मत्ती 12
12
थाङ सोएँ ङ्यिहमागी ताहक्पु
(मर्क २:२३-२८; ३:१-६; लूक ६:१-११)
1ओहजे काहङला येशू थाङ सोएँ ङ्यिहमाला ने़ह-स्यिहङलेगी जेती फेप नाङगेराङ येहकें। ओहले येशूगी स्याहप्च्यीया़ तो़क्यो सुङगोराङ खुङया़ ने़ह-सी़ ट़ूहदी साहज्ये छ़ूसीन।#व्य २३:२५ 2दि थोङदी फरिसीया़गी येशूला, “ज़ी़-नाङदोङ, राहङगी स्याहप्च्यीया़गी थाङ सोएँ ङ्यिहमाला छ्य़े-ठिमगी पेहच्ये मेहयोहङगे म़ेदी माक्योगी ल़ेहॱआङ पेह तेहकु दु” म़ेदी मासीन।
3ओहले येशूगी सुङ नाङसीन, “क्याहल्बु दाऊद दाङ खोगी रो़हया़ टेहपा तो़गेन ती़हजीला दाऊदकी च्यि पेहपा? ख्याया़गी सुङरापला मा़हटाहबा? म़ेदी टी़ह नाङसीन।#१ शमू २१:१-६ 4खोगी किन्ज्योगी छ्योखाङ नाहङला स्य़ूहदी किन्ज्योला फुल्ग्योगी खुरा रो़हया़ ङ्याम्बु डी़दी साहसीन। ओहले छ्य़े-ठिमला ता डोनानी पूजाहारी च्यी़गी मिहम्बानी लेहमेन सुगीॱआङ ओ़ह खुरा साहज्ये मेहयोहङगे यिहन्गे।#लेवी २४:९ 5येहपाराङ च्यि ख्याया़गी छ्य़े-ठिमला मा़हटाहबा? थाङ सोएँ ङ्यिहमाॱलाङ पूजाहारीया़गी छ्योखाङला ङ्यिहमा-टाहङमाराङ ल़ेह पेहकें यिहॱनाङ ठिम गोम्ग्योदी (ङ्ये़हक्योदी) खुङला च्यिॱआङ ङ्य़ेहबा मे़हफोएँ।#गन्ती २८:९,१० 6यिहॱनाङ ङाह ख्याया़ला माएँ, छ्योखाङ म़ेदीॱआङ चा़ छ्यिम्बु देला मेहन्दा च्यी़ येह! 7यिहॱनाङ ‘ङाह सेम्ज्येनया़गी मार्च्ये मिहम्बा, ख्याया़गी चेवा पेहच्यु माएँ ङाहगी सेमला येह’ म़ेदी किन्ज्योगी सुङ नाङग्योकी स्याहल ख्याया़गी ह्अ के़हबा यिहनानी ख्याया़गी ङ्य़ेहबा म़ेहबागी मिहया़ला ङ्य़ेहबा फो़ च्य़ूज्ये म़ेहबा येहकें।#मत्ती ९:१३; होशे ६:६ 8च्यिबेमाना मिहगी स़ेबु थाङ सोएँ ङ्यिहमादीॱआङ ताहक्पु यिहम्बा” म़ेदी येशूगी सुङ नाङसीन।
9ओहलेगी येशू खुङया़गी छो़खाङला फेप नाङसीन। 10ओ़हला लाहक्पा काम्ग्यो मेहन्दा च्यी़ येहकें। ओहले फरिसीया़गी येशूला ङ्य़ेहबा काल्ज्ये म़ेदी साम्लु ताङसीन ओहले खुङगी येशूला, “थाङ सोएँ ङ्यिहमाला नेहपाला टा़ह च्य़ूज्ये ओहङगे नि मेहयोहङगे?” म़ेदी टी़हसीन। 11ओहले येशूगी, “ख्याया़ नाहङला सुज्यीदीॱआङ ल़ूह, थाङ सोएँ ङ्यिहमु हाप्टा-होप्टा नाहङला छ्यिसीमाना ओ़ह ल़ूहला फिला मेहतेन्गे ले? म़ेदी सुङ नाङसीन।#लूक १४:५ 12ल़ूह म़ेदी नि मिह काहजे चा़ छ्यिम्बु यिहम्बा। ओ़ह सोङबे थाङ सोएँ ङ्यिहमाला या़हबु ल़ेह पेहक्यो ठाबे यिहम्बा।” 13ओ़ह तिङले येशूगी ओ़ह लाहक्पा काम्ग्योगी मिहला, “ख्येगी लाहक्पा क्याङदोङ ले!” म़ेदी सुङ नाङसीन। ओहले खोगी लाहक्पा क्याङसीन ओहले ओ़ह लाहक्पा टा़हसीन। 14ओहले फरिसीया़ छो़खाङ नाहङलेगी फिला थेन्दी काहल्सीन ओहले येशूला काहन्डुमु पेहती सेच्ये म़ेदी टे़ह क्याहप्सीन।
किन्ज्योगी स्याहप्तो स्युहएँ मिहया़ दाम नाङग्यो
(मर्क ३:७-१२; लूक ६:१७-१९)
15ओ़ह ताम येशूगी ङोह ख्येन्दी येशू ओहलेगी फेप नाङसीन, ओहले मिह माहङबुराङ येशूला ताहदा क्याहप्ती काहल्सीन, ओहले येशूगी खुङ थाम्ज्यीलाराङ टा़ह च्य़ू नाङसीन, 16ओहले येशूगी ङाह सु यिहम्बा म़ेदी सुॱलाङ माहस्ये म़ेदी खुङया़ला का नाङसीन। 17ओहले दि ल़ेहमु पेहती यशैया लुहङतेम्बागी सुङ नाङग्योकी स्याहल तेहन्दा डुप्सीन।
18त़ेदोङ, ङाहगी दाम्ग्यो ङाहला स्याहप्तो स्युहएँगी मिह खोराङ यिहम्बा।
ङाह खोला चेवा पेहकें, खो ङ्याम्बु ङाह ज्यिबुराङ सेम काहसो येह,
ङाह राहङगी थु खो थो़ला ल़ू तेर्च्ये येह,
ओहले खोगी थाम्ज्यीराङ क्यिहपा-क्यिहपागी मिहया़ला ठिम ताङगेन्गी तेहन्दाला प्रा साल्ज्ये येह। #यशै ४२:१-४
19खो सु ङ्याम्बुॱआङ ठुक्पा क्याहप्च्ये म़ेह, ओहले क़े छ्यिम्बुॱआङ तेन्ज्ये म़ेह, ओहले खोगी क़े लाहमया़ला सुज्यीगीॱआङ थे़ज्ये म़ेह।
20कुहर्ती काहल्ग्यो ङ्युङमा खोगी च्या़ज्ये म़ेह
ओहले स्ये़हज्ये पेहक्योगी लो खोगी सेच्ये म़ेह
खोगी ठिमला तेम्बा ताहर च्य़ू नाङज्ये येह।
21ओहले थाम्ज्यी क्यिहपागी मिहया़गी राहङगी रेहवा मिहरोगी छेनला ज़्या़ज्ये येह।
येशूला फरिसीया़गी थेचुम पेहक्यो
(मर्क ३:२०-३०; लूक ११:१४-२३)
22ओहले मिहया़गी ल्हेन्डी स्य़ूहक्यो मिह च्यी़ला येशूसाला ख्योङसीन खो मी़ मेहथोङ येहकें ओहले खो तामॱआङ मा मी़हखुएँ येहकें। ओहले येशूगी खोला टा़ह च्य़ू नाङ फान्ज्यो खोगी मी़ थोङगेन दाङ ताम मा ख़ूएँ काहल्सीन। 23दि थोङदी मिह थाम्ज्यीराङ याहम्जेनज्यी ने़दी दि ल़ेहमु म़ेदी ताम माज्ये छ़ूसीन, “च्यि मिह-रो़हराङ दाऊदगी स़ेबु, थार्पा नाङगेन्गी क्याहल्बु यिहम्बानी?” 24दि ताम थे़दी फरिसीया़गी मासीन, “दि मिहगीनी ल्हेन्डीया़की क्याहल्बु बालजिबुलगी ओङगी पेहती गा ल्हेन्डीया़ला तेन्गे।”
25यिहॱनाङ खुङया़गी दि ल़ेहमु साम्लु ताङग्यो ङोह ख्येन्दी येशूगी खुङया़ला सुङ नाङसीन, “लुहङबाया़ राहङ नाहङदोङराङ ठ़ूस्यी सिहङदा पेहसीमाना ओ़ह लुहङबा खोराङॱराङ तोङदी डोज्ये येह। ओ़ह ल़ेहमुराङ क्याहसा क्यिनी खाङबा म़ेहमे राहङ नाहङदोङराङ ठ़ूस्यी सिहङदा पेहसीमाना ओ़हदीॱआङ तोङदी डोज्ये येह। 26का़हलेॱआङ ती़हगी ती़हलाॱराङ ङेती टाह छ़ूसीन माना खोगी क्याहल्सी काहन्डुमु पेहती छ्या़ ख़ूएँ ले? 27ख्याया़गी ङाहला ती़हगी क्याहल्बु बालजिबुलगी ओङगी पेहती ल्हेन्डी तेन्गे माएँ। ओ़ह ल़ेहमु यिहन्सीमानानी ख्याया़गी स्याहप्च्यीया़गीदी सुगी ओङगी पेहती तेन्गे ले? ओ़ह सोङबे ख्यागी राहङगी स्याहप्च्यीया़गीॱराङ ख्याया़ला ङ्य़ेहबा काल्ज्ये येह। 28बालजिबुलगी ओङगी मिहम्बा, यिहॱनाङ ङाह किन्ज्योगी थु लाहमले ल्हेन्डी तेन्गे ओहले दि ङो़लेराङ किन्ज्योगी क्याहल्सी ख्याया़गी पाहरक्यीला लेप सिहन्ग्यो येह माएँ ताम ख्याया़गी क्यी़ह ज्योर ख़ूएँ। 29येहपाराङ ङ्यिहन्दोङ, स्युक छ्यिम्बु मिहला तोहङले माहताहम थु सु मिह च्यी़गीॱआङ खोगी खाङबागी पेला ख्येर मी़हखुएँ। खोला ताहम फान्ज्यो च्यी़राङ खोगी खाङबागी पेलाया़ फ्रो़दी खेर ख़ूएँ।
30 ङाह ङ्याम्बु छ्यो़ मेहबेगे मिह ङाहगी टाह यिहम्बा। ङाह ङ्याम्बु रुहप पेहच्येला रो़हराम मेहबेकेन्दीगी ङाहगी रुहप पेहक्योदीॱआङ फेतार कोहतार ताङगे। #
मर्क ९:४०
31ओ़ह सोङबे ङाह ख्याया़ला माएँ, मिहया़गी पेहक्योगी तिहक्पा थाम्ज्यीराङ ओहले किन्ज्योला टाह पेहती पेहक्योकी स्ये़हन्डीलदी कोहङदा ज्योर्च्ये येह यिहॱनाङ नाम्पार-ताहक्पा थुला टाह पेहती पेहक्योकी स्ये़हन्डीलदी कोहङदा नाङज्ये म़ेह। 32मिहगी स़ेबुला टाह पेहती तिहक्पा पेहक्योदी कोहङदा नाङज्ये येह, यिहॱनाङ नाम्पार-ताहक्पा थुला स्ये़हन्डील पेहक्योकी तिहक्पादी दि काल्बा दाङ ओहङगेन्गी काल्बाॱलाङ नाहमॱआङ कोहङदा नाङज्ये म़ेह।#लूक १२:१०
तोहङबोला ते़बेगी सेदो
(लूक ६:४३-४५)
33 या़हबु सेदो या़हज्येला तोहङबोॱआङ या़हबु ओहङ कोहकें। तोहङबोॱराङ या़हबु मे़हसीमानानी सेदोॱआङ या़हबु मेहयोहङगे! सेदो लाहमलेॱराङ तोहङबो ङोह स्य़ेगे। #
मत्ती ७:२०; लूक ६:४४ 34ए प्रुहलगी छार्क्यीनया़! ख्याया़ राहङराङ मिह ङ्येहम्बा येहबा,#मत्ती ३:७; २३:३३; लूक ३:७ या़हबु ताम काह-ठि पेहती मा ख़ूज्ये ले? च्यिबेमाना सेमला च्यि येहकें, ओ़हदीॱराङ खाले थेन्गे। #मत्ती १५:१८; लूक ६:४५ 35या़हबु मिहगी राहङगी सेमला येहकेन्गी या़हबु तामकी चाहङलेगी या़हबु तामॱराङ तेन्गे। चोक्पा मिहगी राहङगी सेमला येहकेन्गी चोक्पा तामकी चाहङलेगी चोक्पा तामॱराङ तेन्गे। 36ङाह ख्येला माएँ, फेन मे़हथोएँगी ताम माएँया़गी ठिम ताङगे ङ्यिहमु ताम रे़ह-रे़हगी चिदुङ तेर कोहच्ये येह। 37ख्याया़गी माक्यो ताम ङो़लेराङ ख्याया़ ठिम ताङगे ङ्यिहमाला ताहक्पा क्यिनी माहताहक्पा म़ेदी ङोह स्ये़ज्ये येह।”
येशूला याहम्जेन छ्येवागी ताक्छेनया़ तेन्ज्येला स्युहक्यो
(मर्क ८:११-१२; लूक ११:२९-३२)
38ओहले लाहला छ्य़ेगी खेम्बुया़ दाङ फरिसीया़ डी़दी येशूला दि ल़ेहमु मासीन, “लोबेन लाह, ताक्छेन च्यी़ तेन नाङदोङ, ङ्यिहया़ला ताज्ये सेम्बा येहबा।”#मत्ती १६:१; मर्क ८:११; लूक ११:१६ 39येशूगी खुङया़ला सुङ नाङसीन, “दाङ-तिहरीङगी मिहया़ काहजे ङ्येहम्बा ओहले छ्येउ-छ्येंमुवा दु! खुङया़ ओङ छ्यिम्बुगी ताक्छेनया़ ताज्ये छोल्गे। यिहॱनाङ लुहङतेम्बा योनागी ताक्छेन मिहम्बा लेहमेन खुङया़गी च्यी़ॱआङ ताक्छेन थोङ ङ्युहङज्ये म़ेह। #मत्ती १६:४; मर्क ८:१२ 40च्यिबेमाना काहन्डुमु पेहती योना ङ्याह छ्युम्बुगी फोवा नाहङला ङ्यिहमा सुम दाङ कुहङमु सुम येहकें, ओ़ह ल़ेहमुराङ पेहती मिहगी स़ेबुॱआङ सा नाहङला ङ्यिहमा सुम दाङ कुहङमु सुम तेहच्ये येह।#योना १:१७ 41ठिम ताङगे ङ्यिहमाला निनवे क्याहसाकी मिहया़गी लाहङदी दाङ-तिहरीङगी मिहया़ला ङ्य़ेहबा केन्ज्ये येह च्यिबेमाना किन्ज्योकी सुङदेन स्येकेमु खुङया़गी राहङ-राहङगी तिहक्पालेगी स्या़बा पेहसीन। यिहॱनाङ त़ेदोङ, योना म़ेदीॱआङ छ्यिम्बु देला सुज्यी येह। #योना ३:५ 42ठिम ताङगे ङ्यिहमाला ल्होदी शेबा लुहङबाकी क्याहल्मु लाहङदी दाङ-तिहरीङगी मिहया़ला ङ्य़ेहबा केन्ज्ये येह च्यिबेमाना सोलोमन क्याहल्बुगी रिहक्स्यीगी ताम ङ्यिहन्ज्येला मोह माहङबुराङ था़-रिहङबुलेगी ओहङसीन। यिहॱनाङ त़ेदोङ, सोलोमन म़ेदीॱआङ छ्यिम्बु देला सुज्यी येह।”#१ राज १०:१-१०; २ लुहक ९:१-१२
ल्हेन्डी लो़हदी ओहङगे
(लूक ११:२४-२६)
43 “मेहचाङा नाम्स्यी मिहलेगी थेन्दी काहल फान्ज्यो खो थाङ सोज्ये म़ेदी काम्बु ग्या़या़ छोल्दे डोएँ, यिहॱनाङ का़हॱलाङ मेहन्ज्योर्कें। 44तेहसा ग्या़ का़हॱलाङ च्य़ेह माहसीहन फान्ज्यो ‘तोहङले तेहक्यो ग्या़लाराङ डो कोहसीन’ म़ेदी खो लो़ह ओहङगे। ओ़हला लेप्केमु खोगी खाङबा तोङबा, क़ेह-चाङमा पेह ज़्या़क्यो ओहले खाङबा ज़ाप्ते ज़्या़क्यो च्य़ेह सिहन्गे। 45दि थोङदी खो काहल्दी राहङ म़ेदीॱआङ चोक्पा ल्हेन्डी तिहन थाल ख्योङदी ओहङगे ओहले खुङया़ ओ़ह नाहङला स्य़ूहदी तेहकें ओहले ओ़ह मिहगी च्याहवादी तोहङले म़ेदीॱआङ तोहरोङ चोक्पा ओहङगे। दाङ-तिहरीङगी मिह ङ्येहम्बाया़गी च्याहवाॱआङ ओ़ह ल़ेहमुराङ ओहङज्ये येह।”
येशूकी आमा दाङ नो़हया़
(मर्क ३:३१-३५; लूक ८:१९-२१)
46येशूगी मिह मिह-माहङला दि स्याहल सुङगे सुङगेमुराङ येशूगी आमा दाङ नो़हया़ लेप्सीन। खुङया़ येशू ङ्याम्बु ताम मा कोहच्ये येह म़ेदी फिलाॱराङ कू़हदे तेहसीन। 47मेहन्दा च्यी़गी येशूला मासीन, “लोबेन लाह, राहङगी आमा दाङ नो़हया़ राहङ ङ्याम्बु ताम माज्ये म़ेदी फिला कू़हदे तेहक्यो येह।” 48येशूगी लेहङगु ख्योङगे मिहला सुङ नाङसीन, “ङाहगी आमा दाङ ङाहगी नो़हया़ सु यिहम्बा?” 49ओहले येशूगी राहङगी छ्या़गी स्याहप्च्यीया़ला तेन्दी सुङ नाङसीन, “ङाहगी आमा दाङ ङाहगी नो़हया़ दिया़राङ यिहम्बा। 50च्यिबेमाना स्यिहङगामला ज़्य़ू नाङगेन्गी ङाहगी याहपगी का ङ्यिहन्गेया़ॱराङ ङाहगी नो़ह, नुहमु दाङ आमा यिहम्बा।”
Okuqokiwe okwamanje:
मत्ती 12: HYLM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved.