Yakkha 2023 WBT/NEBS  (NT) Drama

न्‍हाङा येसु फेरि डुङ्‌गाबे थाङाहोङ् तालगा खेप्‍पारिक उङ् वायाना साहारबे लासाआबा॥ न्‍नाबे एकोहिप्‍पाङ् याॽमिचिङा एको पुप्‍साब्‍याना याॽमि नेथामनुङ् येसुगा उयुम्‍बे ङ्‌खुरा॥ ङ्‌खा याॽमिचिगा बिस्‍वास निसुहोङ् येसुङा न्‍ना तुखाबाङ् खाॽला लु, “ओ आनुन्‍छा, साहास चोगा! ङ्‌गा पाप छेमा लेक्‍सामाहा॥”
येसुङा न्‍ना याॽमि खाॽला लुना ङ्‌खेप्‍सुहोङ् धार्मासाप्‍ला चिन्‍खुबा इखिङ्‌ङा उङ्‌चि निङ्‌वाबे खाॽला ङ्‌गाया, “ना गो निङ्‌वाफुमागा बिरुद्‌दाबेॽले चेङ्‌मेॽना!”
येसुङा ङ्‌खाचिगा निङ्‌वाबेॽहा खा चेॽया था तोक्‍तुहोङ् खाॽला लुचि, “इजाङ् न्‍निङ्‌दा खाॽला निङ्‌वाबे इसिॽनुङ् मित्‍वाम्‍घा? इजाङ्‌बाङ्‌निङ् पुप्‍साब्‍याना याॽमि ‘ङ्‌गा पाप छेमा लेक्‍साहा’ लुॽमायेम ‘पोगाघोङ् लामा’ लुॽमा हेॽना च्‍हेन साजिलोना? ङ्‌खाॽनिङ्‌गो सोयानुम, ना ताम्‍दाङ्‌फुमाबे याॽमिगा उच्‍यानुङ् पाप छेमा चोक्‍माहा चोक्‍तोक वेॽहा बाङ्‌ना चेॽया न्‍निङ्‌दा था तोक्‍तानुम॥” न्‍हाङा उङा न्‍ना तुखाबाङ् लु, “हाकु पोगा, न्‍नेथाम खुघोङ् म्‍बाङ्‌बे ख्‍या॥” न्‍हाङ् न्‍ना याॽमि पोगाहोङ् उपाङ्‌बे ख्‍या॥ खाॽलाहा आच्‍चाम्‍माहा काम न्‍निसुहोङ् न्‍नाबेॽहा याॽमिचि ङ्‌गिसिता, न्‍हाङ् याॽमिचि खाॽलाहा साक्‍ति पिखुबा निङ्‌वाफुमागा पार्साम्‍सा न्‍जोगु॥


न्‍नाभाङ् येसु खेॽमास्‍यानिङ् तिरो हुङ्‌माना पाङ्‌बे एको मात्‍ति बाङ्‌ना याॽमि युङामासाना निसु॥ उङा न्‍ना लु, “कानुङ् लामा॥” न्‍हाङ् मात्‍ति पोगाहोङ् येसुगा हेक्‍साङ् लाचोगा॥
मिहेक्‍साङ् मात्‍तिगा पाङ्‌बे येसु नुङ् उका चेलाचि चामा चासे ङ्‌युङानिङ्, प्‍याक तिरो पोक्‍खुबाचि नुङ् हेकोहा पापिचि चा न्‍दायाहोङ् उङ्‌चिनुङ् चामा चासे ङ्‌युङा॥ फारिसिचिङा खा चेॽया न्‍निसुहोङ् येसुगा चेलाचि न्‍लुचि, “इजाङ् न्‍निङ्‌गा चिन्‍खुबाङा च्‍हेन तिरो पोक्‍खुबाचि न्‍हाङ् हेकोहा पापिचिनुङ् सोरि युङ्‌मेहोङ् च्‍वाहा?”
ङ्‌खाचिगा चेॽया खेप्‍सुहोङ् येसुङा लुचि, “न्‍दुगाब्‍यानिन्‍हा याॽमिगा लागि सिधाक्‍राङ्‌बा चाहान्‍जोङ्‌मेन्‍ना, ङ्‌खाॽनिङ्‌गो तुखाबाङ्‌चिगा लागि से चाहाबा चोङ्‌मेॽना॥ ङ्‌खाॽनिङ्‌गो न्‍निङ्‌दा नाभाङ् खेइघोङ् धार्मासाप्‍लाबे छेप्‍ताहा खा चेॽयागा तुम्‍बिला इहा ओम चिन्‍दानि– ‘का पोसुगा बोलि मेन्‍ना, ङ्‌खाॽनिङ्‌गो न्‍निङ्‌दा याॽमिचि दाया चोगुम्‍चिम्‍गानि बाङ्‌ना मिमेङ्‌ना॥’ इजाङ्‌बाङ्‌निङ् का धार्मोतिचि मेन्‍ना, ङ्‌खाॽनिङ्‌गो पापिचि कासे तायाङ्‌ना ओम॥”


न्‍हाङा युहान्‍नागा चेलाचि येसु वायानाबे न्‍दायाहोङ् न्‍छिम्‍दु, “फारिसिचि नुङ् कानिङ् उपाबास युङिॽवाङ्, ङ्‌खाॽनिङ्‌गो इजाङ् ङ्‌गा चेलाचि च्‍हेन उपाबास ङ्‌युङ्‌मेनिन्‍हा?”
येसुङा पोलोवा पिचि, “इना थाङ्‌छेङ्‌गा होक्‍ताबे न्‍दायाहा याॽमिचि थाङ्‌स्‍योङ्‌बा ङ्‌खाचिनुङ् वानुङ् सोम्‍मा सोक चोक्‍साङ् उपाबास ङ्‌युङ्‌मेहायि? ङ्‌खाॽनिङ्‌गो ङ्‌खाॽलाहा लेन चा न्‍दामे, जोबो थाङ्‌स्‍योङ्‌बा ङ्‌खाचिभाङ् फोङ्‌खेमे, ङ्‌खिङ्‌बेला ङ्‌खाचि उपाबास ङ्‌युङ्‌मेहा॥
“इसाङा चा उलिप्‍पा तेक ओछोङा तेक्‍का टालोङा न्‍लेप्‍त्‍वान्‍ना॥ इजाङ्‌बाङ्‌निङ् ओछोङा टालोङा तेक नाघाक्‍स्‍वा, न्‍हाङा तेक झान तुक्‍नुङ् छिङ्‌खेमे॥
“ङ्‌खाॽलामाङ्, इसाङा चा ओछोङा सिम्‍लेॽमाङ्‌गा माध उलिप्‍पाना ह्‌वारिक्‍का खेसुप्‍पे ङ्‌युक्‍स्‍वान्‍हा, युक्‍सुभोङ् चा खेसुप पेङ्‌खेमे न्‍हाङ् सिम्‍लेॽमाङ्‌गा माध चा फोम्‍खेमे॥ ङ्‌खाॽनिङ्‌गो ओछोङा सिम्‍लेॽमाङ्‌गा माध ओछोङा खेसुप्‍पेॽमाङ् युङ्‌माहा॥ ङ्‌खाॽला चोक्‍माभोङ् खेसुप चा म्‍बेङ्‌मेन न्‍हाङ् सिम्‍लेॽमाङ्‌गा माध चा म्‍फोम्‍खेमेन॥”


येसुङा ङ्‌खाचि खा चेॽया लुॽमास्‍यानिङ् एको याहुदि तायेन्‍राङ्‌बा न्‍नाबे तायाब्‍या॥ न्‍हाङ् उङा येसु फोप सेमेसाङ् खाॽला लु, “चिन्‍खुबा, आच्‍या मामु लोप्‍लोप स्‍यामा, ङ्‌खाॽनिङ्‌गो हाङ्‌बा ख्‍याघोङ् तोक्‍तिगाभोङ् उङ् हिङ्‌मेॽना॥”
येसु पोगा न्‍हाङा उका चेलाचिनुङ् न्‍ना याॽमिगा हेक्‍साङ्-हेक्‍साङ् ङ्‌ख्‍या॥
ङ्‌खिङ्‌बेलामाङ् एको एहिच फिम्‍बिलिङ् ओन्‍दाङ् नाहाङ्‌तो हेलि लोन्‍नुङ्‌खुबा बेथाङा याक्‍सुना एको तुखामाङ् येसुगा ओहेक्‍साङ् पोटिन्‍धाङ् तायाहोङ् येसुगा ओतेक्‍का उलाप तोक्‍ति॥ इजाङ्‌बाङ्‌निङ् न्‍ना मामु खाॽला मितामासा “का उका ओतेक से तोक्‍निमा तोक्‍तुङ्‌भोङ्‌चा नुमेङ्‌ना॥” न्‍हाङा येसु हिक्‍साहोङ् सोनिङ् न्‍ना मामु निसुहोङ् उङा लु, “मामु, साहास चोगा॥ ङ्‌गा बिस्‍वासङा न्‍दा नुमेतामागाना॥” न्‍हाङ् ङ्‌खिङ्‌बेलामाङ् न्‍ना मामु नुया॥
न्‍हाङा येसु याहुदि तायेन्‍राङ्‌बागा पाङ्‌बे तासु॥ उङा न्‍नाबे फुलुलुबा मुखुबाचिनुङ् बिलाप चोक्‍खुबा प्‍याक याॽमिचि निसुचि॥ ङ्‌खाचि येसुङा लुचि, “न्‍निङ्‌दा घाक पाखा लोन्‍दाख्‍यानि, इजाङ्‌बाङ्‌निङ् ना मामु न्‍स्‍यामान्‍ना, ङ्‌खाॽनिङ्‌गो इप्‍साख्‍यामाना सेप्‍पा॥” खा चेॽया ङ्‌खेप्‍सुहोङ् ङ्‌खाचिङा ङ्‌युतुचो॥ येसुङा ङ्‌खा याॽमिचि पाखा लोन्‍धाक्‍सुचिहोङ् उङ् पाहोङ्‌बे उया॥ न्‍हाङा न्‍ना मामुगा उमुकपे लाबु, न्‍हाङ् न्‍ना मामु मुथिङ्‌गिरिक पोगा॥ न्‍हाङा खा चेॽया खाम्‍युक भोरि हिसा॥

येसु न्‍नाभाङ् खेॽमास्‍यानिङ् हिप्‍पाङ् मिक्‍सुरुम्‍बाचि उका हेक्‍साङ्-हेक्‍साङ् लाचोक्‍साङ् खाॽला ओक्‍ताचि, “ओ दाउदका उच्‍या, कान्‍चिङ् दाया चोगा॥”
येसु पाङ्‌बे तासुहोङ् पाहोङ्‌बे उया, न्‍हाङ् ङ्‌खा हिप्‍पाङ् मिक्‍सुरुम्‍बाचि चा येसु वायानाबे तायाब्‍याचि॥ येसुङा ङ्‌खाचि छिम्‍दुचि, “इना का न्‍जिङ्‌दा नुमेॽमा यामेॽनेन्‍चिन्‍हा भोङ् बिस्‍वास चोङ्‌मेचुघा?”
ङ्‌खाचिङा लुयाचु, “बिस्‍वास चोङ्‌मेङ्‌चुङ्‌हा, हाङ्‌बा॥”
न्‍हाङा येसुङा ङ्‌खाचिगा मिकपे तोक्‍निसाङ् खाॽला लुचि, “ङ्‌खाॽलाभोङ्, न्‍जिङ्‌दा बिस्‍वास चोगाचुघा लोॽवा लेङ्‌नि॥” न्‍हाङ् ङ्‌खाचि निमा याखुबा लेक्‍साचि! येसुङा ङ्‌खाचि खाॽला लुचि, “खेप्‍साचु, खा चेॽया इसा चा न्‍लुयान्‍चुन्‍चिन॥” ङ्‌खाॽनिङ्‌गो ङ्‌खाचि न्‍नाभाङ् ख्‍याचिहोङ् येसुगा उतुम्‍बे न्‍ना लिङ्‌खाम घाकपे खेम्‍मेताचुचि॥
येसु उका चेलाचिनुङ् न्‍ना ठोङ्‌भाङ् लोङ्‌खेॽमास्‍यानिङ्, याॽमिचिङा इसिॽना मुइङा याक्‍सुहोङ् लेम्‍सुरुम्‍बा लेक्‍साना एको याॽमि येसुगाबे न्‍दा॥ येसुङा न्‍ना याॽमिभाङ् इसिॽना मुइ लोन्‍धाक्‍सुहोङ् सोलोक न्‍ना याॽमि चेक्‍मा तारोक्‍तु॥ खा न्‍निसुहोङ् याॽमिचि आच्‍चाम्‍मा एसाङ् खाॽला कामा न्‍दारोक्‍तु, “खाॽलाहा गो इजिरेलबे हेॽनिङ्‌चा न्‍निसामासान्‍हा॥”
ङ्‌खाॽनिङ्‌गो फारिसिचिङा खाॽला कामा न्‍दारोक्‍तु, “नाङा इसिॽहा मुइचिगा खाङ्‌खाङ्‌बागा साक्‍तिङा इसिॽहा मुइ लोन्‍दाहाक्‍स्‍वाचिहा॥”


येसुङा घाक साहार नुङ् तेनबेॽहा छुम्‍पाङ्‌चिबे चिन्‍साङ्, निङ्‌वाफुमागा राज्‍यागा उतुम्‍बे नुसाला खेम्‍मेतुचि न्‍हाङा घाक खाले तुक्‍मा-छाक्‍माभाङ् याॽमिचि नुमेतुचि॥ उङा न्‍नाबेॽहा प्‍याक याॽमिचि निसुचिहोङ् उनिङ्‌वाबे उलुङ्‌मा तुक्‍तुगेतुचि॥ इजाङ्‌बाङ्‌निङ् ङ्‌खा याॽमिचि गो गोठाला मेॽनिङ्‌हा सामुङ्‌चिङा लाम्‍बु म्‍फाप्‍सिसिना लोॽवा न्‍हाङ् इहाचा चोक्‍मा मेयाखुबा लोॽवा न्‍लेक्‍सामासा॥ न्‍हाङा येसुङा उका चेलाचि लुचि, “सोयानुम, चाचिॽया खोम्‍माहा गो प्‍याक वान्‍ने, ङ्‌खाॽनिङ्‌गो खेतालाचि मिॽयाङ्‌सेॽहाचि॥ न्‍हाङामाङ् न्‍निङ्‌दा चाचिॽयागा ह्‌वाङ्‌बानुङ् चाचिॽया खोम्‍खुबा खेतालाचि पाक्‍साब्‍याभोङ् पार्थाना चोगानि॥”

ያዳምጡ मात्‍ति 9