Yowano 4
4
Yeshu na mbuyama wa ku Shamaliya
1Bafwalishi bayuvwile ngayi Yeshu ulinakuwana na kuzubilisha bandongesha babengi kupitakana Yowano. 2(Hinge noho, Yeshu niye kaliha wazubilishilenga ndele tuhu bandongesha bendi nibo bazubilishilenga.) 3Oho Yeshu alimukile ebye, wafumine ku Yundeya, pe wabokele ku Ngalileya. 4Oho ayilenga wahanganikile kupita nzila ya Shamaliya.
5 # Shi 33:19; Yako 24:32. Mu Shamaliya wakumine ku munzi watumbiwa ngayi Shikale hahepi na mfuba iya Yakobo apanikile mwanendi Yoshefwa. 6Lishima lya Yakobo lyekalile kuyo. Yeshu wekalile hanci ku lishima, ndaba ya kukwanga ha lwendo. Shengile shikati sha mwaana oho mutena uli hakati ka mutwe.
7Mbuyama wa Kashamaliya wezile na kutekula mema, pe Yeshu wambile kukwendi ngayi, “Nikulombako mema akunwa.” 8(Ndaba bandongesha bendi bayile mu munzi na kulanda byakulya.)
9 # Ezi 4:1-5; Neh 4:1, 2 Mbuyama wambile kukwendi ngayi, “Obe uli Kayunda, nahiti ukunyepa mema kukwami ami mbuyama wa Kashamaliya? (Ndaba Bayunda kaliha baliyuvwilenga na Bakashamaliya.)
10Yeshu wamukumbwile ngayi, “Shinga walimuka shishemo sha Nyambi, na kulimuka ngayi ou unanyepe kukwobe mema akunwa yani, shinga unanyepe kukwendi, shinga unakupana mema a wumi.”
11Mbuyama wambile kukwendi ngayi, “Hekulu, shakutekwisha wufwasho, kami lishima lyakunonka. Kati mema a wumi wukawana kuti? 12Elye lishima lyakutushiyila nkaka yetu Yakobo. Niye na bana bendi na matanga wendi nimwabo nimo banwinenga. Kati obe uli wamunene kupitakana Yakobo ndi?”
13Yeshu wambile kukwendi ngayi, “Muntu nimwendi ukunwa awa mema ukekala na linyontwa kami, 14ngoboni nimwendi ou ukanwa mema nikamupanika kukekala na linyontwa wufwako. Mema nikamupanika akenga mumwendi kaheloke ka mema aya akamupana wumi wa mwayile myaka.”
15Mbuyama wambile kukwendi ngayi, “Hekulu, mpeko owo mema ngayi nibule kwikala na linyontwa, hinge nibule kwiza kuno na kutekula mema.”
16Yeshu wambile kukwendi ngayi, “Yanga ukehane mukokwobe, pe mwize kuno.”
17Mbuyama wamukumbwile ngayi, “Nifwaye mukokwami.”
Yeshu wambile kukwendi ngayi, “Unamba shiwahe hakwamba ngayi, ‘Nifwaye mukokwami.’ 18Ndaba wayekiwile ku balume mutanu, pe ou mulume ulinendi wuluno kaliha mukokwobe. Eshe unamba shakupwisha.”
19Mbuyama wambile kukwendi ngayi, “Hekulu, namono ngayi uli muluwe. 20Bankaka zetu balemeshelenga Nyambi ha lipili elye, ngoboni enu Bayunda mukwamba ngayi ku Yelushalema niko bantu bakufwanina kulemeshela Nyambi.”
21Yeshu wambile kukwendi ngayi, “Obe mbuyama nkulupile, shikati shikeza oho mukabula kulemesha Tate ha lipili elye hinge ku Yelushalema. 22Enu Bakashamaliya mukulemesha ou mukubula kulimuka. Ngoboni Etu Bayunda tukulemesha ou twalimuka, ndaba ku Bayunda niko kunafuminini kupuluka. 23Ngoboni shikati shilinakwiza, haya wuluno shakumakale oho bakakulemesha bakupwisha bakalemesha Tate mu moyo na mukupwisha, ndaba Tate washinga bakakumulemesha banoho. 24Nyambi wenga Moyo, kami baya bakumulemesha bakufwanina kumulemesha mu moyo na mukupwisha.”
25Mbuyama wambile kukwendi ngayi, “Nikulimuka ngayi Kilishitu ulinakwiza, oho akeza ukatutontwelela byuma nimwabyo.”
26Yeshu wambile kukwendi ngayi, “Ami bene, ami nilinakwamba kukwobe.”
27Shikati shiyabene bandongesha ba Yeshu babokele, bakomokele hakuwana ulinakwambola na mbuyama. Ngoboni kowa wambile kuli uya mbuyama ngayi, “Ukushinga bishini?” Hinge kwipula Yeshu ngayi, “Bishini ukwambila nendi?”
28Niho mbuyama ashiyile ntesho yendi ya mema, wabokele ku munzi, wambile ku bantu ngayi, 29“Yekenu mumone muntu unantongweze nimwabyo biya natendanga. Kampe niye Kilishitu?” 30Bantu bafumine mu munzi, pe bezile kuli Yeshu.
31Shikati shiyo bandongesha bendi banyepele ngayi, “Mulongeshi, lya taha.”
32Ngoboni Yeshu wabakumbwile ngayi, “Nili na byakulya biyo enu mukubula kulimuka.”
33Niho bandongesha bendi balyambashanine mukati kabo ngayi, “Kunekala muntu unamuletele byakulya ndi?”
34Yeshu wambile kukwabo ngayi, “Byakulya byami byenga kutenda shifungo shendi ou wantumine na kumanisha mulimo wendi. 35Kaliha mwambanga ngayi, ‘Kunashala zingonda zinaa, niho shikati shakuteza shikume.’ Nikumitongweza ngayi, monenu ayo mafuba! Mbuto yahokakale, pe shikati shakuteza shakumakale. 36Mukakuteza ukutambula ngo ku mulimo akutenda, kami ukukungwila mbuto mu wumi wa mwayile myaka, ngayi mukakukuba na mukakuteza bawahilile hamo. 37Nyambilo eye yenga yakupwisha yakwamba ngayi, ‘Umo ukukuba, kami wamina ukuteza.’ 38Namitumu mukuteza mu mfuba aya mwabulile kutenda milimo. Bantu bamina batendele mulimo, enu mukuwaninaho ha mulimo wabo.”
39Bakashamaliya babengi ba mu munzi muyo bakulupilile Yeshu ndaba ya wupaki wa uya mbuyama ou ambile ngayi, “Unantongweze nimwabyo ebye natendele.” 40Oho Bakashamaliya bakumine kuli Yeshu, bamunyepele ngayi ekale nabo, pe wekalile kuyo matena abili. 41Kami babengi bamina bakulupilile ndaba ya mazu a Yeshu. 42Bambile kuli mbuyama ngayi, “Tunakulupili, kaliha ndaba ya mazu wobe tuhu, ngoboni etu bamwine tunaliyuvwili, kami tukulimuka ngayi mwashikuma ou muntu nengi Mukakupulwisha kaye.”
Yeshu ukunyongomanisha mwana shilolo
43Munyima yakwikala matena abili kuyo, Yeshu wayile ku Ngalileya. 44#Mat 13:57; Mak 6:4; Luk 4:24. Yeshu niye mwine wambile ngayi, “Muluwe ufwao maleema mu litunga lyendi.” 45#Yowa 2:23. Oho akumine ku Ngalileya, bantu bakuyo bamutambwile, ndaba bayile ku Yelushalema ku Shimbo sha Kupitilila, kami bamonene nimwabyo ebye Yeshu atendele shikati sha shimbo.
46 #
Yowa 2:1-11. Yeshu wabokele kami ku Kana mu Ngalileya, kuya afutwile mema kwinga waine. Kwekalile shilolo wamina, ou mwanendi wekalile na kukola ku Kapenauma 47Oho ayuvwile ngayi Yeshu unezi ku Ngalileya kufuma ku Yundeya, wayile kukwendi, pe wamulombele ngayi aye nendi ku Kapenauma na kunyongomanisha mwanendi washingilenga kufwa. 48Yeshu wambile kukwendi ngayi, “Enu kutwesha kukulupila mufwako ndele munamono bilimukisho na bikomokesho.”
49Shilolo wambile ngayi, “Hekulu, tuyenga taha oho mwanami shilolo afwe.”
50Yeshu wambile kukwendi ngayi, “Yanga, mwanobe ukayoya!”
Uya muntu wakulupilile mazu ambile Yeshu, pe wayile. 51Oho ayilenga kukwabo, walihanganine na bakamilimo bendi ha nzila bamutongwezele ngayi, “Mwanobe hayoya!”
52Niho abepwile shikati osho mwana aliyuvwashiwahe. Pe bakumbwile kukwendi ngayi, “Mashikashika amumana nzona shikati sha wulikumi na kahatu.” 53Niho tatiyendi alimukile ngayi shengile shikati shiyo Yeshu ambile kukwendi ngayi, “Mwanobe ukayoya.” Niho akulupilile hamo na ba ka litala lyendi nimwabo.
54Eshe shengile shikomokesho sha wubili shiya Yeshu atendele oho akumine ku Ngalileya kufuma ku Yundeya.
Okuqokiwe okwamanje:
Yowano 4: KK2008
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
New Testament in Nkoya © The Bible Society of Zambia, 2008.