Nawuri: Ɩbwaarɛ Katɔwɛ Kyula Pʋpwɛ New Testament

Ɩbwaarɛ Katɔwɛ Kyula Pʋpwɛ

Yesu tɩɩ mʋ abɩɩlapʋ kudu anyɔ ba gyaŋɛ, nɩɩ ɔ sa bamʋ ɔlʋn yɛ ba taa gya nbwɩɩ libi, kɛ ba kyɛ alɔ yiri‐yiri kʋmaa nɩmʋ.
Abɩɩlapʋ kudu anyɔ mʋ atɩɩ ndee. Ɔgyankpaapʋ mʋ ɩ gyɛ Simon (mʋ nɩɩ ba bɩla bɛɛ tɩɩ mʋ yɛ Pita) maa mu‐supu Andiruwu, yɛ Gyemisi maa mu‐supu Gyɔn, Sebedi mu‐bii ana, yɛ Filipu maa Batolome, yɛ Tomasi maa Matiwu, lenpoo ɔkɔɔlɛpʋ mʋ, yɛ Gyemisi Alifeyo mu‐bii, yɛ Tadiyosi, yɛ Simon mʋ nɩɩ bɛɛ tɩɩ mʋ yɛ Seloti mʋ, yɛ Gyudasi Isikariyoti, mʋ nɩɩ ɔ ba lɛɛ Yesu sa mʋ.


Nɩɩ Yesu sun abɩɩlapʋ kudu anyɔ mʋ tɔwɛ bamʋ yɛ, “Fan man kpee bamʋ nɩɩ ba man gyɛ Gyiwu abi mʋ kɩbaafʋn abɛɛ Samariya abi kadɛ kʋ tɔ. Amaa fan kpee Ɩsɩrayɩ abi mʋ nɩɩ ba du fɛɛ nbʋlʋpʋ fɔyɩsa mʋ asɛ. Fan kpee naa tɔwɛ bamʋ asɩn danbɩrasa mʋ yɛ, ‘Ɩbwaarɛ kuwura‐gyii mʋ ki tiri tɔ.’ Fan kan kpee mʋ fan kyɛ alɔpʋ, kɛ fan kyiŋi alewupu, kɛ fan yɛgɛ abootipu n‐yɩɩ ɩ lɔŋɔ sʋ, kɛ fan gya nbwɩɩ libi lɩɩ asa sʋ. Ba taa ɔlʋn maŋa kɛɛ fanɛ nɩn, ɩmʋ sʋ fanɛ gbaa fanɛ fan taa kɛɛ. Fan man taa afulee kʋ waa fanɛ igyifa tɔ, nɩɩ fan man taa taakpe abɛɛ kaalɛ nyɔsapʋ, abɛɛ asɩbɩta, abɛɛ kikpebi, kpee ɔkpa maŋa. Osunpu dagaa fɛɛ ba sa mʋ kʋtɔ mʋ nɩɩ ki tiri mʋ.
“Kadɛ lala abɛɛ kadɛ‐bi kʋmaa mʋ nɩɩ fan loo kɩmʋ tɔ mʋ, fan biti ɔsa mʋ nɩɩ mʋ ɩkpa i kyiigi, kɛ fan kyɩna mʋ kɩkpaara sʋ naa fʋʋ saŋa mʋ nɩɩ fen biti fan ba lɩɩ tʋtɔ. Nɩɩ fan kan loo mʋ sʋ mʋ, fan kʋlɛ keyuula sa kɩkpaara mʋ. Nɩɩ kɩkpaara mʋ sʋ abi ba kan kɔɔlɛ fanɛ mʋ, fan yɛgɛ fanɛ keyuula mʋ ki sii kɩkpaara mʋ sʋ. Amaa nɩɩ ba man kan kɔɔlɛ fanɛ bɩrɛ, fan yɛgɛ fanɛ keyuula ki bwii ba fanɛ asɛ. Nɩɩ kadɛ kʋ abɛɛ kɩkpaara kʋ asa ba man kan kɔɔlɛ fanɛ abɛɛ ba man nu fanɛ asɛ mʋ, fan kpɩkpaa fanɛ ayaa tɔ ɩsɛ wʋrɩgɛ bamʋ sʋ, kɛ fan lɩɩ tʋtɔ. N tɔwɛ fanɛ kesintin fɛɛ, kakɛ mʋ nɩɩ Ɩbwaarɛ ii biti o be gyii asa asɩn mʋ, Sodom maa Gomora abi kʋsʋ bɩɩtɛ gbaa ii biti ɩ baa ɩ bɔ bamʋ lɛɛ. Fan kɩɩ! N sun fanɛ nɩn fɛɛ nbʋlʋpʋ n kpee akuntun tɔ. Fan baa fan sʋ kanyaasɩn fɛɛ anansɛ, yɛgɛ fan du bwahn fɛɛ awura‐lɔpɔ.


“Fan baa fan da sʋ, lɩɩ fɛɛ asa kʋ bee biti ba kɩtaa fanɛ kpee asɩn ogyikpa, kɛ ba tɩŋɛ fanɛ Gyiwu abi kabwaarɛ‐kʋlɛ ɩgyaŋɛkpa. Lɩɩ mɛ sʋ, bee biti ba kpiya fanɛ awura yɛ alʋlʋnpʋ ansi tɔ, kɛ fan nyɛ ɔkpa tɔwɛ asɩn danbɩrasa mʋ lɩɩ mɛ sʋ sa bamʋ, yɛ bamʋ nɩɩ ba man gyɛ Gyiwu abi mʋ. Nɩɩ ba kan kpiya fanɛ asɩn ogyikpa mʋ, fan man yɩyɛɛ lɩɩ kʋtɔ mʋ nɩɩ fen biti fan tɔwɛ, abɛɛ kanan mʋ nɩɩ fan tɔwɛ mʋ sʋ. Saŋa mʋ kan fʋʋ mʋ, fen biti fan nyɛ asɩn mʋ nɩɩ fan tɔwɛ bamʋ. Lɩɩ fɛɛ man gyɛ fanɛ gbaa‐gbaa ii biti fan tɔwɛ, amaa fanɛ‐Sɛ Ɩbwaarɛ Kayaayu mʋ ii biti ɔ bɔla fanɛ sʋ tɔwɛ.
“Kanɩn nkɛ maa tɔ mʋ, nyɩmɩsa ii biti o gyii mʋ gbaa‐gbaa mu‐supu kadɛ‐boyi, kɛ ba mɔɔ mʋ, kɛ ɔsɛ gbaa ɔ waa obii kanɩn. Nbii bee biti ba kʋsʋ yɩlɛ akʋʋgɛpʋ ana sʋ, kɛ ba yɛgɛ kɛ ba mɔɔ bamʋ. Asa kpini bee biti ba kisi fanɛ lɩɩ mɛ sʋ, amaa ɔkʋmaa mʋ nɩɩ ɔ taalɛ yɩlɛ tɔ kenken naa fʋʋ laalaalʋwɛ mʋ, ii biti ɔ nyɛ kamɔlɩgɛ. Nɩɩ ba kan nyanla fanɛ kadɛ kʋ tɔ mʋ, fan sɩlɛ lɩɩ tʋtɔ kpee kadɛ kʋ tɔ. N tɔwɛ fanɛ kesintin fɛɛ, fɛn mɛɛ yɛ fan sɩlɛ kanɩn kyaabɔɔ Ɩsɩrayɩ ndɛ mʋ kpini sʋ, pɔyɩ kɛ mɛ, Daadimaadi Obii‐nyɩnsa mʋ n ba.
“Ɔbɩɩlapʋ man kyɔ mʋ ɔkaapʋpʋ, nɩɩ kɩnyɛ man kyɔ mʋ‐nyɩrɩpɛ. Ɩ dagaa ɩ maa kʋkwɛ ɔbɩɩlapʋ fɛɛ maa ba waa fɛɛ mʋ ɔkaapʋpʋ. Nɩɩ kɩyaafɔlɛ mɔɔ ɔ ba waa fɛɛ mʋ‐nyɩrɩpɛ. Nɩɩ ba kan bɛɛ tɩn asɩn bɛɛ gyaga mɛ, kɩkpaara sʋ ɔbɩlɩsa sʋ yɛ n gyɛ Beelisebu mʋ, kanɩn bɩrɛ bee biti ba taa atɩɩ libi gyaga fanɛ mʋ nɩɩ fan gyɛ mɛ kɩkpaara sʋ abi mʋ ɩ kyɔ mɛ lɛɛ mʋ.


“Ɩmʋ sʋ fan man sɩlɛ asa. Kʋtɔ kʋmaa mʋ nɩɩ ki bun sʋ mʋ, ii biti i bugi sʋ, nɩɩ kʋtɔ kʋmaa mʋ nɩɩ kɩ baala mʋ, ii biti ɩ lɩɩ ifuli. Asɩn kʋmaa mʋ nɩɩ n tɔwɛ fanɛ kitentenbiri tɔ mʋ, fan tɔwɛ ɩmʋ kakyʋwapɛ, nɩɩ asɩn kʋmaa mʋ nɩɩ n kuli waa fanɛ asʋ tɔ mʋ, fan da ɩmʋ kibonbon. Fan man sɩlɛ bamʋ nɩɩ bɛɛ mɔɔ kayɩɩ‐wʋlɛ nkʋn, yɛgɛ ba mɛɛ taalɛ mɔɔ ɔkala. Amaa fan sɩlɛ Ɩbwaarɛ mʋ nɩɩ ɛɛ taalɛ nyita ɔkala yɛ kayɩɩ‐wʋlɛ, Sɩtaanɛ fʋlɔn tɔ mʋ. Man gyɛ kobo kʋlʋn nɩɩ bɛɛ sʋ bɛɛ sɔɔ alangba anyɔ, amaa bamʋ tɔ ɔkʋlʋn mɛɛ yɛ ɔ tɩyɛ kasɛ sʋ wu, yɛgɛ fanɛ‐Sɛ Ɩbwaarɛ man sa ɔkpa. Halɩɩ fanɛ ɔkʋmaa nɩmʋ kumu tɔ inyini gbaa, Ɩbwaarɛ nyi ɩmʋ kɔnɔ. Ɩmʋ sʋ fan man waa kufuu, lɩɩ fɛɛ fan sʋ kyaarɛ fan kyɔ alangba damantɛ.
“Ɔkʋmaa mʋ nɩɩ ɛɛ lɛɛ ɛɛ tɔwɛ asa tɔ yɛ n gyɛ mʋ‐Nyɩrɩpɛ mʋ, kanɩn nɩɩ ngbaa mɛ n biti n lɛɛ mʋ kaapʋ mɛ‐Sɛ ansi tɔ sʋsʋ. Amaa ɔkʋmaa mʋ nɩɩ o kina mɛ asa tɔ yɛ n man gyɛ mʋ‐Nyɩrɩpɛ mʋ, ngbaa mɛ n biti, n kina mʋ mɛ‐sɛ ansi tɔ sʋsʋ.


“Fan man fɛ nfɛɛrɛ fɛɛ n ba nɩn kɛ ɩ bɩya keyuula dulinyaa nɩmʋ tɔ. Man gyɛ keyuula nɩɩ n bɩya, amaa keluu nɩɩ n bɩya. Lɩɩ fɛɛ n ba nɩn,

‘kɛ nbii‐nyɩnsa ba kʋsʋ yɩlɛ bamʋ‐sɛ ana sʋ,
kɛ nbii‐kyɩɩsa gbaa ba kʋsʋ yɩlɛ bamʋ‐nyi ana sʋ,
kɛ asaa‐kyɩɩsa ba kʋsʋ yɩlɛ bamʋ‐saa ana sʋ,
Kɛ nyɩmɩsa mʋ dʋn ana ba baa ba gyɛ mʋ kɩkpaara sʋ asa.’
“Ɔkʋmaa mʋ nɩɩ ee biti mʋ‐sɛ abɛɛ mu‐nyi ɔ kyɔ mɛ mʋ, ɔ man dagaa maa waa mɛ obuupu. Nɩɩ ɔkʋmaa mʋ nɩɩ ee biti mu‐bii‐nyɩnsa abɛɛ ɔkyɩɩsa ɔ kyɔ mɛ mʋ, man dagaa maa waa mɛ obuupu. Nɩɩ ɔkʋmaa mʋ nɩɩ ɔ man taa mu oyu laasa sʋla buu mɛ mʋ, man dagaa maa waa mɛ obuupu. Nɩɩ ɔkʋmaa mʋ nɩɩ ee biti mʋ nkpa mʋ kɩbaa sʋ mʋ, ee biti ɔ pan ɩmʋ, amaa ɔkʋmaa mʋ nɩɩ ɔ pan mʋ nkpa lɩɩ mɛ sʋ mʋ, ee biti ɔ nyɛ ɩmʋ.


“Ɔkʋmaa mʋ nɩɩ ɔ kɔɔlɛ fanɛ mʋ, kɔɔlɛ mɛ nɩmʋ, nɩɩ ɔkʋmaa mʋ nɩɩ ɔ kɔɔlɛ mɛ mʋ, kɔɔlɛ ɔmʋ nɩɩ o sun mɛ nɩmʋ. Ɔkʋmaa mʋ nɩɩ ɔ kɔɔlɛ Ɩbwaarɛ ɔtɔwɛpʋ lɩɩ maa gyɛ Ɩbwaarɛ atɔwɛpʋ sʋ mʋ, ee biti ɔ nyɛ kʋkɔka mʋ nɩɩ Ɩbwaarɛ ii biti ɔ ka mʋ ɔtɔwɛpʋ mʋ. Nɩɩ ɔkʋmaa mʋ nɩɩ ɔ kɔɔlɛ ɔsa mʋ nɩɩ mʋ ɩkpa i kyiigi lɩɩ maa gyɛ ɩkpa kyiigisa wuya sʋ mʋ, ee biti ɔ nyɛ kʋkɔka mʋ nɩɩ Ɩbwaarɛ ii biti ɔ ka ɔsa mʋ nɩɩ mʋ ɩkpa i kyiigi mʋ. Nɩɩ ɔkʋmaa mʋ nɩɩ ɔ sa mɛ abɩɩlapʋ nɩmʋ tɔ ɔkʋ nkyu yuulisa kawɛ tɔ, lɩɩ fɛɛ maa gyɛ mɛ ɔbɩɩlapʋ sʋ mʋ, n tɔwɛ fanɛ kesintin fɛɛ, ɔ man yɛ ɔ pan mʋ kʋkɔka kpaa.”

ያዳምጡ Mat 10