Athpariya 2023 WBT (NT) Non-Dramatized

Athpariya 2023 WBT (NT) Dramatized

येसु खिरिस्‍टउम्‍बाक् आब्‍राहाम हिट्‌नुङ् दाउद हाङ्‌बाङाना पुङ्‌लाङिना याप्‌मि डाना॥ नाहि येसु खिरिस्‍टङाना उटुबाठेबाचिगा निङ् नाड्‌डे पारिक् युङ्‌ग्‍वा– आब्‍राहामङाना उइछा इसाहाक, इसाहाकङाना उइछा याकुब, याकुबङाना उइछाचि याहुदा हिट्‌नुङ् उम्‍भु-झान्‍झाचि ओडागा, हिट्‌नुङ् याहुदाङा उइछाचि फारेस हिट्‌नुङ् जाहेर डाचिगा, नागाचिगा उमाङाना उनिङ् तामार ओलोडुए॥ फारेसङाना उइछा हेस्‍रोन, हेस्‍रोनङाना उइछा राम, हिट्‌नुङ् रामङाना उइछा आम्‌मिनादाब, आम्‌मिनादाबङाना उइछा नाहासोन, नाहासोनङाना उइछा साल्‍मोन, हिट्‌नुङ् साल्‍मोनङाना उइछा बोआज लिसे (बोआजङा उमाङाना उनिङ् राहाब), बोआजङाना उइछा ओबेद (ओबेद उमा रुथ लिसे), ओबेदङाना उइछा यिसै, हिट्‌नुङ् यिसैङाना उइछा दाउद हाङ्‌बा लिसे॥
दाउदङाना उइछा सोलोमान लिसे (सोलोमानङाना उमा बेतसेबाम्‍बाक् उरियाहाङाना ओपाङ्‌ढाङ्‌मा डाना), हिट्‌नुङ् सोलोमानङाना उइछा राहाबाम, राहाबामङाना उइछा आबिया, आबियाङाना उइछा आसा, हिट्‌नुङ् आसाङाना उइछा याहोसापात, याहोसापातङाना उइछा याहोराम, याहोरामङाना उइछा उज्‌जियाह, हिट्‌नुङ् उज्‌जियाहाङाना उइछा योताम, योतामङाना उइछा आहाज, आहाजङाना उइछा हिजकिया, हिट्‌नुङ् हिजकियाङाना उइछा मानास्‍से, मानास्‍सेङाना उइछा आम्‍मोन, आम्‍मोनङाना उइछा योसियाह, योसियाहङाना उइछा याकोनियास हिट्‌नुङ् उन्‍ङाना आरु छाचि उलिसे, हिट्‌नागा बेबिलोन देसङि याहुदिचि ओलाबुचिउङ् ओखाट्‌टुचिना बेला नुङ् पाइले ओपोङ्‌सागा डागा॥
हिट्‌नुङ् बेबिलोन देसङि ओखाट्‌टुचिउङ् याकोनियासङाना उइछा सालतिएल पोङ्‌से, हिट्‌नुङ् सालतिएलङाना उइछा यारुबाबेल, हिट्‌नुङ् यारुबाबेलङाना उइछा आबिउद, आबिउदङाना उइछा एल्‍याकिम, एल्‍याकिमङाना उइछा आजोर, हिट्‌नुङ् आजोरङाना उइछा सादोक, सादोकङाना उइछा आखिम, आखिमङाना उइछा एलिउद, एलिउदङाना उइछा एलाजार, एलाजारङाना उइछा मात्‍तान, मात्‍तानङाना उइछा याकुब, हिट्‌नुङ् याकुबङाना उइछा योसेफ लिसे, योसेफउम्‍बाक् मारियामङाना ओयेम्‍बेछा डाना, हिट्‌नुङ् ना मारियामङा डोक् येसु पोङ्‌सुए, उन् डोक् खिरिस्‍ट ओलोडुटु॥
नाड्‌डेउङ् आब्‍राहाम नुङ् दाउद सोम्‍मा चौधा पुस्‍ता लिसे, हिट्‌नुङ् दाउदलाम्‍मा याहुदिचि ओलाबुचिउङ् बेबिलोन ओखाट्‌टुचिगा बेला सोम्‍मा चौधा पुस्‍ता डोक् लियुक्, हिट्‌नुङ् बेबिलोन ओखाट्‌टुचिगा बेलालाम्‍मा खिरिस्‍ट पोङ्‌साना बेला सोम्‍मा चौधा पुस्‍ता डोक् लियुक्॥


येसु खिरिस्‍ट नाड्‌डे पारिक् पोङ्‌से– उमा मारियामङाना भ्‍या लिना रिङ् योसेफलोक् रिङ् उफुडुएसुना, टरो हिट्‌नागाचि भ्‍या लिमा पाइले डोक् मारियाम सेङ्‌सेङ्‌ना हाङ्‌सालाम्‍मा माभोक् खुयुना रिङ् ठाहा लिसे॥ टरो ओयेम्‍बेछा योसेफ धारमोति याप्‌मि लिसानाँ, याप्‌मिचि सोरि मारियाम ओचाफेम्‍मा उलिनि नुङ् सोगोप् नामाना निङ्‌ग्‍वा चोगुए॥ ना रिङ् उनिङ्‌ग्‍वाङि मिट्‌टुएट्‌टुना बेला माङ्‌हाङ् डाङ्‌बाङाना माङ्‌हाङ् रिङ् काउग्‍बा सेम्‍माङ्‌ङि उन् सोरि ठेट्‌टाउङ् नाड्‌डे लोडुए, “हाउ दाउद हाङ्‌बा पुङ्‌लाङिना योसेफ, मारियाम भ्‍या चोक्‍मा किट्‌नेन्, पोङ्‌भोने ओमाभोक्‌ङि लिसाना ओओ सेङ्‌सेङ्‌ना हाङ्‌सालाम्‍मा लिसाना ए॥ उन्‍ङा ठिबाङ् ओओ पोङ्‌सुटु हिट्‌नुङ् हिट्‌नाङा ओयाप्‌मिचि उन्‌चि पापलाम्‍मा हिङुचिचि, हिट्‌नुङ् हिट्‌ना ओओङाना उनिङ् खान्‍ङा येसु युङ्‌सु॥”
टाङ्‌बाङाना माङ्‌काटाङा माट्‌टुना रिङ् उयुयाक् नुङ् डोक् नागा सोब्‍बे रिङ् उलिसे– “खेम्‍सानुम्, ठिबाङ् कान्‍नेए मेन्‍झेमाङा छा खुयुटु हिट्‌नुङ् ठिबाङ् ओओ पोङ्‌सुटु, हिट्‌नुङ् उनिङ् इम्‍मानुएल लियुक्,” इमानुएलङाना उटुप्‍बाक्, “माङ्‌हाङ् आनिलोक् लियुक्॥”
योसेफ उमिॽयुमालाम्‍मा चेन्‍डे, हिट्‌नुङ् टाङ्‌बाङाना माङ्‌हाङ् रिङ् काउग्‍बाङा लोडुना रिङ् गाड्‌डे मारियाम भ्‍या चोगुङ् ओपाङ्‌डाङ्‌मा चोगुए॥ टरो मारियामङा ओओ मिपोङ्‌ङे सोम्‍मा हिट्‌नागाचि एक्‍केउ इम्‍चेट्‌चिन्॥ हिट्‌नुङ् मारियामङा ओओ पोङ्‌सुङ् योसेफङा हिट्‌ना ओओङाना उनिङ् येसु युङ्‌सुबिडुए॥

ያዳምጡ मात्‌ति 1