These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐸᐃᒂᐤ ᒋᓴᔅ ᐊ ᒋᔅᒋᓄᐊᒧᐛᑦ ᐊᓂᔭᔪᐛ ᐃᔪᐛ ᐊᓐᑕ ᒋᓴᐊᔭᒥᐊᐅᒋᐛᐱᒡ ᑭᔭ ᐊ ᐛᐎᑕᐧᒃ ᒥᔽᒋᒧᐅᓂᔪᐤ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᑲ ᒋᔅᑯᑎᒪᒐᔨᒋ ᐎᓱᐛᐅᓂᔪᐤ ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐃᔪᐛ ᒋ ᐸᒋ ᓂᑐᐛᐱᒥᑯᐤ, ᐊᑯ ᒂ ᐃᑎᑯᑦ, “ᐎᑎᒧᐅᓇᓐ ᒪ, ᒐᒂᓐ ᐛᒋ ᐃᑐᑎᒥᓐ ᐅ ᑲ ᐃᑐᑎᒥᓐ ? ᐊᐛᓐ ᑲ ᐃᑎᓱᒥᔅᒃ ᐅ ᒐᒋ ᐃᑐᑎᒥᓐ ?”
ᒋᓴᔅ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᑭ ᑯᒂᒋᒥᑎᓇᐛᐤ ᒐᒂᓐ᙮ ᐎᑎᒧᐅᒃ ᒪᒃ᙮ ᐊᐛᓐ ᑲ ᐃᑎᓱᒪᑦ ᒠᓐ ᐅᓯᑲᐃᑕᒐᐛ ᒐᒋ ᓯᑲᐃᑐᐛᔨᒋ ᐊᐛᔪᐛ, ᒋᓴᒪᓂᑐᐤ ᐊ ᑭᔭ ᒪᒃ ᓇᐸᐤ ?”
ᒋ ᒥᒋᐱᔪᒡ ᒪᒃ ᐊᓐᑕ ᐎᔨᐛᐤ ᐊ ᐃᔅᒋᔄᒡ, “ᐃᔅᒋᔄᔭᒂ, ‘ᒋᓴᒪᓂᑐᐛ ᒋ ᐃᑎᑯᐤ,’ ᒋᑭ ᐃᑎᑯᓄᐤ, ‘ᒐᒂᓐ ᒪᒃ ᐛᒋ ᐊᑲ ᐅᒋ ᑕᑈᑐᐛᒄ ?’ ᒪᒃ ᐃᔅᒋᔄᔭᒂ, ‘ᓇᐸᐛ ᑲ ᐃᑎᓱᒥᑯᑦ ᐊᓂᔭ ᑲ ᐃᑎᑦ,’ ᐊᑯ ᐅᒡ ᐃᔪᒡ ᐅᑕ ᑲ ᑕᒡ ᒋᑭ ᓂᐸᐃᑯᓄᒡ ᐊ ᐸᐱᒧᓯᓇᑕᐅᑕᐧᑯᒡ᙮ ᐛᔅ ᓇᔅᒡ ᑕᑈᔭᔨᒪᐅᒡ ᒠᓇ ᐊᒋ ᐅᒋᔅᒋᐛᐃᒐᓱᔨᒋ᙮”
ᒂ ᐃᓯ ᐎᑎᒧᐛᒡ ᒋᓴᓴ ᐊ ᐃᔅᒋᔄᒡ, “ᓇᒪ ᓂ ᒋᔅᒐᔨᒪᓇᓐ ᐊᐛᔪᐛ ᑲ ᐃᑎᓱᒥᑯᑦ ᒠᓐ ᒐᒋ ᓯᑲᐃᑐᐛᑦ ᐊᐛᔪᐛ᙮”
ᒋᓴᔅ ᒂ ᐃᑕᑦ, “ᑭᔭ ᓂᔾ ᓇᒪ ᒋᑭ ᐅᒋ ᐎᑎᒪᑎᓇᐛᐤ ᐊᐛᓐ ᑲ ᐸᒋ ᐃᑎᓱᒥᑦ ᐅ ᒐᒋ ᐃᑐᑎᒪᓐ᙮”


ᒋᓴᔅ ᑭᔭ ᒋ ᐎᑎᒧᐛᐤ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᓇᐸᐤ ᒋ ᐅᓯᑕᐤ ᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᔪᐤ, ᐊᑯ ᐸᑎᒪ ᒂ ᐱᔅᑎᓱᐛᑕᐧᒃ ᐊᐛᔪᐛ ᒐᒋ ᓂᓇᑭᑐᐛᔨᑎᒪᑯᑦ᙮ ᐊᑯ ᒂ ᔅᑐᑕᑦ, ᐛᔪᐤ ᐊ ᑎᑯᓂᔨᒡ ᐊᔅᒋᔪᐤ ᒂ ᐃᑐᑕᑦ᙮ ᓇᐅᔅ ᓇᒪ ᒪᒃ ᐅᒋ ᑕᐤ᙮ ᐃᔅᐱ ᒪᒃ ᐛᑎᒋᐱᔨᒡ ᒐ ᒪᒧᓴᒋᓂᑭᓄᔨᒋ ᐊᓂᔭᔪᐛ ᒥᓂᓴ ᐊᓐᑕ ᒥᔅᑎᑯᒡ ᑲ ᓂᑕᐅᒋᓂᔨᒋ ᒋ ᐃᑎᓴᐛᐤ ᐸᐃᒄ ᐅᑦ ᐊᐸᒐᐊᑭᓇ ᒐᒋ ᓂᑐᐛᐱᒪᔨᒋ ᐊᓂᔭᔪᐛ ᑲ ᓂᓇᑭᑐᐛᔨᑎᒥᔨᒋ ᐊᓂᔭ ᐅᑦ ᐊᔅᒋᔾ ᒐᒋ ᒥᔨᑯᑦ ᐎᔾ ᑕᓐ ᒋᐸ ᐃᓯ ᐊᔭᐤ᙮ ᒥᒄ ᒪᒃ ᐊᓐᒡ ᑲ ᓂᓇᑭᑐᐛᔨᑕᒡ ᐊᓂᔭᔪᐛ ᓂᑕᐅᒋᑕᑭᓇ ᒋ ᒪᓯᐧᑯᐛᐅᒡ ᐊᓂᔭ ᐊᐱᒋᐊᑭᓇ ᑲᐤ ᒂ ᒋᐛᑎᓯᐛᒡ ᐊ ᐱᓯᑯᑕᔨᒋ᙮ ᐊᑯ ᐊᓐ ᑲ ᑎᐱᔨᐛᐅᓯᑦ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ ᒥᓐ ᑯᑎᑲ ᐊᐱᒋᐊᑭᓇ ᒋ ᐃᑎᓴᐛᐤ᙮ ᒥᒄ ᒪᒃ ᐊᓐᒡ ᑲ ᓂᓇᑭᑐᐛᔨᑕᒡ ᐊᓂᔭᔪᐛ ᓂᑕᐅᒋᑕᑭᓇ ᐃᔭᐱᒡ ᐊᓂᔭ ᒋ ᒪᓯᐧᑯᐛᐅᒡ, ᑭᔭ ᒋ ᒪᔭᔨᒪᐅᒡ ᐊᑯ ᒂ ᒋᐛᑎᓯᐛᒡ ᐊ ᐱᓯᑯᑕᔨᒋ᙮ ᐊᑯ ᐊᓐ ᑲ ᑎᐱᔨᐛᐅᓯᑦ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ ᒥᓐ ᑯᑎᑲ ᐊᐱᒋᐊᑭᓇ ᒂ ᐃᑎᓴᐛᑦ᙮ ᐊᓐᒡ ᒪᒃ ᑲ ᓂᓇᑭᑐᐛᔨᑕᒡ ᐊᔪᑯᓐ ᐊᑯ ᐅᔭ ᑲ ᒥᔄᑭᓂᐧᑲᑕᒡ, ᑭᔭ ᑲ ᐎᐛᐱᓇᒡ᙮”
“ᐊᑯ ᐊᓐ ᑲ ᑎᐱᔨᐛᐅᓯᑦ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ ᒋ ᒪᒥᑐᓇᔨᑎᒻ ᑕᓐ ᒋᐸ ᒋ ᐃᑐᐤ᙮ ‘ᒐᒃ ᒂ ᐃᑕᔨᑕᐧᒃ ? ᓂᑭ ᐃᑎᓴᐛᐤ ᓂᔾ ᑎᐱᔨᐛ ᓂᑯᔅ ᑲ ᓴᒋᐊᒃ᙮ ᒋᑭ ᒋᔅᑕᔨᒪᐅᒡ ᐛᐱᒪᑥᐛ᙮’ ”
“ᐊᔪᐅᒄ ᒪᒃ ᒂ ᐃᑎᑦ᙮ ᐊᓐᒡ ᑲ ᓂᓇᑭᑐᐛᔨᑕᒡ ᐃᔅᐱ ᐎᔭᐱᒪᒡ ᒋ ᐃᑎᑐᒡ, ‘ᐊᔪᐅᒄ ᐅᔭ ᐊᓐ ᒋᐅᒋᒪᒥᓄᐤ ᐅᑯᓴ᙮ ᐅᔭ ᓂᑕᐅᒋᑕᑭᓐ ᐊᔅᒋᔪᐤ ᐎᔾ ᒋᑭ ᐊᓱᒥᔭᑭᓄᐤ᙮ ᓂᐸᐊᑕᐤ᙮ ᐊᑯ ᒪᒃ ᐅᔭ ᐅᑦ ᐊᔅᒋᔾ ᒋᔭᓄᐤ ᒐ ᑎᐸᔨᑎᒺᐧᒄ᙮’ ᐊᑯ ᒪᒃ ᒂ ᐎᐎᑎᓯᓇᒡ ᐊᓐᑕ ᐅᒋ ᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ ᒂ ᓂᐸᐊᒡ᙮”
ᐊᑯ ᒋᓴᔅ ᒂ ᑯᒂᒋᒪᑦ ᐊᓂᔭᔪᐛ ᑲ ᑎᐸᒋᒧᔅᑐᐛᑦ, “ᑕᓐ ᒪᒃ ᒐ ᐃᑐᑐᐛᑦ ᐊᓐ ᐅᒋᒪᐤ ᐊᓂᔭ ᑲ ᓂᓇᑭᑐᐛᐸᑎᒥᔨᒋ ᐅᓂᑕᐅᒋᑕᑭᓇ ? ᑭᑈ ᒐ ᒋᐛᑦ ᐊᓐ ᐅᒋᒪᐤ ᒐ ᓂᐸᐊᑦ ᐊᓂᔭᔪᐛ ᓇᐸᐛ ᐊᑯ ᒐ ᒥᔭᑦ ᑯᑎᑲ ᐊᐛᔪᐛ ᒐᒋ ᓂᓇᑭᑐᐛᐸᑎᒥᔨᒋ ᐊᓂᔭ ᓂᑕᐅᒋᑕᑭᓇ᙮” ᐃᔅᐱ ᒪᒃ ᐊᓐᒡ ᐃᔪᒡ ᐱᔭᑕᒡ ᐅᔭ, ᒋ ᐃᑕᐅᒡ, “ᑭᒪ ᐊᑲ ᓂᑕ ᒋᑦ ᐃᔅᐱᔨᒡ ᐅ᙮”
ᒋ ᑭᓄᐛᐱᒪᐤ ᒪᒃ ᐊᑯ ᒂ ᐃᑕᑦ, “ᑕᓐ ᐊ ᐃᔅᒋᔄᒥᑲᒡ ᒪᒃ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᑲ ᐃᑎᔅᑕᒡ,
ᒋ ᐊᑐᐛᔨᒪᐅᒡ ᑲ ᒥᒋᐛᐱᒐᒡ ᐊᓂᔭ ᐊᓯᓂᔭ ᒋᒋᐛ ᐊ ᐊᐱᑎᓯᔨᒋ ᐊ ᒋᒐᔭᔨᒡ᙮”
ᒂ ᐊᑎ ᐃᔅᒋᔄᑦ ᒥᓐ ᒋᓴᔅ, “ᐊᐛᓐ ᒪᒃ ᑕᐧᑯᒋᐱᔨᒐ ᐊᓂᔭ ᐊᓯᓂᔭ ᒋᑭ ᐱᑯᓯᓐ, ᑭᔭ ᐊᓐ ᐊᓯᓂᔾ ᐸᒋᓯᓂᒐ ᐊᐛᔪᐛ ᐊ ᑕᔨᒋ ᓇᔅᒡ ᒋᑭ ᐱᓯᔅᑯᐛᐤ ᒧᔭᒻ ᐃᔭᑲᐤ ᒐ ᐃᓯᓇᑯᓯᔨᒋ᙮”


ᐊᓐᒡ ᒪᒃ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᑭᔭ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑎᐛᒡ ᒋ ᐎ ᒪᑯᓇᐅᒡ ᒋᓴᓴ᙮ ᐛᔅ ᒋ ᒋᔅᒐᔨᒪᐅᒡ ᐎᔨᐛᐤ ᐊᒋ ᐊᔨᒧᒥᑯᒡ ᑲ ᐎᑎᒥᔨᒋ ᐊᓂᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ᙮ ᒥᒄ ᒪᒃ ᓇᒪ ᐅᒋ ᒪᑯᓇᐅᒡ ᐊᒋ ᑯᔅᑕᒡ ᐊᓂᔭ ᐃᔪᐛ᙮
ᐊᑯ ᒥᒄ ᑲ ᓂᓇᑭᑐᐛᔨᑕᒡ ᒐ ᐃᔅᐱᔅ ᒥᔪᐱᔨᒡ ᒐᒋ ᒪᑯᓇᒡ᙮ ᒋ ᐃᑎᓴᐛᐅᒡ ᒪᒃ ᓇᐸᐛ ᐊᓐᑕ ᒋᓴᔅ ᐊ ᑕᔨᒋ ᒪᒪᒡ ᒐᒋ ᐃᓯ ᑯᒂᒋᒪᔨᒋ, ᐊ ᐎ ᓇᓂᑐᒥᔅᑯᒺᒡ ᒐᒋ ᐃᔅᒋᔄᔨᒋ ᒐᒂᔪᐤ ᒐᒋ ᐅᒋ ᒪᑯᓇᒡ᙮ ᐊᑯ ᒪᒃ ᒋ ᒪᑯᓇᑥᐛ ᐊᑯ ᐊᓐᑕ ᒋᐸ ᐃᑐᑕᐊᐅᒡ ᕈᒻ ᒋᓴᐅᒋᒪᐛ ᐊ ᑕᔨᒋ, ᐊᓂᔭ ᒋᐸ ᑎᐸᔅᑯᓂᑯᔪᐛ᙮ ᐊᑯ ᒪᒃ ᐅᒡ ᓇᐸᐅᒡ ᒂ ᑯᒂᒋᒪᒡ ᒋᓴᓴ ᐊ ᐃᑕᒡ, “ᒋᔅᑯᑎᒪᒐᓱᐤ, ᒋ ᒋᔅᒐᔨᒥᑎᓇᓐ ᒐᒂᓐ ᐊ ᐃᔅᒋᔄᔨᓐ ᑭᔭ ᑕᓐ ᐊ ᐃᓯ ᒋᔅᑯᑎᒪᒐᔨᓐ ᐊ ᑕᑈᒥᑲᒡ᙮ ᑭᔭ ᒋ ᒋᔅᒐᔨᒥᑎᓇᓐ ᒥᓯᐛ ᐸᐃᑯᓄᒡ ᐊ ᐃᑕᔨᒥᔅᒡ ᐊᐛᓐᒋ, ᑭᔭ ᒥᓯᐛ ᐸᐃᑯᓄᒡ ᑕᑈ ᐊ ᐃᓯ ᒋᔅᑯᑎᒧᐅᑥᐤ ᒋᓴᒪᓂᑐᐛ ᐅᑦ ᐃᑕᔨᑎᒧᐅᓂᔪᐤ ᒐᒋ ᐃᓯ ᐱᒪᑎᓯᒡ᙮ ᐊᑯ ᒪᒃ ᓇᑐᐛᔨᒥᑕᒡ ᒐᒋ ᐎᑎᒧᐅᔭᒡ, ᐃᑎᔅᑕᐤ ᐊ, ᐎᓱᐛᐅᓂᒡ ᕈᒻ ᒋᓴᐅᒋᒪᐤ ᒐᒋ ᒥᔭᑭᓄᐅᑦ ᐊᓂᔭ ᓱᓇᔭᔪᐤ ᑲ ᒋᓯᐧᑲᓱᔨᒋ ᐊᐛᔪᐛ ?”
ᒋᓴᔅ ᒪᒃ ᒋ ᒋᔅᒐᔨᒪᐤ ᐊ ᐎ ᑯᒂᒋᐃᑯᑦ, ᐊᑯ ᒂ ᐃᑕᑦ, “ᒐᒂᓐ ᐛᒋ ᐎ ᐸᒋ ᑯᒂᒋᐃᔭᒄ ? ᐸᒋ ᐛᐸᑎᔨᒄ ᓱᓇᔭᐱᔅᒄ᙮ ᐊᐛᓐ ᒪᒃ ᐅᑕᔅᑎᒥᐧᒄ ᐊ ᓄᑯᓂᔨᒡ ᐊᓐᑕ ᑭᔭ ᐊᐛᓐ ᐊᓂᔭ ᐅᑦ ᐃᓯᓂᐧᑲᓱᓐ ᑲ ᒥᓯᓇᑕᔨᒡ ?” ᐊᑯ ᒪᒃ ᒂ ᐃᔅᒋᔄᒡ, “ᕈᒻ ᒋᓴᐅᒋᒪᐤ ᓯᓴᕐ ᐊᓂᔭ ᐅᑕᔅᑎᒥᐧᒄ ᑭᔭ ᐎᔾ ᐊᓐᑕ ᒥᓯᓇᓱᐤ᙮”
ᒋᓴᔅ ᒋ ᐃᑕᐤ, “ᒥᔭᐧᒄ ᒋᓴᐅᒋᒪᐤ ᓯᓴᕐ ᑕᓐ ᐊᓂᔭ ᐎᔾ ᑕᐱᔨᐛᐅᓯᑦ, ᑭᔭ ᒥᔭᒄ ᒋᓴᒪᓂᑐᐤ ᑕᓐ ᐊᓂᔭ ᐎᔾ ᑕᐱᔨᐛᐅᓯᑦ᙮” ᐊᓐᑕ ᒪᒃ ᐊ ᐛᐱᒥᑯᒡ ᐃᔪᐛ, ᓇᒪ ᐅᒋ ᐃᑐᑐᐛᐅᒡ ᒐᒋ ᐅᓂᐱᔨᒋ ᒐᒂᔪᐤ ᐊ ᐃᔅᒋᔄᔨᒋ ᐊᓐᑕ ᒐᒋ ᐅᒋ ᒪᑯᓇᒡ᙮ ᓇᔅᒡ ᒋ ᒥᔅᑲᑕᔨᑎᒥᐃᑯᐅᒡ ᑕᓐ ᑲ ᐃᓯ ᐎᑎᒪᑯᒡ, ᐊᑯ ᓇᒪ ᒥᓐ ᐅᒋ ᒋ ᔅᑐᑎᑯᐤ ᒋᓴᔅ᙮



ᒋ ᐸᒋ ᓇᑎᑯᐤ ᒪᒃ ᒋᓴᔅ ᓴᑎᔪᓯᐊ᙮ ᐊᐅᑯᓐᒡ ᐅᒡ ᐊᑲ ᐅᒋ ᑕᑈᑕᒡ ᒐ ᐅᓂᔅᑲᓇᑭᓄᔨᒋ ᐊᔅᒄ ᐊᓂᔭ ᑲ ᓂᐱᔨᒋ᙮ ᐊᑯ ᒪᒃ ᑲ ᐎ ᓇᓂᑐ ᑭᒐᔅᒐᔨᑕᒡ ᑕᓐ ᐊ ᐃᑕᔨᑎᒥᔨᒋ ᒋᓴᓴ ᐅᔭᔪᐤ, ᒂ ᐃᑕᒡ, “ᒋᔅᑯᑎᒪᒐᓱᐤ, ᒧᓱᔅ ᒋ ᒥᓯᓇᐊᒻ ᐅᔭ ᐎᓱᐛᐅᓂᔪᐤ ᑲ ᐃᑎᔅᑕᔨᒡ, ‘ᓂᐱᒐ ᓇᐸᐤ, ᐊ ᑕᔨᒋ ᒪᒃ ᐎᐛ, ᐊᑲ ᒪᒃ ᐅᒋ ᐊᔭᐛᐛᒂ ᐊᐛᓴ, ᐊᓐ ᓇᐸᐤ ᐎᐧᑲᓂᓴ ᒋᐸ ᐎᒋᒪᔪᐛ ᐊᓂᔭᔪᐛ ᐎᐛ᙮ ᐊᑯ ᒪᒃ ᐊᔭᐛᔨᒐ ᐊᐛᓴ ᒧᔭᒻ ᐎᔾ ᐊᓂᔭ ᓇᐸᐤ ᐊ ᐅᑦ ᐊᐛᓯᒥᑦ ᒋᐸ ᐃᓯᓇᑯᓂᔪᐤ᙮’ ” ᐊᑯ ᒥᓐ ᐅᔭ ᒂ ᐃᓯ ᐎᑎᒧᐛᒡ ᒋᓴᓴ ᐊᓐᒡ ᓇᐸᐅᒡ, “ᐸᐃᒂᐤ ᐊᒋ ᑕᒡ ᓂᔄᐅᑕᒡ ᓇᐸᐅᒡ, ᐊᒋ ᐎᐧᑲᓂᓯᑕᑐᒡ᙮ ᐊᑯ ᐊᓐ ᒪᐅᒡ ᒐᓴᐃᔪᑦ ᒂ ᓂᐳᐅᑦ, ᒐᒃ ᒂ ᐳᓂᐱᒪᑎᓯᑦ ᐊᑲ ᐅᒋ ᐊᔭᐛᑦ ᐊᐛᓴ᙮ ᐊᑯ ᒪᒃ ᐊᓐ ᑲ ᐅᒋ ᑕᒋᔅᑯᐛᑦ ᐊᓂᔭ ᐅᔅᑕᓴ ᐊᐅᒄ ᐊᓐ ᒥᓐ ᒂ ᐎᒋᒪᑦ ᐊᓂᔭᐧᑲ ᐅᔅᑕᓴ ᐎᐎᔪᐛ᙮ ᑭᔭ ᐎᔾ ᒐᒃ ᒋ ᐳᓂᐱᒪᑎᓯᐤ ᐊᑲ ᐅᒋ ᐊᔭᐛᑦ ᐊᐛᓴ᙮ ᐊᑯ ᒥᓐ ᐊᓐ ᐊ ᐅᒋ ᑕᒋᔅᑯᐛᑦ ᑲ ᐎᒋᒪᑦ ᐊᓂᔭ ᐎᐧᑲᓂᓴ ᐎᐎᔪᐛ᙮ ᑭᔭ ᐎᔾ ᒐᒃ ᒋ ᐳᓂᐱᒪᑎᓯᐤ ᐊᑲ ᐅᒋ ᐊᔭᐛᑦ ᐊᐛᓴ᙮ ᐊᐅᑯᓐ ᐱᓯᒄ ᑲ ᐃᔅᐱᔨᒡ ᐅᒡ ᓂᔄᐅᑕᒡ ᐎᐧᑲᓂᓯᒪᐅᒡ, ᐸᑐᔅ ᒥᓯᐛ ᓂᔄᐅᑕᒡ ᐊ ᑎᓯᒡ ᑲ ᐎᒋᒪᒡ ᐊᓂᔭ ᐸᐃᒄ ᐃᔎᐛ, ᓇᒪ ᒪᒃ ᐛᐛᒡ ᐸᐃᒄ ᐅᒋ ᑭᓄᐛᔨᒪᐅᒡ ᐊᐛᓴ᙮ ᐊᑯ ᒐᒃ ᐊᓐ ᐃᔎᐤ ᒂ ᓂᐱᑦ᙮ ᐊᑯ ᒪᒃ ᐃᔅᐱ ᐅᑎᒋᐱᔨᒐ ᒐᒋ ᐅᓂᔅᑲᒡ ᐊᓐᒡ ᑲ ᓂᐱᒡ, ᐊᐛᓐ ᒐ ᐎᐅᑦ ᐊᓂᔭ ᐃᔎᐛ, ᐛᔅ ᒥᓯᐛ ᒋ ᐅᓇᐸᒧᐤ ᐊᓂᔭ ᓂᔄᐅᑕᒡ ᓇᐸᐛ ?”
ᐊᑯ ᒋᓴᔅ ᒂ ᐃᑕᑦ, “ᒪᒂᒡ ᐊᓄᒡ ᐊ ᐱᒪᑎᓯᓇᓄᐅᒡ, ᓇᐸᐤ ᑭᔭ ᐃᔎᐤ ᓂᐳᐅᒡ ᒪᒃ ᓂᐳᐊᑭᓄᐅᒡ, ᒥᒄ ᒪᒃ ᐊᓐᑕ ᓂᔅᑕᒥᒡ ᐃᔅᐱ ᐅᑎᒋᐱᔨᒐ ᒐ ᐅᓂᔅᑲᓇᑭᓄᐎᒡ ᐊᓐᒡ ᑲ ᑕᑈᐅᒐᔨᑕᑯᓯᒡ ᒥᓐ ᒐᒋ ᐱᒪᑎᓯᒡ, ᓇᒪ ᒋᑭ ᐅᒋ ᑎᑯᓐ ᐊ ᓂᐳᐅᓇᓄᐅᒡ ᑭᔭ ᐊ ᓂᐳᐃᐛᓄᐅᒡ᙮ ᐛᔅ ᒧᔭᒻ ᐊᓐᒋᓐᒡ ᒋᑭ ᐃᑕᔨᑕᑯᓱᐅᒡ ᐅᒡ ᓇᒪ ᓂᑕ ᒋᑭ ᒋ ᐳᓂᐱᒪᑎᓱᐅᒡ᙮ ᒋᓴᒪᓂᑐᐛ ᐅᑦ ᐊᐛᓯᒥᑐᑕᑯᐅᒡ ᐊᓐᒡ ᒐ ᐅᓂᔅᑲᒡ᙮ ᒧᓱᔅ ᒋ ᐛᐸᑎᔨᐛᐤ ᐊ ᑕᑈᑕᐧᒃ ᒥᓐ ᐊ ᐱᒪᑎᓯᔨᒋ ᑲ ᓂᐱᔨᒋ᙮ ᐎᑕᑭᓄᐤ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒧᓱᔅ ᑲ ᐛᐸᑕᐧᒃ ᒧᔭᒻ ᐊ ᐃᔎᑕᔨᒡ ᓂᐱᓯᔭᑎᑯᒡ᙮ ᐊᑯᑕ ᐛᑕᒂᒡ ᑭᔭ ᒧᓱᔅ ᐊᒋ ᐃᓯᓂᐧᑲᑕᑦ ᐅᑎᐸᔨᒋᒐᐛ,
ᐊᑉᕋᐊᒻ ᐅᒋᓴᒪᓂᑐᒪ, ᐊᐅᑯᓐ ᐊᓂᔭ ᐃᔭᐱᒡ ᐅᒋᓴᒪᓂᑐᒧᐛᐛ ᐊᐃᓯᒃ ᑭᔭ ᒐᑭᑉ᙮
ᐅᔭ ᒪᒃ ᓇᐸᐤ ᓴᔅ ᓇᒪ ᐅᒋ ᐱᒪᑎᓯᐤ ᐅᔭ ᒪᒂᒡ ᑲ ᐃᔅᒋᔄᑦ ᒧᓱᔅ᙮ ᓇᒪ ᐅᒋᓴᒪᓂᑐᒥᑐᑕᑯᐤ ᒋᓴᒪᓂᑐᐤ ᐊᓂᔭ ᑲ ᓂᐱᔨᒋ ᐊᐛᔪᐛ ᒥᒄ ᐊᓂᔭ ᑲ ᐱᒪᑎᓯᔨᒋ᙮ ᒥᓯᐛ ᐱᒪᑎᓯᐤ ᐃᑕᔨᒪᐤ ᒋᓴᒪᓂᑐᐤ ᐊᐛᔪᐛ, ᐊᓂᔭ ᐊᔅᒄ ᑲ ᐱᒪᑎᓯᔨᒋ ᐅᑕ ᐊᔅᒋᒡ ᑭᔭ ᐊᓂᔭ ᓴᔅ ᑲ ᓂᐱᔨᒋ᙮”
ᐱᔅᒐ ᒪᒃ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᐃᔅᒋᔄᐅᒡ, “ᒋᔅᑯᑎᒪᒐᓱᐤ, ᒥᔽᐤ ᐊᓐ ᑲ ᐃᔅᒋᔄᔨᓐ᙮” ᓇᒪ ᒪᒃ ᒥᓐ ᐊᐛᓐ ᐅᒋ ᑯᒋᑕᐤ ᒐᒋ ᑯᒂᒋᒪᑦ ᒋᓴᓴ ᒐᒂᔪᐤ᙮


ᒋ ᐃᔅᒋᔄᐤ ᒪᒃ ᒋᓴᔅ, “ᒐᒂᔪᐤ ᐛᒋ ᐃᔅᒋᔄᒡ ᐊᐛᓐᒋ ᐊᓂᔭᔪᐛ ᙭ᑕ ᒐ ᐸᒋ ᐃᑎᓴᐛᑦ ᒋᓴᒪᓂᑐᐤ ᐊᓐᑕ ᒐ ᐃᑎᔅᑲᓇᓯᔨᒋ ᑎᐱᑕ ᐊ ᑕᔨᒋ ? ᑎᐱᑦ ᒪᒃ ᐅᔭ ᐊᒋ ᐃᓯ ᒥᓯᓇᐊᒧᒂ ᐊᓐᑕ ᐅᓂᑭᒧᐅᓂᒡ,
ᐅᑎᐸᔨᒋᒐᐤ ᒋ ᐃᑕᐤ ᓂᑎᐸᔨᒋᒐᓯᒪ,
ᐅᑕ ᐸᒋ ᐊᐱᔾ ᓂᒥᔪᐅᓂᒡ, ᐸᑐᔅ ᒋ ᓴᐧᑯᒋᐃᒂᐛ ᐊᓐᒡ ᑲ ᐛᐧᑲᑎᔅᒡ᙮
ᐛᐛᒡ ᑎᐱᑦ ‘ᓂᑎᐸᔨᒋᒐᓯᒻ’ ᒋ ᐃᓯᓂᐧᑲᑕᐤ ᐅᑎᐸᔨᒋᒐᐛ᙮ ᑕᓐᑕ ᒪᒃ ᒐᒋ ᐅᒋ ᐅᑯᓯᑐᑐᐛᑦ ?”


ᒪᒂᒡ ᒪᒃ ᐊ ᐸᑕᑯᑦ ᒥᓯᐛ ᐊᓂᔭ ᐃᔪᐛ, ᒋᓴᔅ ᒋ ᐃᑕᐤ ᐊᓂᔭ ᐅᒋᔅᒋᓄᐊᒧᐛᑭᓇ, “ᐃᔭᒂᒥᔅᑐᐛᐧᑯᒡ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᐛᔅ ᓂᑐᐛᔨᑎᒧᒡ ᒐᒋ ᒋᔅᑕᔨᒪᑭᓄᐎᒡ᙮ ᒥᔽᔨᑎᒧᒡ ᐊ ᐳᔅᑎᔅᑲᒡ ᑲ ᒋᓏᑭᓂᔨᒋ ᐊᑯᐸ, ᑭᔭ ᒥᔽᔨᑎᒧᒡ ᐊ ᐊᑎᒥᔅᑯᐛᑭᓄᐎᒡ ᐊᓐᑕ ᐊ ᒥᒐᑎᓇᓄᐎᒡ᙮ ᑭᔭ ᓂᑐᐛᔨᑎᒧᒡ ᐊᓐᑕ ᒪᐅᒡ ᐊ ᓇᐸᒥᐱᒡ ᒐᒋ ᐛᐱᐊᑭᓄᐎᒡ ᐊᔭᒥᐊᐅᒋᐛᐱᒡ, ᑭᔭ ᐊ ᒥᑯᓴᓄᐎᒡ ᒐᒋ ᐊᔭᑭᓄᐎᒡ ᐊᓐᑕ ᐊ ᐅᒋᒪᐅᐱᓇᓄᐎᒡ᙮ ᐅᑎᓂᒧᐛᐅᒡ ᑭᔭ ᒥᓯᐛ ᑕᓐ ᐊ ᐃᓯ ᑎᐱᔨᐛᐅᓯᔨᒋ ᑲ ᐸᐸᐃᑯᓯᔨᒋ ᐃᔎᐛ ᑭᔭ ᐊ ᐊᔭᒥᐊᒡ ᓇᐅᔅ ᐊᔭᒥᐊᐅᒡ, ᒥᒄ ᒪᒃ ᐊᔭᒥᐊᐧᑲᓱᒡ ᐅᔭ ᐊ ᐃᑎᒡ᙮ ᐊᐅᑯᓐᒡ ᒪᒃ ᐅᒡ ᐃᐛᒃ ᒐ ᐊᒂᑕᔨᑕᑯᓂᔨᒡ ᑕᓐ ᒐ ᐃᓯ ᑎᐸᔅᑯᓂᑯᒡ ᒋᓴᒪᓂᑐᐛ᙮”

ያዳምጡ ᓗᒃ 20