यूहन्ना छेम-ल्वा
छेम-ल्वा
ओराम यूहन्नाका र्याक्तु़म जो़पा-सेला सो़। येशूकु को-न सीसिपामिमगोडाम यूहन्ना येशूनुङ हापा जो़पा हेमकेम बाइडा। मेम्मिमका येशू हेप्माम बुमी र्वाक्पा जो़होमका थेसिथेड्डु़मा गुका येशूकु दुथाम र्याक्तु़म बु।
यूहन्नाका र्याक्तु़म जो़पा-सेला मत्ती, मर्कूस, नुङ लूकाकु जो़पा-सेलाडाम वाङ ङा बु। यूहन्नाकु जो़पा-सेलाडा गुइ येशूकु दुथाम छ्याङलो-छ्याङ्लो थेसिथेन्मु झाम। ख्रीष्टकु बासी-दोसी हेप्माम बु र्वाक्साका यूहन्नाका जो़होमका सो़यु़डु़म बु। येशूका उनीमा त्वाकु दुथाम सो़म्डिम ल्वा गुका र्याक्तु़म बु। ओर्मिम ल्वामिम थेसिथेन्बेन्मु लागि सीसि-सो़म्दीलाम आरेसाका र्याक्मा बु, “मेसिपा त्वारो़म ग्वाक्पा सो़बेम गोङा सो़” (६:३५)। “सु़म्दिसेरडाम मु़चु़मिमकु ओल गोङा सो़” (यूहन्ना ८:१२)। “जो़पा रेपा-क्रिपा गो” (यूहन्ना १०:११)। “हुखोप लाम्चोको गोङा सो।” (यूहन्ना १०:१), “लाम्दी, आच्छाङा नुङ त्वारो़म गोङा सो़” (यूहन्ना १४:६)। यूहन्नाका येशू नुङ उनीमा सीसिपामिमगोडा दु़स्ताम लुकुदु़मकु दुथाम सो़यु़डु़म बु। अध्याय १३ डाम्मा १७ सम्म येशू उनी त्वाप चु़म्ला सो़सिमु खाप्मिडिम सिन्था सीसिपामिमनुङ कोदेप दु़म्मिडी मा क्रूसडा सिमु ङादो गुमीका उनीमा सीसिपामिमलाई झो़म्सिबेन्मु नुङ न-गो बसाट्पा सिजेम दो़म्डिम ल्वा र्याक्तु़म बु। चङडाम अध्यायडा येशू चु़म्ला सो़सिम्डिम चङडा उनीमा न-छाम्सी, गुमीलाई क्रूसडा चेट्मिडी, मा आथावो गुमी सिमुलाम बम्गेम्डी। मेम्मा उनीमा सीसिपामिमकाडा रेम्बेसिम्डिम ल्वाकु दुथाम वो सो़यु़डु़म बु।
हेल्वो वो मेसिपा त्वारो़मकु राप्लावा ने ख्रीष्टलाम कोङङा डार्सी। येशूङा लाम्दी, आच्छाङा नुङ त्वारो़म र्वाक्पा ल्वाडा थो़रबेसाका गुमीडा रोक्पामिमका कोङङा ओराम राप्लावा डार्मी।
र्याक्मा ल्वामिम
छेम-ल्वा १:१-१८
कु-रु़दु़म ग्वाक्पा यूहन्ना नुङ येशूकु सीसिपामिम १:१९-५१
खोत्ले सामामिमगोडा येशूका बेम्डिम खारी २:१–१२:५०
यरूशलेमकु हानो आथो़बाडे येशूकु चक्थो़म थारी १३:१–१९:४२
येशू सिमुलाम बम्गेम्डी मा रेम्बेसिम्डिम २०:१-३१
हुम-द: गुमी आथावो गालीलडा रेम्बेसिम्डिम २१:१-२५
यूहन्ना
Okuqokiwe okwamanje:
यूहन्ना छेम-ल्वा: THUL
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.