Nugunu - 2017 CABTAL (NT) Non-Drama

Nugunu - 2017 CABTAL (NT) Drama

Gɔ́ɔ Yésusu a dɔ́ŋɛnɔmɔ́ behúúní bɛ́hɛ́ bɔ́ɔ́dɔ́ na báandɛ́, go bó fáa nɛgaŋa go bɛgáda bá biliíli goŋaá bá bɛ́ gúne, bé éŋugenye ɛgɔnɔ́ iŋkimée na bɛnɛ́mɔ biimée.
Ifíno ya baapótɛlɛ bɔ́ɔ́dɔ́ na báandɛ́ moánɛ yɛ́yɛ́ɛ: ba busío a lɔ́mɔ́ Símono mɔ́ɔnyɔ bá dɔ́ŋɔnɔmɔ́ gɔnɔ́ bá amɔ́ Píele, na ondimóní bɛhɛ́ Andɛlɛ́ɛ, Sáakɛ na Sáŋa, biimée báandɛ́ bahaŋa bá Sebedée. Fílibi na Beletelemíi; Tómasɛ na Motíosi mɔ́ɔnyɔ ugólí tásɛ; Sáakɛ ohaŋa ba Alɛfɛ́ɛ, Tadɛ́ɛ, Símono ba go noanana goŋaá gɛdɔŋɔ gɛ́hɛ́ gɛ́ bábɛa, na Yódasɛ Ɛsɛkalɛ́ɔtɛ mɔ́ɔnyɔ a mbaá dúé Yésusu.

Bɛɔdɔ́ɔ na bɛ́andɛ́ bɛ́ɛbɛ Yésusu a mbaá bó dómá go bosɔ́mɔ bɛ́bɔ́ɔ, a báá bó lɔsɛ́nɔ́ a amɔ́: «No do hóámá no do ɛ́dá naá batɔ báaba bá lɔ́mɔ́ bá dɛ bɛ́ɛ́mbá Beyúdene, no do íŋéné naá tɛ́sɔnɔ sá Samalɛ́ɛ. Ɛ́dá nɔnɔ goana naá batɔ bá Ɛ́sɛlahɛ́ɛlɛ báaba bá lɔ́mɔ́ aŋa bɛdómbáa bɛ́ɛbɛ bɛ́ mbaá yímé. Ɛ́dá no oyanɛna batɔ pɛ́ iŋkimée no amɔ́: Bufuŋe bá mmoɛná bɔ́bɔ́ɔ naá boayá bɛ́nyɔ́. Éŋúgényée nɔnɔ bɔgɔnɔ́gɔnɔ, fúfúnée nɔnɔ bɛlɔ́ŋɔ́, éŋúgényée nɔnɔ bekúnúkunu, no gúne bɛgáda bá biliíli. No á bɛáa nɛgaŋa nɛ́ɛnɛ godugúnú, fáánɛ́náa nɔnɔ tɔ́nɔ godugúnú.
«No do gɔ́lɔ́ akɛ́ góolo, akɛ́ muinyí mbɔ́dɔ ɛhanɛ́ɛ má go ága naá bɛgada bɛ́nyɔ́. No do gɔ́lɔ́ akɛ́ gɛgada gá oŋɛndɔ, no fadɛgɛna goana na bɛla bɛ́nyɔ́ bɛ́ɛbɛ go nnyɔ́dɔ. No do gɔ́lɔ́ akɛ́ nnaadɛna, akɛ́ gidímbo. Ɛɛ́ɛŋ, uyogóní a sɛmɛganana na bɛsoɛná bɛ́hɛ́.
«Naá tɛ́sɔnɔ iŋkimée, ɛ́na lí naá gɛdɔŋɔ giimée gɛ́ɛgɛ no íŋenemú kɔ́ɔ, fúmbée nɔnɔ mɔtɔ mɔ́ɔnyɔ a lɔ́mɔ́ bégedíelú go go nyó gɛ́ndɛgɛna, gɛ́gáa nɔnɔ hɔ́ɔ gó ɛ́da go éme godómba gɛ́nyɔ́. Aŋa no dandamɔ́ no íŋene naá nnyaŋá, bédíígíe nɔnɔ batɔ báaba kɔ́ɔ, no amɔ́: “Ŋgáa Asaŋa a nyó fáa buumbénú!” Aáŋa batɔ bá nnyaŋá yɛ́ɛyɔ bá háanana na buumbénú bɔ́ɔbɔ, ŋgáa mbédíígí yɛnyɔ́ ya buumbénú ɛ bɛ́ɛmba nabɔ́; kanɛ́ bá amɔ́ bí inye go nyó gɔ́lɔ bese, bégundínyéemú nɔnɔ mbédíígí yɛnyɔ́ ya buumbénú. Aáŋa naá nnyaŋá incodío, ɛ́na lí naá tɛ́sɔnɔ incodío, bá amɔ́ bí inye go nyó gɔ́lɔ bese, ɛ́na lí bí inye go nyó bódóliginyo, úlúkíe nɔnɔ hɔ́ɔ, no bégidide bibúu bá bɛgɔ́ndɔ́ bɛ́nyɔ́. Ŋgaá nyó oyáná mammana caá: Naá buisí bá Asaŋa go sómba bɛsɛnɛ, noséésényée ná tɛ́sɔnɔ yɛ́ɛyɔ nó ŋga dómbá nɔ́ɔnɔ ná gɛdɔŋɔ gá Sɔdɔ́mɔ na gá Gɔmɔ́ɔlɔ.


«Ɛ́ná nɔnɔ: ŋgaá nyó dómá aŋa bɛdómbáa naá tɛ́mádɛ́má ya ŋkɔ, liolíónóo nɔnɔ aŋa nnyɔ́gɔ, no goɛma aŋa mmɛŋá.
«Bébeŋéemú nɔnɔ go batɔ: bá nɛ́ ɛ́dana nɛnyɔ́ naá nnyaŋá sá mógála, bá nyó sóala mobágɔ naá nnyaŋá sábɔ́ sá mbósógólí. Bá ŋgɛ ɛ́dánáa nɛnyɔ́ go cáágá naá baŋgɔ́mɔnɔ na naá mefuŋe go busío bámɛ; kɔ́ɔ no ŋgaá bɛ́ɛ́mbá ŋgominyo sámɛ naá busío bábɔ́ na naá busío bá báaba bá lɔ́mɔ́ bá dɛ bɛ́ɛ́mbá Beyúdene. Kanɛ́ aŋa bá nɛ́ ɛ́danamɔ́ nɛnyɔ́ go cáágá, no do yóbímídó go go fúmbe nɛɛ́nɛ no ná gálagalamɔ́, ɛ́na bɔ́ɔbɔ no nó oyamɔ́: bá ŋga nyó fáá dogálɔ dá ŋaá no gálagala naá gɛcamɛna moánɛ. Mammana, caá bɛɛnyɔ́ɔ no ná gálagalamɔ́, a lɔ́mɔ́ Giliíli ba Isée bɛnyɔ́ mɔ́ɔ a ná gálagalamɔ́ gɛ́nyɔ́. Ondimóní a ŋga dúé ondimóní goŋaá bá mo óna, caŋa mmue isée a ŋa nɔ́ɔ go moɔnɔ́, baábayɔ́ bá ná békikilidinye bebíéní bábɔ́, bá ŋa goŋaá bá bó óna. Batɔ biimée bá ŋga nyó bɛlábɛ́láa go busío bámɛ, kanɛ́ mɔ́ɔnyɔ a ná kélemenemú gó ɛ́da go éme naá mesúge, Asaŋa a ná mo sódio. Aŋa bá nɛ́ ɛ́damɔ́ go nyó séesenye, na yɛ́ɛyɛ tɛ́sɔnɔ no ságɛna no ɛ́da naá incodío, ŋgaá nyó oyáná mammana caá: No ná ŋa no gá lɛ́ no do maná go dómbana naá tɛ́sɔnɔ iŋkimée sá Ɛ́sɛlahɛ́ɛlɛ gɔ́ɔ Moɔnɔ́ ba mɔtɔ a nú úlemú. Uhúúní a dɛ dómbánáa uhúúnínyí bɛhɛ́, akɛ́ uyogóní a dɛ dómbánáa ogɔ́nɔ́ɔ bɛhɛ́. Gó háanana uhúúní a bɛ́ɛmba aŋa uhúúnínyí bɛhɛ́, uyogóní aŋa ogɔ́nɔ́ɔ bɛhɛ́. Bá amɔ́ bá dɔ́ŋɛnɔ mɔtɔ ba nnyaŋá bá amɔ́ Belesebúlu, bá ŋga sɛgáa batɔ bá nnyaŋá yɛhɛ́ bó dómba nɔ́ɔnɔ.


«Kɔ́ɔ no do díínée batɔ. Buimée bɔ́ɔbɔ bó lɔ́mɔ́ ɔsɛ́gɔ́ɔlú bó ŋga húmé naá hanyɔ́, gɔnɔ́ buimée bɔ́ɔbɔ bó lɔ́mɔ́ naá nnindíi, bá ŋga bó íyímé. Bɔ́ɔbɔ nnyó oyanamɔ́ naá mbíno, bó oyáamɔ́ nɔnɔ buisí nɔmɔnɔmɔ, gɔnɔ́ bɔ́ɔbɔ bá nyó búuŋgulidenemú naá udúu, bó dóógónyóomú nɔnɔ naá ɛdɔ́ndɔ mmoɛná. No do díínée báaba bó ónamɔ́ nnyɔ́dɔ, kanɛ́ bá dɛ bɛ́ɛ́mbá na bogaaga bá go óna giliíli. Díínée nɔnɔ goana mɔ́ɔnyɔ a lɔ́mɔ́ ba go fúugie giliíli na nnyɔ́dɔ naá gɛbɔlɔ́gɔdɔ gá íyuke há kanɛ go fúenene. Ábɔ, bá dɛ dúénénée kulé pɛ́nɛ ɛ́handɛ́ go dóla mmue o? Asáa gɔgɔ́ akɛ́ mmue ɛ dɛ obánáa go cí kanɛ goŋaá Asaŋa o ó olímínyóo. Go bɛɛnyɔ́ɔ, akɛ́ cóɛ iŋkimée sá odóɛ yɛ́nyɔ́ sɛ́ lɛ́ baná baná. No do gɔ́lɔ́nɔ́ɔ kanɛ́ bofoá: bɛɛnyɔ́ɔ, no lɛ́ ntɔ́nɔ no dómbana kulé pɛ́nɛ iŋkimée. Mɔtɔ a amɔ́ o oyɛda naá oŋgíso yá batɔ a amɔ́ a lɛ́ bamɛ, yɔmɔ́ɔ tɔ́nɔ ka ŋgo oyɛ́dá caá a lɛ́ bamɛ naá oŋgíso yá Baaba mɔ́ɔnyɔ a lɔ́mɔ́ naá mmoɛná. Kanɛ́ mɔtɔ mɔ́ɔnyɔ a ŋgaá mbásáŋóná naá oŋgíso yá batɔ, yɔmɔ́ɔ tɔ́nɔ ka ŋga mo básáŋóná naá busío bá Baaba mɔ́ɔnyɔ a lɔ́mɔ́ naá mmoɛná.


«No do bééníŋényée goŋaá ndɔ́mɔ́ úléelú go go nco go ága buumbénú naá cí: cɛ báá úléelú go go nco go ága buumbénú, ndɔ́mɔ́ úléelú na bidé. Ɛɛ́ɛŋ, ndɔ́mɔ́ úléelú go go ádona ohaŋa na isée, ombóla na nnyeedíi, giombi na ŋgógánɛ́ yɛhɛ́; kɔ́ɔ babɛlɔ́bɛlɔ bá mɔtɔ bá ná bɛ́ɛmbamɔ́ batɔ bá ncíbo yɛhɛ́.


«Mɔtɔ mɔ́ɔnyɔ a maamanamɔ́ isée, ɛ́na lí nnyeedíi, gó dómba go maamana gɔ́ɔgɔ a mmaamanamɔ́ a dɛ báá bamɛ; mɔtɔ mɔ́ɔnyɔ a maamanamɔ́ ohaŋa bɛhɛ́, ɛ́na lí ombóla bɛhɛ́ gó dómba aŋa a mmaamanamɔ́ a dɛ báá bamɛ. Mɔtɔ mɔ́ɔnyɔ i inyemú go gɔ́lɔ kolósi yɛhɛ́ a píde a dɛ báá bamɛ. Mɔtɔ mɔ́ɔnyɔ a ŋgaá fúmbée go beŋe gɛɔyɔ gɛ́hɛ́ a ŋga gɛ́ yímíe, mɔtɔ mɔ́ɔnyɔ a ŋgaá yímíe gɛɔyɔ gɛ́hɛ́ go busío bámɛ a ŋga gɔnɔ́ gɛ́ bɛa.


«Mɔtɔ mɔ́ɔnyɔ a nyó gɛ́ndɛgɛnamɔ́ bese a á kɛ́ndɛ́gɛ́ná yɔmɔ́ɔ moatɛ́, gɔnɔ́ mɔ́ɔnyɔ a kɛ́ndɛgɛnamɔ́ a á gɛ́ndɛ́gɛ́ná mɔ́ɔnyɔ a mbaá tómá. Mɔ́ɔnyɔ a gɛ́ndɛgɛnamɔ́ mbúsí ya Asaŋa naá odɛ́nɛ́ yá mbúsí ya Asaŋa, a ŋga bɛáa bɛsoɛná bɛ́ɛbɛ mbúsí ya Asaŋa ɛ háananamɔ́ na bɛ́, gɔnɔ́ mɔ́ɔnyɔ a gɛ́ndɛgɛnamɔ́ usi ba mɔtɔ naá odɛ́nɛ́ yɛ́hɛ́ yá usi ba mɔtɔ a ŋga bɛáa bɛsoɛná bɛ́ɛbɛ usi ba mɔtɔ a háananamɔ́ na bɛ́. Mɔtɔ mɔ́ɔnyɔ a ŋgaá fáá ummue mɔ́ɔnyɔ naá baábayɔ́ báaba gɛlásɛ gá miimpo má go dénugene goŋaá a lɛ́ uhúúní bamɛ, mammana, ŋgaá nyó oyáná caá, a dɛ ŋgá yímie bɛsoɛná bɛ́hɛ́.»

ያዳምጡ Motíosi 10