Dangaura Tharu

टनिक दिन पाछ येशू घुम्‍क कफर्नहुम सहरम अइल। येशू आपन बैठ्‍ना घर आरल कना बात मनै सुन्‍ल। तब अत्रा धेर मनै अइल कि घरक भित्तर-बाहर, कहोँ फे ठाउँ नैरह। येशूजुन मनैन परमेश्‍वरक वचन प्रचार करटलह। येशू प्रचार कर्टिरलह त, चार जन मनै प्‍यारालाइस रोग लागल एकठो मनैयह बोक्‍क उ घरम अन्‍ल। तर मनैन्‍हक भीडक कारण हुँक्र ओहीह येशूकठे पुगाइ नैसेक्‍ल। उहओर्से हुँक्र भर्‍याङ्‌गमसे छतम चिहुर्ल। हुँक्र येशूक स्‍वाझ उप्‍पर छत उजर्ल ओ उ बेरम्‍हेह बिस्‍तारासैँट उहाँकठे उटर्ल। हुँकन्‍हक विश्‍वास देख्‍क येशू उ बेरम्‍हेह कल, “भैया, टुँहार पाप क्षमा होगैल्।”
कौनो-कौनो शास्‍त्रीहुँक्र ओठे बैठलरलह। यी बात सुन्‍क हुँक्र मनमन सोँच्‍ल, “यी मनैया काकर असिक बट्‌वाइटा? यी त परमेश्‍वरक बदनाम करटा! परमेश्‍वर बाहेक और के पाप क्षमा करसेक्‍ठा जे?”
येशू हुँकन्‍हक मनक बात थाहाँ पाडर्ल ओ हुँकन कल, “टुह्र म्‍वार बारेम काकर गल्‍ती विचार कर्ठो? यी बेरम्‍हेह ‘टुँहार पाप क्षमा हुइल्’ कना कि ‘उठ् ओ बिस्‍तारा बोक्‍क नेङ्‌ग’ कना, कौन सजिलो हो? हेरो, मै मनैयक छावह यी पृथ्‍वीम मनैन्‍हक पाप क्षमा कर्ना अधिकार रहल बात मै टुँहन देखैम।” तब उ बेरम्‍हेह कल, “उठो, आपन बिस्‍तारा बोक्‍क घर जाओ।”
उ बेरम्‍ह्‍या सबजन्‍हक सामुन्‍नेम जुरुक्‍कसे उठल ओ आपन बिस्‍तारा बोक्‍क गैल्। तब हुँक्र सबजन छक्‍क पर्ल। हुँक्र “ओहो! हम्र त असिन कबु फे नैदेख्‍लरलही!” कह्‍टी परमेश्‍वरक महिमा कर्ल।


येशू फेदोस्र गालील समुद्रक ढिक्‍वम पुग्‍ल। धेर मनै उहाँकठे अइटीरलह, ओ उहाँ हुँकन सिखाइलग्‍ल। येशू ओठेसे नेङ्‌ग्‍टी जाइबेर, अल्‍फयसक छावा लेवीह देख्‍ल। ऊ कर उठैना अड्‍डम बैठलरलह। येशू हुँकहीन कल, “म्‍वार पाछ लागो।” तब ऊ उठ्‍ल ओ उहाँक पाछ लग्‍ल।
कुछ समय पाछ येशू लेवीक घरम चेलन्‍हकसँग खाए बैठ्‌ल। धेर जन कर उठुइया ओ पापी मानजैना और जन फे येशूक पाछ लग्‍लरलह। हुँक्र फे सँगसँग खाइटलह। कौनो-कौनो शास्‍त्रीहुँक्र फरिसी समूहक रलह। हुँक्र येशूह कर उठुइया ओ पापीन्‍हकसँग खाइट्‍ देख्‍ल। हुँक्र उहाँक चेलन कल, “ऊ काजे कर उठुइया ओ पापीन्‍हकसँग खैठ?”
यी बात सुन्‍क येशू हुँकन कल, “वैदावक आवश्‍यक रोगीन केल पर्ठा, तर निरोगीन नैपरट्। असहेँक मै पापी मनैन बलाए आरनु, धर्मी मनैन नाहीँ।”


यूहन्‍नक चेलावँ ओ फरिसीहुँक्र ब्रत रहँट्। एकचो मनै आक येशूह पुछ्‌ल, “यूहन्‍नक चेलावँ ओ फरिसीहुँक्र ब्रत रठ, तर अप्‍नक चेलावँ काकर ब्रत नैरट?”
तब येशू कल, “भ्‍वाजमक भोजह्रेन नैखैट का? अवस्‍य खैठ। दुल्‍हा हुँकन्‍हकसँग रहट्‍सम, हुँक्र ब्रत नैबैठ्‍ट। तर एक दिन हुँकन्‍हकठेसे दुल्‍हा लैजाजहीँ, तब हुँक्र ब्रत रहहीँ।
“कुई फे पुरान लुगम लौव लुगक पिउँडा नैलगाइट्‍, काकरकि लौव लुगक पिउँडा मारी पैँस्‍ठा, ओ पुरान लुगह पैल्‍हसे झन् कर्रसे फटादेठा। अस्‍तक पुरान छालक थैलीम कुई फे लौव अङ्‌गूरिक मद नैढरट्‍, काकरकि लौव अङ्‌गूरिक मद बाहार्क पुरान छालक थैलीह फुटादेठा। तब अङ्‌गूरिक मद अँराजैठा। उहओर्से लौव अङ्‌गूरिक मद ढरक लाग लौव छालक थैली चहठा।”


बिसैना दिन येशू ओ उहाँक चेलावँ बाली बुइल् खेत्‍वओर्से जाइटलह। तब उहाँक चेलावँ नेङ्‌ग्‍ने गोहूँक बाल टुर्ने खैने करटलह। यी देख्‍क फरिसीहुँक्र येशूह कल, “हेरी! हिँक्र नैकर्ना काम करट। बिसैना दिनम कुछु काम कर्ना व्‍यवस्‍था अनुसार ठीक हो का?”
तर येशू जवाफ देल, “का टुह्र परमेश्‍वरक वचनम दाऊदक बारेम लिखल बात पहर्क फे नैबुझ्‍टो? दाऊद राजा ओ हुँकहार मनै धेर भुँखाइलम, दाऊद का कर्ल? अबियाथार नाउँ रहल प्रधान पूजारीक समयम, दाऊद परमेश्‍वरक पाल भित्तर पैँठ्‌ल। ऊ परमेश्‍वरह चह्राइल रोटी अप्‍न खैल, ओ आपनसँग रहुइयन फे खाइ देक परमेश्‍वरक व्‍यवस्‍था भङ्‌ग कर्ल। वास्‍तवम परमेश्‍वरह चह्राइल रोटी पूजारीहुँक्र बाहेक औरजहन खाइ नैबन।”
तब येशू हुँकन कल, “परमेश्‍वर बिसैना दिन मनैन्‍हक लाग बनैल। तर बिसैना दिनिक नियम मानक लाग मनैन नैबनैल। बिसैना दिनम का कर्ना ठीक हो, का कर्ना बेठीक हो कना अधिकार मै मनैयक छावकठे बा।”

ያዳምጡ मर्कूस 2