If you have would like a copy of this version please contact info@davarpartners.org

Mandeali Bible, CC-BY-SA-4.0, The Love Fellowship (Text). Mandeali New Testament Audio Bible, CC-BY-SA-4.0, Davar Partners International, 2021 (Audio)

Mandeali New Testament

This work is licensed under Creative Commons Attribution-ShareAlike 4.0 License.

तेस टैम चौथाई देसा रे गलील जिल्ले रा राजा हेरोदेस राजे यीसू रे सामर्था रे कामा रे बारे मन्झ सुणेया। होर तिन्हें आपणे सेऊआदारा किन्हें बोल्या कि, “यहून्ना बपतिस्मा देणे वाल़ा मरिरे मन्झा ले जिउंदा हुई गईरा, इधी कठे यीसू ले सामर्था रे काम हुंहाँ ऐं।”
हेरोदेस राजे ये इधी कठे सोच्या, क्यूंकि हेरोदेसे आपणे भाई फिलिप्पुसा री लाड़ी हेरोदियासा किन्हें ब्याह करी लईरा था, जेब्की तेसरा भाई फिलिप्पुस हल्ली तक जिउंदा था, होर यहून्ना बपतिस्मा देणे वाल़ा हमेसा ये गल हेरोदेसा जो बोल्दा रैंहयां था कि, जो तैं कितेया से परमेसरा री व्यवस्था ले बरखलाफ आ! तेबे, हेरोदियासा री खुसी री वजहा ले हेरोदेसे आपणे स्पाहीया जो यहून्ना जो गिरफ्तार करणे रा हुक्म दितेया, होर तिन्हें स्पाहिये से जंजीरा किन्हें बान्ह्या होर जेल्हा मन्झ पाई दितेया। क्यूंकि यहून्ना तेस किन्हें बोल्या था कि, एसरी लाड़ी रखणा मूसा री व्यवस्था रे बरखलाप आ। होर हेरोदेस यहून्ना बपतिस्मा देणे वाल़े जो मारी देणा चाहां था, पर से लोका ले डरहा था, क्यूंकि स्यों तेस जो नबी मन्हां ऐं थे। पर जेबे हेरोदेस राजे रा जन्म ध्याड़ा आया, ता हेरोदियासा री मह्ठीऐ समारोहा मन्झ नाच दसी किन्हें हेरोदेस राजा खुस करी दितेया। इधी कठे तिन्हें कसम खाध्ही कि, “जो कुछ तू मेरे ले मान्घगी, मां तुजो देणा।” आपणी माऊआ री सलाह मनी किन्हें तेस्से बोल्या, “यहून्ना बपतिस्मा देणे वाल़े रा मूंड एक थाली मन्झ मंगवाई दे।”
राजा हेरोदेस दु:खी हुआ, पर आपणी कसमा री वजहा ले, होर साउगी बैठी किन्हें खाणा खाणे वाल़े री वजहा ले तिन्हें हुक्म दितेया कि, तेस्सा मह्ठी री इच्छा पूरी करी दिती जाए। होर जेल्हा मन्झ लोक भेजी किन्हें यहून्ना बपतिस्मा देणे वाल़ा रा मूंड कटवाई दितेया। होर तिन्हें तेसरा मूंड थाली मन्झ ल्यान्देया, होर मह्ठी जो दितेया; होर मह्ठीये तेसरा मूंड आपणी माऊआ वाले लई गई। होर यहून्ना रे चेले आई किन्हें तेसरी ल्हास लिती होर दबाई दिती, होर जाई किन्हें यीसू जो खबर दिती।


यहून्ना रे बारे मन्झ सुणने ले बाद यीसूए किस्तिया पर चढ़ी किन्हें तेथी ले केसी सुनसान जगहा मन्झ कल्हे रैहणे रे कठे चली गया। पर लोक ये सुणी किन्हें यीसू तेथी आ स्यों गांऊँआं ले पैदल चली किन्हें तेसरे साउगी चली पये। यीसूए किस्ती ले निकली किन्हें एक बडी भीड़ देखी। तेस जो तिन्हा पर तरस आई, होर तिन्हें तिन्हारे ब्मार ठीक किते। जेबे सांझ हुई, ता तेसरे चेले तेस वाले आई किन्हें बोल्दे लगे, “ये ता सुनसान जगहा ई होर देर हुएया करहा ई। लोका जो भेजी देआ कि स्यों बस्ती मन्झ जाई किन्हें आपणे कठे खाणा खरीदी ले।”
यीसू ये तिन्हा किन्हें बोल्या, “तिन्हारा जाणा जरूरी नी आ! तुस्से ई इन्हा जो खाणे जो देआ।” तिन्हें तेस किन्हें बोल्या, “एथी आस्सा वाले पांज रोटी होर दो मछिया जो छाडी किन्हें होर कुछ नी हाया।” होर तिन्हें बोल्या, “तिन्हा जो एथी मेरे वाले लई आऊआ।” तेबे यीसूए लोका जो घाहा प्रयाल्हे बठयाल्णे जो बोल्या। होर तिन्हें पांज रोटिया होर दो मछिया लई किन्हें स्वर्गा वखा जो देखी किन्हें परमेसरा रा धन्यावाद कितेया, होर रोटिया तोड़ी-तोड़ी किन्हें चेले जो दिती होर चेले लोका जो बांडी। होर सब खाई किन्हें रजी गये। होर खाणे ले बाद बी रोटी होर मछिया बची गई, होर तिन्हें बचीरे रोटिया री भर्हिरी बारा छड़ोल्लू चक्के। होर तेथी खाणे वाल़े स्यों पांज हज़ार मर्ध थे पर तिन्हें ज्नानिया होर बच्चे नी गिणीरे थे


होर यीसूए झटपट आपणे चेले जबरदस्ती किस्ती पर चढ़ाए, ताकि स्यों तेस ले पैहले गलील समुद्रा रे पारली तरफ चली जाए, जेबे तक की से लोका जो भेजी नी दे। लोका जो भेजणे ले बाद यीसू प्रार्थना करणे रे कठे कल्हे जे प्हाड़ा पर चढ़ी गया। होर जेबे सांझ हुई ता से तेथी कल्हा ही था। तेस टैम चेले जेस किस्ती पर थे से किस्ती समुद्रा रे बीच डगमगाया करहा ई थी, क्यूंकि बागरा रा असर तिन्हा पर भारी था। होर से भ्यागा तीन बजे रे करीब से समुद्रा पर चली किन्हें तिन्हा वाले आया। चेले तेस जो समुद्रा पर चल्दे हुए देखी किन्हें डरी गये! होर स्यों बोल्दे लगे कि, “से भूत आ,” होर डरा रे मारे स्यों चिंगा पान्दे लगे। यीसूए झटपट तिन्हा किन्हें गल्ला किती, होर बोल्या, “हिम्मत रखा: हांऊँ यीसू आ, डरा मत।”
पतरसे यीसू जो जवाब दितेया, “हे प्रभु, अगर ये तुस्से ऐं, ता मुंजो आपणे वाले पाणी पर चली किन्हें आऊणें रा हुक्म देआ।” यीसूए बोल्या, “आऊ!” तेबे पतरस किस्ती ले उतरी किन्हें यीसू वाले जाणे रे कठे पाणी पर चल्दा लग्या। पर जेबे पतरसे तूफाना री वजहा ले उठदी तेज लैहरा देखी ता से बौह्त डरी गया, होर जेबे पतरस डुबदा लग्या, ता तिन्हें चिंगी किन्हें बोल्या, “हे प्रभु, मुंजो बचाई ले।” यीसूए झटपट आपणा हाथ बढ़ाई किन्हें से पकड़ी लया, होर तेस किन्हें बोल्या, “हे कम विस्वास करणे वाल़े, तैं किधियो सक कितेया?” जेबे स्यों किस्ती पर चढ़ी गये, ता बागर रुकी गई। होर जो किस्ती पर थे, तिन्हें तेस जो अराधना करी किन्हें बोल्या, “सच्चे, तू परमेसरा रा मह्ठा आ।”


होर यीसू समुद्रा रे पार करी किन्हें गन्नेसरत ईलाके मन्झ पूजी गया। होर तेथी रे लोके यीसू पछयाणी लया, होर ओरले परले सारे ईलाके मन्झ खबर किती, होर सभ लोक आपणे-आपणे ब्मार ठीक करणे रे कठे तेस वाले ल्यांदे। होर स्यों तेस ले अर्ज करहा ऐं थे कि, ब्मार लोका जो तेसरे कपड़े रा पल्लू ई छूणे दे। होर जितने तेस जो छुहां ऐं थे, स्यों सब ठीक हुई जाहें थे।

ያዳምጡ मत्ती 14