।”
9येशूका र्वाम्डी, “फिलिप, आकोम थारीसम्म गानीनुङ बाङ्डो मा वो गाना गोलाई मेछेङिमिम? उहेमका गोलाई ल्वाङ्डिम बु, मेरामका पापलाई ल्वास्तु़म बु। हेसाका गाना ‘गुकुलाई पाप रेम्बेट्किनी’ र्वामु चाम्ना?
10“गो पापगोडा बुङु मा पाप आमागोडा बुमी र्वाक्पा हाम गाना थो़र मेलु़ना? गो गानीलाई र्वाङुमिम ल्वा आमा त्वाकु नका र्वाङुमिम मेएँ, आमागोडा बाट्पा पापका र्वाबेन्ङिमिम, मा गुमीका उनी खारी बेत्तोङा लेन्मी। 11गो पापगोडा बुङु, मा पाप आमागोडा बुमी र्वाक्पा थो़र बेनी। मेएँ माला वो गो खारी बेउतोम गानी ल्वान्निमका थो़र बेनी।
12“आच्छाङा गो गानीलाई र्वाङु, उहेमका गोडला थो़र बु़, मेरामका गो बेउतोम होप्माम खारी बु़। मेम्मा मेरामडाम वो डोक्पु खारी बु़, हेङालोने गो पापकाडा लक्तोङा बेउ। 13गानी आमा नङडा हाम बिनी मेराम गो रेथिक्पु, मेम्साका पापकु यु़म गो झ्वाबेट्पु। 14गानी आमा नङडा हाम-हुम बिन्नी माला गो मेराम रेथिक्पु।
येशूका माम्चु़नी-पेल थु़रु र्वाम्डिम
15“गानी गोलाई रिखाम बोङिनी माला गो र्वाङुमिम थो़नी। 16मेम्मा गो पापनुङ र्वाङुमा गानीलाई इनीमा लागि कोङ जेप्साक्पा थु़र्मी। मेम्मा गुमी गानीनुङ हेल्लो लोवो दु़म्मी। 17माम्चु़नीकु दुथाम सो़पा पेल गुमी सो़। उनीमा ल्वाडा सु़म्दिसेरडाम मु़चु़मिम बुमु मेचाम्मी, हेङालोने मेर्मिमका गुमीलाई मेल्वामी, मा मेछेमी वो। लावो गानी गुमीलाई छेनी, हेङालोने गुमी गानीगोडा दु़म्मी, मा गानीनुङ दु़म्मी।
18“गो गानीलाई रेचो़कुपा होङ्ङा मेपार्जो़ल्निनी। गो इनीमाडा योङु। 19घरिकोङडाम्मा सु़म्दिसेरडाम मु़चु़मिमका गोलाई मेल्वाङिमी, लावो गानी ने गोलाई ल्वाङिनी। गो नु़ङुमिमका गानी वो नु़नी। 20मेनेम गो आमा पापगोडा बुङु, मा गानी आमाडा बुनी, मा गो गानीगोडा बुङु र्वाक्पा थेसिथेनी। 21उहेमनुङ गो जेङ्डोम ल्वा बु, मा मेराम होम्साका बु़, मेरामका गोलाई रिखाम बोङी। गोलाई रिखाम बेपा मु़चु़लाई आमा पापका रिखाम बोमी। मेम्मा गो वो गुलाई रिखाम बेउ, मा उमाडा गो रेम्बेङ्सिङु।”
22यहूदाका (यहूदा इस्करियोत ने मेएँ, मेरामङा नङ बाट्पा कोङमी सीसिपा) र्वाक्ता, “ङाचो़, हेङा गानी इनी त्वापलाई आकीमाडा रेम्बोनी, मा सु़म्दिसेरडाम मु़चु़मिमकाडा ने रेममेबोनिमिम?”
23येशूका मेरामलाई सिख्लोम्डिमा र्वाम्डी, “उहेमका गोलाई रिखाम बोङि, मेरामका आमा सीसि थो़सु़। आमा पापका मेरामलाई रिखाम बोमी, मा आमा पाप नुङ गुचुकु मेरामकाडा रोचुकुमा मेरामकाडा बुचुकु। 24गोलाई रिखाम मेबेपाका आमा सीसि मेथो़सु़। गानी थो़निमिम ओर्मिम सिजेम आमा मेएँ, मेर्मिम ने गोलाई थु़र्पा पापकाम सो़।
25“गो गानीनुङ बाङ्डोलोङा ओर्मिम ल्वा सो़उतोम बु। 26लावो जेप्साक्पाका खोत्ले सीनी, मा गो र्वाङ्डोम खोत्ले मिम्बेनिमी। जेप्साक्पा ओराम ने माम्चु़नी-पेल सो़, उहेमलाई पापका आमा नङडा थु़र्मी। 27न-भ्रसी गो गानीनुङ पार्जो़लु, मा आमा न-भ्रसी गो गानीलाई ग्वानिनी। गानी ओराम सु़म्दिसेरका ग्वाक्पा होप्माम न-भ्रसी गो मेग्वानिनी। इनी न-गो मेभ्रसिक्पा मेदु़म्नी, मा मेङिनी।
28“गो लङुमा इनीमाडा ख्लोङ्सिङुमा रोङु र्वाङ्डोम ने गानी थो़न्नी। गानी गोलाई रिखाम बेङिनिवाम माला गो पापकाडा लङुमिमडा गानी गेर्सिट्निवा, हेङालोने पाप गोडाम घ्ल्वापा बुमी। 29ओर्मिम खोत्ले ल्वा दु़म्मु ङादोङा गो गानीलाई र्वाङडोम बु, मा ओराम ल्वा दु़म्मु खाप्डु़लो गानी थो़र बोनी। 30गानीनुङ जेमु थारी हापा गोनुङ मिबु, हेङालोने ओराम सु़म्दिसेरडाम साखामचो़ रोक्तोङा लेडु़। मेरामका गोलाई हाम वो बोमु ने मेचाम्ङी। 31लावो पापलाई गो रिखाम बेउ, मा पापका हाम बेबेन्ङिमी मेरामङा गो बेउ र्वाक्पा सु़म्दिसेरडाम मु़चु़मिमका चमिनु़। दो, ओलामका लक्सी।”
Okuqokiwe okwamanje:
:
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.